15
1 Ej itzun yi teleꞌn cobox keꞌj, yi jeꞌn yi cosech tetz yi triw, nin tzun ben Sansón tan xajseꞌn yi txkel, nin ben tcyꞌal iꞌ jun tal neꞌẍ chiw. I tzun yi toponeꞌn, nin tzun taltz:—Nocopon tan tilweꞌn yi wuxkel, jalen xe tetz caꞌl, stzun iꞌ bantz.
—Chinch wetz, yi quiꞌt na cẍpekꞌ teꞌj. Chaꞌstzun te ja ben wukꞌol tetz jun awamiw. Poro at jun titzꞌun, nin chumbalajt cunin yubil. Baꞌn tzun tzꞌoc tetz awuxkel.
3 —¡Ko yaꞌtz mban xtxumuꞌnuꞌ quiꞌc wetz tuchꞌ yi mbil bajij scyeꞌj yi eꞌ tanumuꞌ! stzun Sansón bantz.
4 Beneꞌn tzun iꞌ-tz tan chitzꞌamleꞌn cobox yac. Ox tzun cient eꞌ txꞌamxijtz taꞌn, nin tzun baj cuꞌ cꞌalol chijeꞌ-tz. Quicobenleꞌn cuꞌn tzun eꞌ baj tuleltz, nin oc nin cꞌalol jun cul tzaj teꞌjak chijeꞌ yi eꞌ lmuj yacaꞌtz. 5 Kalenaꞌs tzun teleꞌn stzakpul yi eꞌ yacaꞌtz, yi cꞌalij tzaj yi na kꞌakꞌan sjuꞌak chijeꞌ, txoꞌlak eꞌchk ujul yi awij cyaꞌn yi eꞌ filistey. Tzaj cunin tzun tircuꞌn yi triw yi nsken wiꞌt molxij, tu yi triw yi ntaxk jeꞌ yi txaꞌxeꞌt muꞌẍt. Tzaj cunin tircuꞌn, tu eꞌchk wiꞌ uva, tu eꞌchk wiꞌ oliw, tircuꞌn stzꞌeꞌeꞌn. 6 Cyoqueꞌn tzun eꞌ filistey tan jakleꞌn tkanil yi naꞌ taw yi ajtzaꞌklaꞌtz. Ma yi quibital yi yaꞌs tzun ban Sansón, tan ticyꞌseꞌn cꞌuꞌl te jiꞌ, yi choꞌn najlij Timnat, tampaj yi ticyꞌeꞌn tkꞌol yi txkel tetz jun tamiw, nin tzun eꞌ ben eꞌ filisteyaꞌtz tan stzꞌeꞌseꞌn yi xnaꞌnaꞌtz tuml yi taj.
7 Ej itzun yi tbital Sansón yi mbi cuꞌn mbajij te txkel, itzun taltz:
—Ma jaluꞌ, tampaj yi yaꞌstzun mban itxumuꞌn, ¡jun cuꞌn yol swaleꞌ nin tzitetz yi quil nujeꞌ, jalen cuꞌn yil wicyꞌsaj incꞌuꞌl tziteꞌj! stzun iꞌ bantz.
8 Yaꞌtz nin tzun tulejtz. Tircunin yi eꞌ filisteyaꞌtz eꞌ baj loꞌon taꞌn, nin quiꞌc jun nink clax cyen. Ma yi ticyꞌsal cꞌuꞌl scyeꞌj, nintzun ajtz tan najeweꞌn le jun picy yi at wutz cꞌub yi na biꞌaj Etam.
Yi xconeꞌn yi bakil wiꞌ jun buruꞌ tan Sansón tan chibiyleꞌn yi eꞌ filistey
9 Ej itzun bantz nin tzun eꞌ opon yi eꞌ filistey tetz cobox kꞌej le jun amaꞌl cwent Judá. Noj cunin tzun yi amaꞌlaꞌtz cyaꞌn jalen yi cyoponeꞌn nakajil yi tnum yi na biꞌaj Lehi. 10 I tzun yi eꞌ aj Judá nin tzun chijaktz scyetz:
—¿Mbi tzuntz nchuꞌluꞌ tan oyintziꞌ skuchꞌ? cheꞌch tzun yi eꞌ aj Judá bantz scyetz yi eꞌ filistey.
—Ntin nkuꞌl tan stzꞌamleꞌn Sansón, tan ẍchojol iꞌ yi mbi cuꞌn banak skeꞌj.
