24
1 Ej i tzun te yi pakxeꞌn tzaj Saúl tan oyintziꞌ scyuchꞌ yi eꞌ filistey, nin tzun aꞌlchij tetz yi choꞌn at Luwiy tul yi amaꞌl yi tzꞌinunin tuꞌ nakaꞌjil En-gadi. 2 Toqueꞌn tzun Saúl tan chitxaꞌlejeꞌn ox mil sanlar ẍchixoꞌl cyakil yi eꞌ wiꞌtz aj oyintzinl cwent Israel. Nin tzun bentz tan chijoyleꞌn Luwiy scyuchꞌ yi eꞌ tuchꞌ, txoꞌlak siwun, nin tulak eꞌchk wutz kotxꞌ. 3 Te yi na chixon tbeꞌ ja chopon kale atit cobox peꞌmil cneꞌr nakaꞌjil jun picy kale atit Luwiy scyuchꞌ yi eꞌ tuchꞌ tan ew ib.a Choꞌn tzun toqueꞌn Saúl tul jun picyaꞌtz tan xoꞌniꞌn. 4 Yi quilol yi eꞌ ẍchakum Luwiy yi mbi na bajij, nin tzun cyaltz tetz:—Jaluꞌ tzꞌelpon cuꞌn teꞌj yi yol yi alijt cyen tan Kataj yi copon tkꞌol iꞌ yi contruꞌ tkꞌabuꞌ. Bneꞌ binuꞌ yi tajbiluꞌ teꞌj, cheꞌch.
Chin ewun cunin tzun toponeꞌn Luwiy wutz coc tan cꞌapleꞌn len muꞌẍ juꞌ yi xtxoꞌ yi at cyen skul. 5 Poro jalcunin ja jal jun bis tetz, tan paj yaꞌtz mban, 6 nin tzun taltz scyetz yi eꞌ sanlar iꞌ.
—¡Lok cuy Kataj impaj na ja noꞌc tan joyleꞌn puntil tan loꞌonseꞌn yi wajcawil, yi kareyil! Na iꞌ rey tan paj yi txaꞌijt tan Kataj Ryos.
7 Nin tzun xcyeꞌ Luwiy tan chimakleꞌn yi eꞌ yaj yi xomcheꞌ teꞌj nin quinin takꞌ amaꞌl scyetz tan loꞌonseꞌn Saúl. Ma Saúl nin el tzajtz le jun picyaꞌtz nin icyꞌt tcyꞌajt yi beꞌ. 8 Ma Luwiy jalcunin teleꞌn tzaj le picyaꞌtz nin tzun ẍchꞌin nintz wutz coc Saúl:
—¡Iluꞌ inreyil! ¡Iluꞌ inreyil! stzun iꞌ.
Yi jeꞌn tolil tib Saúltz, nin tzun cuꞌ mejlok Luwiytz, jalen yi cweꞌn poneꞌn yi plaj wuxtxꞌotxꞌ tan takꞌleꞌn kꞌej Saúl. 9 I tzun taltz:
—Iluꞌ inreyil, ¿mbi tzuntz na tbituꞌ chiyol yi eꞌ yi na cyal yi na chintzan tan joyleꞌn puntil tan telseꞌn cunuꞌ swutz? 10 Na ja wiꞌt lajluchax swutzuꞌ jaluꞌ yi nkꞌeꞌtz puntil. Na ja takꞌ Kataj amaꞌl swetz tan biyleꞌn cunuꞌ te yi atuꞌ tul yi picyeꞌj. Poro yi in wetz nkꞌeraꞌtz wajbil tan biyleꞌn cunuꞌ, ma na ja incuy pajuꞌ, na ja intxum yi ko iluꞌ rey, iꞌtz tan paj yi yaꞌstzun tajbil Kataj Ryos.
