22
1 Ej nin tzun el ojk Luwiytz le amaꞌlaꞌtz, choꞌn tzun toponeꞌn tewal tibtz le picy yi na biꞌaj Adulam.a I tzun yi quibital yi eꞌ taj xtxuꞌ scyuchꞌ yi eꞌ stzicy scyuchꞌ cyakil yi eꞌ tajwutz yi choꞌn at iꞌ-tz le jun picyaꞌtz, cyakil cunin tzun eꞌ, eꞌ opontz teꞌj. 2 Nchaꞌtz eꞌ opon yi eꞌ wunak yi buchij cheꞌ, chi quitaneꞌn yi eꞌ meꞌbaꞌ, scyuchꞌ yi eꞌ yi at chitxꞌokꞌbeꞌn, nin yi eꞌ yi juntlen tajtzaꞌkl yi rey ẍchiwutz. Nin tzun oc Luwiytz cyaꞌn tetz wiꞌtz cyajcawil. At loꞌ cyaj cient chixoneꞌn bantz.
3 Nin tzun el Luwiytz le jun amaꞌlaꞌtz, choꞌn tzun toponeꞌntz Mizpa cwent Moab. I tzun taltz tetz yi rey cwent Moab:
—Max cꞌuꞌluꞌ, bneꞌuꞌ jun pawor swetz, na kloꞌ waj yil chicyaj cyen yi eꞌ intaj le tanumuꞌ, jalen cuꞌn yil tzꞌel intxum tetz yi mbiꞌtz tajbil Kataj Ryos sweꞌj, stzun iꞌ bantz.
4 Nin tzun eꞌ opon yi eꞌ taj xtxuꞌ taꞌn tu yi rey cwent Moab, nin tzun eꞌ aꞌtijtz tuchꞌ te yi tiemp yi aꞌtij Luwiy lakak amaꞌl xoꞌlak kotxꞌ yi at qꞌuixbel tan jeꞌn poneꞌn teꞌj.
5 Ej i tzun bantz nin tzun jilon Gad, yi elsanl stziꞌ Ryos, tetz Luwiy, nin tzun takꞌ iꞌ jun tajtzaꞌkltz:
—Baꞌnt cuꞌn yi quil cẍcyaj tzoneꞌj lakak amaꞌleꞌj, ma na quiloꞌk jalen Judá, stzun iꞌ bantz.
Beneꞌn nin tzun ban Luwiy. Choꞌn tzun toponeꞌntz tan taꞌteꞌnt xoꞌl tzeꞌ cwent Haret.
Yi chiquimeꞌn yi eꞌ paleꞌ cwent Nob
6 I tzun bantz, te yi na bajij cyakil yi xtxolbilaꞌseꞌj, choꞌn tzun at pon Saúl le tnum Gabaa. Choꞌn tzun cꞌolchij iꞌ-tz tmujil jun tzeꞌ yi na biꞌaj tamariscob yi at nakaꞌjil yi kꞌajbil Kataj Ryos. Tzꞌamij yi lans taꞌn, nin ateꞌ yi wiꞌtz cyajcawil yi eꞌ sanlar solteꞌj iꞌ. Yi tbital yi stziblal yi nsken jal yi amaꞌl kale atit Luwiy scyuchꞌ yi eꞌ yi xomcheꞌ teꞌj, 7 nin tzun tal scyetz yi eꞌ wiꞌtz ajcawaꞌtz:
—Eꞌuꞌ jun cꞌoloj aj Benjamín quibit tzajuꞌ inyol: ¿Kꞌuklij peꞌ chicꞌuꞌluꞌ te yi jun cyꞌajl Isaí? ¿Tzꞌocpon nocxaꞌtz tan takꞌleꞌn jalaj chicojbiluꞌ tu eꞌchk amaꞌl yi baꞌn xcon cyanuꞌ tan tawleꞌn wiꞌnin uva? ¿Ej nin na peꞌ cyocsajuꞌ yi tzꞌocpon iꞌ tan cyocseꞌnuꞌ tetz wiꞌtz bajxom nin tetz capitán ẍchixoꞌl yi eꞌ tetz sanlar? 8 Cyakil eꞌuꞌ ja choꞌcuꞌ tan joyleꞌn puntil tan weleꞌn cuꞌn swutz, na cyaꞌl jun ẍchixoꞌluꞌ yi jajk tal yi ja bixeꞌ jun trat ẍchixoꞌl incyꞌajl tu yi jun cyꞌajl Isaí-aꞌtz. Cyaꞌl jun ẍchixoꞌluꞌ jajk bisun muꞌẍ sweꞌj. Cyaꞌl jun yi jajk tal swetz yi ja oc yi weri incyꞌajl tan contriꞌn sweꞌj, nin tan ẍchꞌeyeꞌn jun inchakum tan incuꞌseꞌn tul tramp, chij Saúl scyetz yi eꞌ wiꞌtz ajcaw.
9 At tzun Doeg, yi aj Edom ẍchixoꞌl yi eꞌ wiꞌtz ajcawaꞌtz yi ateꞌ solteꞌj Saúl, i tzun taltz:
—Max cꞌuꞌluꞌ taꞌ, yi in wetz ja wil yi jun cyꞌajl Isaí-aꞌtz yi tponeꞌn Nob tan yol tu yi paleꞌ Ahimelec yi cyꞌajl Ahitob. 10 Ej nin wil yi toqueꞌn iꞌ tan jakleꞌn banl Luwiy tetz Kataj Ryos, nin wil yi tkꞌol iꞌ waꞌ tu cumir tetz, tu yi sparbeꞌn Goliat yi filistey.c
11 Beneꞌn tzun mantar yi rey tan ticyꞌleꞌn tzaj Ahimelec yi paleꞌ cwent Nob, nin cyakil yi eꞌ mas paleꞌ yi cyajwutz quib tuchꞌ. 12 Yi cyuleꞌn tzaj swutz Saúl nin tzun oc tan ẍchꞌoteꞌn stziꞌ Ahimelec:
—Bit tzaj yaj, yi aẍ cyꞌajl Ahitob.
