Yi mbi cuꞌn bajij ẍchixoꞌl Micaías tu yi eꞌ xonl kꞌajtzun Dan
18
1 Yi xtxolbileꞌj mbajij te yi tiemp yi ntaxk jal jun chireyil yi eꞌ xonl Israel.Itzun bantz yi eꞌ xonl kꞌajtzun Dan, quiꞌc jun amaꞌl kale na chaꞌt cuꞌnt. Na tzun chitzan tan joyleꞌn jun amaꞌl kale chinajeweꞌt. 2 Itzun te yi ateꞌ-tz le tnum Zora tu yi tnum Estoal, nin tzun ben chichakol oꞌ xkꞌukwil yi chin cham nin eꞌ, nin yi qui na chixob tetz jun, tan joyleꞌn junt amaꞌl tan chinajeweꞌn tul. Chibeneꞌn tzun eꞌ xkꞌukwilaꞌtz lakak eꞌchk amaꞌl cwent yi eꞌ xonl kꞌajtzun Efraín. Te yi quicyꞌeꞌn lakak amaꞌlaꞌtz, choꞌn tzun cyoponeꞌntz le caꞌl Micaías tan watl. 3 Te yi ntaxk chopon xe caꞌl Micaías, nin tzun ben quibital yi apart wekl jilon yi jun xicyaꞌtz, yi xonl Leví, nin tzun eꞌ bentz tan jakleꞌn tetz:
—¿Mbitzun na ajoy tzoneꞌj? cheꞌch tzun bantz tetz.
4 Toqueꞌn tzun yi jun levitajaꞌtz tan xtxoleꞌn nin scyetz yi ẍeꞌn cuꞌn ban chitrat, yi cyajeꞌn cyen iꞌ tetz paleꞌil Micaías tuml yi tetz najal. 5 Yi quibital yi xtxolbilaꞌtz tetz yi levitajaꞌtz, nintzun cyaltz tetz:
—Jakaj bin kabanl tetz Kataj. ¿Baꞌn cuntuꞌk sbneꞌ kapyaj? cheꞌch tzun bantz tetz.
6 —Cheb cuꞌn bin chibenuꞌ, na tzꞌocopon Kataj Ryos tan chiqꞌuicyꞌleꞌnuꞌ. Quiꞌc na ban naꞌl chaꞌj nintuꞌ, stzun yi paleꞌaꞌtz bantz scyetz.
7 Quicyꞌeꞌn tzuntz yi oꞌ xkꞌukwilaꞌtz jalen le tnum yi na biꞌaj Lais. Ej nin yi eꞌ wunak yi najlcheꞌ le jun tnumaꞌtz, quiꞌc jun takleꞌn na chibislej. Niꞌcuꞌn eꞌ chi quitaneꞌn yi eꞌ aj Sidón, na cyaꞌl jun jak oc tan chixuxeꞌn nka tan oyintziꞌ scyeꞌj. Nchaꞌtz quiꞌc jun tiemp jak chitij weꞌj. Nin chin joylaj nin najlcheꞌt scyeꞌj yi eꞌ aj Sidón, nin cyaꞌl nin junt tnum at ẍchinakaꞌjil. 8 Chipakxeꞌn tzun yi oꞌ xkꞌukwilaꞌtz jalen le cob tnum Zora tu Estoal kale najlcheꞌt nin yi eꞌ chixonl. Ma yi cyoponeꞌn nintzun jaklij scyetz:
—¿Ẍeꞌn ban imantar? ¿Ja peꞌ jal jun amaꞌl itaꞌn tan kanajeweꞌn tul?
9 —Ja, na ja baj kaxoꞌmbel lakak eꞌchk amaꞌl, nin ja jal jun amaꞌl kaꞌn kale atit balaj cojbil. ¡Quin bin! ¡Quin tan chisotzajeꞌn yi eꞌ wunak yi najlcheꞌ-tz tul! Or itetz, ¿mbi xac tzitetz yi iẍnin cꞌolch quixeꞌt? Tajweꞌn kaben tan kacambal yi amaꞌlaꞌtz. 10 Na yil kopon choneꞌj tzitileꞌ yi quiꞌc nin jun takleꞌn najk chibislej yi eꞌ taw luwaraꞌtz, na wiꞌnin balaj txꞌotxꞌ at, nin quiꞌc nin jun takleꞌn najk sotz chicꞌuꞌl teꞌj. Stkꞌeꞌ Kataj amaꞌl sketz tan kacambal yi jun amaꞌlaꞌtz, cheꞌch tzun yi eꞌ xkꞌukwilaꞌtz bantz.
