Yi bixeweꞌn taꞌn Jonatán tu Luwiy yi scyamiweꞌ quib sbneꞌ opon tunintz
18
1 I tzun bantz yi stzajeꞌn wiꞌ chiyol Luwiy tu Saúl, chin tamiw nin tzun Jonatán ban Luwiy, nin wiꞌnin pekꞌ iꞌ teꞌj, chi na pekꞌ iꞌ stibil tib. 2 Ma Saúl nin tzun cawuntz tan cyajeꞌn cyen Luwiy tuchꞌ, nin tan quiꞌt tajeꞌnt xe caꞌl scyeꞌj eꞌ taj. 3 Nin tzun bixeꞌ-tz cyaꞌn Jonatán tu Luwiy yi scyamiweꞌ quib tetz cyakil tiemp, na wiꞌnin na pekꞌ Jonatán te Luwiy, chi na pekꞌ iꞌ stibil tib. 4 Ej nchaꞌtz el tcyꞌal Jonatán yi tetz ẍchaquet yi cyꞌaꞌn taꞌn, tu yi xbuꞌk yi at cuꞌn tzkul, nin tzun takꞌ-tz tetz Luwiy, tu yi spar iꞌ, tu yi cꞌoxbil flech, tu yi cꞌalbil maꞌcl yi at xe cꞌuꞌl.5 Nin tzun lajluchaxtz yi chin list nin Luwiy na te tircuꞌn yi eꞌchk takleꞌn yi na tal Saúl tetz tan bnol, jalcunin na bnix taꞌn, nin chumbalaj nin na tulej. Chaꞌstzun te toqueꞌn iꞌ taꞌn tetz cyajcawil cobox sanlar, ej nin chumbalaj nin bantz ẍchiwutz cyakil yi eꞌ mas sanlar scyuchꞌ cyajcawil.
Yi ẍchiꞌcheꞌn cꞌuꞌl Saúl te yi balajil Luwiy yi jal ẍchiwutz wunak
6 Ej i tzun bantz, te yi chipakxeꞌn yi eꞌ sanlar tul oyintziꞌ nin te yi quimeꞌn yi jun filisteyaꞌtza tan Luwiy, nin tzun eꞌ eltzaj nil eꞌ xnaꞌn tan cꞌulcheꞌn yi rey Saúl. Wiꞌnin tzun chibitzineꞌntz nin cyꞌaꞌn len eꞌchk chimaꞌcl cyaꞌn tetz bitz, chi taneꞌn pandero tu eꞌchk platillo. 7 Nin je na cyaleꞌj: “Jun mil contr ja chiquim tan kareyil Saúl, ma Luwiy lajuj mil nchiquim taꞌn.”b
8 Nin tzun jeꞌ swutz Saúl yi xtxolbilaꞌseꞌj, nin nintzun jeꞌ lajpuj wiꞌ nin taltz: “Yi eꞌ wunak wiꞌnin na cyakꞌ kꞌej Luwiy nin na cyal yi ja chiquim lajuj mil contr taꞌn, ma wetz juneꞌn tuꞌ mil. Jalt cuntuꞌ yil tzꞌoc cyen iꞌ cyaꞌn tetz rey,” stzun Saúl bantz. 9 Jetzaꞌtz quiꞌt pekꞌ mas Saúl te Luwiy.
10 Ma le junt eklok te yi ateꞌ nin le palacio, nin tzun oc junt tir yi jun espíritu yi na takꞌ, bis te talmaꞌ Saúl, nin tzun oc yabtz twiꞌ. Ma tetz Luwiy, na choꞌn na tzan tan tocseꞌn yi arpa, chi na ban cyakil kꞌej, ma tetz Saúl cyꞌaꞌn yi lans taꞌn le kꞌab. 11 Jalt cuntunin yi beneꞌn cꞌoxol Saúl yi lans teꞌj Luwiy. Na yi tajbil Saúl iꞌtz tan cyajeꞌn cyen kloꞌ lacꞌlchok Luwiy wutz xan, poro yi Luwiy cob cuꞌn tir xcyeꞌ tan coloꞌn ib tkꞌab yi lansaꞌtz yi saj cꞌoxol Saúl.
12 Nin tzun xob Saúltz tetz Luwiy, na ilenin xomij Kataj tan ẍchꞌeyeꞌn, ma tetz Saúl quiꞌt oc Kataj tan ẍchꞌeyeꞌn. 13 Chaꞌstzun te bixeweꞌn tan Saúl tan telseꞌn Luwiy xlaj iꞌ, nin octz taꞌn tetz jun wiꞌtz cyajcawil jun mil sanlar, nin cyakil tir yi na chiben chakij te jun oyintziꞌ, bajxij Luwiy ẍchiwutz. 14 Poro tan paj yi ilenin xomij Kataj te Luwiy, ja tzun txꞌacontz te chicontr, nin baꞌn na ban tircuꞌn yi na ban iꞌ. 15 Chaꞌstzun te wiꞌnin xobeꞌn Saúl tetz Luwiy. 16 Poro tircuꞌn yi eꞌ aj Israel scyuchꞌ yi eꞌ aj Judá, eꞌ pekꞌ teꞌj iꞌ, na iꞌ bajxij ẍchiwutz yi eꞌ sanlar yi na cheꞌl le chitanum, nin bajxij ẍchiwutz yi na chipakx tzaj junt tir.
