28
1 I tzun bantz te yi jun tiempaꞌtz nin eꞌ oc yi eꞌ filistey tan molcheꞌn cuꞌn chisanlar tan oyintziꞌ scyeꞌj yi eꞌ xonl Israel. Beneꞌn tzun tlol Aquis tetz Luwiy:—Na loꞌ el atxum tetz yi tajweꞌn yil cxom nin sweꞌj scyuchꞌ yi eꞌ yi xomcheꞌ tzaweꞌj, na nchimben tan oyintziꞌ scyeꞌj yi eꞌ xonl Israel.
2 —Baꞌn bin, iluꞌ jun cꞌoloj wajcawil, list oꞌ. Ej nin jaluꞌ slajluchaxk swutzuꞌ yi mbiꞌtz yi eꞌchk takleꞌn yi baꞌn na chinxcyeꞌ wetz tan banleꞌn, yi in wetz yi in ẍchakumuꞌ, chij Luwiy.
—Ko yaꞌtz, chij Aquis, —cẍocpon waꞌn tetz wiꞌtz cyajcawil yi eꞌ insanlar, yi eꞌ qꞌuicyꞌlom wetz, chij yi rey bantz.
Yi xaꞌkeꞌn Saúl tan jakleꞌn swert tetz jun xnaꞌn aj wutz mes le amaꞌl Endor
3 Ej i tzun bantz nsken tzun el tiemp yi quimleꞌnix wutzileꞌn Samuel, nin cyakil yi eꞌ xonl Israel cyokꞌlej wutz iꞌ. Na nsken wiꞌt mukxij cyaꞌn Ramá, le tnum kale itzꞌeꞌt.a
Ma Saúl nsken el lajul cyakil yi eꞌ aj wutz mes lakak amaꞌl cwent Israel, yi eꞌ yi na choꞌc tan yol scyuchꞌ yi eꞌ almaꞌ taneꞌn.b
4 Ma yi eꞌ filistey, nin eꞌ oc tan chimolcheꞌn cyakil chisanlar, nin tzun eꞌ bentz jalen Sunem kale cweꞌt chicampament tan chibnol list quib tan oyintziꞌ. Ma yi Saúl scyuchꞌ cyakil yi eꞌ xonl Israel choꞌn cweꞌn chicampament tan chibnol list quib wi yi juꞌwtz Gilboa. 5 Ma yi beneꞌn tilol Saúl yi jun cꞌoloj filisteyaꞌtz, nin tzun saj jun chin xoꞌwtz teꞌj. Quiꞌt nin tzun jal walortz tan yi xoꞌw. 6 Toqueꞌn tzuntz tan jakleꞌn tajtzaꞌkl tetz Kataj Ryos, poro qui nin tbit Kataj yol iꞌ. Na quiꞌc jun xtxolbil til Saúl tul wutzicyꞌ nka tan yi Urim.c Nicyꞌt nin yi eꞌ elsanl stziꞌ Ryos quiꞌc jun xtxolbil tal Kataj scyetz tan tbital Saúl. 7 Chaꞌstzun te nin oc iꞌ tan jakleꞌn pawor scyetz yi eꞌ caꞌp ajcaw yi ateꞌ xlaj:
—Chibenkuꞌ tan joyleꞌn jun xnaꞌn yi baꞌn na jilon scyuchꞌ yi eꞌ almaꞌ, na na waj chimben tan jakleꞌn wajtzaꞌkl tuchꞌ, stzun iꞌ scyetz.
—Le aldey Endor at jun xnaꞌn yi baꞌn na xcyeꞌ iꞌ tan yol scyuchꞌ almaꞌ, cheꞌch.
8 Jeꞌn tzun xtxꞌixpul Saúl yi beꞌch tetz, nin oc junt txꞌakaj teꞌj, bantz cyaꞌl tzꞌel xtxum tetz ko iꞌtz yi rey. Nin nsken oc lakꞌbal yi beneꞌn te yi jun xnaꞌnaꞌtz. Xomcheꞌ cob ẍchakum teꞌj yi chibeneꞌn. I tzun jaktz yi toponeꞌn:
—Bneꞌuꞌ pawor swetz tan talcheꞌn tzaj inswert. Nin na waj yil xcyeꞌuꞌ tan tulseꞌn yi almaꞌ yil walnin teruꞌ, chij Saúl.
9 —Cuquen, chij yi xnaꞌn, —na na el xtxumuꞌ tetz yi caꞌwl yi elnak tan yi rey Saúl. Na nin eꞌ el lajuj cyakil yi eꞌ aj wutz mes scyuchꞌ yi eꞌ yi na chijilon scyuchꞌ almaꞌ le katanum Israel. ¿Nxac na tzanuꞌ tan impitleꞌn nin tul jun xtxolbil yi quicunin batz ẍchinquimok taꞌn? chij yi xnaꞌn.
10 —Sak swutz Ryos, chij Saúl —yi quiꞌc jun takleꞌn sbajok teꞌjuꞌ tan paj.
11 —Naꞌ scyetz jun almaꞌ yi na tajuꞌ yil jeꞌul waꞌn tzoneꞌj, chij yi xnaꞌn.
—Baꞌn tzꞌocuꞌ tan ẍchakleꞌn tzaj kꞌajtzun Samuel, stzun Saúl.
