Yi mbi mban Sansón le tnum Gaza
16
1 I tzun bantz, nin tzun opon jun tir Sansón le tnum Gaza. Nin tzun til iꞌ jun xnaꞌn yi wiꞌtz bnol tetz. Choꞌn tzun cyajeꞌn cyen xe caꞌl jun xnaꞌnaꞌtz tan watl te jun akꞌbalaꞌtz. 2 I tzun quibital yi eꞌ aj Gaza yi choꞌn at Sansón le chitnumil, nin tzun eꞌ octz tan qꞌuicyꞌleꞌn solteꞌj yi tnum tan qui teleꞌn. Nchaꞌtz te jun kꞌejaꞌtz nin eꞌ octz tan qꞌuicyꞌlen iꞌ stziꞌ yi sawanil yi tnum. Ma yi toqueꞌn akaleꞌn nin tzun eꞌ ajtz tan ujleꞌn, na le wutz cyetz cyajtzaꞌkl yi jun cuꞌn cupon chibiyol jalchan le junt eklok. 3 Poro yi Sansón jalaj ntziꞌ akꞌbal wit, nintzun el tzajtz xe caꞌl. Ma yi toponeꞌn swutz yi sawanil yi tnum, nintzun el tzaj bukꞌul iꞌ yi jun chin sawanaꞌtz tuml yi marquil yi benak ttxꞌotxꞌ, tuml yi tzeꞌ yi at tan pachꞌeꞌn len, nin tzun jeꞌ nin tekaltz. Ej nin choꞌn toponeꞌntz taꞌn jalen wi juꞌwtz yi at nakajil yi tnum Hebrón.a Yi tajskel Sansón wutz Dalila
4 Ej itzun yi teleꞌn tiemp, nin tzun pekꞌ Sansón te jun xun yi na biꞌaj Dalila. Yi jun xunaꞌtz choꞌn tzun najlijtz le jun jocoꞌj yi na biꞌaj Sorec. 5 Ej nin tzun eꞌ ben yi eꞌ wiꞌtz cyajcawil yi eꞌ filistey tan yol tetz Dalila, i tzun cyaltz tetz:
—Joyaj puntil tan subleꞌn cuꞌn Sansón, tan teleꞌn katxum tetz yi naꞌ na sajeꞌt yi ẍchamil, nin mbi puntilil kulej tan cꞌalcheꞌn cuꞌn iꞌ. Nin tan yi pawor yi tzabneꞌ sketz, skajunal len cuꞌn skakꞌeꞌ jun mil tu jun cient pwok tzatz yi sakal cuꞌn, cheꞌch tzun yi eꞌ wiꞌtz ajcawaꞌtz bantz tetz Dalila.
6 Ej yaꞌtz nin tzun bantz, nin tzun tal Dalila tetz Sansón:
—Sansón, al tzaj nin swetz yi ẍeꞌn na jal yi awalor yi cyaꞌl cunin na kilwit. ¿At peloꞌ jun puntil tan acꞌalcheꞌn cuꞌn junawez? stzun Dalila bantz tetz Sansón.
7 Sajeꞌn tzun tlol Sansón:
—Yi kol chin cuꞌ cꞌalij tan juk akwil yi na xcon tan pakleꞌn tzaj jun cꞌoxbil flech, yi txaꞌxeꞌt muꞌẍ, tzꞌelpon tzun inwalortz, nin tzꞌocopon tzun inwalor chi alchok yaj, stzun Sansón bantz tetz Dalila.
8 Yi quibital yi eꞌ wiꞌtz ajcaw yi xtxolbilaꞌtz, nin tzun cyakꞌ juk akwil acꞌaj tetz Dalila, nin tzun cuꞌ cꞌalol iꞌ Sansón tan yi eꞌchk akwilaꞌtz. 9 Ej nin nsken cyen oc tewal Dalila cobox yaj xe tetz witbil, nin tzun ẍchꞌintz:
—¡Sansón, chuꞌl yi eꞌ filistey tan abiyleꞌn cuꞌn! stzun Dalila bantz.
