Yi mbi cuꞌn ban Jefté
11
1 Ej itzun bantz te yi jun tiempaꞌtz at jun yaj aj Galaad yi na biꞌaj Jefté. Iꞌ jun wiꞌtz alkꞌom yi qui na xob tan oyintziꞌ tu jun. Nchaꞌtz iꞌ tal jun xnaꞌn yi wiꞌtz bnol tetz, nin yi biꞌ tetz taj iꞌtz Galaad. 2 Ateꞌ nin mas nitxajil Galaad tu yi tetz txkel, nin yi chichꞌuyeꞌn nin tzun el tzaj chilajul Jefté ẍchixoꞌl na nin cyaltz tetz yi quiꞌc takꞌbil muꞌẍ tetz te yi herens, tampaj yi iꞌ tuꞌ jun chacꞌ, yi tal jun xnaꞌn yi wiꞌtz bnol tetz. 3 Tan yi xtxolbilaꞌtz nin tzun el ojkuj Jefté ẍchixoꞌl yi eꞌ stzicy. Choꞌn tzun toponeꞌntz tan najeweꞌn jalen yi tnum yi na biꞌaj Tob. Nin tzun eꞌ jal cobox tuchꞌ taꞌn yi chin mal nin eꞌ. Ej nin ntinaꞌtz cyakꞌun bantz iꞌtz tan talkꞌeꞌn eꞌchk takleꞌn. 4 Itzun bantz yi teleꞌn tiemp nin tzun eꞌ opon yi eꞌ amonita tan oyintziꞌ scyeꞌj yi eꞌ aj Israel. 5 Ej nin yi eꞌ wiꞌtz ajcaw tetz yi tnum Galaad, nin ben chimantar tan ẍchakleꞌn yi jun Jefté-aꞌtz jalen le tnum Tob. 6 I tzun cyaltz tetz:—Na kloꞌ kaj yil cẍuꞌl skaxoꞌl. Yi kajbil iꞌtz yi nink tzꞌocuꞌ tetz kajcawil bantz kabeneꞌn tan oyintziꞌ scyeꞌj yi eꞌ amonita.
7 Sajeꞌn tzun tlol Jefté scyetz:
—¿Poro ẍeꞌn? ¡Qui ptzun na chiꞌch chicꞌuꞌluꞌ sweꞌj! na nin bin el tzaj chilajuluꞌ in xe caꞌl intaj. ¿Nxac na cuꞌ chiwutzuꞌ swetz? ¿I ptzun tan paj yi ateꞌuꞌ wutz peꞌm?
8 I tzun cyaltz:
—Bintzij yoluꞌ yi na taltzajuꞌ sketz. Ja wiꞌt koꞌc wutz peꞌm, chaꞌstzun te ja kuꞌl tan joyleꞌnuꞌ. Yi mero kajbil iꞌtz yi nink tzꞌoponuꞌ skaxoꞌl tan kuchꞌeyeꞌn yil koꞌk tan oyintziꞌ scyuchꞌ yi eꞌ amonita. Nchaꞌtz yi kajbil iꞌtz, yi nink cyaj cyenuꞌ tetz wiꞌtz kajcawil yi oꞌ aj Galaad.
9 Sajeꞌn tzun tlol Jefté:
—Baꞌn, ko yaꞌtz cyajbiluꞌ. Nopontz ẍchixoꞌluꞌ tan oyintziꞌ scyeꞌj yi eꞌ amonita, nin ko yaꞌtz tajbil Kataj, nocopon tzuntz tetz cyajcawiluꞌ, stzun Jefté bantz scyetz.
10 —Sak swutz Kataj Ryos, skeꞌlk cuꞌn teꞌj chi na taltzajuꞌ, cheꞌch yi eꞌ ajcawaꞌtz.
