Yi joyol Saúl junt puntil tan biyleꞌn cuꞌn Luwiy
19
1 I tzun bantz nin tzun tal Saúl scyetz Jonatán scyuchꞌ yi eꞌ mas wiꞌtz cyajcawil yi eꞌ sanlar, tan biyleꞌn cuꞌn Luwiy. Poro tan paj yi wiꞌnin na pekꞌ Jonatán te Luwiy 2 nin tzun bentz tan talcheꞌn tetz:—Na tzan intaj tan joyleꞌn puntil tan abiyleꞌn cuꞌn. Joyaj bin puntil tan awewal awib te jun akꞌbaleꞌj. Joyaj jun amaꞌl kale quil cẍjaleꞌt, nin baꞌn cẍcyaj tul jalen yil tzꞌul skil eklen. 3 Yi in wetz chinxomok nin teꞌj intaj nakaꞌjil yi amaꞌl kale atiẍeꞌt. Nin tzinjoyeꞌ puntil tan cuꞌseꞌn tzaj xtxumuꞌn, nin kol cutzaj xtxumuꞌn ilenin swaleꞌ tzatz.
4 Ej nin tzun jilon Jonatán tu taj nin xtxol iꞌ yi balajil Luwiy tetz, nin je yol iꞌeꞌj:
—Wajcaw, baꞌnt cuꞌn quil juchuꞌ tiluꞌ tan tuꞌ biyleꞌn cuꞌn yi prow Luwiy, yi ẍchakumuꞌ, na quiꞌc jun eꞌchk takleꞌn yi ploj mban iꞌ teꞌjuꞌ, cyakil yi na ban iꞌ, iꞌtz chumbalaj nin, nin iꞌtz tan jalseꞌn kꞌejuꞌ. 5 Na ja takꞌ tib tkꞌab quimichil yi toqueꞌn tan biyleꞌn cuꞌn Goliat yi filistey, nin ja xcyeꞌ Ryos tan kaclaxeꞌn yi oꞌ xonl Israel tan yi mbi ban Luwiy. Sak swutzuꞌ yi xtxolbilaꞌtz nin ja tzatzinuꞌ teꞌj. Baꞌnt cuꞌn quil juchuꞌ tiluꞌ tan biyleꞌn cuꞌn, na quiꞌc tetz til. Quiꞌc xeꞌ kol tzꞌocuꞌ tan biyleꞌn cuꞌn.
6 Nin tzun cutzaj xtxumuꞌn Saúl tan yi xtxolbil yi tal yi cyꞌajl tetz:
—Jun cuꞌn yol sak swutz Kataj Ryos, quiꞌt noꞌc tan joyleꞌn puntil tan biyleꞌn cuꞌn Luwiy, chij Saúl bantz.
7 Beneꞌn tzun Jonatán tan xtxoleꞌn tetz Luwiy yi mbi cuꞌn eꞌ jilon teꞌj tu taj. Nin ben tcyꞌal iꞌ Luwiytz tu yi rey Saúl yi taj, nin cyaj iꞌ junt tirtz.
8 Yi teleꞌn tiemp nin bajij junt chin oyintziꞌ scyuchꞌ yi eꞌ filistey. Nin eꞌ xcyeꞌ Luwiy tan chixiteꞌn cuꞌn, na nin eꞌ el ojkuj ẍchiwutz.
9 Ma tetz Saúl nin oc lacꞌpuj junt tir yi jun espíritu cachiꞌ te talmaꞌ te yi na tzan Luwiy tan tocseꞌn yi arpa swutz. 10 Cyꞌaꞌn jun lans taꞌn. Beneꞌn tzun cꞌoxoltz te Luwiy, poro qui nin tzꞌamon teꞌj na lajkeꞌl teleꞌn xajsal tib swutz. Choꞌn tzun toqueꞌn cyen yi lans tul xan. Nin tzun el ojk Luwiytz, nin el tewal tibtz te akꞌbalaꞌtz. 11 Toqueꞌn tzun Saúl tan chichakleꞌn cobox ẍchakum tan qꞌuicyꞌleꞌn yi caꞌl Luwiy, nin tan biyleꞌn cuꞌn jalchan cuꞌn le junt eklok.a Tlol Mical tetz Luwiy:
—Baꞌnt cuꞌn ewlen awib jalcuꞌneꞌj, na ko quiꞌ cẍquimok tan intaj eklen, chij.
