Yi chipucꞌuneꞌn junt tir yi eꞌ xonl kꞌajtzun Benjamín
21
1 Ej itzun bantz, yi eꞌ aj Israel, nin tzun bnix jun chitrat-tz cyaꞌn yi ateꞌ tzaj le tnum Mizpa, te yi ntaxk xeꞌtij yi oyintziꞌ scyuchꞌ yi eꞌ xonl Benjamín, yi quiꞌc cuj tan cyakꞌol amaꞌl tan cyumeweꞌn jun chimeꞌl scyeꞌj yi eꞌ xonl kꞌajtzun Benjamín. 2 Yi tzajeꞌn yi oyintziꞌ, cweꞌn tzun chimolol quibtz le tnum Betel, nin tzun eꞌ octz tan banleꞌn taneꞌn chimunl swutz Ryos, jalen yi toqueꞌn akaleꞌn, wiꞌnin tzun cyokꞌeꞌntz, nin wiꞌnin chibisuneꞌn, i tzun na cyaltz: 3 “Iluꞌ jun cꞌoloj kaRyosil yi oꞌ aj Israel. ¿Mbi tzuntz yi ja bajij yi jun ilaꞌtz skaxoꞌl? ¿Mbi tzuntz yi ja tzaj jun kꞌuꞌj kaxonl skaxoꞌl yi oꞌ xonl Israel?” cheꞌch tzun na bantz.4 Ma le junt eklok, chin jalchan cunin chicꞌaseꞌn yi eꞌ aj Israelaꞌtz, nin tzun bnix jun altar cyaꞌn, nin eꞌ octz tan pateꞌn cuꞌn chitxꞌixwatz tetz Kataj Ryos, tu eꞌchk oy yi na ẍchaj yi ja wiꞌt jal tzatzin paz ẍchixoꞌl tu Ryos. 5 Ej nintzun eꞌ octz tan jakleꞌn squibil quib, i tzun na cyaltz: “¿Naꞌ scyetz jun skaxoꞌl yi qui aꞌtij yi cweꞌn kamolol kib le tnum Mizpa te yi ntaxk nkaben tan oyintziꞌ?” cheꞌch tzun na bantz.
Na nsken wiꞌt bixeꞌ cyaꞌn yi alchok scyetz yi qui maꞌtij te jun moloꞌn ibaꞌtz, at quimbil.
6 Wiꞌnin tzun chibisuneꞌn yi eꞌ xonl Israel bantz Betel, tan yi xtxolbil yi mbajij scyeꞌj yi eꞌ xonl Benjamín, i tzun cyaltz: “Muꞌẍt qui nsotz jun kꞌuꞌj kaxonl yi oꞌ xonl Israel. 7 ¿Mbil kaban tan takꞌleꞌn quixkel, yi eꞌ yi ja chiclax cyen? Na yi oꞌ ketz ja bixeꞌ jun katrat kaꞌn, swutz Kataj Ryos yi quiꞌc cuj tan cyumeweꞌn jun kameꞌl scyeꞌj. 8 ¿At peꞌ jun kꞌuꞌj katanum yi qui eꞌ aꞌtij te yi moloꞌn ib yi nkaban le tnum Mizpa?” cheꞌch tzun bantz.
Ej nin tzun ul txꞌakx ẍchicꞌuꞌl, yi cyaꞌl jun scyetz yi eꞌ yi najlcheꞌ le tnum Jabes cwent Galaad eꞌ aꞌtij te jun moloꞌn ibaꞌtz. 9 Na yi cyoqueꞌn tan siꞌleꞌn planiy scyeꞌj yi eꞌ yi aꞌtij, ja lajluchax yi cyaꞌl jun scyeri eꞌ wunakaꞌtz eꞌ aꞌtij Mizpa. 10-11 Bixeweꞌn tzun coblaj mil sanlar ẍchixoꞌl yi eꞌ aj Israelaꞌtz, nin tzun akꞌlij ort scyetz tan cweꞌn chibiyol tircuꞌn yi eꞌ aj Jabes, tuml chinitxaꞌ nin scyuchꞌ yi eꞌ xnaꞌn yi at len quichmil. 12 Ẍchixoꞌl yi eꞌ wunakaꞌtz cwent Jabes ja chijal cyaj cient xun yi cheꞌn cunin quil wutz jun yaj, nin tzun eꞌ saj quicyꞌaltz le campament yi eꞌ sanlar yi choꞌn at le tnum Siló, cwent Canaán. 13 Beneꞌn tzun chimantar yi eꞌ aj Israeltz tan chichakleꞌn tzaj yi eꞌ xonl kꞌajtzun Benjamín, yi choꞌn najlcheꞌ le jun picy yi na biꞌaj Rimón, nin tzun bnix jun trat cyaꞌn tan quiꞌt jaleꞌn oyintziꞌ ẍchixoꞌl. 14 Kalenaꞌs tzun eꞌ pakxijtz yi eꞌ xonl Benjamín tan najeweꞌn tul chiꞌamaꞌl. Nin akꞌlij yi cobox xunaꞌtz scyetz tetz quixkel. Poro qui nin eꞌ xcyeꞌ yi cyaj cient xunaꞌtz tetz chicyakil cuꞌn.
