Yi toqueꞌn txkel Sansón
14
1 Ej i tzun bantz cweꞌn poneꞌn Sansón le tnum yi na biꞌaj Timnat, nintzun pekꞌ iꞌ-tz te jun xun filistey. 2 Nin yi pakxeꞌn iꞌ xe tetz caꞌl nin xtxoltz scyetz yi eꞌ taj xtxuꞌ. I tzun tal scyetz:—Chibneꞌuꞌ jun pawor, na kloꞌ waj yil choꞌcuꞌ tan banleꞌn yi tajweꞌn, na swuꞌmek tu jun xun filistey yi ja wil le tnum Timnat.
3 —¿Mbi xac tzatz yil cẍben tan joyleꞌn awuxkel ẍchixoꞌl yi eꞌ filisteyaꞌtz yi apart chiryosil skawutz ketz? ¿Ko quiꞌct nin tzun jun xun at ẍchixoꞌl yi eꞌ ketz kawunakil, nka ẍchixoꞌl yi eꞌ mas xonl Israel?
—Yi jun xunaꞌtz yaꞌstzun yi na peꞌk walmaꞌ teꞌj. Chijoyeꞌuꞌ puntil tan kumeweꞌn tuchꞌ iꞌ, stzun iꞌ bantz scyetz yi eꞌ taj ẍtxuꞌ.
4 Poro yi eꞌ taj Sansón qui nin na el chitxum tetz yi yaꞌtz tzun tajbil Kataj Ryos yi jun umleꞌnaꞌtz. Na nternin na tzan Kataj tan joyleꞌn puntil tan chixiteꞌn yi eꞌ filistey, na te yi tiempaꞌtz na chicawun squibaj yi eꞌ xonl Israel. 5 Chibeneꞌn tzun Sansón tu yi taj xtxuꞌ tan joyleꞌn puntil tan nucꞌleꞌn yi jun umleꞌnaꞌtz jalen yi tnum Timnat. Te yi nsken wiꞌt opon Sansón nakaꞌjil yi tnum, kale atit jun amaꞌl yi at wiꞌnin wiꞌ uva swutz, nin tzun el tzaj jun león yi acꞌajeꞌt tan bajseꞌn kloꞌ. 6 Cweꞌn muleꞌn tzun yi porer Kataj teꞌj Sansón. Ej nin ntin tan tuꞌ yi kꞌab tu yi walor xcon taꞌn tan biyleꞌn cuꞌn. Katzij cunin tulej yi jun leónaꞌtz. Chi ik jun tal neꞌẍ chiw tuꞌ, yi quiꞌc walor. Poro qui nin tal iꞌ yi xtxolbilaꞌtz scyetz yi eꞌ taj xtxuꞌ. 7 Yi wiꞌt bajeꞌn yi xtxolbilaꞌtz, nin tzun ben iꞌ-tz tan yol tetz yi jun xunaꞌtz yi na pekꞌ iꞌ teꞌj.
8 Yi teleꞌn coboxt kꞌej nintzun pakxeꞌnt junt tir te yi xun tan cyumeweꞌn tuchꞌ, nin tzun icyꞌak iꞌ tan tilweꞌn yi wankil yi león yi nsken cyen quim taꞌn. Nin tzun til yi at jun soc wunak txuc yi choꞌn ateꞌ le cꞌuꞌl yi jun leónaꞌtz, nin at wiꞌnin cabil wunak txuc tul. 9 Nin tzun ben iꞌ-tz tan telseneꞌl tzaj yi cab, nin octz tan bajseꞌn. Ma yi chitxꞌamxeꞌn yi eꞌ taj xtxuꞌ, nin tzun ben tkꞌol muꞌẍ scyetz, poro qui ntal naꞌ nsajeꞌt tcyꞌal.
10 Ma te yi mben yi taj Sansón tan yol tu yi taj xtxuꞌ xun, nintzun oc Sansón tan nucꞌleꞌn jun chin tzatziꞌn scyuchꞌ yi eꞌ xicy, quib chicxtumbr te yi tiempaꞌtz. 11 Poro tampaj yi wiꞌnin na chixob yi eꞌ filistey tetz Sansón, nin tzun ben chimolol quib junaklaj xicy yi cyamiw len cuꞌn quib te yi tzatziꞌnaꞌtz. 12 Ej itzun tal Sansón scyetz yi eꞌ xicyaꞌtz:
—Swaleꞌ jun xtxolbil tzitetz yi tajweꞌn tzital yi mbi na elepont yi ntaxk tzaj wiꞌ yi juk kꞌej tzatziꞌneꞌj. Kol chopon wok teꞌj yi mbi na elpont, swakꞌeꞌ tzun jujun cmiꞌẍ tzitetz yi lino cuꞌn. Nchaꞌtz swakꞌeꞌ len tzitetz cobox beꞌchok yi chin yubeꞌn nin. 13 Ma na ko quil cxopon wok tan talcheꞌn yi mbi na elepont, tajweꞌn tzun yi tzijunalen cuꞌn tzitakꞌ jun cmiꞌẍ yi lino cuꞌn, swetz. Nchaꞌtz tajweꞌn tan itkꞌol len swetz jun beꞌchok yi chin yubeꞌn nin, stzun Sansón bantz scyetz.