11 Ej nintzun ben xomok Jefté scyeꞌj. Ej nin tircuꞌn yi tnum eꞌ cujij yi toqueꞌn iꞌ tetz wiꞌtz cyajcawil. Choꞌn tzun tlol Jefté iteꞌn nin yolaꞌtz swutz cuꞌn Kataj Ryos le tnum Mizpa. 12 Chibeneꞌn tzun cobox chakum taꞌn swutz yi chireyil yi eꞌ amonita tan jakleꞌn yi xtxolbileꞌj: “¿Mbi na chiꞌch cꞌuꞌluꞌ teꞌj? ¿Nin mbitzuntz na tajuꞌ yil chuꞌluꞌ tan oyintziꞌ skeꞌj?” 13 “Ma jaluꞌ ax wok aj Israel, yi iteleꞌn tzaj wok Egipto, ja cxuꞌl tan majleꞌn kaꞌamaꞌl, tircuꞌn yi amaꞌl yi na xeꞌtij te yi aꞌ yi na biꞌaj Arnón, jalen te aꞌ yi na biꞌaj Jaboc yi na tzajpon Jordán. Ma jaluꞌ, na kloꞌ kaj yil tzitakꞌicyꞌ tzaj katxꞌotxꞌ tan baꞌn cuꞌn,” stzun chireyil yi eꞌ amonita bantz scyetz yi eꞌ ẍchakum Jefté.
14 Chibeneꞌn tzun junt tir coboxt chakum tan Jefté swutz yi chireyil yi eꞌ amonita. 15 Je tzun ben tloltzeꞌj: “Je yi yol Jefté jeꞌj: Yi oꞌ ketz yi oꞌ xonl Israel, qui nin mmeꞌl kamajol muꞌẍ txꞌotxꞌ scyetz yi eꞌ aj Moab, tuꞌk muꞌẍ scyeruꞌ yi eꞌuꞌ amonita. 16 Na yi keleꞌn tzaj Egipto, ja kaxoꞌmbej yi amaꞌl yi tzꞌinunin tuꞌ, tan koponeꞌn te yi Cyak Mar, nin ja kopon jalen le tnum Cades. 17 Chaꞌstzun te ja chiben kachakol cobox chakum tan jakleꞌn amaꞌl tetz yi rey Edom, tan jakleꞌn amaꞌl tetz tan kicyꞌeꞌn le chiꞌamaꞌl, poro yi iꞌ tetz qui nin takꞌ amaꞌl sketz tan kicyꞌeꞌn. Nchaꞌtz oꞌ bantz te yi rey tetz Moab, oꞌ jak amaꞌl tetz, poro nchaꞌtz iꞌ qui nin takꞌ amaꞌl sketz tan kicyꞌeꞌn le chitanum. Chaꞌstzun te oꞌ cyajeꞌn cyen Cades. 18 Ej nin yi teleꞌn tiemp ja kicyꞌ tul yi amaꞌl yi tzꞌinunin tuꞌ, nin ja kakꞌ welt yi eꞌchk amaꞌl cwent Edom tu Moab, jalen kacweꞌn poneꞌn jalaj icyꞌtzaj yi tzanlaꞌ Arnón. Qui nin oꞌ icyꞌ jalaj icyꞌen yi jun tzanlaꞌaꞌtz na yaꞌtz chimojomil yi eꞌ aj Moab. 19 Chaꞌstzun te eꞌ beneꞌn kachakol cobox chakum jalen te Sehón, yi rey amorreo yi choꞌn na cawun le amaꞌl Hesbón, tan jakleꞌn amaꞌl tetz ntin tan kicyꞌeꞌn le chiꞌamaꞌl tan koponeꞌn ketz le ketz katanum. 20 Poro yi Sehónaꞌtz qui nin takꞌ amaꞌl sketz tan kicyꞌeꞌn, na ja cabej cꞌuꞌl skeꞌj. Ej nin oc iꞌ-tz tan molcheꞌn yi eꞌ tetz sanlar, nin tzun eꞌ opontz le amaꞌl yi na biꞌaj Jahaza, nin eꞌ octz tan oyintziꞌ skuchꞌ. 