Yi toqueꞌn Jonatán tan colcheꞌn Luwiy
20
1 I tzun bantz nin tzun el ojkuj Luwiy Naiot cwent Ramá, nin bentz tan yol tu Jonatán:—¿Mbiꞌtz wil swutz ataj? ¿Mbiꞌtz ncuꞌ injuchul swutz iꞌ? ¿Mbiꞌtz ncuꞌ mbnol tan jaleꞌn wil swutz ataj, bantz toqueꞌn iꞌ tan injoyleꞌn tan imbiyleꞌn cuꞌn? chij Luwiy.
2 —¡Quiꞌ loꞌ, nkꞌeꞌtz tajbil Ryos tan toqueꞌn intaj tan abiyleꞌn cuꞌn! ¡Quil cẍquim taꞌn! Quiꞌc jun eꞌchk takleꞌn yi na tew intaj tzinwutz, na tircuꞌn na tal iꞌ swetz yi ntaxk bnix, nin quiꞌc na ban jun eꞌchk takleꞌn ẍchuc cuntuꞌ, mpe ik at ekaꞌn taꞌn nka quiꞌ. ¡Quil cẍwoksaj yaj! stzun Jonatán.
3 Poro nin oc Luwiy chꞌinchꞌuj:
—Sak swutz Ryos yi tajbil ataj iꞌtz tan imbiyleꞌn cuꞌn. Nin na el xtxum iꞌ tetz yi aẍatz na cẍpekꞌ sweꞌj, nin quil tal tzatz yi mbi na xtxum tan banleꞌn sweꞌj tan qui abisuneꞌn. Sak swutz Ryos nin tzawutz yi jun cuꞌn txant tan tuleꞌn yi quimichil tzinwutz, stzun Luwiy tetz Jonatán.
4 —Ko yaꞌtz bintzij, chij Jonatán, —¿mbiꞌtz na awaj yil tzimban tan awuchꞌeyeꞌn?
5 —Je puntileꞌj, chij Luwiy, —eklen yaꞌstzun yil xeꞌtij yi nim kꞌej yi na bajij yi na jeꞌul yi neꞌẍ xaw,a nin ilenin tajweꞌn tan inwaneꞌn tu ataj tul yi kꞌejaꞌtz. Poro baꞌnt cuꞌn quil chimben, ma na tzꞌelpon wewal wib xoꞌl wutz jalen caꞌpen cweꞌn kꞌej. 6 Ej nin kol jak ataj yi naꞌ atineꞌt, baꞌn tzawal tetz yi ja injak amaꞌl tzatz tan imbeneꞌn lajkeꞌl jalen Belén, yi weri intanum, tan ticyꞌseꞌn yi kꞌej yi na bajij ẍchixoꞌl yi eꞌ inxonl cyakil yob. 7 Ej nin kol tal iꞌ yi baꞌn, na tzun elepont yi qui tajweꞌn chimbisun, poro kol jeꞌ lajpuj wiꞌ, iꞌtz jun techl yi jun cuꞌn ja bixeꞌ taꞌn tan imbiyleꞌn cuꞌn. 8 I bin jaluꞌ, in achakum, nin ja bixeꞌ jun katrat swutz Kataj tan kuchꞌeyal kib skibil kib. Banaj bin jun pawor swetz. Ko in ajpaj baꞌn cẍoꞌc tan imbiyleꞌn cuꞌn. Quiꞌc na takꞌ yi nink cẍoꞌc tan injatxleꞌn nin tkꞌab ataj. Baꞌn yi ko aẍteꞌn cẍoꞌc tan imbiyleꞌn cuꞌn, stzun Luwiy tetz Jonatán.
9 —¡Quil tzatxum jun ajtzaꞌklaꞌtz! Na ko yaꞌtz tajbil intaj tan abiyleꞌn cuꞌn, ilen nin swaleꞌ tzatz, stzun Jonatán.
10 —¿Poro ẍeꞌn tzꞌul rason tinwiꞌ ko jun cuꞌn na chiꞌch cꞌuꞌl ataj sweꞌj? stzun Luwiy.
11 —Quin sweꞌj, chij Jonatán, —baꞌn kaben tan xoꞌn wutz wutz tan yol.