17 Ej i tzun bantz, nin tzun tal Saúl tetz Luwiy:
—Swakꞌeꞌ yi Merab yi bajx inmeꞌl tzatz, tan toqueꞌn tetz awuxkel, poro tajweꞌn tan awoqueꞌn tetz jun insanlar yi chin cham nin, nin tajweꞌn tan abeneꞌn tan oyintziꞌ tetz jun sanlar Kataj Ryos.
Na nin xtxum Saúl yi qui tajweꞌn tan cweꞌn biyol iꞌ Luwiy, ma na choꞌn squimok ẍchikꞌab yi eꞌ filistey. 18 Ej i tzun tal Luwiy tetz:
—Yi in wetz quiꞌc muꞌẍ inkꞌej. Nchaꞌtz yi eꞌ inxonl, quiꞌc cyetz chikꞌej ẍchiwutz yi eꞌ mas katanum. Chaꞌstzun te quiꞌc inkꞌej tan woqueꞌn tetz jiꞌuꞌ taꞌ.
19 Ma yi toponeꞌn yi tiemp tan tkꞌol kloꞌ Merab tetz Luwiy, quiꞌt oc tetz txkel Luwiy ma na txkel Adriel, yi aj Mehola, ban. 20 Ma yi Mical, yi junt meꞌl Saúl, wiꞌnin na pekꞌ-tz te Luwiy. Wiꞌnin tzun stzatzineꞌn Saúl yi tbital yi xtxolbilaꞌtz. 21 Ej nin tzun icyꞌtz tcꞌuꞌl: “Baꞌn bin wakꞌ Mical tetz txkel Luwiy, nin baꞌn xcon Mical waꞌn tan cweꞌn tul tramp, tan quimeꞌn iꞌ ẍchikꞌab yi eꞌ filistey.”
—Ma jaluꞌ Luwiy cẍocopon tetz injiꞌ, stzun Saúl ban junt tir.
22 Cawuneꞌn nintzun scyetz yi eꞌ ẍchakum tan cyoqueꞌn tan tocseꞌn cꞌuꞌl Luwiy, tan cyumeweꞌn tu Mical. Nin je yol iꞌ yi talol scyetz yi eꞌ ẍchakum tan talcheꞌn quen tetz Luwiy:
—Wiꞌnin na pekꞌ yi kareyil tzaweꞌj. Nchaꞌtz yi eꞌ wiꞌtz ajcaw yi ateꞌ xlaj, na chipekꞌ tzaweꞌj, chaꞌstzun te baꞌn cxuꞌmeꞌ tu Mical yi meꞌl kareyil.
23 Nin tzun chitxol yi xtxolbilaꞌtz tetz Luwiy, poro je yol Luwiy yi tal:
—Yi nink tzꞌoc jun tetz jiꞌ yi rey sjalok wiꞌnin kꞌej. Poro yi in wetz, in tuꞌ jun prow sloj wunak, nin quiꞌc muꞌẍ inkꞌej tan woqueꞌn tetz jiꞌ yi rey, chij Luwiy.
24 Cyalol tzun yi eꞌ ẍchakum Saúl tetz yi yol yi tal Luwiy scyetz. 25 Ja tzun cawun Saúl scyetz tan talcheꞌn yi xtxolbileꞌj tetz Luwiy:
—Yi rey qui na taj muꞌẍ jamel yi xun, ntin na taj iꞌ jun cient piẍ tzꞌuꞌm tetz chichiꞌol yi eꞌ filistey yi ẍchiquimok awaꞌn, tan ticyꞌsal yi rey cꞌuꞌl scyeꞌj yi eꞌ tetz contr.
Yi tajbil Saúl iꞌtz yi nink quim Luwiy cyakꞌun yi eꞌ filisteyaꞌtz.
26 Chibeneꞌn tzun yi eꞌ ẍchakum Saúl tan xtxoleꞌn yi xtxolbilaꞌtz tetz Luwiy. Yi tbital iꞌ, wiꞌnin tzun stzatzineꞌntz yi ntinaꞌtz na taj tan toqueꞌn tetz jiꞌ yi rey. 27 Te ntaxk jepon yi kꞌejlal tan cyumeweꞌn, chibeneꞌn tzun Luwiy scyuchꞌ yi eꞌ sanlar, nin ja chixcyeꞌ tan chibiyleꞌn cuꞌn cob cient filistey. Nin ja el chikuxul yi tzꞌuml yi chichiꞌol yi eꞌ yajaꞌtz yi eꞌ quim cyaꞌn. Nin ja opon tan takꞌleꞌn swutz yi rey, bantz toqueꞌn Luwiy tetz jiꞌ iꞌ. Tkꞌol tzun Saúl yi meꞌl tetz txkel Luwiy.
28 Yi teleꞌn xtxum Saúl tetz yi xomij Kataj te Luwiy, nin yi wiꞌnin na pekꞌ Mical teꞌj, 29 mas tcunin tzun xobeꞌntz tetz Luwiy, nin octz tetz contr iꞌ tetz cyakil tiemp. 30 Te yi jun tiempaꞌtz wiꞌnin cyuleꞌn yi eꞌ sanlar filistey tan oyintziꞌ scyeꞌj yi eꞌ xonl Israel. Mas teꞌn cuꞌn xcyeꞌ iꞌ ẍchiwutz yi eꞌ mas capitán cwent Israel tan chilajeꞌn len yi eꞌ filistey. Chaꞌstzun te nin jal wiꞌnin kꞌej iꞌ ẍchiwutz cyakil wunak.