Yi nchicawun tzaj Tola tu Jair
10
1 Ej itzun bajijtz, yi nsken wiꞌt quim Abimelec, nin tzun jal jun yaj ẍchixoꞌl yi eꞌ xonl Isacar yi na biꞌaj Tola, yi cyꞌajl Fúa, nin yi Tolajaꞌtz iꞌ mamaj yi yaj yi na biꞌaj Dodo. Ej nin tzun jal walor iꞌ-tz tan chicolpeꞌn yi eꞌ aj Israel. Nin yi jun aj colpinlaꞌtz choꞌn tzun najlijtz le jun amaꞌl yi na biꞌaj Samir, yi choꞌn at wiꞌwtz cwent Efraín. 2 Ej nin junak ox tzun yob ban iꞌ-tz tan cawuꞌn Israel, jalen yi quimeꞌn. Choꞌn mukxeꞌn iꞌ Samir.3 Ma yi nsken quim Tola, nin tzun jal junt ajcaw yi na biꞌaj Jair, iꞌ jun aj Galaad. Ej nin cawun iꞌ junak cob yob squibaj eꞌ xonl Israel. 4 Nin yi Jairaꞌtz eꞌ jal junaklaj cyꞌajl. Ej nin at len cuꞌn jun chiburuꞌ tetz chixoꞌmbil yi eꞌ cyꞌajolaꞌtz. Nchaꞌtz at len jun tnum chicwentaꞌ tan cawuꞌn le amaꞌl Galaad. Nin yi junaklaj tnumaꞌtz na chibiꞌajeꞌt “Yi eꞌchk tnum tetz Jair”. 5 Ma yi quimeꞌn Jair, choꞌn tzun mukxeꞌntz Camón.
Yi cyoqueꞌn yi eꞌ amonita tan chibuchleꞌn yi eꞌ aj Israel
6 Ej nin eꞌ oc junt tir yi eꞌ xonl Israel tan juchleꞌn quil swutz Ryos. Na nin eꞌ oc tan lokꞌeꞌn wutz yi eꞌchk teblal Baal tu Astarté. Nchaꞌtz eꞌ oc tan lokꞌeꞌn chiwutz yi chiryosil yi eꞌ aj Siria, tu chiryosil yi eꞌ wunak yi najlcheꞌ le tnum Sidón, tu chiryosil yi eꞌ aj Moab, tu chiryosil yi eꞌ amonita, nin yi chiryosil yi eꞌ filistey. Teleꞌn tzun Kataj Ryos te chicꞌuꞌl, quiꞌt nin eꞌ octz tan banleꞌn taneꞌn yi cyetz chimunl swutz iꞌ. 7 Chaꞌstzun te chiꞌcheꞌn cꞌuꞌl Ryos junt tir scyeꞌj, tan paj yi teleꞌn iꞌ te chicꞌuꞌl. Chaꞌstzun te tkꞌol Ryos amaꞌl scyetz yi eꞌ filistey tu yi eꞌ amonita tan cyoqueꞌn tan chibuchleꞌn. 8 Ej nin jetzaꞌtz eꞌ cyajeꞌn cyen yi eꞌ xonl Israel jakꞌ chicaꞌwl yi eꞌ filistey scyuchꞌ yi eꞌ amonita. Ej nin wajxaklaj yob eꞌ ban jak chicaꞌwl. Nin wiꞌnin buchuꞌn eꞌ ban scyeꞌj yi eꞌ xonl Israel yi najlcheꞌ le amaꞌl cwent Galaad, yi choꞌn at jalaj icyꞌen yi aꞌ Jordán cwent yi amaꞌl scyetz yi eꞌ amorreo. 9 Ej itzun bantz yi eꞌ amonita nin tzun eꞌ icyꞌ tzaj wi yi aꞌ Jordán tan cyuleꞌn tan oyintziꞌ scyuchꞌ yi eꞌ xonl Judá, tuml yi eꞌ xonl Benjamín, scyuchꞌ yi eꞌ xonl Efraín, tircunin tzun yi eꞌ aj Israelaꞌtz eꞌ octz wutz peꞌm cyaꞌn. 10 Ej itzun tampaj yi xtxolbilaꞌtz, nin tzun el chitziꞌ-tz tan jakleꞌn ẍchꞌeybil cyetz tetz Kataj Ryos, itzun cyaltz tetz: “Iluꞌ kaRyosil, ja kajuch kil swutzuꞌ, na ja eluꞌ te kacꞌuꞌl, nin ja koꞌc tan lokꞌeꞌn chiwutz junt txꞌakaj ryos yi nkꞌeraꞌtz bintzij, nin yi quiꞌc ekaꞌn cyaꞌn,” cheꞌch tzun yi eꞌ aj Israelaꞌtz banintz tetz Kataj Ryos.
