Yi quimeꞌn Saúl scyuchꞌ yi eꞌ cyꞌajl tul oyintziꞌ
(1Cr 10:1-12)
31
1 Ej i tzun bantz nin tzun eꞌ ben yi eꞌ filisteyaꞌtz tan oyintziꞌ scyeꞌj yi eꞌ xonl Israel, poro yi eꞌ xonl Israel qui nin eꞌ xcyeꞌ cyen scyeꞌj, ma na nin eꞌ el ojkuj ẍchiwutz, nin wiꞌnin eꞌ, eꞌ quim wi yi juꞌwtz Gilboa. 2 Chixomeꞌn nintzun yi eꞌ filistey tan stzꞌamleꞌn Saúl scyuchꞌ yi eꞌ cyꞌajl. Nin tzun quim Jonatán cyaꞌn, tu Abinadab nin Malquisúa. 3 Ej nin tzun oc chitxꞌanul quibtz tan oyintziꞌ te Saúl. Nin tan paj yi baꞌn tcunin chicꞌoxon flech yi eꞌ filistey yi xomcheꞌ nin tan biyleꞌn cuꞌn, nin tzun qꞌuixpijtz cyaꞌn. Xobeꞌn tzun Saúltz scyetz. 4 Tlol tzun iꞌtz tetz yi ẍchꞌeyum yi xomij teꞌj:—Cyꞌajeꞌn tzaj aspar, nin biycuꞌn in, bantz nkꞌeꞌtz yi eꞌ awer nakaꞌtz chimbiyon cuꞌn, nin bantz quil chitzeꞌeꞌn sweꞌj, te ntaxk chinquim cyaꞌn, stzun iꞌ tetz yi ẍchakum.
Poro yi ẍchꞌeyum qui nin tzun cujijtz, na wiꞌnin xobeꞌn. Ej, jeꞌn tzaj tzun tcyꞌal Saúl yi tetz spar nin cuꞌ xtxicbaltz wuxtxꞌotxꞌ, nin ben jokloktz tibaj. 5 Yi tilol yi chꞌeyum yi nsken wiꞌt quim Saúl, iteꞌn nin tzun tulej tetz, nin cuꞌ xtxicbal yi spar wuxtxꞌotxꞌ, nin ben joklok tibaj, nin quimtz. 6 Yaꞌstzun bantz yi chiquimeꞌn Saúl scyuchꞌ yi ox cyꞌajl tu yi ẍchꞌeyum yi xomij teꞌj, nin scyuchꞌ cyakil yi eꞌ sanlar iꞌ. 7 I tzun yi quilol yi eꞌ xonl Israel yi najlcheꞌ le jalajt cyꞌen yi amaꞌlaꞌtz swutz len yi aꞌ Jordán, yi wiꞌnin cyeleꞌn ojkuj yi eꞌ sanlar nin yi nsken wiꞌt chiquim Saúl scyuchꞌ yi ox cyꞌajl, nin tzun eꞌ el ojkujtz tulak chitnumil. Ej nin tzun eꞌ opon yi eꞌ filisteytz tulak yi eꞌchk tnumaꞌtz tan najeweꞌn.
8 Ma le junt eklok yi cyoponeꞌn yi eꞌ filistey tan majleꞌn len chimaꞌcl yi eꞌ almaꞌ, nin tzun eꞌ nojquentz te wankil Saúl tu chiwankil yi ox cyꞌajl wi yi juꞌwtzaꞌtz yi na biꞌaj Gilboa. 9 Nin tzun el chikuxul yi wiꞌ Saúl. Nchaꞌtz el chimajol yi eꞌchk maꞌcl, nin tzun eꞌ ben chakumtz cyaꞌn tan xoꞌmbeꞌn cyakil yi chiꞌamaꞌl tan xtxoleꞌn tulak eꞌchk caꞌlil chiryosil yi mbi cuꞌn bajij scyeꞌj yi eꞌ xonl Israel. 10 Nin tzun oc cyen yi eꞌchk maꞌcl kꞌajtzun Saúl cyaꞌn le caꞌl chiryosil Astarté, nin tzun jeꞌ chichꞌimbal yi wankiltz swutz yi chin wutzileꞌn tapij tetz yi tnum Bet-sán.
11 Ma yi quibital yi eꞌ aj Jabes cwent Galaad yi mbi cuꞌn baj chibnol yi eꞌ filistey te Saúl, 12 nin tzun oc chiyol tircuꞌn yi eꞌ yaj yi chin cham nin eꞌ tan chibeneꞌn tan ticyꞌleꞌn tzaj. Cyakil tzun yi jun akꞌbalaꞌtz chixontz. Yi cyoponeꞌn, nin tzun cutzaj yi wankil kꞌajtzun Saúl cyaꞌn swutz yi chin tapij cwent Bet-sán scyuchꞌ yi ox cyꞌajl. Eꞌ pakxeꞌn tzuntz Jabes le chitnumil. Cyꞌaꞌn chiwankil Saúl cyaꞌn. Ej nin yi cyoponeꞌn, nin tzun eꞌ oc tan stzꞌeꞌseꞌn yi chiwankilaꞌtz wi kꞌakꞌ. 13 Ej choꞌn tzun mukxeꞌn chibakiltz le amaꞌl Jabes, jak jun wiꞌ tzeꞌ. Ma yi mukxeꞌn chibakil, nin tzun chimucꞌ weꞌj tetz juk kꞌej. Saúl, yi chireyil.