12 Jalt cuntunin beneꞌn tilol yi xnaꞌn yi jeꞌn jobtuj Samuel swutz iꞌ, nin tzun ẍchꞌintz tan xoꞌw. I tzun taltz tetz Saúl:
—¿Nxac mmoꞌcuꞌ tan poyseꞌn inwutz? na yi iluꞌ teruꞌ iluꞌ yi rey Saúl.
13 —Quil xobuꞌ, ¿mbiꞌtz ntiluꞌ? chij Saúl.
—Na wil nin jun ryos yi choꞌn na jetzaj tul txꞌotxꞌ, chij yi xnaꞌn.
14 —¿Ẍeꞌn taneꞌn? chij Saúl.
—Iꞌtz jun yaj yi ja tijin cꞌuꞌl, nin at jun xbuꞌk teꞌj kul, chij yi xnaꞌn.
Jalcunin tzun teleꞌn xtxum Saúl tetz yi iꞌtz Samuel, nin tzun cuꞌ mejloktz jalen yi cweꞌn poneꞌn yi plaj wuxtxꞌotxꞌ. 15 I tzun tal Samuel:
—¿Nxac na cẍtzan tan inxuxeꞌn, tan wuleꞌn junt tir tzoneꞌj wuxtxꞌotxꞌ? chij Samuel.
—Wiꞌnin na chimbisun, na uleꞌn ateꞌt yi eꞌ filistey tan oyintziꞌ skeꞌj, nin quiꞌc Kataj Ryos xomij sweꞌj. Nin quiꞌct jun xtxolbil nak tal tzaj swetz cyakꞌun yi eꞌ elsanl stziꞌ, nka tul wutzicyꞌ. Chaꞌstzun te ja cuꞌ inwutz tan tulseꞌnuꞌ junt tir, tan tloluꞌ swetz yi mbil tzimban, chij Saúl.
16 Stzaꞌwel tzun Samuel:
—Yi ko ja cẍcyaj cyen coliꞌn tan Ryos, nin ko ja oc iꞌ contriꞌn tzaweꞌj, ¿nxac tzun na cẍtzan tan jakleꞌn awajtzaꞌkl swetz? 17 Ja wiꞌt el kꞌab Ryos teꞌj yi eꞌchk xtxolbil yi tal iꞌ swetz tan walol tzatz, yi jun cuꞌn sbajok tzaweꞌj. Ma jaluꞌ, ja wiꞌt el majol yi caꞌwl takꞌab nin ja wiꞌt takꞌ tetz yi atanum Luwiy.d 18 Yaꞌstzun sbajok tan paj yi qui nin cẍoꞌc cꞌulutxum jakꞌ caꞌwl Kataj, na qui nin cẍoꞌc tan chibiyleꞌn cuꞌn yi eꞌ amalecita.e Chaꞌstzun te yaꞌtz mban xtxumuꞌn iꞌ tzaweꞌj jaluꞌ. 19 Nin nkꞌeꞌtz ntinaꞌtz na eklen tzꞌocpon Ryos tan chijatxleꞌn nin cyakil yi eꞌ xonl Israel ẍchikꞌab yi eꞌ filistey. Ej nin cẍquimok ekl scyuchꞌ yi eꞌ acyꞌajl. Nchaꞌtz stkꞌeꞌ Kataj amaꞌl tan chicweꞌn yi eꞌ sanlar Israel ẍchikꞌab yi eꞌ filistey, chij Samuel.
20 Yi tbital Saúl yi yolaꞌtz, jalt cuntunin tajeꞌn cutxpuj wuxtxꞌotxꞌ. Ninin txꞌakxij xtxumuꞌn tan paj yi nin xob yi tbital yi yol Samuel. Yaꞌstzun ban, poro nkꞌeꞌtz ntin tan xoꞌw, ma na tan paj yi qui nin wan iꞌ te jun kꞌejaꞌtz tu yi jun akꞌbalaꞌtz. 21 Yi tilol yi xnaꞌn yi wiꞌnin lucneweꞌn Saúl tan xoꞌw, nin tzun taltz tetz:
—Yi in wetz in ẍchakumuꞌ nin ja imban taneꞌn yi tajbiluꞌ. Na ja el intxum tetz yi at quimichil tuchꞌ yi tajbiluꞌ, poro ja imban taneꞌn yi caꞌwluꞌ. 22 Chaꞌstzun te tbiteꞌuꞌ inyol, swakꞌeꞌ muꞌẍ waꞌuꞌ, tan jaleꞌn waloruꞌ tan xoꞌn.
23 Poro yi Saúl qui nin kloꞌ na taj lwan, poro yi ẍchakum tu yi xnaꞌn nin eꞌ ban puers tan xtxꞌixpeꞌn tajtzaꞌkl. Chaꞌstzun te nin jeꞌ sicyꞌol tibtz wuxtxꞌotxꞌ, nin coyeꞌeꞌntz wi jun txꞌach. 24 Ma yi xnaꞌn nin oc tan biyleꞌn cuꞌn jun neꞌẍ wacẍ nin octz tan banleꞌn cobox pam yi quiꞌc xtxꞌamil. 25 Yi bnixeꞌn nin tzun bentz tan takꞌleꞌn tetz Saúl scyuchꞌ yi cob yi xomcheꞌ teꞌj. Yi wiꞌt chibnixeꞌn nin tzun eꞌ tziwun cyentz tetz yi xnaꞌnaꞌtz. Nin te iteꞌn nin akꞌbalaꞌtz chipakxeꞌntz.