15 Wiꞌnin tzun teleꞌn chikꞌajab yi eꞌ aj Israeltz scyeꞌj yi eꞌ xonl Benjamín tan paj yi nin takꞌ Kataj Ryos amaꞌl tan chisotzajeꞌn kloꞌ yi eꞌ xonl kꞌajtzun Benjamín. 16 Cyoqueꞌn tzun yi eꞌ ajcaw cwent Israel tan xtxumleꞌn: “¿Ẍeꞌn lchijal quixkel yi eꞌ mas xonl Benjamín kaꞌn, na tircunin chixnaꞌnil ja chisotz kaꞌn? 17 Na yi eꞌ xonl kꞌajtzun Benjamín tajweꞌn yi quil chisotz junawes skaxoꞌl. Ma na tajweꞌn tan chipucꞌuneꞌn junt tir yi cobox yi ja chiclax cyen. 18 Poro ja koꞌc wutz peꞌm, na quiꞌc cuj tan kakꞌol kameꞌl scyetz, na ja kasuk jun kayol swutz Kataj yi yaꞌtz sbneꞌ. Nin ko qui keꞌl cuꞌn teꞌj kayol tzꞌul kacaws.” 19 Nintzun ul txꞌakx chicꞌul yi txant tan tucumuleꞌn yi tzatziꞌn yi na el cyakil yob tan takꞌleꞌn kꞌej Kataj Ryos le tnum Siló. Choꞌn at Siló lijeꞌn yi tnum Betel, nin licuꞌn tzaj yi tnum Lebona nin xlaj len yi beꞌ yi na opon Siquem.
20 Ej nin tzun ben aj mantarinl cyaꞌn tan talcheꞌn yi jun xtxolbileꞌj scyetz yi eꞌ xonl Benjamín. I tzun ben cyaloltz: “Baꞌn cxben wok le tnum Siló, nin baꞌn tzitew cuꞌn itib xoꞌlak eꞌchk wiꞌ uva yi at nakaꞌjil yi tnumaꞌtz. 21 Or iwutz te yil cheꞌl tzaj yi eꞌ xun tan bixiꞌn. Baꞌn tzun tzitalkꞌaj jun xun te jujun, nin baꞌn tzun cxpakxij woktz le itanum. 22 Ej nin yi kol chuꞌl chitaj nka chixibin yi eꞌ xunaꞌtz tan xochoꞌn sketz, skaleꞌ scyetz: ‘Kacꞌucheꞌ jun pawor scyeruꞌ, yi nink chicuyuꞌ chipaj, na yi oꞌ ketz qui nin nkaxcyeꞌ tan takꞌleꞌn len quixkel, te yi cyaj cient xun yi njal tzaj kaꞌn Jabes. Na el katxum tetz yi nkꞌeraꞌtz cyajbiluꞌ tan takꞌleꞌn chimeꞌluꞌ scyetz, ma na eꞌ nin nchopon tan cyalkꞌeꞌn len ẍchikꞌabuꞌ. Na tzun elpont-tz, yi nkꞌeraꞌtz chipajuꞌ te yi yol yi chisucnakuꞌ tetz Kataj,’ ” cheꞌch tzun yi eꞌ ajcaw tetz Israel bantz.
23 Nin tzun cuꞌ ẍchiwutz yi eꞌ xonl kꞌajtzun Benjamín yi jun ajtzaꞌklaꞌtz, yi aꞌlchij scyetz. Chaꞌstzun te ẍchijunal len cuꞌn eꞌ beneꞌntz tan talkꞌeꞌn jun xun, scyeꞌj yi eꞌ yi na chibixin, nin tzun eꞌ el ojkuj, tan cyoponeꞌn le chitanum. Ej nin tzun eꞌ octz tan jeꞌseꞌn junt tir eꞌchk chitnum, tan chinajeweꞌn tul.
24 Nchaꞌtz eꞌ ban cyakil yi eꞌ aj Israel, ẍchijunal len cuꞌn eꞌ pakxij lakak chitanum kale ateꞌt chixonl, nin kale ateꞌt chinajal tan najeweꞌn scyuchꞌ.
25 Te yi cobox tiempaꞌtz quiꞌc nin jun rey na cawun squibaj eꞌ aj Israel, chaꞌstzun ja chiban len yi cyetz cyajbil.