Yi tyoẍ yi tetz cuntuꞌ Micaías
17
1 I tzun bantz at tzun jun yaj yi na biꞌaj Micaías, yi choꞌn najlij wutz wutz yi amaꞌl cwent Efraín. 2-3 I tzun xtxoltz tetz yi xtxuꞌ:—Naꞌ, na kloꞌ waj wal yi bintzi teruꞌ. ¿Nachij peꞌ tanuꞌ yi teleꞌn yi puꞌkuꞌ tan alkꞌom, yi jun mil tu jun cient pwok sakal, yi colij tanuꞌ? ¿Ej nin nachij peꞌ tanuꞌ yi toqueꞌnuꞌ tan jakleꞌn caws yi jun alkꞌomaꞌtz? In colol tetz yi pwokaꞌtz, na in mmalkꞌon len teꞌjuꞌ. Ma jaluꞌ, swakꞌeꞌ teruꞌ, na ja ben wital teꞌjuꞌ yi ten wiꞌt sukuꞌ tetz Kataj Ryos tan banleꞌn jun ryosiluꞌ yi banij sbneꞌ tan jun seꞌol, nin yi sakal cuꞌn tzꞌocopon teꞌjak.
Nin tzun takꞌt iꞌ yi sakal tetz yi xtxuꞌ. I tzun tal yi xtxuꞌ-tz:
—¡Takꞌ tzaj Kataj Ryos banl tzawibaj, aẍ jun cꞌoloj wal!
4 Ma yi wiꞌt tkꞌol Micaías yi pwokaꞌtz tetz yi xtxuꞌ, nin tzun ben yi xtxuꞌ tan takꞌleꞌn tetz jun yaj yi txakꞌol sakal, tan bnixeꞌn jun ryos yi tzeꞌ tuꞌ nin tan tocseꞌn sakal solteꞌj. Ma yi bnixeꞌn choꞌn tzun toponeꞌntz xe caꞌl Micaías. 5 Yi Micaíasaꞌtz, at tzun jun tetz amaꞌl xe tetz caꞌl yi ntinaꞌtz xac tetz tan banleꞌn taneꞌn tetz munl. Ej nin tzun bnix jun efod taꞌn, nchaꞌtz bnix cobox teblal ryosil iꞌ taꞌn. Nchaꞌtz nin oc cyen jun cyꞌajl iꞌ taꞌn tetz paleꞌ. 6 Yaꞌstzun eꞌ ban te yi cobox tiempaꞌtz, na ntaxk jal jun chireyil. Ej nin cyakil wunak ntin ja chixom te cyetz cyajbil.
7 Itzun bantz, at tzun jun xicy yi choꞌn aꞌtijtz cobox kꞌej le tnum Belén. Iꞌ jun xonl Leví. 8 Nin tzun el tzaj xicyaꞌtz le tnum Belén, tan joyleꞌn junt amaꞌl kalel najeweꞌt. Nin te yi na xon iꞌ tbeꞌ tul yi amaꞌl cwent yi eꞌ xonl Efraín, nin tzun opon nojtz te yi caꞌl Micaías.
9 Beneꞌn tzun jakol Micaías tetz:
—¿Naꞌ ncsiteꞌt? stzun iꞌ bantz tetz yi xicyaꞌtz.
—Choꞌn nchinsaj jalen Belén. In jun xonl Leví nin na chintzan tan joyleꞌn jun amaꞌl kalel chinnajeweꞌt.
10 —Baꞌn ẍcyaj swuchꞌ, nin baꞌn cẍoꞌc tetz impaleꞌ, nin baꞌn cẍoꞌc tetz kajbil intaj. Nin baꞌn cẍoꞌc tan banleꞌn taneꞌn eꞌchk kamunl. Nin cẍinchojeꞌ. Swakꞌeꞌ lajuj piẍ sakal tzatz le jun yob. Nin swakꞌeꞌ beꞌch atz, tu awaꞌ, stzun Micaías bantz tetz yi jun xicyaꞌtz.
11 Nin tzun cujij yi xicyaꞌtz, tan cyajeꞌn cyen tan najeweꞌn tuchꞌ Micaías. Ej nin yi teleꞌn tiemp nin tzun octz chi jun nitxajil iꞌ. 12 Nintzun bixeꞌ iꞌ tan Micaías tetz chipaleꞌil. Cyajeꞌn nintzun bantz tan najeweꞌn tu Micaías. 13 Le wutz tetz tajtzaꞌkl yi wiꞌnin banl Kataj sbneꞌ squibaj na yi paleꞌaꞌtz iꞌ jun xonl Leví.