Yi Sansón
13
1 Ej itzun bantz nin tzun eꞌ ajt junt tir yi eꞌ xonl Israel tan pajleꞌn caꞌwl Kataj Ryos. Tkꞌol tzun Kataj amaꞌl scyetz yi eꞌ filistey tan chibuchleꞌn tetz caꞌwunak yob.2 At tzun jun tnum yi na biꞌaj Zora, yi choꞌn at le chiꞌamaꞌl yi eꞌ xonl Dan. Ej nin choꞌn najlij jun yaj yi na biꞌaj Manoa. Quiꞌc nitxajil iꞌ na quiꞌc talbil yi txkel. 3 At tzun jun tir yi jeꞌ joptuj yi ángel yi kꞌajbil Kataj Ryos swutz yi txkel Manoa, itzun taltz tetz: “Yi aẍatz quiꞌc awalbil, poro tzawekeꞌ pwokil jun niꞌ, nin iꞌtz jun tal xicy sbneꞌ. 4 Poro quiꞌc cuj tan bajeꞌn win awaꞌn, nka jun jilwutz xcꞌalaꞌ, nin quiꞌc cuj tan bajeꞌn jun takleꞌn awaꞌn yi xan. 5 Nin yi awalaꞌtz yil sjalok quiꞌc cuj tan teleꞌn cꞌapluꞌn yi xiꞌil wiꞌ, na yi jun tal niꞌaꞌtz xconk tetz Kataj na iꞌ nazareoa sbneꞌ te yi ntaxk itzꞌij. Ej nin yil chꞌuy tzꞌocopon iꞌ tan icolpeꞌn yi axwok xonl Israel jakꞌ chicaꞌwl yi eꞌ filistey,” stzun yi ángel bantz tetz yi xnaꞌnaꞌtz.
6 Nin tzun ben yi xnaꞌn tan xtxoleꞌn tircuꞌn tetz yi chmil yi mbi cuꞌn aꞌlchij tetz, itzun taltz: “Ja ẍchaj tib jun ẍchakum Kataj Ryos kale atineꞌt, nin ja neꞌl yab teꞌj, na icuꞌn na ben jaleꞌ jun ángel tetz Kataj Ryos. Nin qui nin minjak tetz, yi naꞌj scyetz iꞌ. Na nchaꞌtz iꞌ tetz qui nin ntal swetz. 7 Yi xtxolbil yi ntal swetz iꞌtz, yi sjalok jun wal, nin quiꞌc cuj tan bajeꞌn win waꞌn, nin quiꞌc cuj tan bajeꞌn junt jilwutz xcꞌalaꞌ waꞌn, nin quiꞌc cuj tan bajeꞌn jun takleꞌn waꞌn yi xan, na yi niꞌ xconk tetz Kataj Ryos chi jun nazareo jetz yil tzꞌitzꞌij nin jalen yil quim,” stzun yi xnaꞌn bantz tetz yi chmil.
8 Toqueꞌn tzun Manoa tan nachleꞌn Kataj Ryos, i tzun tal tul oración: “Kataj, yi nink ẍchak tzajuꞌ junt tir yi jun yajaꞌtz tan tlol sketz yi mbi tajweꞌn tan kabnol te yi niꞌ yil tzꞌul itzꞌok,” stzun Manoa bantz tetz Kataj Ryos.
9 Nintzun tbit Kataj Ryos yi yol Manoa, nin jeꞌ jobtuj junt tir yi jun ángelaꞌtz swutz yi txkel iꞌ, te yi at iꞌ wi cojbil. Ej nin quiꞌc Manoa at-tz nakaꞌj. 10 Lajkeꞌl nin tzun beneꞌn yi txkeltz tan talcheꞌn tetz, itzun taltz:
—¡Bit tzaj, yi jun yaj yi jeꞌnak jobtuj tzinwutz, ja wiꞌt jeꞌ jobtuj junt tir!
11 Lajkeꞌl nin tzun beneꞌn Manoa, nin xomnintz te yi txkel kale atit yi jun yajaꞌtz. Itzun tal tetz:
—¿I peꞌ iluꞌaꞌtz yi jilon tetz wuxkel ban?
—Itzun inaꞌtz.
12 Beneꞌn tzun jakol Manoa tetz:
—Yil bajij yi xtxolbilaꞌtz yi ja taluꞌ sketz, ¿ẍeꞌn kaban tan ẍchꞌuyseꞌn yi niꞌ? nin ¿mbi jilwutz munl sbneꞌ iꞌ? stzun Manoa bantz.