Lajkeꞌl nin tzun jeꞌn pakꞌlul Sansón yi eꞌchk akwilaꞌtz yi cꞌalol tetz, chi ik pitaꞌ yi ja cu num tan kꞌakꞌ. Nin qui nin tzun el chitxum yi eꞌ filistey tetz yi ẍeꞌn na jal walor Sansón.
10 Talol tzun Dalila junt tir tetz Sansón:
—¡Nxac qui mawal yi mero bintzij swetz! ¡Cyakil tir na ajal cuꞌn wi awakꞌ swetz! Ma jaluꞌ, alaj bin swetz yi mbinin puntil tzimban tan acꞌalcheꞌn cuꞌn.
11 Talol tzun Sansón jun tir tetz:
—Yi kol chincuꞌ cꞌalij tan eꞌchk akwil yi acꞌaj, yi txeꞌn cunin xcon, tzꞌelpon tzun inwalor, nin nocopon chi taneꞌn alchok yaj, stzun Sansón bantz.
12 Ej yi tbital Dalila yi xtxolbilaꞌtz, nin tzun xcon cobox akwil taꞌn yi mero acꞌaj, nin tzun cuꞌ cꞌalol iꞌ Sansón, nin tzun ẍchꞌintz:
—¡Sansón chuꞌl yi eꞌ filistey tan abiyleꞌn!
Nchaꞌtz te jun tireꞌj, nin eꞌ oc tewal Dalila cobox filistey le witbil, poro nin xcyeꞌ Sansón tan pakꞌleꞌn yi eꞌchk akwilaꞌtz chi ik tal nokꞌ tuꞌ.
13 Talol tzun Dalila junt tir tetz Sansón:
—¡Iẍnin na cẍtzaneꞌt tan lamcheꞌn inwutz! ¡Iẍnin na cẍtzaneꞌt tan talcheꞌn laꞌjil swetz! ¡Al tzaj nin swetz yi mbiꞌtz tajweꞌn tzimban tan acꞌalcheꞌn cuꞌn! stzun Dalila tetz Sansón.
—Tajweꞌn yil cẍoꞌc tan laseꞌn xiꞌil inwiꞌ, nin yil xcon tetz waꞌ jun xbuꞌk yi na tzan ẍchemleꞌn tul jun chin maꞌcl yi na xcon tan telseꞌn chem. Ej nin tajweꞌn tan toqueꞌn acꞌalol te jun tzeꞌ yi benak pajij ttxꞌotxꞌ. Tan yi xtxolbilaꞌtz tzꞌelpon tzun cyakil inchamil, nin nocopon chi taneꞌn alchok yaj tu ẍchamil.
Toqueꞌn tzun Dalila tan watzeꞌn cuꞌn Sansón, nin oc iꞌ tan waꞌtzeꞌn quen yi juk bocꞌoj xiꞌil wiꞌ Sansón yi lasuꞌnt txoꞌl yi kꞌinl yi xbuꞌkl yi na tzan ẍchemleꞌn te maꞌclaꞌtz. 14 Nchaꞌtz oc cꞌalol yi maꞌcl te jun tzeꞌ yi choꞌn benak pajij ttxotxꞌ, nin tzun ẍchꞌintz:
—¡Sansón! Chuꞌl yi eꞌ filistey tan abiyleꞌn cuꞌn, stzun Dalila bantz.
Poro yi Sansón lajkeꞌl nin teleꞌn watl nin xcyeꞌ iꞌ tan bukꞌlejeꞌn tzaj yi tzeꞌ yi benak pajij ttxꞌotxꞌ, tuml yi maꞌcl tetz chemoꞌn.
15 Talol tzun junt tir Dalila tetz Sansón:
—¡Chin laꞌj nin aẍ! ¿Mbi xac tzatz yi na awal yi wiꞌnin na cẍpekꞌ sweꞌj? Oxix tir cẍtzeꞌen sweꞌj, nin qui nin na awal yi naꞌ na sajeꞌt atxamil, stzun Dalila bantz tetz Sansón.
