Yi teleꞌn ojk Luwiy
21
1 I tzun bantz nin tzun ben Luwiy jalen le tnum Nob tan tilweꞌn yi paleꞌ Ahimelec.a Yi tponeꞌn, nintzun eltzaj yi paleꞌ tan cꞌulcheꞌn, poro ja el yab teꞌj tan paj yi ẍchuc Luwiy toponeꞌn. Jakol tzun tetz Luwiy:—¿Mbi tzuntz yi ẍchucuꞌ mmuꞌluꞌ tzoneꞌj?
2 —Atin tzoneꞌj tan jun mantar yi rey, chij Luwiy, —nin ja tal iꞌ swetz yi quiꞌc rmeril yi nink tbit jun yi mbiꞌtz xeꞌ yi inmantar. Ej nin yi eꞌ yaj yi xomcheꞌ sweꞌj, ja wal scyetz tan inẍchiweꞌn tul junt amaꞌl. 3 Ma jaluꞌ quiꞌc peꞌ kawaꞌ tuchꞌuꞌ, na kloꞌ waj oꞌ pam yi lmak, tu alchok jilwutz cumir, chij Luwiy tetz yi paleꞌ.
4 —Quiꞌc muꞌẍ pam swuchꞌ, ntin yi pam yi xansaꞌnt, nin yi ja wiꞌt oc swutz Ryos, baꞌn ben tanuꞌ ko ateꞌ yi eꞌ ẍchakumuꞌ wi xan,b stzun yi paleꞌ bantz.
5 —Jun cuꞌn atoꞌ wi xan, stzun Luwiy, —na yi eꞌ wetz inchakum ilen nin na choꞌc wi xan yi na keꞌl tan oyintziꞌ. Nin yi jun kamantar jaluꞌ iꞌtz apart, poro ilen nin na choꞌc wi xan yi na keꞌl tan jun kamantar joylaj. Chaꞌstzun te jun cuꞌn atoꞌ len wi xan jaluꞌ, stzun Luwiy.
6 Beneꞌn tzun yi paleꞌ tan takꞌleꞌn tzaj yi pam yi wiꞌnin xanil tetz Luwiy yi inak teleꞌn wi altar,c na quiꞌc mas pam at-tz.
7 Poro te yi jun kꞌejaꞌtz at jun ẍchakum Saúl yi at-tz tul yi jun amaꞌlaꞌtz. Iꞌ jun aj Edom yi na biꞌaj Doeg, nin iꞌ wiꞌtz ajcaw squibaj yi eꞌ pstor cwent Saúl, nin tzun til iꞌ cyakil yi mbajij yi toponeꞌn Luwiy te Ahimelec.
8 I tzun tal Luwiy tetz Ahimelec:
—¿Quiꞌc peꞌ jun inlans tuchꞌuꞌ nka jun inspar yil tzincꞌam teruꞌ? Quiꞌc wetz cyꞌaꞌn waꞌn, na tan paj ojkeꞌl tan bnixeꞌn chan yi inmantar, quiꞌt nin tzun ntxꞌamxtzaj yi inspar waꞌn tu eꞌchk inmaꞌcl, stzun Luwiy.
9 —At loꞌ, colij yi sparbeꞌn Goliat waꞌn, yi jun filisteyaꞌtz yi quim awaꞌn le amaꞌl cwent Ela.d Choꞌn at wutzcoc yi efod, nin tꞌoliꞌn tul jun xbuꞌk. Baꞌn tzacyꞌaj nin ko na awaj, na quiꞌc junt maꞌcl swuchꞌ, stzun Ahimelec tetz Luwiy.
—Na kloꞌ waj lwucyꞌaj nin, chij Luwiy bantz.
10 I tzun bantz nin tzun el tewal tib Luwiy joylaj, na ilen nin na xob tetz Saúl. Choꞌn tzun toponeꞌntz tu Aquis yi rey cwent yi tnum Gat. 11 Ma yi eꞌ wiꞌtz cyajcawil yi eꞌ sanlar yi reyaꞌtz nin tzun cyaltz:
—¡Or tiluꞌ taꞌ, na yi juneꞌj iꞌtz Luwiy, yi ẍchakum Saúl, yi rey cwent cyakil yi amaꞌleꞌj! I bin iꞌaꞌtz yi jun yi na bajij bitz teꞌj yi na tal: “Jun mil kacontr nchiquim tan Saúl, ma tetz Luwiy lajuj mil nchiquim taꞌn,”e cheꞌch tzun ban cuꞌntz.