Yi chitxꞌamxeꞌn yi chireyil yi eꞌ madianita tan Gedeón
8
1 Ej, itzun bantz, nin tzun jeꞌ lajpuj chiwiꞌ yi eꞌ xonl Efraín te Gedeón na mbi xac yi qui nin eꞌ ẍchak Gedeón yi beneꞌn iꞌ tan oyintziꞌ scyeꞌj yi eꞌ aj Madián. 2 I tzun tal iꞌ-tz scyetz:—¿Qui peꞌ na el itxum tetz yi mas tcuꞌn itetz mbnix itaꞌn swutz yi wetz yi mbnix waꞌn? Yi muꞌẍ tal yi mbnix itaꞌn itetz, mas tcuꞌn walor swutz yi ketz yi mbnix kaꞌn. 3 Ja takꞌ Kataj yi Oreb tu Zeeb tzitetz yi wiꞌtz chireyil yi eꞌ aj Madián. ¿Mbiꞌtz mbnix wetz waꞌn yi chin baꞌn teꞌn cunink mban swutz yi mbnix itaꞌn itetz? stzun Gedeón bantz.
Yi quibital yi eꞌ xonl Efraín yi yolaꞌtz yi tal Gedeón scyetz, quiꞌt tzun chiꞌch chicꞌuꞌltz teꞌj Gedeón.
4 Ma Gedeón scyuchꞌ yi ox cient tetz sanlar, choꞌn tzun cyoponeꞌntz stziꞌ yi aꞌ Jordán nin tzun eꞌ baj icyꞌtz jalaj cyꞌen, nin nsken wiꞌt chikꞌeꞌxij, tampaj chitzꞌamleꞌn chicontr. 5 Nin le amaꞌl yi na biꞌaj Sucot, nin tzun jakꞌ Gedeón scyetz yi eꞌ wunak yi najlcheꞌ-tz le amaꞌlaꞌtz, itzun taltz:
—Chibneꞌuꞌ jun pawor, cyakꞌeꞌuꞌ noc chiwaꞌ yi eꞌ yi xomcheꞌ sweꞌj, na nternin kꞌeꞌxnakoꞌt. Choꞌn xomchoꞌ tan chitzꞌamleꞌn yi chireyil yi eꞌ aj Madián yi na chibiꞌaj Zeba tu Zalmuna.
6 I tzun saj chitzaꞌwel yi eꞌ wiꞌtz ajcaw tetz Sucot:
—¿Ja tzun wiꞌt chitxꞌamxij Zeba tu Zalmuna awaꞌn tan kakꞌol chiwaꞌ yi eꞌ asanlar? cheꞌch tzun bantz tetz Gedeón.
7 I tzun saj stzaꞌwel Gedeóntz:
—¡Yil takꞌ Kataj amaꞌl swetz tan chitzꞌamleꞌn Zeba tu Zalmuna, chimpakxok nin nocopon tan xileꞌn ichiꞌbel tan txꞌiꞌx nin tan xak xtzeꞌ yi at txꞌiꞌx swutzak, yi choꞌn na jal tul yi amaꞌl yi tzꞌinunin tuꞌ! stzun Gedeón bantz scyetz.
8 Nin tzun eꞌ icyꞌtz, choꞌn tzun cyoponeꞌntz Penuel, nin tzun jakꞌ iꞌ junt tir chi yi jak jalen Sucot. Poro iteꞌn nin eꞌ banaꞌs yi eꞌ aj Penuel chi eꞌ ban yi eꞌ aj Sucot, quinin cyakꞌ chiwaꞌ Gedeón, 9 i tzun tal Gedeóntz scyetz:
—¡Yil chimpakxij yi nsken wiꞌt chinxcyeꞌ scyeꞌj incontr, copon inchꞌukil yi jun caꞌleꞌj yi chin wutz tkan nin! stzun Gedeón bantz.
10 Ma yi Zeba tu Zalmuna choꞌn tzun ateꞌ-tz le amaꞌl yi na biꞌaj Carcor, scyuchꞌ oꞌlaj loꞌ mil sanlar, yi jaltaꞌtz eꞌ itzꞌijtz ẍchixoꞌl jun cꞌoloj sanlar aj teleꞌn tziꞌn yi ateꞌ ban, na nsken wiꞌt chiquim jun cient tu junak mil contr. 11 Nin tzun ben Gedeóntz, tul yi beꞌ kale na xeꞌteꞌt nin yi amaꞌl yi tzꞌinunin tuꞌ, yi cyꞌanl tetz yi teleꞌn tziꞌn te yi amaꞌl cwent Noba tu Jogbeha, nin tzun eꞌ opontz tan oyintziꞌ scyuchꞌ yi eꞌ aj Madián te yi quiꞌc cunin na chitzan tan xtxumleꞌn. 12 Yi quilol Zeba tu Zalmuna yi xtxolbileꞌj, nin tzun eꞌ el ojkujtz, poro nin xom nin Gedeón tan chitzꞌamleꞌn, nin tzun eꞌ txꞌamxijtz taꞌn, nin tzun oc jun chin xoꞌw scyetz yi eꞌ contr taꞌn.
