Yi mbi cuꞌn bajij te jun xonl kꞌajtzun Leví tu yi tetz mos yi caꞌb txkel iꞌ taneꞌn
19
1 Itzun bantz, te yi quiꞌc jun rey at tan cawuꞌn yi eꞌ aj Israel, at tzun jun xonl kꞌajtzun Leví najlijtz joylajlen tul yi amaꞌl cwent Efraín. Nin tzun cyokꞌbej quibtz tu yi tetz mos, yi iꞌtz jun aj Belén, jun tnum cwent Judá. 2 Yi xoneꞌn tiemp nin tzun jeꞌ lajpuj wiꞌ yi xnaꞌnaꞌs teꞌj, nin tzun aj ojkujtz jalen Belén tan najeweꞌn te yi taj. Ma yi teleꞌn cyaj xaw tan yi xnaꞌn te yi taj, 3 nin tzun opon yi jun levitajaꞌtz tan joyleꞌn, nin tan cuꞌswutzil tetz yi xnaꞌn tan pakxeꞌnt tzaj teꞌj. Cyꞌaꞌn tzun cob buruꞌ taꞌn, nin xomij jun yaj teꞌj yi mos iꞌ. Tkꞌol tzun yi xnaꞌn amaꞌl tetz tan toqueꞌn xe caꞌl yi taj. 4 Nchaꞌtz yi taj yi xnaꞌn, wiꞌnin tzun stzatzineꞌntz te yi jun levitajaꞌtz yi toponeꞌn scyuchꞌ, nin tzun taltz tetz yi baꞌn lcyaj scyeꞌj. Nin tzun eꞌ cyaj cyentz tuml yi mos tetz ox kꞌej xe najbil taj yi xnaꞌn, nin tzun akꞌlij chiwaꞌ-tz, tu quicꞌaꞌ, nin chiwitbiltz. 5 Itzun te yi cyajiꞌn kꞌej, chin jalchan cunin teleꞌn chiwatl tan cyajeꞌn kloꞌ. Poro te yi ajeꞌn tlen tuꞌ ateꞌt, nin tzun tal yi taj yi xnaꞌn tetz yi jiꞌ:—Wan nin, quiꞌc na ban ko jun ntziꞌ piẍ tal pam lbajnin itaꞌn, te ntaxk cxaꞌj wok, bantz quil tzitij weꞌj, stzun yi taj yi xnaꞌn bantz tetz.
6 Chicabil tzun eꞌ cꞌoleꞌ cuꞌntz tan waꞌeꞌn, nin tan ucꞌaꞌeꞌn, nin tzun cuꞌ wutz taj yi xnaꞌn tetz yi jiꞌ, tan chicyajeꞌntz tetz junt akꞌbal, tan qui chitijol watl tbeꞌ. 7 Qui nin tzun kloꞌ cujij, poro tampaj yi cuꞌnak nin wutz yi taj yi xnaꞌn tetz, chaꞌstzun te eꞌ cyajeꞌnt cyen tetz junt akꞌbaltz.
8 Itzun yi jeꞌmponeꞌn yi toꞌiꞌn kꞌej, chin jalchan cunin tzun teleꞌn watl yi levitajaꞌtz, tan cyajeꞌn kloꞌ, poro nin cuꞌ wutz junt tir yi jiꞌ tetz tan waneꞌn nin te ntaxk chaꞌj, tan qui chimucꞌul weꞌj tbeꞌ. Chaꞌstzun te eꞌ cyajeꞌnt cyen tan waꞌeꞌn jalen yi toqueꞌn chaj kꞌej. 9 Ma yi wiꞌt waneꞌn, cweꞌn tzun wekolt tib tan tajeꞌnt tu yi txkel nin tu yi mos. Talol tzun junt tir yi jiꞌ tetz:
—Ja wiꞌt ben kꞌej itaꞌn, nin oqueꞌn tlen tuꞌ atit akaleꞌn. Baꞌn tcuꞌn yi nink xcyajk wok cyen tzoneꞌj, bantz iteleꞌn jalchan cunin.
