Yi xcyeweꞌn Luwiy tan chicolpeneꞌl tzaj yi aj Keila ẍchikꞌab yi eꞌ filistey
23
1 I tzun bantz nin tzun eꞌ oc yi eꞌ filistey tan oyintziꞌ te yi tnum Keila. Nin tzun el chimajol yi triw yi inaknin teleꞌn tzaj tul er.—Iluꞌ jun cꞌoloj Wajcaw ¿Cuj peꞌ tanuꞌ yil chimben tan oyintziꞌ scye yi eꞌ filistey?
—Baꞌn cẍben, chij Kataj tetz, —quiloꞌk tan chixiteꞌn cuꞌn yi eꞌ filistey, nin colpweꞌ yi eꞌ wunak yi najlcheꞌ le tnumaꞌtz.
3 Ej i tzun cyal yi eꞌ sanlar tetz Luwiy:
—Poro ẍeꞌn kaban, na na kaxob scyetz yi eꞌ kacontraꞌtz jalcuꞌneꞌj te yi atoꞌ tzoneꞌj Judá, pyor yil kopon ẍchiwutz tan oyintziꞌ, skalucnek loꞌ tan xoꞌw ẍchiwutz, cheꞌch tzun yi eꞌ sanlar bantz tetz Luwiy.
4 Tan yi xtxolbilaꞌtz, nin tzun jak junt tir Luwiy tajtzaꞌkl tetz Kataj. I tzun saj tlol Kataj tetz:
—Quiloꞌk tan oyintziꞌ le tnum Keila, na nocpon tan ichꞌeyeꞌn tan oyintziꞌ scyeꞌj yi eꞌ filisteyaꞌtz, chij Kataj bantz.
5 Ej beneꞌn nin tzun eꞌ ban Luwiy scyuchꞌ yi eꞌ tetz sanlar tan oyintziꞌ scyeꞌj yi eꞌ filistey. Nin tzun eꞌ xcyeꞌ-tz tan chixiteꞌn cuꞌn nin tan majleꞌn cyakil cyawun. Yaꞌstzun ban Luwiy tan chicolpeneꞌl tzaj yi eꞌ xonl Israel yi najlcheꞌ Keila.
6 Ej ma Abiatar, yi cyꞌajl yi kꞌajtzun paleꞌ Ahimelec, nsken el ojk tan tponeꞌn ojkuj te Luwiy le tnum Keila, cyꞌaꞌn yi efoda taꞌn.
7 Ma yi Saúl, yi tbital yi choꞌn at Luwiy le tnum Keila, i tzun icyꞌtz tcꞌuꞌl cuntuꞌ: “Ja loꞌ wiꞌt takꞌ Kataj amaꞌl swetz tan stzꞌamleꞌn Luwiy, na jajtz, yi mmoꞌc cyen le tnum. Quiꞌt tzꞌel tzaj. Ja wiꞌt lamxij yi eꞌchk puert swutz tan quiꞌt teleꞌn liwr tinkꞌab.”
8 Ej teleꞌn tzun stziblaltz tan Saúl tan chichakleꞌn cyakil yi eꞌ sanlar, tan chimolol quib tan chibeneꞌn Keila, tan suteꞌn teꞌj yi tnumaꞌtz nin tan stzꞌamleꞌn Luwiy scyuchꞌ yi eꞌ tetz aj oyintzinl yi xomcheꞌ teꞌj. 9 Poro yi tbital Luwiy yi yaꞌstzun taneꞌn yi xtxumuꞌn Saúl, nin tzun cawunintz tetz Abiatar, yi paleꞌ, tan xconeꞌn yi efod taꞌn, tan jakol Luwiy tajtzaꞌkl tetz Kataj Ryos. 10 I tzun tal Luwiytz tetz Kataj:
—Iluꞌ jun cꞌoloj Kataj Ryos yi oꞌ xonl Israel, yi in wetz in ẍchakumuꞌ nin na el intxum tetz yi jun cuꞌn tzꞌul yi rey Saúl tan xiteꞌn cuꞌn yi tnumeꞌj tan tuꞌ yi choꞌn atin tzoneꞌj. 11 Poro Taꞌ, tal tzajuꞌ swetz, yi ko jun cuꞌn tzꞌul iꞌ tzoneꞌj chi yi yol yi nwit, ¿nchimben poloꞌ chijatxol yi eꞌ wunakeꞌj tetz Saúl yil tzꞌul tzaj? Iluꞌ jun cꞌoloj Wajcaw, in ẍchakumuꞌ nin na cuꞌ inwutz teruꞌ tan tloluꞌ swetz yi mbiꞌtz sbajok.