—Sak swutz Ryos, yi chwaꞌn nin ekl, nka caꞌp nocpon tan jakleꞌn tkanil yi mbiꞌtz xtxumuꞌn intaj. Yi ko qui na tzan tan xtxumleꞌn tan abiyleꞌn cuꞌn tzꞌopon stziblal waꞌn tawiꞌ. 13 Poro ko txumijt taꞌn tan abiyleꞌn cuꞌn, nink tzꞌoc Kataj Ryos tan incawseꞌn cunin ko quil tzꞌopon rason waꞌn tawiꞌ, nin ko quil noꞌc tan awuchꞌeyeꞌn tan aweleꞌn liwr. ¡Takꞌ tzaj bin Kataj banl tzawibaj, chi banak iꞌ tenẍchan teꞌj intaj! 14 Ma jaluꞌ, ko quil chin quim chan, nink jal banl awalmaꞌ sweꞌj, chi yi banl talmaꞌ Kataj yi mban tzaweꞌj sajleꞌn tunintz. 15-16 Ma kol chinquim chan, ilen nink jal banl awalmaꞌ scyeꞌj innajal.b ¡Nink tzꞌoc Kataj tan chicawseꞌn yi eꞌ acontr, nink tzꞌoc tan chisotzajeꞌn cuꞌn! chij Jonatán.
Tan yi xtxolbilaꞌtz ja bnix jun trat tan Jonatán tu Luwiy. 17 Nin tan yi pekꞌeꞌn yi at tan Jonatán te Luwiy, nin tzun bixeꞌ junt tir chiyoltz cyaꞌn, yi ilen nin ẍchichꞌeyeꞌ quib squibil quib, na wiꞌnin na pekꞌ Jonatán te Luwiy chi na pekꞌ iꞌ stibil tib. 18 Nin je yol Jonatán yi taleꞌj:
—Eklen yaꞌstzun yil xeꞌtij yi kꞌej tetz yi acꞌaj xaw, nin quibiẍ sbneꞌ le acꞌolchbil ẍchixoꞌl yi eꞌ xtxocum rey. Poro quil chinachon teꞌj yi quibix atiẍ ẍchixoꞌl. 19 Ma le toxiꞌn kꞌej slajluchaxk ẍchiwutz yi quibiẍ ẍchixoꞌl. Chaꞌstzun te baꞌn cẍben junt tir tan ew ib wutzcoc yi jun chin tenaj cꞌubaꞌtz kale acolol awib te wiꞌtzbil tir yi chiꞌch cꞌuꞌl intaj tzaweꞌj. 20 Nin mben incꞌoxol ox flech tetz techl nakajil yi jun tenaj cꞌubaꞌtz, ik yi choꞌnk na chintzan tan techeꞌn nin te jun takleꞌn. 21 Nin swaleꞌ tetz yi chakum yi xomij sweꞌj: “Cun joy yi eꞌchk flech.” Nin yil ben tan joyleꞌn chin ẍchiꞌnk nin tzun tetz: “Yi eꞌchk flech choꞌn ateꞌ nakaꞌj tzinwutz, cyꞌajweꞌ tzaj.” Na tzun elepontz yi baꞌn cẍeꞌl tzaj kale na aweꞌweꞌt awib na quiꞌc jun il sbajok tzaweꞌj. Sak swutz Ryos nelpon cuꞌn te inyol. 22 Poro kol wal nin tetz inchakum: “Yi eꞌchk flech choꞌn ateꞌ joylaj muꞌẍ kale atixeꞌt,” baꞌn tzun cẍeꞌl ojktz, na yaꞌstzun tajbil Kataj Ryos tan aweleꞌn ojk. 23 Ma yi kayol yi ja wiꞌt bixeꞌ kaꞌn, quil xit sbneꞌ opon tunintz, na yi testiw kayol iꞌtz Kataj Ryos, stzun Jonatán bantz.
24 Ej inin tzun tulej Luwiytz, nin tzun el tewal tibtz. Ma yi xeꞌteꞌn yi kꞌejaꞌtz yi na jeꞌul yi acꞌaj xaw, nin tzun wan yi rey ẍchixoꞌl yi eꞌ wiꞌtz ajcaw. 25 Choꞌn cꞌoleweꞌn kale na cꞌoleweꞌt nintz nakajil yi tapij. Ma tetz Jonatán choꞌn cꞌoleweꞌn swutz cuꞌn. Ma Abner choꞌn cꞌoleweꞌn xlaj Saúl. Ma yi cꞌolchbil Luwiy, cyaꞌl cꞌoleꞌ-tz tul. 26 Nin tul yi bajx kꞌej quiꞌc jun yol tal Saúl yi quiꞌc Luwiy le tetz cꞌolchbil, na nin xtxum yi quicunin batz iꞌtz tan paj yi qui nin xansaj tib tan jun til. 27 Ma le caꞌpiꞌn kꞌej te yi jun chin kꞌejaꞌtz, iteꞌn nin banaꞌs, qui ẍchaj tib Luwiy. Jakol tzun Saúl tetz Jonatán:
—¿Mbi tzuntz yi quinin ul yi cyꞌajl Isaí tan waꞌaꞌn ewt skaxoꞌl, nin nchaꞌtz jaluꞌ cyaꞌl nẍchaj tib? stzun iꞌ tetz Jonatán.