16 Ma na tampaj yi cuꞌnak nin wutz Dalila tan jakleꞌn tetz Sansón yi mero bintzij, nin tampaj yi cyakil nin rat na tzan iꞌ tan jakleꞌn yi xtxolbilaꞌtz tetz Sansón, nsken tzun wiꞌt icyꞌ paj Sansóntz tan tbiteꞌn. 17 Chaꞌstzun te baꞌn cunin xtxolil Sansón yi mero xtxolbil tetz Dalila:
—Cyaꞌl jun jajk oc tan telseꞌn xiꞌil inwiꞌ, na te yi taxk nitzꞌij txumijt tan inxconeꞌn tetz Ryos chi jun nazareo. Nin kol tzꞌel cꞌapluꞌn xiꞌil inwiꞌ, tzꞌelpon tzun inchamil, nin nocopon tzuntz chi alchok yaj, yi quiꞌc mas ẍchamil.
18 Yi teleꞌn xtxum Dalila tetz, yi yaꞌstzun yi mero bintzij yi tal Sansón tetz, nin tzun ben mantar iꞌ tan chichakleꞌn yi eꞌ wiꞌtz cyajcawil yi eꞌ filistey, i tzun taltz:
—¡Ma jaluꞌ, baꞌn chuꞌluꞌ, na ja tal Sansón swetz yi mero xtxolbil yi ewaꞌn cuntuꞌ taꞌn! stzun Dalila bantz.
Nin tzun eꞌ opon yi eꞌ ajcawaꞌtz te Dalila nin cyaꞌn yi pwok cyaꞌn yi chisuknak tetz. 19 Nin tzun joy Dalila puntil tan watzajeꞌn cuꞌn Sansón wi tkan, nin tzun ẍchak jun yaj tan tponeꞌn tan cꞌapleꞌn len yi juk bocꞌoj xiꞌil wiꞌ Sansón yi lasuꞌn quitaneꞌn. Ej nin tzun octz tan yajleꞌn Sansón, i tzun taltz tetz:
20 —¡Sansón chuꞌl yi eꞌ filistey tan abiyleꞌn!
Lajkeꞌl nin tzun teleꞌn watl Sansón, nin taneꞌn swutz yi xcyek iꞌ scyeꞌj chi na ban nin tunin. Poro quinin pujx taꞌn yi nsken cyaj cyen coliꞌn tan Kataj Jehová. 21 Cweꞌn tzun chitzꞌamol, nin tzun el tzaj chicꞌolpil chicabil wutz. Nin tzun aj quicyꞌaltz jalen le tnum Gaza. Cweꞌn tzun chicꞌaloltz tan caren yi brons cuꞌn, nin tzun octz cyaꞌn tan toleꞌn jun caꞌ yi na xcon tan ẍcheꞌjeꞌn triw yi choꞌn at xetzeꞌ. 22 Poro, nin chꞌuy junt tir yi xiꞌil wiꞌ Sansón.
Yi quimeꞌn Sansón
23 Ej yi wiꞌt bajeꞌn yi xtxolbilaꞌtz nin tzun cuꞌ chimolol quib yi eꞌ wiꞌtz cyajcawil yi eꞌ filistey tan jun tzatziꞌn, na nin eꞌ xcyeꞌ te Sansón yi chicontr, nin tzun eꞌ octz tan toyeꞌn chitxꞌixwatz tetz chiryosil yi na biꞌaj Dagón. Wiꞌnin tzun chibitzineꞌntz, i tzun na cyaltz:
“Yi karyosil ja takꞌ amaꞌl sketz, tan kaxcyeweꞌn te Sansón, yi kacontr,” cheꞌch tzun na bantz.