10 Poro yi levita qui nin cujij tan chicyajeꞌn cyen tetz junt akꞌbal, ma na ajeꞌn nin eꞌ bantz tu yi txkel, tuml yi cob buruꞌ yi cyꞌaꞌn cheꞌ cyaꞌn tan cyekeꞌn. Ma yi oponeꞌn tlen tuꞌ ateꞌt le tnum yi na biꞌaj Jebús, yi jaluꞌ na biꞌaj Jerusalén, 11 nin tzun tal yi mos yi levita tetz:
—¿Mbi na tal teruꞌ taꞌn kol kacyaj cyen tan watl le chitanum yi eꞌ jebuseo? stzun bantz.
12 —Quil kacyaj le jun tnum yi nkꞌeꞌtz scyetz yi eꞌ katanum yi oꞌ xonl Israel. Tajweꞌn tan koponeꞌn jalen Gabaa. 13 Tajweꞌn kabuch kib tan koponeꞌn tan watl jalen Gabaa, nka Ramá, stzun yi levita bantz tetz yi mos.
14 Ej beneꞌn nin tzun eꞌ bantz, tal muyunt cuntuꞌ cyoponeꞌn le tnum Gabaa, yi chitanum yi eꞌ xonl kꞌajtzun Benjamín. 15 Nin tzun cyaj cyen yi nim beꞌ cyaꞌn, tan cyoponeꞌn le tnum Gabaa. Choꞌn tzun cyoponeꞌntz tan cꞌolcheꞌn tcꞌaꞌybil na cyaꞌl jun el kꞌajab scyeꞌj tan takꞌleꞌn chiposar.
16 Ej, nskenin oc lakꞌbal yi ticyꞌeꞌn cuꞌn jun wutzileꞌn yaj, yi choꞌn xaꞌkeꞌn tan akꞌun wi cojbil. Iꞌ jun xonl Efraín, yi choꞌn najlijtz Gabaa, chi jun awernak, na yi eꞌ aj Gabaa, eꞌ len cuꞌn xonl kꞌajtzun Benjamín. 17 Ma yi beneꞌn tilol yi wutzileꞌn yi levita tu caꞌp txkel yi choꞌn jukl cheꞌ tcꞌaꞌybil, nin tzun ben jakoltz scyetz:
—¿Naꞌ tzun ncxsajeꞌt, nin naꞌ ncxbeneꞌt? stzun iꞌ banintz scyetz.
18 —Ujleꞌn tuꞌ nkicyꞌak teꞌj tzoneꞌj. Choꞌn nkasaj le amaꞌl Belén cwent Judá, nin choꞌn nkaben joylajlen yi amaꞌl cwent Efraín, kale atit kanajbil. Ja kaꞌtij cobox kꞌej Belén, ma jaluꞌ ja kapakx tzaj tan koponeꞌn le kanajbil, poro cyaꞌl njal cuꞌnt kaposar tzoneꞌj. 19 Yi oꞌ ketz, cyꞌaꞌn chiwaꞌ yi eꞌ tal kaburuꞌ kaꞌn, nin cyaꞌn pam tu aꞌ kakꞌun bantz quil katij weꞌj. Quiꞌc jun tajweꞌn sketz, stzun yi levitajaꞌtz banintz.
20 Beneꞌn tzun tlol yi wutzileꞌn scyetz:
—Quil cxbisun wok tan eꞌchk takleꞌnaꞌtz. Yi wetz swakꞌeꞌ yi tajweꞌn tzitetz. Nin quil wakꞌ amaꞌl tan ticyꞌeꞌn yi akꞌbal itaꞌn tzoneꞌj tcꞌaꞌybil.
