Yi mbi cunin eꞌ ban yi eꞌ xonl Israel te yi il yi bajij Gabaa
20
1 Ej itzun bantz tircunin tzun yi eꞌ aj Israel, yi najlcheꞌ cwent Dan, jalen Beerseba tuml yi amaꞌl tetz Galaad, baj cuꞌ chimolol quibtz. Ej nin junit ban chitxumuꞌn le amaꞌl Mizpa, swutz Kataj Ryos. 2 Tircunin tzun yi eꞌ wiꞌtz cyajcawil yi jujun kꞌuꞌj xonl Israel, ateꞌ lentz. Cyaj tzun cient mil sanlar tetz yi tanum Kataj Ryos eꞌ mol quibtz le jun amaꞌlaꞌtz. 3 Nin tzun quibit yi eꞌ xonl kꞌajtzun Benjamín, yi nsken wiꞌt chimol quib tircuꞌn yi eꞌ aj Israel le tnum Mizpa. Cyoqueꞌn tzun yi eꞌ aj Israelaꞌtz tan jakleꞌn tkanil tetz yi levita, yi ẍeꞌn cuꞌn mban yi jun chin ilaꞌtz. 4 Beneꞌn tzun tlol yi chmil yi kꞌajtzun almaꞌ, yi mbi cunin bajij. Je tzun taltzeꞌj:—Choꞌn koponeꞌn le tnum Gabaa chitanum yi eꞌ xonl kꞌajtzun Benjamín tu yi caꞌb wuxkel taneꞌn, tan watl te jun akaleꞌnaꞌs. 5 Poro te iteꞌn nin akaleꞌnaꞌs nin eꞌ opon yi eꞌ wunak yi najlcheꞌ-tz tan suteꞌn teꞌj yi cꞌal kale oꞌ cyajeꞌt cyen tan posariꞌn, nin yi cyajbil iꞌtz tan imbiyleꞌn kloꞌ. Poro quiꞌ, ntin ja choꞌc tan banleꞌn cyajbil te yi caꞌb wuxkel. Ej nin ja quim cyaꞌn. 6 Nin tzun saj wucyꞌal yi wankil, nin tzun cuꞌ impiẍultz nin tzun ben inmantartz tan ẍchajleꞌn tircuꞌn yi eꞌchk piẍaꞌl lakak amaꞌl cwent Israel bantz quibital wunak yi jun xtxolbileꞌj yi chin juntlenin yi mbajij. 7 Ma jaluꞌ, choꞌn lcyaj cyen waꞌn ẍchiwutzuꞌ, eꞌuꞌ xonl kamam Israel tan xtxumleꞌn yi mbil cyaj cyent yi jun ilaꞌtz yi chin txꞌixwil nin yi ja bajij Gabaa, stzun yi chmil yi kꞌajtzun almaꞌ.
8 Tircunin tzun eꞌ, eꞌ jeꞌ txicloktz nin junit ban cyajtzaꞌkl, itzun cyaltz:
—Je bin skabneꞌ-eꞌj: Cyaꞌl jun sketz spakxok xeꞌak kanajbil. 9 Ej nin kocopon tan txꞌiluꞌn teꞌj yi naꞌj scyetz eꞌ skaxoꞌl yi baꞌn kaben tan oyintziꞌ scyeꞌj yi eꞌ aj Gabaa. 10 Ej nin nchaꞌtz baꞌn kabixbaj jun teꞌjak yi lajuj kaxoneꞌn yi baꞌn chiben tan ticyꞌleꞌn kawaꞌ. Ma yi oꞌ ketz yil kacyaj cyen, baꞌn kaben tan oyintziꞌ scyeꞌj yi eꞌ aj Gabaa tan chicawseꞌn tan yi il, yi chin txꞌixwil nin yi mbajij skaxoꞌl yi oꞌ aj Israel, cheꞌch tzun bantz.