—Jun cuꞌn tzꞌul Saúl tzoneꞌj, chij Kataj.
12 —¿Nchimben peꞌ chijatxol yi eꞌ aj Keila scyuchꞌ yi eꞌ insanlar tkꞌab Saúl? chij Luwiy.
—Jun cuꞌn yaꞌstzun sbajok, stzun Kataj bantz tetz.
13 Chaꞌstzun te cyeleꞌn Luwiy le amaꞌlaꞌtz scyuchꞌ yi eꞌ tetz sanlar yi xomcheꞌ teꞌj. At loꞌ kak cient chixoneꞌn. Poro qui nin jal jun amaꞌl cyaꞌn yi nink kꞌukeꞌ chicꞌuꞌl tul, ma na eꞌ xon cuntuꞌ nintz.
Ma yi toponeꞌn stziblal twiꞌ Saúl yi nsken wiꞌt el ojkuj Luwiy le tnum Keila, quiꞌt tzun bentz tan chitzꞌamleꞌn.
Yi taꞌteꞌn Luwiy le amaꞌl yi tzꞌinunin tuꞌ
14 Ma Luwiy, choꞌn tzun cyaꞌteꞌntz tul eꞌchk amaꞌl yi at qꞌuixbel tan jeꞌn poneꞌn jun teꞌj yi at tulak eꞌchk amaꞌl yi at wiꞌak wutz le amaꞌl tzꞌinunin tuꞌ cwent Zif. Nin ilenin ja oc Saúl tan joyleꞌn iꞌ, poro qui nin takꞌ Kataj amaꞌl tetz tan jaleꞌn taꞌn. 15 Poro ilen nin na xob Luwiy tetz Saúl, na yi tajbil Saúl yi teleꞌn tan joyleꞌn, iꞌtz tan biyleꞌn cuꞌn. Chaꞌstzun te nin najeꞌ-tz Luwiy Hores, le amaꞌl yi tzꞌinunin tuꞌ cwent Zif.
16 Ej ma yi Jonatán yi cyꞌajl Saúl nin tzun opontz tan xajseꞌn Luwiy le amaꞌl Hores. Yi tajbil iꞌ iꞌtz tan quiwseꞌn nin tan kꞌukeweꞌn mas cꞌuꞌl Luwiy te Ryos. 17 I tzun taltz:
—Quil cxob tetz intaj, na qui na xcyeꞌ iꞌ tan ajalseꞌn. Jun cuꞌn cẍocpon tetz kareyil yi oꞌ xonl Israel, nin yi in wetz baꞌn noꞌc tetz yi caꞌp rey. Na nchaꞌtz intaj na el xtxum tetz yi yaꞌtz sbajok.
18 Nin tzun bnix jun chitrat cyaꞌn, nin oc Kataj Ryos cyaꞌn tetz stiwil chiyol.b Nin tzun pakxij Jonatán xe tetz caꞌl. Ma Luwiy nin cyaj cyentz Hores.
