Yi tlol Luwiy yi quiꞌc cuj tan cweꞌn biyol Saúl
26
1 I tzun bantz yi eꞌ aj Zip choꞌn tzun chibeneꞌn Gabaa tan yol tu Saúl, i tzun cyaltz:—Yi Luwiy choꞌn na tew tiba wi jun juꞌwtz yi na biꞌaj Haquila, swutz cuꞌn yi amaꞌl yi tzꞌinunin tuꞌ, cheꞌch.
2 Beneꞌn tzun Saúl scyuchꞌ ox mil wiꞌtz aj oyintzinl cwent Israel, nin choꞌn chibeneꞌn le amaꞌl yi tzꞌinunin tuꞌ cwent Zif tan joyleꞌn Luwiy. 3 Yi toqueꞌn akaleꞌn, choꞌn tzun chicyajeꞌn cyentz wi jun juꞌwtz cwent Haquila nakaꞌjil yi beꞌ yi na icyꞌ cuꞌntz le amaꞌl yi tzꞌinunin tuꞌ. Ma yi Luwiy choꞌn at le amaꞌl yi tzꞌinunin tuꞌ, nin el xtxum tetz yi xomij Saúl tan stzꞌamleꞌn kloꞌ jalen le jun amaꞌlaꞌtz. 4 Chibeneꞌn tzun ẍchakol cobox xkꞌukwil tan joyleꞌn yi amaꞌl kale oponeꞌt cyen Saúl. 5 Yi teleꞌn xtxum tetz, nintzun ben iꞌ-tz le jun amaꞌlaꞌtz kale eꞌ witeꞌt Saúl, nin tzun tech wutz yi amaꞌl kale na witeꞌt Saúl tu Abner yi wiꞌtz cyajcawil sanlar, yi cyꞌajl Ner. Nin ben tilol yi choꞌn witeꞌn Saúl nicyꞌal yi amaꞌl kale na chiwiteꞌt cyakil yi eꞌ mas sanlar. 6 Toqueꞌn tzun Luwiy tan yol scyetz Ahimelec yi hitita tu Abisai, yi tal naꞌ Sarvia yi titzꞌun Joab, i tzun jaktz scyetz:
—¿Naꞌ scyetz jun tzitetz yi list tan xomeꞌn nin sweꞌj jalen le amaꞌl kale na chiwiteꞌt, nin tan kocomponeꞌn kale na witeꞌt Saúl?
—List wutaneꞌn taꞌ. Baꞌn tzinxomnin teꞌjuꞌ, tzun Abisai bantz.
7 Ej te iteꞌn nin akꞌbalaꞌtz eꞌ ben Luwiy tu Abisai jalen te yi amaꞌl kale na chiwiteꞌt Saúl. Choꞌn na wit Saúl ẍchinicyꞌal cyakil yi eꞌ sanlar. Ej nin nakaꞌjil yi witzꞌ iꞌ txiclij yi lans tul txꞌotxꞌ. Ma Abner scyuchꞌ yi eꞌ mas sanlar choꞌn chiwiteꞌn solteꞌj iꞌ.
8 —Ja takꞌ Ryos amaꞌl tzatz tan cweꞌn abiyol yi acontr, baꞌn yi nink tzawakꞌ amaꞌl swetz tan biyleꞌn cuꞌn. Nin iteꞌn nin yi tetz lans baꞌn xcon waꞌn tan xuyleꞌn nin wutz cꞌuꞌl jalen yi tzꞌicyꞌpon tul txꞌotxꞌ. Junit tkuj tzꞌel cuꞌn swutz, stzun Abisai bantz tetz Luwiy.