11 Ej, junit tzun ban cyajtzaꞌkl yi eꞌ aj Israelaꞌtz tan chibeneꞌn tan oyintziꞌ te yi tnumaꞌtz. 12 Nin tzun eꞌ ben chakumtz cyaꞌn tulak eꞌchk amaꞌl cwent yi eꞌ xonl Benjamín, tan talcheꞌn scyetz: “Chin xaꞌbil nin yi il yi ja wiꞌt bnix cyakꞌun cobox itanum. 13 Baꞌnt cuꞌn akꞌwokeꞌ yi cobox yajaꞌtz sketz yi choꞌn najlcheꞌ Gabaa, tan chicweꞌn kabiyol, na chin xaꞌbil nin cyajtzaꞌkl. Na tajweꞌn teleꞌn yi jun yab ajtzaꞌklaꞌtz skaxoꞌl bantz koqueꞌn junt tir tetz balaj,” cheꞌch tzun eꞌ chakumaꞌs bantz beneꞌn tziꞌn yi amaꞌl cwent Benjamín.
Poro qui nin ocopon chiyol yi eꞌ aj Israel te chiwiꞌ yi eꞌ xonl Benjamín. 14 Ma na tircunin yi eꞌ xonl kꞌajtzun Benjamín ben chimolol quibtz jalen Gabaa tan oyintziꞌ scyeꞌj. 15 At junak wukak mil sanlar yi aj Benjamín chimol quibtz. Nin nchaꞌtz at juk cient sanlar yi aj Gabaa. 16 Ej nin ẍchixoꞌl yi jun cꞌoloj sanlaraꞌtz, at juk cient yi max len cuꞌn chicꞌoxon, nin yi chin ẍcꞌatnak nin eꞌ tan xconseꞌn yi cꞌoxl na jun cuꞌn na cyulej te alchok takleꞌn yi yaꞌtz cyajbil tan loꞌonseꞌn. 17 Ej ma tzun yi junt txꞌakaj xonl Israel nin tzun eꞌ molxij cyaj cient mil sanlar cyaꞌn, yi naꞌwnakeꞌt tan oyintziꞌ.
Yi bajeꞌn yi oyintziꞌ scyuchꞌ yi chixonl kꞌajtzun Benjamín
18 Ej nin tzun eꞌ ben yi eꞌ aj Israeltz jalen Betel. Choꞌn tzun chijakoltz tetz Kataj Ryos yi naꞌ scyetz jun kꞌuꞌj xonl Israel yi baꞌn chiben bajx tan oyintziꞌ scyeꞌj yi eꞌ xonl Benjamín. Nin tzun tal Kataj Ryostz scyetz yi baꞌn chiben yi eꞌ xonl kꞌajtzun Judá. 19 Ej chin jalchan cunin tzun chicꞌaseꞌn yi eꞌ xonl Israel tan cyoponeꞌn juꞌk nakaꞌjil yi tnum Gabaa. 20 Itzun yi cyoponeꞌn, nin tzun cuꞌ chitxolil quibtz tan oyintziꞌ nakaꞌjil cunin yi tnum Gabaa. 21 Poro yi eꞌ xonl Benjamín qui nin eꞌ xob, na nin eꞌ el tzajtz tan oyintziꞌ, nin te jun tiraꞌtz eꞌ quim junak cob mil aj Israel cyaꞌn. 22-24 Ej tan yi xtxolbilaꞌtz nin tzun eꞌ ben yi eꞌ aj Israel jalen Betel, tan oꞌkl swutz Kataj Ryos jalen yi toqueꞌn akaleꞌn. Nin tzun chijaktz tetz Kataj Ryos yi ko baꞌn chiben junt tir tan oyintziꞌ scyeꞌj yi eꞌ xonl kꞌajtzun Benjamín. Nin tampaj yi nin tal Kataj scyetz yi baꞌn chiben, nin tzun jal junt tir chiwalor. Ej nin tzun eꞌ bentz le junt eklok tan oyintziꞌ scyeꞌj, le iteꞌn nin amaꞌlaꞌtz kale eꞌ ẍchaꞌkeꞌt bajx tir. 25 Ej nin tzun eꞌ el tzaj junt tir yi eꞌ xonl Benjamín le tnum Gabaa tan oyintziꞌ scyuchꞌ, nin te junt tiraꞌtz eꞌ quim wajxaklaj mil sanlar yi eꞌ len cuꞌn aj Israel. 26 Tircunin tzun yi eꞌ sanlar tuml yi eꞌ wunak eꞌ bentz Betel, tan oꞌkl swutz Kataj Ryos. Nin qui nin eꞌ wan muꞌẍ taltz te jun kꞌejaꞌtz, nin tzun chipat eꞌchk chitxꞌixwatz tetz Kataj Ryos, tu eꞌchk oy tan jaleꞌn cuybil chipaj.