19 Ma yi eꞌ aj Zif choꞌn chibeneꞌn jalen Gabaa tan yol tu Saúl. Ej itzun cyaltz tetz:
—Iluꞌ kajcawil, yi Luwiy, choꞌn na tew tib le ketz kaꞌamaꞌl,c na choꞌn na benak iꞌ lakak amaꞌl yi at wiꞌwtz, yi at qꞌuixbel ocomponeꞌn teꞌj. Choꞌn na kil wutz iꞌ wiꞌak eꞌchk wutz yi na biꞌaj Haquila, cwent Hores yi at cweꞌn tziꞌn tul yi amaꞌl tzꞌinunin tuꞌ. 20 Iluꞌ jun cꞌoloj kareyil, baꞌn tzun tzꞌoponuꞌ, alchok kꞌejil yi na tajuꞌ nin list kutaneꞌn tan jatxleꞌn iꞌ tkꞌabuꞌ. 21 Tzajeꞌn tzun tlol Saúl scyetz:
—¡Takꞌ tzaj Kataj banl squibuꞌ na ja el chikꞌajabuꞌ sweꞌj! chij Saúl. 22 Chibneꞌ binuꞌ pawor swetz tan joyleꞌn yi mero luwar kale tewaneꞌt tib, nin naꞌ scyetz yi jun yi ilon tetz, na na wit yi chin list nin Luwiy tan tewal tib. 23 Tajweꞌn yil jal cyakil yi eꞌchk amaꞌl yi na xcon taꞌn tan tewal tib. Baꞌn tzun chuꞌluꞌ junt tirtz tan talcheꞌn cyakil yi xtxolbil swetz, na na waj yi mero bintzij. Ej kalenaꞌs tzun chimbentz scyeꞌjuꞌ, nin ko bintzij nin at iꞌ le jun amaꞌlaꞌtz, tzintxukꞌeꞌ cunin cyakil yi amaꞌl cwent Judá jalen yil jal waꞌn.
24 Yi tkꞌol Saúl amaꞌl scyetz, nin tzun eꞌ pakxijtz Zif, le cyetz chitanum. Ma Luwiy scyuchꞌ yi eꞌ yaj yi xomcheꞌ teꞌj, choꞌn tzun cyaꞌteꞌntz tul jun ẍkꞌajlaj yi at tzakꞌ cuꞌn yi amaꞌl yi tzꞌinunin tuꞌ cwent Maón.
25 Toqueꞌn tzun Saúl scyuchꞌ yi eꞌ tetz sanlar tan joyoꞌn. Yi tbital Luwiy yi jun stziblalaꞌtz, nin tzun ben tan ew ib wiꞌak eꞌchk wutzileꞌn picy xoꞌlak chin lmak wutz cꞌub le amaꞌl yi tzꞌinunin tuꞌ cwent Maón. Yi tbital Saúl yi xtxolbileꞌj, nin tzun ben le jun amaꞌlaꞌtz tan stzꞌamleꞌn kloꞌ Luwiy. 26 Te yi na xon Saúl scyuchꞌ yi eꞌ tetz ẍchakum xe jun juꞌwtz, choꞌn tzun at Luwiy te jalajt xlaj tan joyleꞌn puntil tan cyeleꞌn liwr. Yi xcyeweꞌn Saúl scyuchꞌ yi eꞌ tetz ẍchakum tan suteꞌn teꞌj Luwiy scyuchꞌ yi eꞌ tetz sanlar, nin te yi txant tan xcyeweꞌn tan chitzꞌamleꞌn cuꞌn, 27 nin tzun opon jun chakum tan talcheꞌn tetz Saúl:
—¡Iluꞌ kareyil tajweꞌn yil pakxijuꞌ jalcuꞌn le katanum, na ja wiꞌt chopon yi eꞌ filistey tan oyintziꞌ skeꞌj!
28 Cyajeꞌn cyen tzun tilol Saúl stzꞌamleꞌn Luwiy, nin jalcunin beneꞌn tan oyintziꞌ scyuchꞌ yi eꞌ filistey. Chaꞌstzun te ja oc biꞌ yi jun amaꞌlaꞌtz tetz “Yi wutz cꞌub, kale chijatxwit quib”.
Yi cuyul Luwiy paj Saúl
29 Choꞌn tzun beneꞌn Luwiy tul eꞌchk amaꞌl yi at qꞌuixbel tan jeꞌn poneꞌn jun teꞌj le amaꞌl cwent En-gadi.