11 Yi quibital yi eꞌ aj Judá yi yaꞌstzun chitxumuꞌn yi eꞌ filistey, nin tzun eꞌ ben ox mil aj Judá tan joyleꞌn Sansón le yi picy yi at wutz cꞌub yi na biꞌaj Etam. Itzun cyaltz tetz Sansón:
—¿Qui peꞌ na el atxum tetz, wiꞌnin chiwalor yi eꞌ filistey skawutz ketz? Na tan yi awajtzaꞌklaꞌtz skatzꞌaben nink tzaweꞌj.
—Yi mero xtxolbil iꞌtz, yi ntin ja inxelsaj yi xtxolbil yi nchiban eꞌ sweꞌj.
12 —Ma jaluꞌ, yi oꞌ ketz, ntin nkuꞌl tan atzꞌamleꞌn, nin tan ajatxleꞌn ẍchikꞌab yi eꞌ filistey, cheꞌch tzun yi eꞌ aj Judá bantz tetz Sansón:
—Ko yaꞌtz bintzij na ital quiꞌ bin chinquimaꞌtz itaꞌn.
13 —Jun cuꞌn yol sak swutz Ryos yi quil koꞌc ketz tan abiyleꞌn cuꞌn, ma na ntin na kaj ketz yil ẍkakꞌnin scyetz yi eꞌ filistey, cheꞌch tzun bantz tetz Sansón.
Ej nin tzun eꞌ octz tan cꞌalcheꞌn cuꞌn Sansón tan cob akwil yi nim cꞌatzaj, yi mero acꞌaj, yi quiꞌc cunin jun tir jajk xcon. Nintzun el tzaj quicyꞌaltz kale tewaneꞌt tib.
14 Ej itzun cyoponeꞌntz le amaꞌl yi na biꞌaj Lehi, nin tzun eꞌ saj yi eꞌ filisteytz tan chicꞌulcheꞌn. Wiꞌnin tzun chiẍchꞌineꞌntz, na le wutz cyetz cyajtzaꞌkl yi nsken txꞌamxij Sansón cyaꞌn. Cweꞌn muleꞌn tzun yi porer Kataj te Sansón tan tkꞌol xtxꞌamil tan pakꞌlejeꞌn yi eꞌchk akwil yi cꞌalol tetz yi kꞌab. Quiꞌc nin tzun tilil yi akwilaꞌtz bantz swutz Sansón, na icunin tal nokꞌ yi tzꞌeꞌnakt ban. 15 Nin tzun ben iꞌ-tz tan ticyꞌleꞌn tzaj jun bakil stziꞌ buruꞌ yi at wuxtxꞌotxꞌ nakaꞌj nintz, yi ntaxk skej, nin tan yi bakaꞌtz xcyeꞌ iꞌ tan chibiyleꞌn jun mil filistey. 16 Ej itzun tal Sansóntz:
“Tan bakil wiꞌ jun buruꞌ, ja chinxcyeꞌ scyeꞌj jun cꞌoloj wunak,
tan bakil wiꞌ jun buruꞌ, ja chiquim jun mil yaj waꞌn,” stzun Sansón bantz.
17 Ej nin tzun el cꞌoxol yi jun bakaꞌtz, nin tan yi xtxolbilaꞌtz nin oc cyen biꞌ yi jun amaꞌlaꞌtz tetz Ramat-lehi. 18 Wiꞌnin tzun sak tziꞌ at-tz te Sansón, nin tzun jilonintz tetz Kataj Ryos, i tzun ben tloltz: “¿Mbi tzuntz ja takꞌuꞌ amaꞌl swetz tan inxcyeweꞌn scyeꞌj yi eꞌ incontr? Ej ma jaluꞌ ¿stkꞌeꞌ peꞌuꞌ amaꞌl tan inquimeꞌn tan saktziꞌ ẍchiwutz yi eꞌ wunakeꞌj yi quiꞌc na cyocsaj?” stzun Sansón bantz.
19 Nin tan porer Kataj Ryos nin tzun jakxij jun jul kale je uleꞌt mulkꞌ aꞌ, yi at nintz le amaꞌlaꞌtz yi na biꞌaj Lehi. Nin tzun ucꞌaꞌ Sansóntz te yi aꞌ yi mmulkꞌij, nin tzun ult yos tuchꞌ. Nin tan yi xtxolbilaꞌseꞌj nin tzun oc cyen biꞌ yi jun tal aꞌaꞌtz tetz En-hacore, nin yaꞌtz nin biꞌ-tz jaluꞌ.
20 Junak tzun yob ban Sansóntz tetz wiꞌtz ajcaw Israel, te yi tiemp yi at tzaj cunin chichamil yi eꞌ filisteyaꞌtz tan cawuꞌn le amaꞌlaꞌtz.