13 Yi pakxeꞌn tzaj Gedeón le oyintziꞌ, tul yi beꞌ cwent Heres, 14 nin tzun txꞌamxij jun xicy taꞌn yi aj Sucot, nin tzun octz tan ẍchꞌoteꞌn stziꞌ, nin yi xicy nin tal chibiꞌ yi ox cꞌal tu coblaj ajcaw tu wiꞌ banl wiꞌ, tetz Sucot. 15 Nin tzun ben Gedeóntz, jalen Sucot itzun taltz scyetz yi eꞌ wunak yi najlcheꞌ-tz:
—¿Nachij peꞌ cyanuꞌ, yi cyoqueꞌnuꞌ tan xcyꞌaklil sweꞌj, tan chipaj Zeba tu Zalmuna? ¿Nachij peꞌ cyanuꞌ yi qui nin ncyakꞌuꞌ jun piẍ chiwaꞌ yi eꞌ insanlar te yi nternin kꞌeꞌxnakeꞌt, nin saj cyaloluꞌ sketz yi quiꞌc jun scyeꞌj cobaꞌtz yi jajk chitxꞌamxij kaꞌn? ¡Ma jaluꞌ, je ateꞌ tzoneꞌj!
16 Ej nin tzun ben Gedeóntz tan joyleꞌn tzaj txꞌiꞌx tu xtzeꞌ yi chin txꞌiꞌx nin wutz xak, yi choꞌn na jal le amaꞌl yi tzꞌinunin tuꞌ, nin tzun oc iꞌ-tz tan chicawseꞌn yi eꞌ ajcawaꞌtz tetz Sucot. 17 Nchaꞌtz cuꞌ ẍchꞌukil iꞌ yi jun caꞌl yi nim wutz tkan yi at Penuel, nin cuꞌ cyen biyol iꞌ tircuꞌn yi eꞌ wunak yi najlcheꞌ-tz le tnumaꞌtz. Yaꞌstzun bajijtz. 18 Ej nin tzun jak iꞌ yi xtxolbileꞌj scyetz Zeba tu Zalmuna:
—¿Ẍeꞌn quitaneꞌn yi eꞌ wunak yi eꞌ quim itaꞌn le amaꞌl Tabor? stzun Gedeón bantz scyetz.
I tzun saj chitzaꞌweltz:
—Niꞌcuꞌn eꞌ chi aẍ. Na ben jaleꞌ chiyubil chi cyꞌajl jun rey, cheꞌch tzun bantz.
19 Nin tzun ẍchꞌin Gedeóntz:
—¡Eꞌ bin witzꞌun! ¡Ja chicuꞌ ibiyol eꞌ witzꞌun! Tan biꞌ Kataj Ryos, yi quiꞌk ncuꞌ ibiyol eꞌ, qui kloꞌ xquimwok waꞌn, stzun Gedeón bantz.
20 Nin tzun cawunin iꞌ-tz tetz yi bajx cyꞌajl yi na biꞌaj Jeter, i tzun ben tloltz tetz:
—¡Cyꞌajweꞌn nin, nin biyweꞌ cuꞌn! stzun Gedeón bantz tetz cyꞌajl.
Poro tampaj yi juyeꞌt tetz Jeter, chaꞌstzun te qui nin nimsaj iꞌ cꞌuꞌl tan chibiyleꞌn cuꞌn tan spar. 21 Ej, itzun tan yi xtxolbilaꞌtz, nin tzun ben cyalol Zeba tu Zalmuna tetz Gedeón:
—¡Ma jaluꞌ, biycuꞌn bin oꞌ! ¡Na jun mero yaj, na lajluchax tan yi tetz ẍchamil! cheꞌch tzun banintz.
Nin tzun ben Gedeóntz tan chibiyleꞌn cuꞌn. Nchaꞌtz nin ben iꞌ-tz tan ticyꞌleꞌn len yi chiyubel yi chicamey Zeba tu Zalmuna. 22 I tzun cyal yi eꞌ xonl Israel tetz:
—Ma jaluꞌ yi aẍatz ja xcyeꞌ scyeꞌj yi eꞌ kacontr yi eꞌ aj Madián, chaꞌstzun te na kloꞌ kaj yil cẍoꞌc tetz jun wiꞌtz ajcawil katnumil, nchaꞌtz yi eꞌ anitxaꞌ sbneꞌ pon tunintz, nink choꞌc tetz wiꞌtz ajcaw le katnumil, cheꞌch tzun bantz tetz Gedeón.