27-28 Nin te yi tiempaꞌtz choꞌn tzun at pon yi caẍaꞌ tetz Kataj Ryos le tnum Betel, nin yi paleꞌ banaꞌs na biꞌaj Finees, cyꞌajl Eleazar, nin mam kꞌajtzun Aarón. Nin yi eꞌ aj Israel nin tzun chijaktz tetz Kataj Ryos, itzun cyaltz: “¿Baꞌn peꞌ kol kaben junt tir tan oyintziꞌ scyuchꞌ yi eꞌ kaxonl yi xonl kꞌajtzun Benjamín, nko baꞌn yi tul cyaj tuꞌs kaꞌn?” cheꞌch tzun bantz. I tzun saj tlol Kataj scyetz: “Quiloꞌk wok tan oyintziꞌ, na swakꞌeꞌ amaꞌl tzitetz tan ixcyeweꞌn eklen,” stzun Kataj Ryos bantz scyetz.
29 Ej nin tzun cyew quib cobox sanlar yi eꞌ aj Israel solteꞌj len yi tnum Gabaa. 30 Ej itzun le junt eklok eꞌ ben tircuꞌn yi mas sanlar tan oyintziꞌ scyeꞌj yi eꞌ xonl Benjamín quib chiban cyen yi cob tiraꞌtz. 31 Ej nin tzun eꞌ eltzaj junt tir yi eꞌ xonl Benjamín, tan chitzꞌamleꞌn. Nin tzun eꞌ xcyeꞌ-tz tan chibiyleꞌn junaklaj loꞌ sanlar aj Israel tulak eꞌchk beꞌ tetz Gabaa tu yi beꞌ yi na ben Betel nin txoꞌlak chꞌim. 32 Le wutz cyetz cyajtzaꞌkl yi eꞌ aj Israel eleꞌn ojkuj eꞌ ban ẍchiwutz, tampaj yi quiꞌt na chixcyeꞌ cyen scyeꞌj chi ban te cob tir cyen. Poro yi eꞌ aj Israel, nin el chiẍkansal quib joylaj len yi tnum tan chixomeꞌn nin chicontr tan chitzꞌamleꞌn, jalen lakak eꞌchk beꞌ joylaj len. 33 Cweꞌn tzun chimolol quib yi eꞌ aj Israel nin tzun eꞌ octz tan oyintziꞌ nakaꞌjil yi tnum Baal-tamar. Ma yi eꞌ yi cyewaꞌn quib solteꞌj yi tnum Gabaa, nin tzun eꞌ eltzajtz kale ateꞌt, 34 nin eꞌ octz tan oyintziꞌ le tnum. Ej lajuj tzun mil sanlar yi chin cham nin eꞌ tan oyintziꞌ eꞌ octz le tnum Gabaa. Nin chin xoꞌwbil nin ban, nin qui nin na el chitxum yi eꞌ xonl kꞌajtzun Benjamín ko txant tan cyeleꞌn cuꞌn swutz. 35 Nin tzun takꞌ Kataj Ryos amaꞌl scyetz yi eꞌ aj Israel tan chitxꞌaconeꞌn scyeꞌj yi eꞌ aj Benjamín, nin te jun kꞌejaꞌtz eꞌ quim junak oꞌ mil sanlar cwent Benjamín. 36 Ej nin tzun el chitxum yi eꞌ xonl kꞌajtzun Benjamín tetz yi nsken wiꞌt chitzꞌakon.