—Al tzaj bin yi xtxolbilaꞌtz sketz. List atoꞌt tan tbiteꞌn, cheꞌch tzun banintz tetz Sansón.
14 Xeꞌteꞌn tzun Sansóntz tan xtxoleꞌn. Je tzun taltzeꞌj:
“Te jun yi na wan, ja eltzaj cab.
Te yi jun yi cham ja jal ẍchiꞌal.”
Ma yi teleꞌn ox kꞌej qui nin na el chitxum tetz yi mbi na elpont yi xtxolbilaꞌtz. 15 Itzun le junt kꞌej, nin tzun cyaltz tetz yi txkel Sansón:
—Joyaj puntil tan telseneꞌl tzaj tetz awuchmil yi mbi na elpont yi xtxolbil yi ntal iꞌ sketz. Yi ko quil tzaban, tzꞌocopon tzun akꞌaꞌkltz kaꞌn tuml yi ataj scyuchꞌ cyakil axonl. ¡Na i cuꞌn ntin tan majleꞌn len tuꞌ yi beꞌch ketz, mmitxoc wok oꞌ teꞌj! cheꞌch tzun bantz.
16 Ej, lajkeꞌl nin tzun beneꞌn iꞌ te Sansón. Wiꞌnin tzun tokꞌeꞌntz yi toponeꞌn teꞌj, itzun taltz tetz Sansón:
—¡Yi aẍatz qui na cẍpekꞌ sweꞌj! ¡Na chiꞌch acꞌuꞌl sweꞌj! Na ja awal jun xtxolbil scyetz yi eꞌ intanum, nin qui nin mawal swetz yi mbi cuꞌn na elpont, stzun iꞌ bantz.
I tzun tal Sansóntz tetz:
—Qui nin nwal scyetz intaj mbi na elepont yi xtxolbil, i ptzun tzatz wal nint, stzun Sansón bantz.
17 Poro qui nin taneꞌ yi txkel Sansón tan oꞌkl, ma na jepon cunin yi juk kꞌejaꞌtz taꞌn tan oꞌkl, nin chin chꞌinchꞌuj nin ban yi txkel tan jakleꞌn iteꞌn nin xtxolbilaꞌtz tetz. Chaꞌstzun te le jukiꞌn kꞌej te yi tzatziꞌn, tlol Sansón tetz yi txkel yi mbi na elepont yi xtxolbil yi ntal iꞌ. Lajkeꞌl nin tzun beneꞌn yi txkel Sansón tan talcheꞌn scyetz yi eꞌ tanum. 18 Itzun le jukiꞌn kꞌej aꞌtz, tal muyunt cuntuꞌ, cyoponeꞌn yi eꞌ filistey tan talcheꞌn yi xtxolbileꞌj tetz Sansón:
“Quiꞌc nin jun takleꞌn yi chin chiꞌ nin chi cabil wunak txuc.
Nin cyal jun nimteꞌn cuꞌn ẍchamil swutz jun león,” cheꞌch.
“Qui kloꞌ mmeꞌl itxum tetz
yi quiꞌk ntal wuxkel tzitetz,” stzun Sansón bantz scyetz.
19 Cweꞌn muleꞌn tzun yi porer Kataj teꞌj Sansón. Choꞌn tzun beneꞌntz le jun tnum yi na biꞌaj Ascalón. Ej nin cuꞌ biyol junaklaj yaj le jun tnumaꞌtz. Ej nin yi beꞌchok yi cambaj iꞌ scyeꞌj, yaꞌstzun takꞌ iꞌ scyetz yi eꞌ yi cyal yi mbi na elepont yi xtxolbil yi tal iꞌ scyetz. Wiꞌnin tzun ẍchiꞌcheꞌn cꞌuꞌl Sansón yi pakxeꞌn xe caꞌl taj xtxuꞌ. 20 Ma tetz txkel, nin ben akꞌij tetz jun scyeri eꞌ tamiw Sansón.