9 —Quil tzaban yi jun ajtzaꞌklaꞌtz, chij Luwiy, —na alchok scyetz yi ntin tzꞌoc tan xtxumleꞌn tan biyleꞌn cuꞌn yi rey, yi ja jeꞌ xtxaꞌol Kataj, tzꞌocpon cawseꞌn teꞌtz. 10 Sak cuꞌn swutz Ryos, na ntin iꞌ at caꞌwl tkꞌab tan ticyꞌleꞌn nin talmaꞌ jun yil tzꞌopon oril. Quiꞌc na ban yi ko iꞌtz tan yaꞌbil nka tul oyintziꞌ. 11 Nink tzꞌoc Ryos tan inmakleꞌn kol tzintxum tan biyleꞌn cuꞌn yi rey yi txaꞌij taꞌn. Ntin cyꞌajtzaj yi lans yi txiclij xlaj yi witzꞌ, tu cuꞌlbil tcꞌaꞌ, nin keꞌlken ẍchixoꞌl, chij Luwiy.
12 Ej yaꞌtz nin bantz nin ben tcyꞌal Luwiy yi lans tu yi cuꞌlbil aꞌ yi at xlaj witzꞌ Saúl, nin eꞌ eltz. Cyaꞌl nin tzun jun eꞌ iꞌlontz, nin cyaꞌl jun tbit yi quicyꞌeꞌn cuꞌn ẍchixoꞌl. Na nin oc bow chiwatl tan Kataj Ryos. 13 Ticyꞌeꞌn tzun Luwiy jalaj cyꞌen yi jocoꞌjaꞌtz, nin tzun txcyeꞌ eltzajtz wi jun juꞌwtz. Nin nim yi amaꞌl yi at ẍchixoꞌl. 14 Ẍchꞌineꞌn nin tzun Luwiy tan cꞌaseꞌn Abner scyuchꞌ yi eꞌ mas sanlar:
—¡Abner elk awatl!
Teleꞌn tzun watl Abner:
—¿Mbi ekaꞌn awaꞌn yi na cẍtzan tan cꞌaseꞌn yi kareyil? chij Abner.
15 I tzun saj stzaꞌwel Luwiy:
—¿Nkꞌeꞌtz peꞌ i aẍaꞌtz yi jun yaj yi cyaꞌl jun skaxoꞌl yi oꞌ xonl Israel yi niꞌcuꞌnk tzꞌaknakil yi tajtzaꞌkl chitaneꞌn yi teruꞌ? ¿Ẍeꞌn tzun yi qui maꞌw qꞌuicyꞌleꞌn yi rey awaꞌn? Na at jun yi ja ocpon tzixoꞌlwok nin yi tajbil iꞌ iꞌtz tan biyleꞌn cuꞌn kloꞌ yi rey. 16 Qui na yub awajtzaꞌkl, na cẍtzan tan qꞌuicyꞌleꞌn yi rey taneꞌn. Poro sak swutz Ryos na yi itetz icaws iꞌtz yi quimichil, na qui na cxtzan tan qꞌuicyꞌleꞌn yi rey, yi txaꞌijt tan Ryos tan cawuneꞌn. ¡Ma jaluꞌ, ko chin list nin aẍ joyaj yi lans yi rey tu yi jun tal xaruꞌ aꞌ yi at xlaj yi witzꞌ, ko pel jal awaꞌn! stzun Luwiy banintz.
17 Yi teleꞌn xtxum Saúl tetz yi iꞌtz Luwiy yi na ẍchꞌin tzaj, i tzun ben tlol:
—¿Poro aẍ bin loꞌ Luwiy, aẍ jun cꞌoloj witzꞌun, yi na cẍjilon tzaj? stzun Saúl.