13 —Ntin banwok taneꞌn tircuꞌn yi ja wiꞌt wal tetz awuxkel: 14 Quil baj win taꞌn, nka alchok eꞌchk takleꞌn yi na bnix te yi taꞌal uva. Nin quiꞌc cuj tan bajeꞌn junt jilwutz xcꞌalaꞌ taꞌn. Nin quiꞌc cuj tan bajeꞌn jun takleꞌn taꞌn yi xan. Ntinaꞌtz tajweꞌn tan ibnol taneꞌn, stzun yi ángel bantz scyetz.
15-16 Poro qui nin el xtxum Manoa tetz yi jun yajaꞌtz, yi iꞌ yi ángel kꞌajbil Kataj Ryos, na nin ben tlol iꞌ tetz:
—Bneꞌuꞌ jun pawor, cyajk cyenuꞌ skeꞌj tan waꞌaꞌn te jun tal neꞌẍ chiw yi skanuqueꞌ teruꞌ, tzun iꞌ bantz.
Poro itzun saj tlol yi ángelaꞌtz:
—Mpe laꞌk chincyaj cyen tan waꞌn, quiꞌc rmeril tan bajeꞌn iwaꞌ waꞌn. Poro baꞌn tzapat yi tal chiwaꞌtz tetz jun atxꞌixwatz, stzun yi ángel bantz tetz Manoa.
17 Beneꞌn tzun tlol Manoa tetz yi ángel:
—Ntin tal tzajuꞌ yi biꞌuꞌ sketz, bantz quil tzꞌeluꞌ te kacꞌuꞌl, na ilenin skatyoẍink teruꞌ yil bnix taneꞌn yi mbi cuꞌn ntaluꞌ sketz, stzun Manoa bantz.
18 —Quiꞌc rmeril yil walnin tzatz. Mpeꞌk walnin quil tzꞌel itxum te yi mbi ekaꞌn taꞌn.
19 Beneꞌn tzun Manoa tan ticyꞌleꞌn tzaj yi tal neꞌẍ chiw, tu ixiꞌn triw, nintzun je tkꞌol tircuꞌn wi jun cꞌub, nin octz tan pateꞌn tircuꞌn tetz Kataj Ryos. Nin tzun ban Kataj Ryos jun takleꞌn yi chumbalaj nin, ẍchiwutz Manoa tu txkel. 20 Te yi na tzan yi kꞌakꞌ wi yi altar, wiꞌnin tzun jeꞌn sibel te yi oyaꞌtz tcyaꞌj, nin tzun ben quilol Manoa tu txkel yi tajeꞌn yi ángel tcyaꞌj. Choꞌn jeꞌn nin tul yi sib. Nin tzun aj cuꞌn chiwiꞌ-tz, jalen yi cweꞌn poneꞌn chiplaj wuxtxꞌotxꞌ. 21 Kalenaꞌs tzun teleꞌn xtxum Manoa tetz yi jun yajaꞌtz iꞌtz yi ángel yi kꞌajbil Kataj Ryos. Quiꞌt ẍchaj tib junt tir ẍchiwutz. 22 Itzun tal Manoa tetz yi txkel:
—Jun cuꞌn yol skaquimok, na ja kil wutz Ryos.
23 Sajeꞌn tzun tlol yi txkel:
—Yi yaꞌtzk tajbil Kataj Ryos tan kaquimeꞌn, qui kloꞌ ncujij iꞌ yi katxꞌixwatz yi nkoy, nin qui kloꞌ ntakꞌ amaꞌl sketz tan kilol yi ángel. Nchaꞌtz qui kloꞌ ntal iꞌ tircuꞌn yi xtxolbilaꞌtz sketz, stzun yi txkel Manoa bantz tetz.
24 Ma yi teleꞌn tiemp, jaleꞌn nin ban jun tal yi xnaꞌn, nin tzun oc tkꞌol yi biꞌ-tz tetz Sansón. Wiꞌnin tzun ẍchꞌuyeꞌn yi tal niꞌaꞌtz, nin wiꞌnin banl Kataj bantz tibaj. 25 At tzun jun tir bantz, yi choꞌn at Sansón le chicampament yi eꞌ xonl Dan, yi choꞌn at txoꞌl yi tnum yi na biꞌaj Zora tu Estoal, nin tzun xeꞌtij yi espíritu tetz Ryos tan xconseꞌn iꞌ.