21 Poro yi Kataj Ryos, yi kaRyosil yi oꞌ Israel, ja takꞌ iꞌ amaꞌl sketz tan katxꞌaconeꞌn scyeꞌj Sehón tuml yi eꞌ tetz sanlar. Chaꞌstzun te ja kacambaj tircuꞌn chiꞌamaꞌl yi eꞌ amonita yi najlcheꞌ-tz. 22 Ja tzun kacambaj tircuꞌn chiꞌamaꞌl yi eꞌ amorreo-aꞌtz, yi choꞌn na xeꞌtij stziꞌ te yi tzanlaꞌ yi na biꞌaj Arnón jalen yi na opon te yi junt tzanlaꞌ yi na biꞌaj Jaboc, nin yi junt mojom na xeꞌt tzaj te yi amaꞌl yi tzꞌinunin tuꞌ jalen yi na opon stziꞌ yi aꞌ Jordán. 23 ¿Ma jaluꞌ i peꞌ teruꞌ tajbiluꞌ yil majlenuꞌ tircuꞌn yi amaꞌlaꞌtz yi ja el majol Kataj Ryos scyetz yi eꞌ amonita tan tkꞌol sketz? 24 Na nchaꞌtz teruꞌ yi kol takꞌ Quemos yi ryosiluꞌ jun takleꞌn teruꞌ, teruꞌ sbneꞌ. ¿Nkꞌeraꞌtz peꞌ bintzij yi na wal nin? Nchaꞌtz tzun yi oꞌ ketz, skawutz ketz tircuꞌn yi na takꞌ kaRyosil sketz iꞌtz mero ketz na ban. 25 ¿Ko chumbalajt cunin tzun teruꞌ-tz swutz Balac yi rey tetz Moab, yi cyꞌajl Zipor? Na yi iꞌ tetz, qui nin oc tan kalajeꞌn len. 26 Ja el oxix cient yob kaꞌn yi kunleꞌnix tan najeweꞌn tul yi amaꞌl cwent Hesbón. Nin ja kaꞌtij tul yi tnum Aroer, nin ja kaꞌtij lakak eꞌchk neꞌẍ tnum yi ateꞌ nintz nakaꞌj. Ej nin ja kaꞌtij tulak eꞌchk lmak tnum yi ateꞌ stziꞌak yi tzanlaꞌ Arnón. ¿Nxac tzun yi qui nin nchoꞌcuꞌ tan majleꞌn tircuꞌn yi eꞌchk amaꞌlaꞌtz sketz lejeꞌnak tzaj tunintz? 27 Yi in wetz quiꞌc jun tal takleꞌn ploj mimban teꞌjuꞌ. Ma na iluꞌ teruꞌ na tzanuꞌ tan joyleꞌn puntil tan jaleꞌn oyintziꞌ skaxoꞌl. Poro Kataj Ryos iꞌ tzꞌocopon tan pujleꞌn kaxoꞌl scyuchꞌuꞌ, yi oꞌ ketz yi oꞌ xonl Israel scyuchꞌ yi eꞌuꞌ xonl Amón,” stzun Jefté banintz scyetz yi eꞌ ẍchakum tan cyalol tetz chireyil yi eꞌ amonita.
28 Poro qui nin tocsaj yi chireyil yi eꞌ amonita chiyol yi eꞌ ẍchakum Jefté.
Yi yol yi nsuk Jefté tetz Kataj Ryos
29 Ej itzun bantz, nin tzun cuꞌul yi espíritu tetz Kataj Ryos tibaj Jefté, nin tzun ben iꞌ-tz lakak amaꞌl cwent Galaad tu Manasés tan chijoyleꞌn wunak tan chixomeꞌn teꞌj tan oyintziꞌ. Kalenaꞌs tzun pakxeꞌn Mizpa yi choꞌ at cwent Galaad kalenaꞌs ticyꞌeꞌn iꞌ tan oyintziꞌ scyeꞌj yi eꞌ amonita. 30 Te yi ntaxk ben, nintzun suk iꞌ yi xtxolbileꞌj tetz Kataj Ryos, itzun taltz: “Yi kol takꞌuꞌ amaꞌl swetz tan inxcyeweꞌn scyeꞌj yi eꞌ amonita, 31 nin ko baꞌn cuntuꞌ chimpakxij, jun cuꞌn, swoyeꞌ teruꞌ tetz jun intxꞌixwatz, yi patuꞌn cuꞌn na uꞌlij, yi bajx yil tzꞌeluꞌl xe incaꞌl tan incꞌulcheꞌn,” stzun Jefté bantz tetz Kataj Ryos.
