Yi jatxleꞌn chiꞌamaꞌl yi jukt kꞌuꞌj xonl Israel
18
1 Itzun bantz, nintzun cuꞌ chimolol quib tircuꞌn yi eꞌ xonl Israel le amaꞌl Siló. Tircuꞌn chimolol quib tan nucꞌleꞌn yi mantial kale na chijiloneꞌt tu Kataj Ryos. Na sken chixcyeꞌ tan cambajeꞌn yi amaꞌl yi tajweꞌn tan cyetzal. 2 Poro ntaxk akꞌlij chiꞌamaꞌl yi jukt kꞌuꞌj xonl Israel.3 Nintzun ben tlol Josué scyetz yi eꞌaꞌtz: “¿Mbi na ichꞌiwwok, yi qui na itzꞌamwokeꞌn yi iluwar yi ja wiꞌt takꞌ Kataj tzitetz, yi Kataj yi iꞌ chiRyosil yi eꞌ kamam kateꞌ? 4 Ma jaluꞌ, sicyꞌwokeꞌn ox ox yaj te yi jujun kꞌuꞌj axwok yi txeꞌn akꞌlij iluwar, na nchiben inchakol tan tilweꞌn yi eꞌchk amaꞌl, bantz kilol yi ẍeꞌn kaban tan jatxleꞌn cuꞌn tziwutz. Yil chiben, baꞌn chitzꞌib tzaj yi ẍeꞌn taneꞌn yi amaꞌl. 5 Tajweꞌn yi juk cuntuꞌ piẍ cyulej yi eꞌchk amaꞌlaꞌtz. Quil jop yi chiꞌamaꞌl yi eꞌ xonl Judá yi txeꞌn cyetzaj yi at cweꞌn tziꞌn, na ja wiꞌt akꞌlij cyetz. Nchaꞌtz yi eꞌ xonl Ẍep yi choꞌn makꞌlij yi cyetz chiꞌamaꞌl jeꞌn tziꞌn, poro txeꞌn chicambaj. 6 Ma yi axwok itetz, yil cxbenwok, jatxwok cuꞌn yi amaꞌl, nin juk piẍ tzitulejwok. Kalenaꞌs tzun tzꞌultz itaꞌn tzinwutz tan woqueꞌn tan txꞌiluꞌn teꞌj, tan injakol tetz Kataj yi kaRyosil, yi naꞌ taw tzꞌan yi jujun piẍaꞌtz. 7 Ma yi jun kꞌuꞌj xonl Leví, quiꞌc cyetz chiꞌamaꞌl sbneꞌ. Na yi eꞌ cyetz chixconk tetz kapaleꞌil swutz Kataj. Ma yi eꞌ xonl Gad, scyuchꞌ yi eꞌ xonl Rubén, tu yi jun kꞌuꞌj xonl Manasés, ja wiꞌt cyech wutz yi cyetz chiꞌamaꞌl yi at swutz len yi aꞌ Jordán. Na Moisés yi ẍchakum Kataj, iꞌ mmakꞌon yi cyetz chiꞌamaꞌl,” stzun Josué bantz.
8 Ej, itzun yi eꞌ yi at chibembil tan cuꞌseꞌn techl yi eꞌchk amaꞌlaꞌtz, wekoꞌn ib nin eꞌ bantz. Nintzun ben tlol Josué-tz scyetz: “Quibeneꞌnk tan tilweꞌn tircuꞌn yi amaꞌl. Nin jatxwok cuꞌn. Ma yil bnix, baꞌn cxaꞌjtzajwok. Nin yil cxuꞌltwok tzoneꞌj Siló, nocopon tan txꞌiluꞌn teꞌj, tan jakleꞌn tetz Kataj yi naꞌ taw yi jujun piẍ sbneꞌ.”
9 Nintzun eꞌ ben yi eꞌ yajaꞌtz tan tilweꞌn tircuꞌn yi amaꞌl. Juk cuntuꞌ el cyakil yi eꞌchk amaꞌlaꞌtz tuml yi eꞌchk tnum yi at tcꞌuꞌl. Nin baj cuꞌ chitzꞌibaltz swutz uꞌj yi ẍeꞌn cunin ban. Yi bnixeꞌn, nintzun eꞌ aj tzajtz kale chimoloneꞌt quib yi eꞌ mas chitanum le amaꞌl Siló. 10 Kalenaꞌs tzun toqueꞌn txꞌiluꞌntz teꞌj swutz cuꞌn Kataj. Iꞌ tzun cawuntz teꞌj yi naꞌ taw yi jujun piẍ sbneꞌ.