23 I tzun ben stzaꞌwel Gedeóntz:
—Quiꞌc rmeril nink noꞌc tan chicaweꞌnuꞌ, tuꞌk incyꞌajl quiꞌc rmeril, na Kataj Ryos tzꞌocopon tan chicaweꞌnuꞌ. 24 Yi wetz wajbil iꞌtz kloꞌ, yi nink cyakꞌuꞌ yi eꞌchk xmalkꞌab yi nchicambajuꞌ.
Na yi eꞌchk xmalkꞌabaꞌtz yi oro cuꞌn, yaꞌstzun na xcon cyakꞌun yi eꞌ kacontr, na yi eꞌaꞌtz eꞌ len cuꞌn wunak yi choꞌn najlcheꞌ le amaꞌl yi tzꞌinunin tuꞌ. 25 Ej nin tzun eꞌ ben yi eꞌ cmon tetz Israel tan liteꞌn cuꞌn jun mant wuxtxꞌotxꞌ, nin tzun baj cuꞌ len quikꞌol yi eꞌchk xmalkꞌabaꞌtz yi baj len chicambal scyeꞌjak chicontr, i tzun cyaltz:
—Cyꞌajninuꞌ, na iꞌtz teruꞌ, cheꞌch tzun bantz tetz Gedeón.
26 Nin tircuꞌn talal yi eꞌchk xmalkꞌabaꞌtz yi oro cuꞌn, jepon teꞌj junaklaj tu wajxak loꞌ liwr. Ma yi eꞌchk yubel, tu eꞌchk uwaj, tu eꞌchk balaj xbuꞌk yi púrpura yi el quicyꞌal te eꞌ rey Madiánaꞌtz, tircuꞌn yi eꞌchk takleꞌnaꞌtz tu yi eꞌchk uwaj yi at ẍchikul eꞌ camey qui oc tcwent yi oro yi ncyakꞌ tetz Gedeón. 27 Ej nin tzun bnix jun efoda tan Gedeón te yi oro yi molxij. Nin choꞌn tzun tponeꞌn taꞌn le tnum yi na biꞌaj Ofra. Ej nin tan paj yi eꞌ oc cyakil yi eꞌ xonl Israel tan jakleꞌn cyajtzaꞌkl te yi jun efodaꞌtz, tircuꞌn tzun yi eꞌ, eꞌ octz tetz pajol caꞌwl swutz Ryos. Nchaꞌtz ja xcon yi jun efodaꞌtz tetz jun tramp tetz Gedeón tu yi tetz najal.
28 Yaꞌtz cunin bantz yi cyoqueꞌn yi eꞌ aj Madián jakꞌ chicaꞌwl yi eꞌ aj Israel, nin jetzaꞌtz quiꞌt jal chiwalor tan oyintziꞌ. Nin tul yi caꞌwunak yob yi itzꞌ tzaj Gedeón, quiꞌc jun oyintziꞌ mbajij, ma na tircuꞌn cweꞌn num, ntin tzatzin paz jal te yi tiempaꞌtz.
Yi ẍeꞌn ban yi quimeꞌn Gedeón
29-30 Ej, je tzun bajijtzeꞌj, yi Jerobaal, nka Gedeón nin tzun aj iꞌ-tz tan najeweꞌn xe tetz caꞌl, nin oxcꞌal tu lajuj tzun nitxajil iꞌ eꞌ jalcyentz, na wiꞌnin txkel banak. 31 At tzun jun ẍchakum iꞌ yi xnaꞌn at cyentz jalen Siquem, nchaꞌtz jal jun nitxajil iꞌ teꞌj, nin tzun oc biꞌ yi jun niꞌaꞌtz taꞌn tetz Abimelec. 32 Yi Gedeón nsken wiꞌt tijin cꞌuꞌl iꞌ yi quimeꞌn, nin choꞌn tzun mukxeꞌn iꞌ-tz kale mukxeꞌt yi taj yi na biꞌaj Joás, jalen Ofra, yi chitanum yi eꞌ wunakil Abiezer.
33 Ma yi teleꞌn tiemp yi nsken wiꞌt quim Gedeón, nin el junt tir Kataj Ryos te chicꞌuꞌl yi eꞌ aj Israel, na nin eꞌ pakxijt tan chicꞌuꞌlajeꞌn eꞌchk teblal Baal, nin yi chiryosil bantz iꞌtz yi Baal-berit. 34 Nin el cyen Kataj Ryos te chicꞌuꞌl, yi Ryos yi oc tan chicolpeꞌn jakꞌ chicaꞌwl yi eꞌchk chicontr yi eꞌ jalnak cyen, 35 nin qui nin eꞌ octz balaj scyeꞌj yi eꞌ xonl Jerobaal, nka Gedeón, na wiꞌnin baꞌn ban iꞌ scyetz te yi itzꞌ tzaj iꞌ. Yaꞌstzun bajijtz yi nsken wiꞌt quim Gedeón.