11 ”Iluꞌ inreyil xmay tzajuꞌ yi mbiꞌtz at tinkꞌab, iꞌtz jun piẍ xtxoꞌuꞌ yi ja el incꞌaplul. Yaꞌstzun techl yi jaj kloꞌ chinxcyeꞌ tan biyleꞌn cunuꞌ. Na tzun elepontz yi quiꞌc jun tir yi jajk noꞌc tan joyleꞌn puntil tan biyleꞌn cunuꞌ, nka tan subleꞌnuꞌ. Poro yi iluꞌ teruꞌ na tzanuꞌ tan joyleꞌn puntil tan imbiyleꞌn cuꞌn. 12 ¡Lok tzꞌoc Kataj Ryos tan maꞌleꞌn kajtzaꞌkl, nin lok takꞌ Kataj cawsuꞌ tan paj yi na tzanuꞌ tan joyleꞌn puntil tan imbiyleꞌn cuꞌn! Ma yi in wetz quil noꞌc tan contriꞌn teꞌjuꞌ, na iluꞌ inreyil. 13 At jun xtxolbil yi ilen nin ja aꞌlchij sajleꞌn tunintz: “Yi eꞌchk ajtzaꞌkl yi chin junt len nin choꞌn na jal te cyalmaꞌ yi eꞌ mal nak”. Chaꞌstzun te yi wetz quiꞌc teꞌj wajal tan biyleꞌn cuꞌnuꞌ na iluꞌ inreyil, na yi in wetz nkꞌeꞌtz in jun mal nak. 14 Yi iluꞌ teruꞌ at kꞌejuꞌ, na iluꞌ wiꞌtz kareyil yi oꞌ xonl Israel. Ma yi in wetz quiꞌc muꞌẍ tal ekaꞌn waꞌn, niꞌcuꞌn in tu jun txꞌiꞌ yi quimnakt nka chi jun tzꞌis tuꞌ. Quiꞌc na takꞌ yi na ojkeluꞌ wutz incoc tan intzꞌamleꞌn. Nxac na buch tibuꞌ tan injoyleꞌn, na quiꞌc ekaꞌn waꞌn. 15 Chaꞌstzun te nink tzꞌoc Kataj tan kamaꞌleꞌn tuchꞌuꞌ, yi naꞌ scyetz aj paj skaxoꞌl. ¡Nink tzꞌoc iꞌ tan wuchꞌeyeꞌn nin tan incolcheꞌn tkꞌabuꞌ! stzun Luwiy bantz tetz Saúl.
16 Yi wiꞌt jiloneꞌn Luwiy, i tzun saj tlol Saúltz:
—¿I peꞌ aẍaꞌtz Luwiy? aẍ jun cꞌoloj witzꞌun.
—Jun cuꞌn yol yi aẍatz nkꞌeꞌtz aẍ ajpaj. Na qui nin matxum jun ploj ajtzaꞌkl sweꞌj, wech na chin juntlen nin mimban tzaweꞌjaꞌtz. 18 Tan yi ayol yi mawal, na el intxum tetz yi at banl te awalmaꞌ sweꞌj. Na ja takꞌ Kataj Ryos amaꞌl tzatz tan imbiyleꞌn cuꞌn, poro yi aẍatz qui nin nchincuꞌ abiyol. 19 Na yi mero bintzij, cyaꞌl nin jun nink takꞌ amaꞌl tan teleꞌn yi contr liwr, yi na jal puntil taꞌn tan biyleꞌn cuꞌn. Chaꞌstzun te ¡nink takꞌ Kataj wiꞌnin abanl na qui nin nchincuꞌ abiyol! 20 Nchaꞌtz na el cunin intxum tetz jaluꞌ yi jun cuꞌn yol cẍocpon tetz rey cwent Israel, nin yil cẍoꞌc tan cawuꞌn sjalok wiꞌnin chibanl yi eꞌ katanum, nin quil chibisun tan jun eꞌch takleꞌn. 21 Ntinaꞌtz na waj yi swutz cuꞌn Ryos tzawal tzaj, yi quil cẍoc tan chisotzajeꞌn cuꞌn yi eꞌ innajal scyuchꞌ yi eꞌ inxonl, chij Saúl.
22 —Swutz cuꞌn Ryos yi quil noꞌc tan sotzajeꞌn cuꞌn jun xonluꞌ, stzun Luwiy bantz.
Pakxeꞌn tzaj tzun junt tir Saúl le tetz palacio. Ma Luwiy scyuchꞌ yi eꞌ yi xomcheꞌ teꞌj nin eꞌ pakxij junt tir lakak amaꞌl yi at xoꞌl wutz yi cyaꞌl na jepon teꞌj.