Yi chiꞌamaꞌl yi eꞌ xonl Benjamín
11 Toqueꞌn tzun txꞌiluꞌn tan tilweꞌn yi naꞌ chicyajeꞌt cyen yi eꞌ xonl Benjamín, xomquen tuꞌ te tajlal yi jujun najal. Choꞌn tzun chinojeꞌn cyen te yi txꞌotxꞌ yi at nicyꞌal yi chiꞌamaꞌl yi eꞌ xonl Judá, tu yi eꞌ xonl Ẍep. 12 Yi mojomil yi amaꞌlaꞌtz iꞌtz: Te yi jalaj jeꞌn tziꞌn, choꞌn xeꞌt tzaj tzi aꞌ Jordán. Nin xom tzaj xlaj Jericó. Xomnin tunintz wiꞌwtz. Choꞌn tzun ticyꞌeꞌntz le amaꞌl tzꞌinunin tuꞌ cwent Bet-avén. 13 Kalenaꞌs tzun muꞌl jakꞌ cuꞌn yi tnum yi na biꞌaj Luz, yi nchaꞌtz na biꞌaj Betel. Nintzun na copon Atarot-adar, yi at wi yi juꞌwtz swutz cuꞌn yi tal tnum Bet-horón, yi at tzakꞌ cuꞌn tzaj. 14 Kalenaꞌs tzun micyꞌpontz tan toponeꞌn jalen Quiriat-baal. Yi Quiriat-baalaꞌtz nchaꞌtz na biꞌaj Quiriat-jearim, nin choꞌn at chicwent yi eꞌ xonl Judá. Yaꞌstzun yi mojom te yi jalajaꞌtz toqueꞌn tziꞌn.
15 Ma yi mojomil tetz cweꞌn tziꞌn, choꞌn na xeꞌt tzaj xtxꞌuꞌc Quiriat-jearim. Tunin na xomnin kale na itzꞌeꞌt yi aꞌ Neftoa. 16 Nin choꞌn na cuꞌ-tz, jalen yi na opon te yi juꞌwtz yi at swutzoꞌc tzaj yi jocoꞌj Ben-hinom, yi at tibeꞌn yi jocoꞌj Refaim. Xomnin tunintz te yi jocoꞌj Hinom, na icyꞌtz Jebús, nin na jepontz kale atit yi neꞌẍ aꞌ En-rogel. 17 Kalenaꞌs tzun na pakxijtz le jeꞌnak tziꞌn. Nin na jeꞌ cuꞌntz le amaꞌl Ense-mes. Nin na cuꞌ-tz jalen Gelilot, yi amaꞌl yi choꞌn at swutz cyen yi txalaꞌj Adumín. Nintzun na copontz wutz cꞌub tu Boán yi cyꞌajl Rubén.
18 Nchaꞌtz na icyꞌak swutzeꞌn yi txalaꞌj yi at swutz cyen yi ẍkꞌajlaj Jordán. Kalenaꞌs tzun na copontz tzi aꞌ Jordán. 19 Na icyꞌak cuꞌn tibeꞌn yi amaꞌl Bet-hogla. Nin na tzajpontz tziꞌ yi mar yi chin cꞌaꞌ nin tan atzꞌum, kale na tzajpont yi aꞌ Jordán. Yaꞌstzun yi mojom le jalaj cweꞌn tziꞌn.
20 Yi aꞌ Jordán yaꞌstzun mojom le jalaj xlaj teleꞌn tziꞌn. Yaꞌstzun eꞌchk mojomil yi eꞌchk amaꞌl yi jatxlij ẍchiwutz yi eꞌ xonl Benjamín, xomquen tuꞌ te yi jujun kꞌuꞌj eꞌ yi chixonl quib.
21 Yi eꞌchk tnum yi cyetzaj yi jun kꞌuꞌj xonl Benjamín iꞌtz: Jericó, Bet-hogla, Emec-casis. 22 Tu Bet-arabá, Zemaraim, Betel. 23 Tu Avim, Pará, Ofra. 24 Tu Quefar-haamoni, tu Ofni, nin Geba. Yaꞌstzun yi coblaj tnum tuml yi eꞌchk aldeyil. 25 Nchaꞌtz cyetzaj Gabaón, tu Ramá, tu Beerot, 26 tu Mizpa, tu Cafira, tu Mozah, 27 tu Requem, tu Irpeel, tu Tarala, 28 tu Sela, tu Elef, tu Jebús yi nchaꞌtz na biꞌaj Jerusalén, tu Gabaa, nin Quiriat. Yaꞌstzun yi cyajlajt tnum tuml yi eꞌchk aldeyil yi akꞌlij scyetz yi eꞌ xonl Benjamín.