—Atin jakꞌ caꞌwluꞌ, iluꞌ inreyil, chij yi paleꞌ.
13 —¿Nxac tzun ncẍoꞌc tan nucꞌleꞌn jun tramp sweꞌj tu yi nocx cyꞌajl Isaí-aꞌtz? na ja awakꞌ jun spar tetz. Nchaꞌtz ja awakꞌ waꞌ. Nchaꞌtz ja cẍoꞌc tan jakleꞌn banl swutz Ryos, bantz jaleꞌn walor tan contriꞌn sweꞌj. Ma jaluꞌ nternin na tzan iꞌ tan inxkꞌukeꞌn, bantz inloꞌoneꞌn taꞌn, stzun Saúl tetz Ahimelec.
14 —Max cꞌuꞌluꞌ taꞌ poro taneꞌn tzinwutz wetz quiꞌc nin junt ẍchakumuꞌ yi baꞌn lkꞌukeꞌ cꞌuꞌluꞌ teꞌj, ma na ntin Luwiy. Nin nchaꞌtz iꞌ jiꞌuꞌ, nin iꞌ yi wiꞌtz ajcaw squibaj yi eꞌ sanlar yi ntinaꞌtz chixac tan qꞌuicyꞌleꞌnuꞌ. Quiꞌc loꞌ jun yi nim teꞌn cuꞌn kꞌej ẍchixoꞌl yi eꞌ ajcaw yi ateꞌ jakꞌ wiꞌuꞌ. 15 Ej nin nkꞌeraꞌtz bajx tir yi nnoꞌc tan jakleꞌn banl iꞌ tetz Kataj Ryos. Max cꞌuꞌluꞌ poro nkꞌeꞌtz in contruꞌ. Chaꞌstzun te, iluꞌ inreyil, quil jeꞌ jun eꞌchk takleꞌn tanuꞌ teꞌj inkul nka scye innajal, na yi in wetz, yi in ẍchakumuꞌ, qui na wit muꞌẍ tal yi xtxolbil yi ntaltzajuꞌ swetz.
16 Poro nin oc yi rey chꞌinchꞌuj te yi tajtzaꞌkl, i tzun taltz:
—¡Jun cuꞌn yol na wal nin tzatz Ahimelec, cẍquimok tuml cyakil yi eꞌ axonl!
17 Cawuneꞌnin tzun yi rey scyetz yi eꞌ sanlar yi na chitzan tan qꞌuicyꞌleꞌn iꞌ:
—Biywok cuꞌn yi eꞌ paleꞌ Kataj, na nchaꞌtz eꞌ junit eꞌ tu Luwiy, na elnak chitxum tetz yi na tew tib tzinwutz, poro qui nin cyal muꞌẍ stziblal swetz.
18 Poro yi eꞌ sanlar qui nin chinimsaj chicꞌuꞌl tan chibiyleꞌn cuꞌn yi eꞌ paleꞌ. Chaꞌstzun te toqueꞌn yi rey tan caweꞌn Doeg yi aj Edom tan chibiyleꞌn cuꞌn:
—Doeg, biyweꞌ cuꞌn, stzun.
Toqueꞌn tzun Doeg tan chibiyleꞌn cuꞌn yi eꞌ paleꞌaꞌtz. Nin tul yi jun kꞌejaꞌtz ja xcyeꞌ iꞌ tan chibiyleꞌn jun mutxꞌ tu oꞌ yaj (85) yi at beꞌch cyetz paleꞌ scyeꞌj. 19 Choꞌn tzun beneꞌntz le tnum Nob kale najlcheꞌt yi eꞌ paleꞌaꞌtz nintzun oc tan chibiyleꞌn cuꞌn eꞌ yaj tu xnaꞌn, scyuchꞌ eꞌ nitxaꞌ tuml yi eꞌ tal niꞌ. Nchaꞌtz oc tan chibiyleꞌn cuꞌn eꞌchk awun chi taneꞌn wacẍ, buruꞌ nin cneꞌr. 20 Poro at jun cyꞌajl yi paleꞌ Ahimelec yi na biꞌaj Abiatar, yi ja xcyeꞌ tan coloꞌn ib, na nin el ojkuj. Choꞌn tzun toponeꞌntz le amaꞌl kale tewaneꞌt tib Luwiy.
21 Yi toponeꞌn nin octz tan xtxoleꞌn yi ẍeꞌn cuꞌn ban Saúl tan chibiyleꞌn cuꞌn yi eꞌ paleꞌ cwent Kataj. 22 Tzajeꞌn tzun tlol Luwiy:
—Jun cuꞌn, te yi jun kꞌejaꞌtz yi wilol Doeg, ja icyꞌ tincꞌuꞌl yi jun cuꞌn mben iꞌ tan xochoꞌn tetz Saúl. 23 Impaj loꞌ yi ja wiꞌt chiquim cyakil yi eꞌ axonl. Poro baꞌn cẍcyaj tzoneꞌj swuchꞌ. Quiꞌt cxob, na yi eꞌ yi na cyaj choꞌc tan abiyleꞌn cuꞌn, iteꞌn nin cyajbilaꞌtz tan imbiyleꞌn cuꞌn wetz. Poro kol cẍcyaj tzoneꞌj cyaꞌl jun tzꞌocpon tan aloꞌonseꞌn.