Yi xcyeweꞌn Gedeón scyeꞌj yi eꞌ aj Madián
7
1 Ej itzun bantz, chin jalchan cunin chimolol quib Gedeón, yi na aꞌlchij Jerobaal tetz, scyuchꞌ yi eꞌ yi xomcheꞌ teꞌj. Choꞌn tzun eꞌ beneꞌntz jalen stziꞌ yi aꞌ yi na biꞌaj Harod. Choꞌn tzun cweꞌn chicampament cyaꞌn. Ma yi amaꞌl kale ateꞌt yi eꞌ aj Madián, choꞌn tzun at-tz xeꞌ cuꞌn yi wutz yi na biꞌaj More.2 Ej nin tzun jilon tzaj Katajtz tetz Gedeón: “Wiꞌnin wunak xomcheꞌ tzaweꞌj, nin yi kol wakꞌ amaꞌl tan chitxꞌaconeꞌn scyeꞌj yi eꞌ aj Madián, chitxumeꞌ yi eꞌ cuntuꞌ ja chixcyeꞌ tan chiwalor, nin cyocsaj quib nim tzinwutz. 3 Chaꞌstzun te baꞌn tcuꞌn alaj scyetz, yi alchok scyetz yi na xob tan beneꞌn tan oyintziꞌ baꞌn tcuꞌn pakxoken xe tetz caꞌl,” stzun Kataj bantz tetz Gedeón. Nin tan yi xtxolbileꞌj, ja oc Gedeón tan chipileꞌn yi eꞌ sanlar, nin junak cob mil nchipakxij xeꞌak chicaꞌl. Ntin lajuj mil ja chinimsaj chicꞌuꞌl tan oyintziꞌ.
4 Ej nintzun oc Kataj chꞌinchꞌuj tan talcheꞌn, yi ilenin nim teꞌn chixoneꞌn, nin tzun taltz tetz Gedeón: “Ilenin nimteꞌn cunin chixoneꞌn yi eꞌ sanlar yi ja chicyaj cyen. Baꞌn tcuꞌn cyꞌajweꞌ nin tan ucꞌaꞌeꞌn tzi aꞌ, nin nocopon tan chipileꞌn, nin swaleꞌ tzatz yi na scyetz yi eꞌ yi baꞌn chixomnin tzaweꞌj, nin naꞌ scyetz eꞌ yi baꞌn chipakxij,” stzun Kataj bantz tetz Gedeón.
5 I nin tzun tulej Gedeóntz, nin tzun eꞌ ben tcyꞌal iꞌ tircuꞌn tan ucꞌaꞌeꞌn stziꞌ aꞌ. I tzun tal Kataj tetz: “Ma jaluꞌ jatxweꞌ len yi eꞌ yil xcon chikꞌab tan jeꞌseꞌn tzaj yi aꞌ, chi na xcon yi takꞌ jun txꞌiꞌ tan jeꞌseꞌn tzaj aꞌ. Jatxweꞌ len yi eꞌaꞌtz ẍchixoꞌl yi eꞌ yil chijokeꞌ cuꞌn tan ucꞌaꞌiꞌn,” stzun Kataj bantz tetz Gedeón.
6 Ej, ox tzun cient chixoneꞌn yi eꞌ yi xcon chikꞌab cyaꞌn tan jeꞌseꞌn tzaj yi aꞌ, ma yi eꞌ mas, tircunin eꞌ, eꞌ cuꞌ jokloktz tan ucꞌaꞌiꞌn. 7 Nin tzun tal Kataj Ryos tetz Gedeón: “Yi ox cientaꞌtz yi ja wiꞌt ajatx, chixconk waꞌn tan icolpeꞌn, nin tan cyelseꞌn cuꞌn yi eꞌ aj Madián swutz, ma yi eꞌ mas baꞌn chaꞌj xeꞌak chinajbil,” stzun Kataj bantz.
8 Toqueꞌn tzun Gedeón tan chichakleꞌn len xeꞌak chinajbil, poro te yi ntaxk chaꞌj, nin tzun oc Gedeón tan molcheꞌn yi cuꞌlbil chicꞌaꞌ, tuml yi eꞌchk chun, yi cyꞌaꞌn cyaꞌn. Nin tzun cyaj cyen iꞌ-tz scyuchꞌ yi ox cient sanlaraꞌtz wiꞌwtzeꞌn. Ma yi chicampament eꞌ aj Madián choꞌn at xe wutz, tjocoꞌj cuꞌn.