11 I tzun saj tlol Ryos scyetz: “Yi axwok itetz ocnak ibuchleꞌn cyakꞌun yi eꞌ aj Egipto, nin cyakꞌun yi eꞌ amorreo, nin cyakꞌun yi eꞌ aj Amón, nin scyuchꞌ yi eꞌ filistey. 12 Nchaꞌtz yi eꞌ aj Sidón, scyuchꞌ yi eꞌ xonl Amalec, nin yi eꞌ aj Madián, tircuꞌn yi eꞌaꞌtz ja choꞌc len tan ibuchleꞌn, nin cyakil tir yi mmeꞌl itziꞌ tan jakleꞌn ẍchꞌeybil itetz swetz, ja noꞌc tan icolcheꞌn. 13 Poro qui nin ncxoꞌc cꞌulutxum jakꞌ incaꞌwl. Chaꞌstzun te ja chincyaj cyen itilol. Lastum yi ja cxoꞌc wok tan lokꞌeꞌn chiwutz junt txꞌakaj ryosaꞌtz. Chaꞌstzun te jaluꞌ quiꞌt noꞌc tan icolcheꞌn. 14 ¡Baꞌnt cuꞌn quibeneꞌnk tan jakleꞌn ẍchꞌeybil itetz scyetz yi iryosilaꞌtz yi kꞌuklij icꞌuꞌl scyeꞌj! ¡Baꞌn choꞌc cyeꞌtz tan ichꞌeyeꞌn nin tan icolcheꞌn yil cxoꞌcwok wutz peꞌm!” stzun Kataj Ryos bantz scyetz yi eꞌ aj Israel.
15 Ej itzun cyal junt tir tetz Kataj Ryos: “Bintzij nin taꞌ ja kajuch kil swutzuꞌ. Koꞌ cawseꞌ binuꞌ, nin bneꞌuꞌ yi tajbiluꞌ skeꞌj. Poro na cuꞌ katziꞌ junt tir teruꞌ, koꞌ coleꞌuꞌ jaluꞌ ẍchikꞌab kacontr,” cheꞌch tzun yi eꞌ xonl Israel banintz tetz Kataj Ryos. 16 Ej nin eꞌ octz tan xiteꞌn cuꞌn eꞌchk teblal chiryosil yi eꞌ awernak yi eꞌ ocnak cyetz tan lokꞌeꞌn chiwutz. Nin eꞌ oct-tz tan lokꞌeꞌn wutz Kataj Ryos. Nin tan yi xtxolbilaꞌtz, el kꞌajab Ryos scyeꞌj tan paj yi buchbeꞌn cyetz nin oc junt tir tan quichꞌeyeꞌn, na wiꞌnin qꞌuixcꞌuj ateꞌ cuꞌnt. 17 Cweꞌn tzun chimolol quib yi eꞌ amonita tan oyintziꞌ nin choꞌn cweꞌn chicampament tetz cobox keꞌj le amaꞌl Galaad. Nchaꞌtz eꞌ ban yi eꞌ aj Israel, cuꞌ chimolol quib nin choꞌn tzun cweꞌn chicampament le amaꞌl yi na biꞌaj Mizpa. 18 Ej nin yi eꞌ xonl Israel yi najlcheꞌ-tz Galaad, scyuchꞌ yi eꞌ wiꞌtz cyajcawil, bixeꞌ cyaꞌn, yi alchok scyetz yil nimsaj cꞌuꞌl nin yil bajx cuꞌn ẍchiwutz tan oyintziꞌ scyeꞌj yi eꞌ amonita, jepon cyen cyakꞌun tetz cyajcawil.