Yi quimeꞌn wutzileꞌn Samuel
25
1 Ej i tzun bantz, quimeꞌn nin tzun ban wutzileꞌn Samuel. Ej nin cyakil cunin tzun yi eꞌ xonl Israel chimol quibtz tan mukleꞌn. Wiꞌnin cyokꞌeꞌn tan bis. Choꞌn mukxeꞌn cyaꞌn le tnum Ramá le tetz luwar kale najeweꞌt. Ma Luwiy nin ajtz le amaꞌl tzꞌinunin tuꞌ cwent Parán, tan ew ib.Yi xtxolbil tetz Luwiy tu Abigail
2 Ej i tzun bantz, at jun yaj yi chin ric nin iꞌ, yi choꞌn najlij le tnum Maón cwent Judá. At ox mil cneꞌr tuchꞌ tu jun mil chiw, nin aj lijens iꞌ le tnum Carmel, kale na oqueꞌt tan cꞌapleꞌn len xiꞌil yi eꞌ tawun tan cꞌayeꞌn. 3 Yi yajaꞌtz, Nabal biꞌ. Nin iꞌ jun xonl kꞌajtzun Caleb. Yi jun Nabalaꞌtz iꞌtz jun yaj yi chin macleꞌn nin, nin chin tzeꞌtzuj nin te talmaꞌ. Ma Abigail, yi txkel, iꞌtz jun xnaꞌn yi chin yubeꞌn nin, nin chin list nin.
4-5 Ej i tzun te yi at pon Luwiy le amaꞌl yi tzꞌinunin tuꞌ, nin tzun tbit iꞌ stziblal yi choꞌn at Nabal le tnum Carmel tan telseꞌn xiꞌil cneꞌr. Beneꞌn tzun ẍchakol lajuj ẍchakum tan xajseꞌn Nabal nin tan talcheꞌn jun yos tetz. 6 Ej nin je yi xtxolbileꞌj yi tal Luwiy scyetz tan cyalol tetz Nabal: “Iluꞌ jun cꞌoloj wajwutz, jun yos tetz teruꞌ tuml txkeluꞌ nin scyetz cyakil yi eꞌ xonluꞌ. 7 Ja imbit stziblal yi na akꞌujuꞌ tan telseꞌn xiꞌil yi eꞌ tawunuꞌ. Nchaꞌtz na el xtxumuꞌ tetz yi cyaꞌtweꞌn yi eꞌ pstoruꞌ le amaꞌl Carmel te yi atoꞌ tzaj ketz le jun amaꞌlaꞌtz, nin qui nin nkoꞌc tan chixuxeꞌn nka tan majleꞌn len jun tawunuꞌ scyetz. 8 Nin baꞌn sjakuꞌ yi xtxolbilaꞌtz scyetz yi eꞌ mosuꞌ, nin scyaleꞌ yi yaꞌstzun bintzij. Chaꞌstzun te na waj lwal teruꞌ yi iteꞌn nink iꞌaꞌs sbanuꞌ scye yi eꞌ wetz inchakum yi ja chopon swutzuꞌ, nink takꞌuꞌ yi mbiꞌtz yil saj buꞌk te cꞌuꞌluꞌ sketz, na niꞌcuꞌn chi iluꞌ-k intaj taneꞌn.” Cxchijwok sban tetz.
9 Eꞌ beneꞌn tzun yi eꞌ ẍchakum Luwiy nin yi cyoponeꞌn, i nin tzun oc chitxoliltz chi yi ben alij scyetz, nin tzun chichꞌiwantz. 10 Poro je tal Nabaleꞌj:
—¿Naꞌ scyetz iꞌ yi jun Luwiyaꞌtz? ¿Naꞌ scyetz iꞌ yi jun cyꞌajl Isaí-aꞌtz? ¡Na at wiꞌnin esclaw jaluꞌ yi na cheꞌl ojkuj swutz chipatrón! 11 ¿Baꞌn ptzun kol woy nin chiwaꞌ tu quicꞌaꞌ tu chichib yi eꞌ wetz inmos tetz chiwaꞌ cobox wunak yi qui wajskeꞌn chiwutz? chij Nabal scyetz.