9 Nin te yi akꞌbalaꞌtz, nin tzun tal Kataj tetz Gedeón: “Quiloꞌk tan oyintziꞌ scyuchꞌ yi eꞌ aj Madián, na swakꞌeꞌ amaꞌl tzatz tan axcyeweꞌn scyeꞌj. 10 Poro ko na cxob tan oyintziꞌ scyuchꞌ, baꞌn tcuꞌn cẍben le cuꞌnak kale atit yi chicampament. Ej nin baꞌn tzacyꞌaj nin tzaweꞌj yi achakum Purá, 11 nin bit wok tzaj yi mbi na chiyolbej. Tan yi xtxolbilaꞌtz sjalok awalor tan oyintziꞌ scyeꞌj yi eꞌ aj Madián.”
I nin tzun tulej Gedeóntz. Nin tzun aj cuꞌn tu yi ẍchakum yi na biꞌaj Purá, tan cyoponeꞌn nakajil chicampament tan chixkꞌukeꞌn chicontr. 12 Itzun yi eꞌ aj Madián, scyuchꞌ yi eꞌ xonl Amalec nin scyuchꞌ yi eꞌ aj teleꞌn tziꞌn, noj cunin yi ẍkꞌajlajaꞌtz cyaꞌn, chi ik jun cꞌoloj sacꞌ yi jotl cheꞌ wi cojbil. Na quin tech nin chicamey at, chi ik tajlal yi samlicyꞌ yi at tzi mar. 13 Yi toponeꞌn Gedeón nakaꞌjil chicampament kale ateꞌt chicontr, nin ben tbital iꞌ yi at jun sanlar yi na tzan tan xtxoleꞌn tetz junt yi tetz wutzicyꞌ. I tzun ben tloltz tetz yi tuchꞌ:
—Ja inwutzcyꞌaj yi ja saj tol jun pam yi ixiꞌn cebada cuꞌn, nin choꞌn ncuꞌul tol tul kacampament, nin ja noj quen te jun mantial, nin ja xcyeꞌ tan woqꞌuen cuꞌn.
14 I tzun ben tlol yi tuchꞌ tetz:
—Yi na elpont yi jun pamaꞌtz iꞌtz yi spar Gedeón, yi cyꞌajl Joás, yi aj Israel. Na stkꞌeꞌ Ryos amaꞌl tetz iꞌ tan xcyeweꞌn skeꞌj, stzun iꞌ bantz tetz tuchꞌ.
15 Yi beneꞌn tbital Gedeón yi mbi na elpont yi jun wutzicyꞌaꞌtz, nintzun octz tan lokꞌeꞌn wutz Kataj Ryos. Kalenaꞌs tzun pakxij le amaꞌl kale ateꞌt yi eꞌ tetz sanlar. Nin cawunin scyetz:
—¡Cajeꞌnwok, na ja wiꞌt takꞌ Kataj amaꞌl sketz tan chixiteꞌn cuꞌn yi eꞌ aj Madián! stzun Gedeón bantz.
16 Ox tzun kꞌuꞌj eꞌ tulejtz. Nin ben tkꞌol jun chun tetz jujun, nin jun ẍchokꞌ tetz jujun yi at jun bocꞌoj tzaj tul yi na tzan kꞌaꞌkl. 17 Nintzun cawun scyetz:
—Yil nopon jalaj cyen chicampament yi eꞌ kacontr, tajweꞌn yi list tziban tan xmayeꞌn yi mbil tzimbneꞌ nin iteꞌn nin iꞌaꞌtz tzitulejwok. 18 Nin yil tzitbitwok yil cuꞌ yi chun waꞌn, nin yil cuꞌ chichun yi eꞌ yi xomcheꞌ sweꞌj, nchaꞌtz axwok tajweꞌn yil cuꞌ tetz ichun itaꞌn, nin jek iwiꞌ tan talcheꞌn: “¡Katxꞌaconk tan yi spar Kataj Ryos, nin tan yi spar Gedeón!” stzun Gedeón bantz scyetz.