11 Ej, kak tzun cient yaj cyeleꞌn tzaj Zora tu Estoal. Choꞌn tzun eꞌ beneꞌntz tan chicambal yi jun amaꞌlaꞌtz. Tircuꞌn eꞌ cyꞌaꞌn len chimaꞌcl cyaꞌn tetz oyintziꞌ. 12 Choꞌn tzun cyoponeꞌntz tan ujleꞌn tetz jun lakꞌbal nakajil yi tnum Quiriat-jearim, jun amaꞌl yi choꞌn at cwent yi eꞌ xonl Judá. Jaluꞌ na biꞌaj “yi amaꞌl kale eꞌ ujeweꞌt yi eꞌ xonl Dan”. 13 Quicyꞌeꞌn tzuntz yi junt eklok nin eꞌ opontz le amaꞌl cwent yi eꞌ xonl Efraín, kale najleꞌt Micaías. 14 Itzun yi oꞌ xkꞌukwilaꞌtz yi nsken wiꞌt baj quilol yi amaꞌl cwent yi tnum Lais, nin tzun cyaltz scyetz yi eꞌ cyuchꞌ:
—¡Bit wok tzaj! Xe jun caꞌleꞌj at jun efod. Nchaꞌtz at cobox teblal chiryosil yi eꞌ taw caꞌleꞌj yi seꞌij nin yi sakal cuꞌn cyeꞌjak. ¿Mbi na cyal cyeruꞌ, kalkꞌaj peꞌ? cheꞌch tzun yi eꞌ xkꞌukwilaꞌtz bantz scyetz yi eꞌ cyuchꞌ.
15 Teleꞌn tzun chijatxol quib yi eꞌ xkꞌukwilaꞌtz scyeꞌj yi eꞌ cyuchꞌ, nin eꞌ octz xe caꞌl Micaías kale najleꞌt yi jun xicyaꞌtz yi levita tan talcheꞌn jun yos tetz. 16 Ma yi kak cient sanlar yi cyaꞌn len chispar cyaꞌn choꞌn tzun eꞌ cyajeꞌn cyentz stziꞌ puert tan chichꞌiweꞌn. 17 Inti yi oꞌ xkꞌukwilaꞌtz eꞌ oc xe quen yi caꞌl tan cyelseneꞌl tzaj yi ryosil Micaías yi seꞌij nin yi at sakal teꞌj, tuml yi efod, tu eꞌchk ryosil iꞌ.
18 Ma yi beneꞌn tilol yi paleꞌ yi nsken wiꞌt choꞌc yi oꞌ xkꞌukwilaꞌtz xe quen yi caꞌl Micaías, nin yi beneꞌn tilol yi eꞌ octz tan ticyꞌleꞌn tzaj yi ryos yi at sakal teꞌj, tuml yi efod, tuml yi eꞌchk chiryosil, nin tzun ben tlol scyetz:
—¿Nxac na chitzanuꞌ tan telseꞌn tzaj eꞌchk karyosil?
19 —¡Ẍcꞌabnequen tuꞌ! Baꞌn tcuꞌn quil cẍjilon. Ntin xomen tzaj skeꞌj. Na yi kajbil iꞌtz, yil cẍoꞌc tetz jun wiꞌtz kapaleꞌil tan banleꞌn taneꞌn eꞌchk kamunl ¿Nkꞌeꞌtz peꞌ bant cuꞌn yil cẍoꞌc tetz paleꞌ jun kꞌuꞌj xonl Israel, swutz jun ntziꞌ najal? cheꞌch tzun bantz.