Yi eꞌ aj Israel yi wiꞌnin cyeleꞌn ojkuj taneꞌn, choꞌn kꞌuklij chicꞌuꞌl scyeꞌj yi eꞌ yi eꞌ cyaj cyen cyewal quib tan chicambal yi tnum Gabaa. 37 Na yi eꞌ sanlaraꞌtz yi cyeweꞌn quib, nin tzun eꞌ octz tan oyintziꞌ le tnum, nin tircuꞌn yi eꞌ wunak eꞌ quim cyaꞌn tan spar. 38 Nin tzun oc chitꞌinol kꞌaꞌkl yi tnum. Na nsken cyen oc chiyol teꞌj yi xconk yi sib tetz jun techl yi ja wiꞌt chicambaj yi tnum, 39 nin yil quiltzaj yi eꞌ aj Israelaꞌtz yil jeꞌ yi sib le tnum, bantz chixcyeweꞌn cuꞌn tan oyintziꞌ ẍchiwutz yi eꞌ xonl Benjamín.
Itzun yi eꞌ xonl Benjamín eꞌ xcyeꞌ tan chibiyleꞌn junaklaj aj Israel, nin le wutz cyetz cyajtzaꞌkl yi nsken wiꞌt chixcyeꞌ scyeꞌj, chi ban le bajx tir oyintziꞌ. 40 Poro icunin na chitzan tan oyintziꞌ yi beneꞌn quilol yi sken wiꞌt oc kꞌaꞌkl yi tnum. 41 Nin tzun eꞌ xcyeꞌ cuꞌn yi eꞌ aj Israeltz ẍchiwutz tan oyintziꞌ, nin tzun eꞌ xob yi eꞌ aj Benjamíntz, yi teleꞌn chitxum tetz yi jun chin wutzileꞌn il yi uleꞌn tlen tuꞌ atit ẍchiwutz. 42 Nin tzun eꞌ el ojkujtz ẍchiwutz yi eꞌ aj Israel le beꞌ yi na ben le amaꞌl tzꞌinunin tuꞌ. Poro quiꞌc nin cuj tan chiclaxeꞌn, na yi eꞌ yi choꞌn na cheꞌl tzaj tnum, list tzun quitaneꞌntz tan makleꞌn chibeꞌ nin taꞌsteꞌnin na chiquimeꞌtz. 43 Nin tzun eꞌ cyaj cyen cye yi eꞌ xonl Benjamínaꞌtz ẍchinicyꞌal yi eꞌ aj Israel, nin quiꞌc nin jun scyetz itzꞌij cyen le amaꞌl txoꞌl yi tnum Menúha jalen te yi tnum Gabaa.
44 Yaꞌstzun ban yi xtxolbiltz yi chiquimeꞌn wajxaklaj mil sanlar yi eꞌ cuꞌn xonl kꞌajtzun Benjamín. 45 Ma yi eꞌ yi eꞌ clax cyen choꞌn tzun chibeneꞌn ojkuj le amaꞌl tzꞌinunin tuꞌ tan cyoponeꞌn kale atit yi jun picy yi Rimón biꞌ. Oꞌ mil scyeꞌj yi eꞌaꞌs eꞌ quim tbeꞌ. Xomcheꞌ nin yi eꞌ aj Israel tan chitzꞌamleꞌn, nin eꞌ quimt cob mil wunaktz cyaꞌn. 46 Te jun kꞌejaꞌs, eꞌ quim junak oꞌ mil sanlar yi chin cham nin eꞌ yi eꞌ len xonl kꞌajtzun Benjamín. 47 Ej nin tzun eꞌ el ojkujtz le amaꞌl tzꞌinunin tuꞌ, nin tzun eꞌ aꞌtijtz tetz cyaj xaw le picyaꞌtz yi tetz Rimón na aꞌlchij tetz. 48 Nin tzun eꞌ oc yi eꞌ aj Israel tan chibiyleꞌn cuꞌn yi eꞌ aj Benjamín yi eꞌ cyaj cyen, tan cchiluꞌ. Tircunin tzun eꞌchk tnum eꞌ icyꞌakit yi eꞌ aj Israel tan chibiyleꞌn eꞌ wunak tuml cyawun, ninin el nak cuꞌn yi eꞌchk takleꞌn cyaꞌn yi na nojquen ẍchiwutz, nin na oc cyen kꞌaꞌkl eꞌchk tnumaꞌtz cyaꞌn.