Jefté scyuchꞌ yi eꞌ xonl Efraín
12
1 Ej itzun bantz, tircunin tzun yi eꞌ yaj yi xonl Efraín cweꞌn chimolol quibtz, nin tzun eꞌ icyꞌtz wi yi aꞌ yi na biꞌaj Jordán. Sbejnin tzun eꞌ beneꞌntz kale atit yi tnum yi na biꞌaj Zafón, nintzun cyaltz tetz Jefté:—¿Nxac qui mital sketz ko at ibembil tan oyintziꞌ scyeꞌj yi eꞌ amonita? Ja kloꞌ kaben tziteꞌj tan oyintziꞌ. ¡Tan tuꞌ yi yaꞌtz maban tzꞌocopon kꞌaꞌkl acaꞌl kaꞌn nchaꞌtz aẍ cẍocopon kaꞌn tul tan atzꞌeꞌeꞌn! cheꞌch tzun bantz tetz Jefté.
2 I tzun saj tlol Jefté scyetz:
—Bintzi, yi in wetz scyuchꞌ yi eꞌ inwunakil yi xomcheꞌ sweꞌj, ja jal jun oyintzin skaxoꞌl scyuchꞌ yi eꞌ amonita. Ej nin te yi ntaxk xeꞌtij yi oyintziꞌaꞌtz ja kacꞌuch jun pawor tzitetz tan ituleꞌn tan kuchꞌeyeꞌn, poro qui nin ncxuꞌl wok. 3 Nin tampaj yi qui nin ncxuꞌl wok tan kuchꞌeyeꞌn, ja tzun wakꞌ wibtz tkꞌab quimichil, na nin imben tan oyintziꞌ scyuchꞌ yi eꞌ amonita, nin ja takꞌ Kataj Ryos amaꞌl sketz tan katxꞌaconeꞌn scyeꞌj. ¿Ma jaluꞌ, mbi tzuntz ja cxuꞌl wok jaluꞌ tan oyintziꞌ swuchꞌ?
4 Cweꞌn tzun molol Jefté tircuꞌn yi eꞌ yaj yi eꞌ aj Galaad, nin tzun eꞌ octz tan oyintziꞌ scyuchꞌ yi eꞌ xonl kꞌajtzun Efraín, nin xcyeꞌ iꞌ scyeꞌj. (Ilenin at oyintziꞌ ẍchixoꞌl, na ja cyal yi eꞌ xonl Efraínaꞌtz yi najlcheꞌ jalaj icyꞌ tzaj, yi quiꞌc chixak yi eꞌ xonl Galaad na eꞌ tuꞌ awernak taneꞌn, na le wutz cyetz cyajtzaꞌkl yi ja chicyajcyen coliꞌn cyaꞌn.) 5 Ej nin nchaꞌtz cyetzaj yi eꞌchk amaꞌl kale juyeꞌt xeꞌ yi aꞌ Jordán nin yi nxcon cyakꞌun yi eꞌ xonl Efraínaꞌtz tan quicyꞌeꞌn tzaj. Ej nin yi cweꞌn poneꞌn jun scyeri eꞌ xonl Efraín tan jakleꞌn permis tan quicyꞌeꞌn tzaj, ja chijak yi eꞌ aj Galaad yi eꞌ qꞌuicyꞌlom beꞌ tzi aꞌ aꞌtz tetz: “¿Aẍ peꞌ xonl Efraín?” Ej nin yi ko ja tal quiꞌ, ja tzun chijak tetz tan talcheꞌn tzaj yi yol “ẍibolet”. Ej nin yi ko qui nin xcyeꞌ tan talcheꞌn yi yolaꞌtz skil cunin nin ko ja tal tetz “sibolet”, 6 taꞌsteꞌnin tzun na cweꞌt tzꞌamijtz, nin taꞌsteꞌn nin cweꞌt biyijtz, stziꞌ yi aꞌ Jordánaꞌtz. Te jun tiraꞌtz eꞌ quim caꞌwunak cob mil yaj yi eꞌ len cun xonl Efraín. 7 Kak tzun yob ban Jefté-tz tetz cyajcawil yi eꞌ aj Israel. Nin yi quimeꞌn iꞌ, choꞌn tzun mukxeꞌntz Galaad, yi tetz tanum.
Oxt wiꞌtz ajcaw tetz Israel
8 I tzun bantz yi nsken wiꞌt quim Jefté, nin tzun oc cyen Ibzán tetz cyajcawil yi eꞌ xonl Israel. Iꞌ jun aj Belén. 9 Nin eꞌ jal junaklaj cyꞌajl iꞌ, nin junaklaj meꞌl, nin cyakil cunin tzun yi eꞌ nitxajilaꞌtz eꞌ umeꞌ-tz taꞌn scyuchꞌ awer nak. Juk yob mban iꞌ tan chicaweꞌn yi eꞌ xonl Israel. 10 Ej nin yi quimeꞌn, choꞌn tzun mukxeꞌntz Belén. 11 Itzun yi quimeꞌn Ibzán, nin tzun oct cyen Elón. Iꞌ jun xonl kꞌajtzun Zabulón, nin tzun octz tetz cyajcawil yi eꞌ aj Israel, tetz lajuj yob. 12 Nin yi quimeꞌn iꞌ choꞌn tzun mukxeꞌntz Ajalón, le chitanum yi eꞌ xonl. 13 Itzun yi quimeꞌn Elón, nin tzun oct cyen Abdón, cyꞌajl Hilel yi aj Piratón tetz cyajcawil yi eꞌ aj Israel. 14 Cawun iꞌ tetz wajxak yob. Eꞌ jal caꞌwunak cyꞌajl, nin junaklaj mam iꞌ. Ej nin ẍchijunal len ja xcon buruꞌ cyaꞌn. 15 Nin yi quimeꞌn Abdón, choꞌn tzun mukxeꞌntz le tnum Piratón, yi choꞌn at tul yi amaꞌl cwent Efraín, yi choꞌn at wiꞌwtz yi na biꞌaj wi Amalec.