20 Wiꞌnin tzun stzatzineꞌn yi paleꞌaꞌtz te yi xtxolbil yi ben tbital, nin tzun ben tcyꞌaltz yi teblal yi ryos yi sakal cuꞌn teꞌj, tuml yi efod tu yi eꞌchk chiryosil, nin xom nintz scyeꞌj yi eꞌ aj Danaꞌtz. 21 Eꞌ cweꞌn tzuntz tbeꞌ cyakil yi eꞌ xonl Danaꞌtz tuml chinitxaꞌ, tuml cyawun, tu cyakil chimeꞌbiꞌl. 22 Nsken tzun chopon joylaj, yi cweꞌn chimolol quib Micaías tuml yi eꞌ wisin tan chibeneꞌn tan chitzꞌamleꞌn. 23 I tzun yi sajeꞌn quibital yi eꞌ xonl Dan yi wiꞌnin chiẍchꞌineꞌn yi eꞌ yi xomcheꞌt nin tan chitzꞌamleꞌn, nin tzun eꞌ taqueꞌ cuꞌntz tan chichꞌiweꞌn. Nin tzun ben chijakoltz tetz Micaías:
—¿Mbi na aban yaj? ¿Mbi tzuntz yi na cẍchꞌin tzaj sketz? cheꞌch tzun bantz tetz Micaías.
24 —Yi axwok itetz ja el tzaj italkꞌal yi eꞌchk inryosil, yi in seꞌol tetz. Nchaꞌtz ja el tzaj itcyꞌal yi impaleꞌ. Tircuꞌn mmeꞌl tzaj itcyꞌal. ¿Nin na inimsaj icꞌuꞌl tan jakleꞌn tzaj swetz yi mbi na imban? stzun iꞌ scyetz.
25 —Quil jeꞌ mas awiꞌ tan kayajleꞌn, na qui na kil ko at jun sketz yil jeꞌ lajp wiꞌ tzaweꞌj, nin ltzꞌoc tan abiyleꞌn cuꞌn, nin yil tzajpon wiꞌ qui cunin batz tircuꞌn yi anajal ẍchiquimok.
26 Yi beneꞌn tilol Micaías yi jun cꞌoloj cunin chixoneꞌn, baꞌnt cun pakxeꞌn iꞌ xe tetz caꞌl. Ma yi eꞌ xonl Dan nin tzun eꞌ cweꞌn junt tir tbeꞌ, 27 tu yi eꞌchk takleꞌn yi el tzaj cyaꞌn xe caꞌl Micaías, tu yi paleꞌ. Choꞌn tzun cyoponeꞌntz le tnum Lais.
I tzun yi eꞌ wunakaꞌtz yi najlcheꞌ-tz Lais, quiꞌc jun il na chibislej. Chaꞌstzun te cyoqueꞌn poꞌk yi eꞌ xonl Danaꞌtz tan chibiyleꞌn cuꞌn tircuꞌn tan spar. Ej nin nchaꞌtz oc chitꞌinol kꞌaꞌkl yi tnum. 28 Ej nin tampaj yi joylaj ẍchixoꞌl yi tnum Sidón, nin tampaj yi quiꞌc nin junt tnum yi at-tz nakaꞌj, cyaꞌl tzun jun opon tan chicolcheꞌn ẍchikꞌab yi eꞌ xonl Dan. Ma yi chicambal yi eꞌ xonl Dan yi amaꞌlaꞌtz nin tzun eꞌ oct-tz tan nucꞌleꞌn junt tir yi tnum tan chinajeweꞌn tul. Choꞌn at yi tnumaꞌtz le jun jocoꞌj cwent yi amaꞌl Bet-rehob. 29 Lais biꞌ yi tnum te ntaxk chopon tan cambajeꞌn, poro yi chicambal nin tzun oc biꞌ-tz cyaꞌn tetz Dan, tan takꞌleꞌn kꞌej chimam Dan, jun scyeri cyꞌajl Israel. 30 Choꞌn tzun toqueꞌn cyen yi ryosilaꞌtz yi seꞌij tuꞌ nin ocnak sakal teꞌj, tul yi tnumaꞌtz tan lokꞌeꞌn wutz. Ej nin yi chipaleꞌil bantz iꞌtz Jonatán, xonl Gersón jun scyeri cyꞌajl Moisés. Yi xoneꞌn tiemp ja chijal cyꞌajl Jonatán. Tircunin tzun eꞌ oc lentz tetz chipaleꞌil yi eꞌ xonl Danaꞌtz, jalen yi chibeneꞌn ticyꞌleꞌn pres joylaj. 31 Choꞌn tzun taꞌteꞌn jun ryosaꞌtz yi bnix tan Micaías ẍchixoꞌl yi eꞌ xonl Danaꞌtz te yi tiemp yi at tzaj yi mantial Kataj le tnum Siló.