—Iluꞌ jun cꞌoloj wajcawil, i inaꞌtz, chij Luwiy. 18 —¿Mbi tzuntz na tzanuꞌ tan joyleꞌn puntil tan weleꞌn cuꞌn swutz na yi in wetz in tuꞌ jun ẍchakumuꞌ? ¿Mbiꞌtz ncuꞌ injuchul swutzuꞌ? ¿Mbiꞌtz yi impaj intxꞌokꞌbeꞌn teruꞌ? 19 Iluꞌ jun cꞌoloj wajcawil, tbit tzajuꞌ inyol: Yi ko iꞌtz Kataj Ryos mmakꞌon amaꞌl tan toqueꞌnuꞌ tan imbiyleꞌn cuꞌn, nink cutzaj xtxumuꞌn iꞌ, tan jun intxꞌixwatz yi swoyeꞌ tetz. Poro ko iꞌtz cyajtzaꞌkl tuꞌ cobox wunak, nink tzꞌoc Kataj tan chicawseꞌn cunin tan yi jun cyajtzaꞌklaꞌtz. Na na chitzan tan inlajeꞌn len le amaꞌleꞌj, yi iꞌtz luwar Kataj Ryos. Na tan yi xtxolbilaꞌtz na chitzan tan impitleꞌn nin tan woqueꞌn tan lokꞌeꞌn chiwutz junt txꞌakaj ryos. 20 Nkꞌeraꞌtz wetz wajbil tan inquimeꞌn le chiꞌamaꞌl awer nak joylaj, yi nkꞌeraꞌtz tanum Kataj. Poro yi iluꞌ teruꞌ, yi iluꞌ inreyil, niꞌcuꞌntz chi najk tzanuꞌ tan injoyleꞌn chitaneꞌn jun cyꞌak, nin na tzanuꞌ tan injoyleꞌn xoꞌlak wutz chi ink jun tzꞌichinb tuꞌ, chij Luwiy banintz.
21 Ej i tzun tal Saúl:
—¡Luwiy, aẍ jun cꞌoloj witzꞌun, jun cuꞌn na el intxum tetz yi ja injuch wil! Na chin chꞌinchꞌuj nin tunin in te yi wajtzaꞌkl yi chin juntlen nin. Na el intxum tetz yi ja chinxubsij. Poro quil cẍeꞌl ojkuj, na quiꞌt noꞌc tan joyleꞌn puntil tan aloꞌonseꞌn, na ja wiꞌt achaj swetz jaluꞌ yi na awakꞌ inkꞌej, na qui nin nchincuꞌ abiyol, stzun Saúl tetz.
22 Beneꞌn tzun stzaꞌwel Luwiy:
—Je yi lansuꞌeꞌj, iluꞌ jun cꞌoloj wajcawil. Baꞌn tzꞌul jun mosuꞌ tan ticyꞌleꞌn nin. 23 Na na el intxum tetz yi Kataj Ryos tzꞌakꞌon kabanl yi oꞌ yi na kakꞌ kib tan banleꞌn yi tetz tajbil, nin yi na kabuch kib tan qꞌuicyꞌleꞌn yi kareyil. Yi jaluꞌ ja takꞌ Kataj Ryos amaꞌl swetz tan biyleꞌn cuꞌnuꞌ, poro qui nin micyꞌ tincꞌuꞌl tan imbnol, na iluꞌ bixbaꞌnt tan Ryos tetz wiꞌtz kareyil. 24 Chi yi mimban wetz jaluꞌ, yi qui nin mintxum tan biyleꞌn cuꞌnuꞌ, iteꞌn nink sban Kataj Ryos sweꞌj, nink lchincol, nin quiꞌk ltakꞌ iꞌ sotz cꞌuꞌlal swetz, chij Luwiy.
25 —¡Luwiy, aẍ jun cꞌoloj witzꞌun, takꞌ tzaj Kataj banl tzawibaj! ¡Sbnixok wiꞌnin eꞌchk takleꞌn balaj awaꞌn, nin chumbalaj nin sbneꞌ cyakil! chij Saúl banintz tetz Luwiy.
Yi bajijeꞌn cyakil yi xtxolbilaꞌseꞌj, nin tzun pakxij Saúl xe tetz najbil. Ma tetz Luwiy, nin tcyꞌajt iꞌ yi tetz beꞌ.