12 Toqueꞌn tzun Mical tan ẍchꞌeyeꞌn, tan teleꞌn xe caꞌl. Choꞌn tzun teleꞌn Luwiytz tul wentanuꞌ nin el tewal tibtz. 13 Nin tzun cuꞌ tewal Mical jun teblal wunak jakꞌ xnoꞌkl, nin oc jun witzꞌ taꞌn yi banij tan xiꞌil chiw, tetz wiꞌ taneꞌn, nin jeꞌ jun xbuꞌktz taꞌn tibaj tircuꞌn. 14 Yi cyocomponeꞌn yi eꞌ ẍchakum Saúl tan stzꞌamleꞌn kloꞌ Luwiy, nin tzun tal Mical scyetz:
—Yabiꞌẍ Luwiy nin at iꞌ jakꞌ xnoꞌkl.
15 Poro nin eꞌ ben ẍchakol Saúl eꞌ ẍchakum junt tir tan tilweꞌn yi ko bintzij nin iꞌtz Luwiy. Nin tzun cawuntz scyetz tan tzajeꞌn cyekal Luwiy cyakil tu xtxꞌach:
—Ma yil tzꞌul itaꞌn tzinwutz, copon tzun imbiyoltz, stzun Saúl.
16 Nin tzun eꞌ ben junt tir xe caꞌl Luwiy, nin ja chinoj cyen teꞌj yi iꞌtz jun tuꞌ teblal wunak yi ewaꞌn jakꞌ xnoꞌkl, nin yi at jun witzꞌ yi banij tan xiꞌil chiw tetz wiꞌ taneꞌn. 17 Toqueꞌn tzun Saúl tan ẍchꞌoteꞌn stziꞌ Mical:
—¿Nxac ncẍoꞌc tan insubleꞌn? na ja awakꞌ amaꞌl tan teleꞌn ojk incontr.
—Taꞌ iꞌtz tan paj yi ja tal iꞌ swetz yi chincopon biyol ko quil noꞌc tan ẍchꞌeyeꞌn tan teleꞌn ojkuj, stzun Mical.
18 Yaꞌstzun bantz yi claxeꞌn Luwiy tkꞌab Saúl. Cyenin tzun toponeꞌn Luwiy te Samuel jalen Ramá, nin tzun oc xtxolil tircuꞌn yi mbi cuꞌn ban Saúl teꞌj. Chibeneꞌn tzun Luwiy tu Samuel tan najeweꞌn le tnum Naiot. 19 Yi tbital Saúl yi choꞌn at Luwiy Naiot cwent Ramá, 20 nin tzun eꞌ ben ẍchakol cobox sanlar tan stzꞌamleꞌn. Yi cyoponeꞌn nin quil yi at Samuel tu coboxt elsanl stziꞌ Ryos yi na chibixin nin yi na chibitzin. Cweꞌn muleꞌn tzun yi espíritu Kataj squibaj yi eꞌ ẍchakum Saúlaꞌtz nin iteꞌn nin tzun eꞌ ban cyetz, eꞌ bixin, nin eꞌ bitzin chi eꞌ ban yi eꞌ elsanl stziꞌ Ryos.
21 Yi tbital Saúl yi yaꞌtz bajij, nin eꞌ ben ẍchakol coboxt ẍchakum tan stzꞌamleꞌn Luwiy. Poro nchaꞌtz eꞌ, eꞌ oc tan bixl, nin tan bitz. Nin iteꞌn nin xtxolbilaꞌtz mbajij scyeꞌj yi toxiꞌn kꞌuꞌj ẍchakum Saúl. 22 Bixeweꞌn tzun tan Saúl tan beneꞌn Ramá tan stzꞌamleꞌn Luwiy. Poro yi toponeꞌn iꞌ te yi chumam julil aꞌ yi at le tnum Secú, ja tzun oc tan jakleꞌn tkanil Samuel tu Luwiy, nin ja cyal wunak yi choꞌn ateꞌ Naiot. 23 Te yi na xon tan toponeꞌn Naiot, nintzun cuꞌul yi espíritu cwent Kataj teꞌj iꞌ, nin ja oc lacꞌp te talmaꞌ. Ej nin nchaꞌtz tzun iꞌ-tz, nin oc tan bixl nin tan bitz te yi na xon tbeꞌ tan toponeꞌn le aldey Naiot. 24 Yi toponeꞌn Naiot, nin el tcyꞌal beꞌch tetz, nin oc tan bixl. Nin wiꞌnin ẍchꞌineꞌn swutz cuꞌn Samuel. Txꞌanl cuntuꞌ taneꞌn iꞌ, nin tzꞌamij yi tajtzaꞌkl tan yi espíritu Kataj te jun kꞌejaꞌtz, nin te jun akꞌbalaꞌtz.b Chaꞌstzun te ja cyal wunak: “¿Nchaꞌtz ptzun Saúl, elsanl stziꞌ Ryos peꞌ iꞌ?”c cheꞌch.