32 Nin tzun xcyeꞌ Jefté scyeꞌj yi eꞌ amonita. Xcyeꞌ iꞌ tan cambajeꞌn chitanum, na nin takꞌ Kataj Ryos amaꞌl tetz tan txꞌaconeꞌn scyeꞌj. 33 Wiꞌnin tzun contr eꞌ quimtz tan Jefté, nin xcyeꞌ iꞌ tan cambajeꞌn junak tnum yi at xoꞌl Aroer tu Minit, jalen yi tnum Abel-keramim. Yaꞌstzun xtxolbil bantz yi eꞌ xcyeweꞌn yi eꞌ xonl Israel scyeꞌj yi eꞌ amonita.
34 Ej itzun yi pakxeꞌn Jefté xe tetz caꞌl jalen Mizpa, nin tzun el tzaj yi jun tal ẍutuj meꞌl iꞌ tan cꞌulcheꞌn. Wiꞌnin tzatziꞌn atit cuꞌntz. Nin nternin na bixin yi na tzan tan tocseꞌn yi tetz pandero. 35 Yi beneꞌn tilol Jefté yi teleꞌn tzaj yi meꞌlaꞌtz tan cꞌulcheꞌn, nintzun oc iꞌ-tz tan ritꞌeꞌn cuꞌn yi beꞌch tetz, tan ẍchajleꞌn yi bis oꞌkl yi njal teꞌj. Beneꞌn tzun tlol tetz yi meꞌl:
—¡Ay, aẍ jun cꞌoloj inmeꞌl, mbinin jun chin chꞌon na awakꞌ swetz! ¡Nin aẍ ajpaj te yi tzꞌakoꞌn yi tzimbneꞌ, na ja insuk inyol tetz Ryos nin tajweꞌn cuꞌn tan weleꞌn cuꞌn teꞌj jaluꞌ! stzun Jefté banintz tetz yi meꞌl.
36 Sajeꞌn tzun tlol yi meꞌl tetz:
—Iluꞌ jun cꞌoloj intaj, bneꞌuꞌ sweꞌj chi yi nsukuꞌ tetz Kataj Ryos, na ja el cuꞌn iꞌ te yi mmoꞌc iꞌ tan ẍchꞌeyeꞌnuꞌ tan xcyeweꞌnuꞌ scyeꞌj yi eꞌ contruꞌ yi eꞌ amonita. 37 Poro na kloꞌ waj tzincꞌuch jun pawor teruꞌ, yi nink takꞌuꞌ amaꞌl swetz tetz cob xaw, tan imbeneꞌn tan xoꞌn scyuchꞌ cobox wamiw xun, wiꞌak eꞌchk juꞌwtz, tan oꞌkl scyuchꞌ yi eꞌ wamiwaꞌtz, tampaj yi ẍchinquimok chan, na quil numeꞌ.
38 Nin tzun takꞌ Jefté amaꞌltz tetz yi meꞌl tetz cob xaw. Nin te yi tiempaꞌtz ja aꞌtij iꞌ scyuchꞌ yi eꞌ xun yi eꞌ tamiw, wiꞌak eꞌchk wutz tan oꞌkl, na quimeꞌn tlen tuꞌ atit, wech qui nin til wutz jun yaj. 39 Ma yi ticyꞌeꞌn yi tiempaꞌtz, nin tzun pakxijt-tz kale najleꞌt yi taj, nin tzun el cuꞌn Jefté te yi yol iꞌ yi suknak tetz Kataj Ryos. Nin tzun quim yi meꞌl Jefté-aꞌtz nin qui nin til wutz jun yaj. 40 Chaꞌstzun te ẍchixoꞌl yi eꞌ xonl Israel jaluꞌ, cyakil nin yob tircuꞌn yi eꞌ xun na chiben tan chunaꞌn xoꞌl wutz tetz cyaj kꞌej, tan tuleꞌn txꞌakx chicꞌuꞌl yi mbi cuꞌn ban te yi meꞌl Jefté.