19 Ej nin tzun eꞌ ben yi jun cient sanlaraꞌtz yi xomcheꞌ teꞌj Gedeón jalaj cyen chicampament yi chicontr. Eꞌ opon te yi ntaxk opon nicyꞌakꞌbal, nin te yi na chitzan cuꞌn tan ẍchixpeꞌn yi bajx wart. Kalenaꞌs cweꞌn yi eꞌchk chun cyaꞌn, nin cweꞌn chipokꞌlol yi eꞌchk ẍchokꞌ kale atit cuꞌn yi jun bocꞌoj tzaj yi na kꞌakꞌan. 20 Junit tzun tir cweꞌn yi eꞌchk chun cyakꞌun yi ox kꞌuꞌj sanlaraꞌtz. Nchaꞌtz cuꞌ chipokꞌlol yi eꞌchk ẍchokꞌ. Cyꞌaꞌn len jujun cul tzaj cyaꞌn le chisbal, ma le chimax tzꞌamij yi chun cyaꞌn, nin chin wiꞌ nin eꞌ ban tan sichꞌ “¡Koyintziꞌink tan biꞌ Kataj Ryos, nin tan biꞌ Gedeón!” cheꞌch tzun bantz. 21 Nin eꞌ takeꞌ cuꞌntz solteꞌj yi campament yi eꞌ aj Madiánaꞌtz, ma yi eꞌ aj Madiánaꞌtz wiꞌnin chiẍchꞌineꞌn tan paj xoꞌw, nin wiꞌnin cyeleꞌn ojktz. 22 Nin te yi na chitzaneꞌt yi ox cient sanlaraꞌtz tan tocseꞌn chichun, eꞌ teꞌn yi eꞌ aj Madiánaꞌtz eꞌ biꞌy quib squibil quib tan chispar, poro tan porer Kataj. Nchaꞌtz at eꞌ, eꞌ el ojkuj te yi beꞌ yi na opon Zerera. Nin at eꞌ eꞌ opon jalen yi amaꞌl Bet-sita nin kale atit yi mojom cwent Abel-mehola, nakaꞌjil yi tnum Tabat.
23 Ej nin tzun eꞌ chakxij yi eꞌ xonl Neftalí, scyuchꞌ yi eꞌ xonl Aser, nin tircuꞌn yi eꞌ xonl Manasés, tan chibeneꞌn xomok tan chitzꞌamleꞌn yi eꞌ aj Madiánaꞌtz yi eꞌ el ojk. 24 Nchaꞌtz eꞌ ben ẍchakol Gedeón cobox chakum tan chibeneꞌn wiꞌak eꞌchk juꞌwtz cwent yi amaꞌl tetz Efraín, tan talcheꞌn yi nink chicuꞌul tan quichꞌeyeꞌn tan oyintziꞌ scyeꞌj yi eꞌ aj Madián. Nin tzun eꞌ cweꞌn muleꞌntz tan qꞌuicyꞌleꞌn eꞌchk amaꞌl kale na chicyꞌeꞌt wunak tibaj yi aꞌ Bet-bara. Nchaꞌtz eꞌ ban te eꞌchk amaꞌl stziꞌ yi aꞌ Jordán, na eꞌ cuꞌtz tan qꞌuicyꞌlomiꞌn, te ntaxk chopon yi eꞌ aj Madián. Nin inin tzun cyulej yi eꞌ xonl Efraíntz, na nin eꞌ ban taneꞌn yi caꞌwl Gedeón. 25 Nin tzun eꞌ txꞌamxij cob cyajcawil yi eꞌ aj Madián cyaꞌn yi na chibiꞌaj Oreb nin Zeeb. Yi Oreb choꞌn quimeꞌn cyaꞌn wi jun wutz cꞌub yi jaluꞌ na biꞌaj yi wutz cꞌub tetz Oreb. Ma yi Zeeb choꞌn quimeꞌn cyaꞌn le amaꞌl yi at biꞌ iꞌ teꞌj, kale na oqueꞌt yakꞌpeꞌn yi uva, tan toqueꞌn tetz win. Ma yi nsken wiꞌt chixcyeꞌ tan chilajeꞌn len yi eꞌ aj Madián, nin tzun ben quicyꞌal yi chiwiꞌ Oreb tu Zeeb tan ẍchajleꞌn tetz Gedeón, yi nsken wiꞌt icyꞌpon jalaj icyꞌen yi aꞌ Jordán.