24 Nin yi quilol wunak Sansón, nchaꞌtz eꞌ, eꞌ bitzin tan lokꞌeꞌn wutz yi chiryosil, i tzun na cyaltz:
“Yi karyosil ja takꞌ amaꞌl sketz tan kaxcyeweꞌn te Sansón, yi kacontr, yi ilenin ja oc tan xiteꞌn cuꞌn eꞌchk kacosech, nin wiꞌnin kawunakil ja cheꞌ quim taꞌn,” cheꞌch tzun na bantz.
25 Wiꞌnin tzun chitzatzineꞌntz, nin tampaj yi tzatziꞌn yi ateꞌ cuꞌnt, nin tzun chijaktz tan tponeꞌn Sansón ẍchiwutz, tan chitzeꞌeneꞌn teꞌj. Nin tzun ben qꞌuil tetz xetzeꞌ. Ma yi tponeꞌn ẍchiwutz, wiꞌnin chitzeꞌeneꞌntz teꞌj. Choꞌn tzun toponeꞌntz cyaꞌn txoꞌl cob chin tkan caꞌl. 26 Talol tzun Sansóntz tetz yi xicy yi na tzan tan ẍchꞌineꞌnin iꞌ:
—Cyꞌajnin in kale ateꞌt yi cob tkan caꞌl yi tijom tetz tircuꞌn yi tyoẍ. Na na waj chinkejeꞌ cyen jun rat, stzun Sansón bantz.
27 Tircunin tzun yi eꞌ wiꞌtz cyajcawil yi eꞌ filistey ateꞌ cuꞌntz le jun chin tyoẍaꞌtz. Nin nojnak cunin cyaꞌn wunak. At xnaꞌn ateꞌ-tz, nin at yaj, tech nin wunak ateꞌ-tz. Nchaꞌtz at loꞌ ox mil wunak le caꞌp chup te yi tyoẍaꞌtz. Tircunin tzun na chitzantz tan xmayeꞌn yi mbi cuꞌn na uꞌlij Sansón. 28 Nin tzun el stziꞌ Sansóntz tetz Kataj Ryos, i tzun taltz: “Taꞌ bneꞌuꞌ pawor quil neꞌl te cꞌuꞌluꞌ, nink nuꞌl txꞌakx tcꞌuꞌluꞌ. Ntin te junt tireꞌj, nink takꞌuꞌ inwalor tan telseꞌn xel scyeꞌj yi eꞌ wunakeꞌj, na ja eltzaj chicyꞌal cabil inwutz,” stzun Sansón banintz tetz Kataj Ryos.
29 Ej nin tzun joy iꞌ tan kꞌab yi cob tkan tyoẍaꞌtz, nintzun cuꞌ nucꞌul tibtz txol, na yaꞌstzun yi cob tkan yi tyoẍ yi tijom tetz tircuꞌn. Jujun tzun kꞌab bantz tejak eꞌchk tijomaꞌtz tetz yi tyoẍ. 30 Ẍchꞌineꞌn tzuntz, i tzun taltz: “¡Ẍchiquimoken tircuꞌn yi eꞌ filistey swuchꞌ!” stzun iꞌ bantz.
Nin tzun xcon tircuꞌn yi ẍchamil taꞌn tan chipitleꞌn len yi cob tkan tyoẍaꞌtz, nin tzun saj nil tircuꞌn squibaj yi eꞌ wiꞌtz cyajcawil yi eꞌ filistey, yi ateꞌ-tz. Nimteꞌn cunin wunak eꞌ quim tan Sansón te yi jun tiraꞌtz, swutz yi eꞌ quim taꞌn yi baꞌn tzaj iꞌ. 31 Yi wiꞌt quimeꞌn Sansón, nin tzun eꞌ opon cyen yi eꞌ titzꞌun, tuml yi eꞌ xonl, tan telseꞌn tzaj wankil. Choꞌn tzun mukxeꞌntz cyaꞌn txoꞌl yi eꞌchk amaꞌl yi na biꞌaj Zora tu Estoal, kale mukxnakit Manoa, yi taj iꞌ. Junak tzun yob ban Sansóntz tetz cyajcawil yi eꞌ aj Israel.