21 Nin tzun eꞌ ben tcyꞌal xe yi tetz caꞌl nin oc iꞌ tan chicꞌaꞌcheꞌn yi eꞌ buruꞌ. Yi wiꞌt xtxꞌajol iꞌ quikan yi eꞌ txocum, kalenaꞌs tzun eꞌ octz tan waꞌn tu ucꞌaꞌeꞌn. 22 Na chitzatzin cuꞌn, yi cyoponeꞌn cobox yaj yi chin xaꞌbil nin cyajtzaꞌkl, nin tzun baj chisutal te yi caꞌl, nin oc chicꞌojlol yi puert. I tzun cyal quen tetz yi wutzileꞌn, yi taw caꞌl:
—¡Elk tzaj yi jun yaj tanuꞌ yi at tuchꞌuꞌ! ¡Na kaj kawitbej kib tuchꞌ! cheꞌch tzun bantz.
23 Poro nin tzun cuꞌ wutz yi wutzileꞌn taw yi caꞌl scyetz, itzun taltz:
—¡Ax wok jun cꞌoloj wamiw, quil tziban wok jun ajtzaꞌklaꞌtz! Quil tziban jun itajtzaꞌklaꞌtz yi chin xaꞌbil nin, na yi jun yajaꞌtz iꞌ jun intxocum. 24 At jun inmeꞌl swuchꞌ, yi txeꞌn cuꞌn til wutz jun yaj. Nchaꞌtz at yi caꞌb txkel yi intxocum. Chelopon wukꞌpl tan teleꞌn chitxꞌix itaꞌn, nin baꞌn tziban itajbil scyeꞌj. Poro quil tziban cyen jun yab ajtzaꞌkl te yi yajeꞌj, stzun yi wutzileꞌn bantz scyetz.
25 Poro qui nin ocopon yol wutzileꞌn te chiwiꞌ. Ej tampaj yi qui nin ocopon yi yol wutzileꞌnaꞌtz te chiwiꞌ, beneꞌn tzun yi levita tan ticyꞌleꞌn tzaj yi caꞌb txkel nin el pitoltz ẍchikꞌab yi eꞌ malnakaꞌtz tbeꞌ. Nin eꞌ oc tan banleꞌn cyajbil te yi xnaꞌnaꞌtz te cyakil yi jun akꞌbalaꞌtz jalen yi tuleꞌn skil. Kalenaꞌs tzun cyajeꞌn cyen quiloltz. 26 Uleꞌn tlen tuꞌ atit skil yi toponeꞌn yi xnaꞌnaꞌtz xe caꞌl yi wutzileꞌn yaj, kale atit yi chmil. Ej nin tzun cuꞌ trimpujtz wuxtxꞌotxꞌ nin junawes quimeꞌn swutz cuꞌn yi puert. 27 Ma yi teleꞌn watl yi chmil, nin yi jeꞌn jakol yi puert tan tajeꞌn, nin tzun noj quentz te yi caꞌb txkel yi joklij wuxtxꞌotxꞌ swutz cuꞌn yi puertil yi caꞌl, nin ateꞌeꞌn yi kꞌab tibaj yi tzeꞌ yi tijom tetz yi marquil yi puert. 28 I tzun ben tlol yi chmil tetz:
—Txiclejeꞌn nin quin, stzun banintz tetz yi xnaꞌn.
Poro quiꞌc jun yol saj stzaꞌwel yi xnaꞌn, na quimnakt. Toqueꞌn tzun yi yaj tan nucꞌlejeꞌn yi wankil yi almaꞌaꞌtz tibaj jun buruꞌ, nin tzun ajtz xe najbil. 29 Ma yi toponeꞌn, nin tzun oc yi yaj tan cꞌupleꞌn cuꞌn wankil yi xnaꞌnaꞌtz. Coblaj tzun piẍ tulejtz, nin tzun eꞌ ben ẍchakum iꞌ taꞌn tan ẍchajleꞌn scyetz wunak lakak eꞌchk tnum cwent Israel. 30 Nin tircuꞌn yi eꞌ wunak yi miꞌlon tetz ja cyal:
—Jetz yi keleꞌn tzaj jakꞌ caꞌwl Egipto, quiꞌc cunin jun tir jajk kil jun xtxolbil chitaneꞌn juneꞌj. Tajweꞌn katxumun te yi mbil skabneꞌ tan banleꞌn taneꞌn.