12 Yi quibital yi eꞌ ẍchakum Luwiy yi xtxolbilaꞌtz, nin tzun eꞌ cuꞌ-t tbeꞌ tan chipakxeꞌn. Ma yi cyoponeꞌn te Luwiy nin tzun baj cyen chitxolil tetz, cyakil yi mbi cuꞌn tal Nabal scyetz. 13 Jeꞌn tzun lajpuj wiꞌ-tz Luwiy, nin tzun cawunintz scyetz yi eꞌ yi ateꞌ jakꞌ caꞌwl:
—¡Banwok list itib tu imaꞌcl tan oyintziꞌ! chij iꞌ.
Toqueꞌn tzun chicꞌalol chispartz xe chicꞌuꞌl. Nchaꞌtz ban tetz Luwiy. Cyaj tzun cient chixoneꞌn eꞌ xom nintz teꞌj, nin cob cient eꞌ cyaj cyen tan qꞌuicyꞌleꞌn yi amaꞌl kale atit chicampament. 14 Poro at tzun jun mos Nabal nin bentz tan talcheꞌn tetz Abigail yi mbi ben tlol Nabal scyetz yi eꞌ ẍchakum Luwiy:
—Max cꞌuꞌluꞌ naꞌ, poro yi Luwiy ja saj ẍchakol cobox ẍchakum tan talcheꞌn jun yos tetz kapatrón. Poro nin nsaj colpuj wiꞌ scyeꞌj. 15 Na yi eꞌ yajaꞌtz chumbalaj nin eꞌ ban skeꞌj te yi tiemp yi kaꞌteꞌn tan pstoreꞌn awun ẍchinakaꞌjil. Quiꞌc jun tir jajk choꞌc tan kaxuxeꞌn nin quiꞌc jun takleꞌn mmeꞌl chimajol sketz. 16 Ma na skꞌejl tu lakꞌbal nchoꞌc tan kacolcheꞌn. 17 Poro tan paj yi wiꞌnin macleꞌn yi chmiluꞌ nin chin xoꞌwbil nin yi tajtzaꞌkl, qui tzun na tbit yol jun. Baꞌnt cuꞌn tzun nink xtxumuꞌ chan yi mbil sbanuꞌ, na jun cuꞌn tzꞌul jun chin il ẍchiwutzuꞌ tan paj yi tajtzaꞌkl yi chmiluꞌ, chij yi mos bantz tetz Abigail.
18 Lajkeꞌl nin tzun beneꞌn Abigail tan wekleꞌn cuꞌn cob cient pam tu cob tzꞌuꞌm win, oꞌ cneꞌr yi boxijt, nin caꞌwunak liwr ixiꞌn triw woyiꞌnt, nin jun cient tort yi wutz uva cuꞌn yi skejt, nin cob cient tort wutz ibẍ cuꞌn yi nternin skejt. Nin tzun jeꞌ nin tircuꞌn yi wajaꞌtz taꞌn teꞌjak buruꞌ. 19 I tzun taltz scyetz yi eꞌ mos:
—Baꞌn cxbajxijwok scyuchꞌ yi buruꞌ, na chinxomokt nin wutz icoc junt kujt nin, chij Abigail.
Qui nin tzun tal stziblaltz tetz chmil, te cyakil yi na bajij. 20 Choꞌn tzun jeꞌn nintz tib jun buruꞌ, nin ewun cuntuꞌ teleꞌntz swutz yi chmil. Nin tzun eꞌ sajtz chicyakil licuꞌnak tzaj tziꞌn. Ej nin tzun ben tiloltz yi jeꞌn pon ateꞌt Luwiy tu jun cꞌoloj yaj. Beneꞌn nin tzun ban Abigail tan chicꞌulcheꞌn.
21 Ma tetz Luwiy te yi na xon tbeꞌ, tuleꞌn txꞌakxtz tcꞌuꞌl yi iꞌtz tan chaꞌtz tuꞌ yi cyoqueꞌn tan chicolcheꞌn yi eꞌ pstor Nabal le amaꞌl tzꞌinunin tuꞌ, nin yi quiꞌc jun takleꞌn el chimajoltz. Chin ploj nin ban Nabal na qui nin takꞌ xel yi pawor yi ban Luwiy tetz. Yaꞌstzun na icyꞌtz tcꞌuꞌl, te yi na chixon tbeꞌ. 22 Chaꞌstzun te bixeweꞌn jun yol Luwiy taꞌn: “¡Nink tzꞌoc Kataj Ryos tan incawseꞌn cunin ko ek jalchan quil quim nocx Nabal waꞌn, scyuchꞌ cyakil yi eꞌ yaj yi choꞌn ateꞌ cwent iꞌ!” stzun iꞌ bantz.
