Yi toponeꞌn Luwiy le chitanum yi eꞌ filistey
27
1 Poro ilen nin na tal Luwiy tcꞌuꞌl cuntuꞌ: “Aloꞌ nin kꞌejil xcyeꞌ Saúl tan imbiyleꞌn cuꞌn. Chaꞌstzun te yi mas balaj iꞌtz yil chimben ojkuj le chitanum yi eꞌ filistey, bantz quiꞌt tzꞌoc Saúl tan inxuxeꞌn, nin bantz quiꞌt tzꞌojkel iꞌ beneꞌn tziꞌn Israel tan intzꞌamleꞌn. Na kol chimben joylaj nelpon tzuntz liwr tkꞌab,” chij Luwiy. 2 Ej nintzun eꞌ ben Luwiy scyuchꞌ yi kak cient yi xomij chiwiꞌ teꞌj, tan cyoqueꞌn jakꞌ caꞌwl yi rey Aquis cwent yi tnum Gat. Yi Aquisaꞌtz iꞌ cyꞌajl Maoc. 3 Choꞌn tzun chinajeweꞌn Luwiytz scyuchꞌ yi eꞌ tetz sanlar tu chinajal le amaꞌl Gat kale na cawuneꞌt yi rey Aquis. Nin eꞌ xom nin yi cob txkel Luwiy teꞌj, Ahinoam yi aj Jezreel tu Abigail yi txkelbeꞌn kꞌajtzun Nabal yi aj Carmel.4 Ma yi tbital Saúl yi nin ben ojkuj Luwiy jalen le tanum yi rey Aquis, quiꞌt tzun octz tan joyleꞌn.
5 Ej i tzun tal Luwiy tetz yi rey Aquis:
—Iluꞌ jun cꞌoloj rey Aquis ko ja kꞌukeꞌ cꞌuꞌluꞌ sweꞌj jaluꞌ, bneꞌuꞌ pawor swetz tan takꞌleꞌn amaꞌl sketz tan kanajeweꞌn le junt amaꞌl tul yi tanumuꞌ. Na qui na yub yi kol kaꞌtij tul yi tnum kale najleꞌtuꞌ, na yi oꞌ ketz oꞌ tuꞌ ẍchakumuꞌ, chij Luwiy.
6 Te iteꞌn nin kꞌejaꞌtz nin tal Aquis tetz Luwiy tan chibeneꞌn tan najeweꞌn le jun aldey yi na biꞌaj Siclag. Nin tan paj yi choꞌn taꞌteꞌn Luwiy le jun amaꞌlaꞌtz chaꞌstzun te yi amaꞌl Siclag choꞌn at tcwent Judá jaluꞌ.
7 Jun tzun yob tu cyaj xaw eꞌ aꞌtij Luwiy le amaꞌl cwent yi eꞌ filisteyaꞌtz. 8 Nin na benak iꞌ scyuchꞌ yi eꞌ yi xomcheꞌ teꞌj tan majleꞌn chitakleꞌn yi eꞌ yi najlcheꞌ lakak amaꞌl cwent Gesur tu Gezer nin le eꞌchk amaꞌl cwent chitanum yi eꞌ xonl Amalec, yi ateꞌ-tz cweꞌn tziꞌn.a Nchaꞌtz na benak iꞌ tan majleꞌn eꞌchk takleꞌn lakak amaꞌl yi na xeꞌtnin jalen Telaim, xlaj cuꞌn yi amaꞌl tzꞌinunin tuꞌ cwent Beerseba, nin yi na icyꞌak lakak amaꞌl cwent Shur jalen yi na ocpon te mojom tu Egipto. 9 Yaꞌstzun amaꞌl kale na oqueꞌt-tz tan chibiyleꞌn wunak, quiꞌc nin jun najk itzꞌij cyen taꞌn, ma na yaj loꞌtz, xnaꞌn loꞌtz, nitxaꞌ loꞌtz tircuꞌn na chiquim taꞌn. Nin na tetzaj eꞌchk awun chi taneꞌn cneꞌr, wacẍ, buruꞌ tu eꞌchk camey, nicyꞌt nin eꞌchk beꞌchok na chicyꞌaj nin. Ej nin tzun na pakxij junt tirtz Siclag yi amaꞌl cwent yi rey Aquis.
10 Poro i tzun yi na jak yi rey tetz: “¿Mbi tnumil ncxaꞌk tan xiteꞌn cuꞌn jaluꞌ?” “Choꞌn nxnaꞌk cweꞌn tziꞌn cwent Judá,” stzun Luwiy na ban. Koꞌk na tal: “Choꞌn nxnaꞌk cweꞌn tziꞌn yi amaꞌl Jerameel.” Koꞌk na tal: “Choꞌn nxnaꞌk cweꞌn tziꞌn le chi amaꞌl yi eꞌ quenita,” stzun Luwiy na bantz tetz yi rey. Qui na tal iꞌ ko iteꞌn nin yi eꞌ filistey yi oc iꞌ tan chixiteꞌn cuꞌn.
11 Cyaꞌl nin jun wunak na itzꞌij tkꞌab Luwiy. Quiꞌc na ban ko yaj nka xnaꞌn, na yi tajbil Luwiy iꞌtz tan qui toponeꞌn stziblal twiꞌ yi rey Aquis jalen Gat. I nin tunin tzun bantz te cyakil tiemp yi taꞌteꞌn ẍchixoꞌl yi eꞌ filistey. 12 Ma yi rey Aquis nin tzun kꞌukeꞌ cꞌuꞌltz te yi yol yi na tal cyen Luwiy tetz. Nin je na xtxum tcꞌuꞌl cuntuꞌ: “Wiꞌ nin na chiꞌch chicꞌuꞌl yi eꞌ tanum Luwiy te jaluꞌ. Nin tan yi xtxolbilaꞌtz tzꞌocpon tetz inchakum tetz cyakil tiemp,” chij yi rey Aquis bantz tcꞌuꞌl cuntuꞌ.