28 —Ja tal Luwiy swetz yi chin tajweꞌn cunin tan beneꞌn iꞌ jalen Belén. 29 Nin cuꞌ wutz swetz tan wakꞌol amaꞌl tetz tan beneꞌn, na yi eꞌ taj chocpon tan pateꞌn chitxꞌixwatz, nin ja tal yi stzicy tetz yi tajweꞌn tan taꞌteꞌn iꞌ scyeꞌj. Nchaꞌtz ja tal Luwiy swetz yi kol tzimban yi jun paworaꞌtz tetz, mben tzaj tzuntz tan chixajseꞌn cyakil yi eꞌ xonl iꞌ. Chaꞌstzun te iluꞌ inreyil, quiꞌc iꞌ at tan waꞌaꞌn skaxoꞌl.
30 Sajeꞌn tzun colpuj wiꞌ Saúl te Jonatán:
—¡Quiꞌc awajtzaꞌkl, aẍ tuꞌ tal jun wiꞌtz bnol tetz! Na na el intxum tetz yi aẍ mero tamiw nocx yajaꞌtz. Chin txꞌixwil nin tuꞌ iwutz tu atxuꞌ tan paj yi awajtzaꞌkl. 31 Qui peꞌ na el atxum tetz, te yi itzꞌeꞌt Luwiy, quiꞌc rmeril tan awoqueꞌn cyen tetz rey. ¡I bin jaluꞌ baꞌn cẍben tan ticyꞌleꞌn tzaj, na tajweꞌn tan quimeꞌn waꞌn!
32 —¿Poro mbi tzuntz yi tajweꞌn tan quimeꞌn, na quiꞌc tetz til? chij Jonatán.
33 Yi tlol Jonatán yi jun yolaꞌtz, beneꞌn tzun cꞌoxol Saúl yi lans teꞌj tan biyleꞌn cuꞌn kloꞌ, poro lajkeꞌl nin teleꞌn xajsal tib. Qui nin tzꞌamon teꞌj. Teleꞌn tzun xtxum Jonatán tetz yi nsken bixeꞌ cunin tan yi taj tan biyleꞌn cuꞌn Luwiy. 34 Jeꞌn tzun txiclok Jonatán nin eltz, wiꞌnin ẍchiꞌcheꞌn cꞌuꞌl iꞌ, nin quinin wan te jun kꞌejaꞌtz tu yi caꞌp kꞌej te yi jun chin tzatziꞌnaꞌtz. Wiꞌnin bisuneꞌn iꞌ na nin el kꞌajab te Luwiy. 35 Ma le junt eklok nin tzun bentz wutz wutz tan yol tu Luwiy chi yi bixeꞌ cyaꞌn, nin ben tcyꞌal jun xicy tetz ẍchꞌeyum. 36 Ej nin tzun taltz tetz yi ẍchꞌeyumaꞌtz:
—Cun joy eꞌchk flech yil noꞌc tan cꞌoxleꞌn nin.
Jalcunin tzun beneꞌn yi xicy tan joyleꞌn. Poro nin ben cꞌoxol jun flech mas joylaj swutz yi xicy. 37 Yi toponeꞌn yi xicy kale atit yi flech ẍchꞌineꞌn nin tzun Jonatán tetz:
Beneꞌn tzun yi xicy tan ticyꞌleꞌn tzaj yi flech nin pakxij te Jonatán yi patrón. 39 Quinin pujx taꞌn yi mbi na elepont cyakil yi xtxolbileꞌj, na ntin Jonatán tu Luwiy mmeꞌl chitxum tetz. 40 Beneꞌn tzun tkꞌol Jonatán yi maꞌcl tetz yi xicy, nin taltz tetz tan pakxeꞌn le tnum.
41 Te yi nsken aj yi xicy nin tzun eltzaj Luwiy wutz coc yi jun tenaj cꞌubaꞌtz. Nin cuꞌ mejloktz, nin cuꞌ ox tir yi wiꞌ-tz wuxtxꞌotxꞌ swutz Jonatán. Nin tzun chitzekꞌsaj quibtz. Wiꞌnin cyokꞌeꞌntz chicabil jalen yi ticyꞌeꞌn paj Luwiy tan oꞌkl. 42 Tlol tzun Jonatán tetz Luwiy:
—Cheb cuꞌn cẍben, na ja wiꞌt bnix katrat swutz Ryos. Tzꞌocpon iꞌ tan kuchꞌeyeꞌn bantz teleꞌn cuꞌn kakꞌab te kayol yi sukiꞌnt kakꞌun skibil kib, chij Jonatán bantz.
Beneꞌn tzun Luwiy joylaj, ma Jonatán nin pakxij le tnum.