23 Ma yi sajeꞌn tilol Abigail yi Luwiy, nintzun cuꞌ tzajtz wi buruꞌ nin tzun cuꞌ mejloktz jalen yi cweꞌn poneꞌn yi wutz plaj wuxtxꞌotxꞌ tan takꞌleꞌn keꞌj Luwiy. 24 Nin tzun opon ẍkansal tibtz swutz iꞌ:
—¡Iluꞌ jun cꞌoloj ajcaw, baꞌn tzꞌocuꞌ tan incawseꞌn wetz chi ink yi mero aj paj! Poro max cꞌuꞌluꞌ nink takꞌuꞌ amaꞌl swetz tan tbiteꞌn inyol. Nink takꞌuꞌ amaꞌl swetz tan lajluchaxeꞌn yi xeꞌ yi xubseꞌneꞌj. 25 Quil xtxumuꞌ yi yol Nabal yi ntal teruꞌ, na quiꞌc muꞌẍ tajtzaꞌkl at. Niꞌcuꞌn yi tajtzaꞌkl iꞌ tu yi mbi na elepont yi biꞌ. Na chin yab nin iꞌ. Yi in wetz yi in mosuꞌ qui nin wil chiwutz yi eꞌ ẍchakumuꞌ yi cyoponeꞌn tan jakleꞌn jun oy tetz yi wuchmil. 26 Poro ntyoẍ tetz Kataj yi qui nin ntakꞌ iꞌ amaꞌl tan tuleꞌnuꞌ tzoneꞌj tan chibiyleꞌn wunak, nin tan ticyꞌsaluꞌ cꞌuꞌluꞌ teꞌj. ¡Lok takꞌ Kataj chicaws yi eꞌ contruꞌ scyuchꞌ cyakil yi eꞌ yi na chijoy puntil tan biyleꞌn cunuꞌ! Nink chitij yi caws yi stijeꞌ Nabal. 27 Na cuꞌ inwutz swutzuꞌ tan stzꞌamoluꞌ cyakil yi oy yi cyꞌaꞌn waꞌn, tan jatxoluꞌ ẍchixoꞌl yi eꞌ sanlaruꞌ yi xomcheꞌ teꞌjuꞌ. 28 Lok cuyuꞌ impaj, yi in wetz yi in tuꞌ jun mosuꞌ. Jun cuꞌn yol stkꞌeꞌ Ryos yi caꞌwl tkꞌabuꞌ cyuml yi eꞌ xonluꞌ sbneꞌ opon tunintz, na yi iluꞌ teruꞌ na takꞌ tibuꞌ tan xconeꞌnuꞌ tetz Kataj Ryos. Chaꞌstzun te quiꞌk jun il tzꞌul swutzuꞌ sbneꞌ opon tunintz. 29 Na kol tzꞌoc jun tan joyleꞌn puntil tan biyleꞌn cunuꞌ, quil loꞌonuꞌ taꞌn, na at Ryos tan qꞌuicyꞌleꞌnuꞌ. Ma yi eꞌ contruꞌ tzꞌocpon Ryos tan chijoꞌleꞌn len, chi na oc jun tan cꞌoxleꞌn cꞌub tan jun cꞌoxl. 30 Chaꞌstzun te yil tzꞌel cuꞌn Ryos te yi eꞌchk takleꞌn yi sukiꞌnt taꞌn teruꞌ, nin yil tzꞌocuꞌ tetz rey skibaj yi oꞌ xonl Israel, chumbalaj nin yi quil bisunuꞌ tan tuꞌ yi mmoꞌcuꞌ tan chibiyleꞌn yi eꞌ yi quiꞌc cyetz quil. 31 Nin quil bisunuꞌ tan paj yi jajk ticyꞌsajuꞌ cꞌuꞌluꞌ scye yi contruꞌ. Nchaꞌtz yil jal kꞌejuꞌ, nink nuꞌl txꞌakx tcꞌuꞌluꞌ, yi in wetz yi in tuꞌ mosuꞌ, stzun Abigail tetz Luwiy.
32 —Chumbalaj nin kaRyosil yi oꞌ xonl Israel, yi nsaj ẍchakol aẍ tan inmakleꞌn. 33 Nin takꞌ tzaj iꞌ banl tzawibaj tan yi balajil awajtzaꞌkl. Na ja cxcyeꞌ tan makleꞌn inwutz tan qui imbeneꞌn tan chibiyleꞌn wunak yi quiꞌc quil, nin ja amak inwutz tan qui wicyꞌsal incꞌuꞌl scyeꞌj. 34 Poro jun cuꞌn na wal nin tzatz tan biꞌ Kataj, yi kaRyosil yi oꞌ xonl Israel, yi ja xcyeꞌ iꞌ tan makleꞌn inwutz tan qui aloꞌoneꞌn waꞌn. Na yi quiꞌk ncẍuꞌl chan lajkeꞌl tan makleꞌn inwutz, chwaꞌnin kloꞌ eklen quiꞌct jun xonl Nabal yi itzꞌeꞌtk, stzun Luwiy bantz.
35 Stzꞌamol tzun Luwiy tircuꞌn yi oy yi cyꞌaꞌn tan Abigail, nin je taleꞌj:
—Ma jaluꞌ quiꞌt cẍbisun nin baꞌn cẍaꞌj xe acaꞌl. Na ja wiꞌt atxol swetz yi mbi cuꞌn na icyꞌ tacꞌuꞌl, nin tzimbneꞌ taneꞌn yi ncuꞌ awutz tan jakleꞌn swetz, chij Luwiy.
36 Ma yi pakxeꞌn tzaj junt tir Abigail kale atit yi chmil, nin tzun til yi benak nin Nabal tan waꞌaꞌn chi na ban jun waꞌaꞌn tu jun rey. Wiꞌnin na tzatzin, nin nsken wiꞌt oc aꞌ twiꞌ. Chaꞌstzun te qui nin tal Abigail jun yol tetz, ma na jalen le junt eklok. 37 Ma yi tuleꞌn skil, te yi nsken wiꞌt ul tajtzaꞌkl Nabal, nin tzun oc Abigail tan xtxoleꞌn tetz yi mbi cuꞌn bajij. Sajeꞌn tzun cutxpujtz nin txꞌakxij tajtzaꞌkl, junawes ẍnukeweꞌn cuꞌn wankil tan paj. 38 Yi teleꞌn lajujt kꞌej, nin loꞌon junt tir Nabal tan Kataj Ryos nin quimtz.
39 Yi tbital Luwiy yi nsken wiꞌt quim Nabal, i tzun taltz:
—¡Ntyoẍ tetz Kataj yi iꞌ mmeꞌlsan xel te Nabal tan paj yi chin juntlen nin tajtzaꞌkl mban sweꞌj! ¡Ntyoẍ tetz Kataj yi ja oc tan inmakleꞌn tan qui imbnol jun eꞌch takleꞌn cachiꞌ, ma na iteꞌn nin tajtzaꞌkl Nabal mmoꞌc contr teꞌj tan Kataj! chij Luwiy.
Yi teleꞌn tiemp nin tzun opon jun yol tan Luwiy twiꞌ Abigail, tan talcheꞌn tetz tan toqueꞌn tetz txkel. 40 Ej i tzun yi cyoponeꞌn yi eꞌ ẍchakum Luwiy le amaꞌl Carmel tan yol tu Abigail, i tzun cyaltz tetz:
—Yi Luwiy, ja koꞌ saj ẍchakol tan ticyꞌleꞌn ninuꞌ na na taj iꞌ yil tzꞌocuꞌ tetz txkel.
41 Cweꞌn tzun mejlok Abigailtz tan ẍchajleꞌn yi cꞌulutxumil, i tzun taltz:
—Yi in wetz in tuꞌ jun mos Luwiy taneꞌn, nin list in tan xtxꞌajleꞌn len quikan yi eꞌ tetz esclaw ko yaꞌtz caꞌwl ltakꞌ iꞌ swetz, chij Abigail.
42 Yi wiꞌt tlol yi yolaꞌtz toqueꞌn tzuntz lajkeꞌl chan tan wekleꞌn cuꞌn beꞌch tetz, nin tzun jeꞌ nintz teꞌj jun buruꞌ. Nin eꞌ xomnin oꞌ xun yi mos iꞌ teꞌj. Nin eꞌ xom nintz wutz chicoc yi eꞌ ẍchakum Luwiy. Ej nin yi toponeꞌn Abigail nintzun octz tetz txkel Luwiy.