Yi chiꞌamaꞌl yi eꞌ xonl Manasés
17
1 Je yi amaꞌl yi akꞌlij scyetz yi eꞌ xonl Manasés yi toqueꞌn txꞌiluꞌn teꞌj. Yi Manasésaꞌtz, yaꞌstzun yi bajx cyꞌajl Ẍep. Nin yi bajx cyꞌajl Manasés, iꞌtz Maquir, nin iꞌ chimam cyen yi eꞌ aj Galaad. Akꞌlij yi amaꞌl cwent Galaad tu Basán scyetz yi eꞌ tu Maquir, yi at jalaj cyꞌen yi aꞌ Jordán. Yi eꞌaꞌtz eꞌ cuꞌn wiꞌtz sanlar yi qui na chixob tan oyintziꞌ. 2 Nchaꞌtz oc swertiꞌn te yi amaꞌl yi naꞌl chaꞌt cuꞌnt yi eꞌ mas cyꞌajl Manasés. Xomquen tuꞌ te yi jujun kꞌuꞌj eꞌ. Je chibiꞌeꞌj: Abiezer, Helec, Asriel, Siquem, Itefer tu Semida. Eꞌ cuꞌn cyꞌajl Manasés, nin mamaj Ẍep.3 Ma tetz Zelofehad, yi cyꞌajl Hefer, yi mamaj Galaad, yi cyꞌajl Maquir, yi cyꞌajl Manasés, quiꞌc tetz cyꞌajl jal, ma na ntin oꞌ meꞌl. Je chibiꞌeꞌj: Maala, Noa, Hogla, Milca, nin Tirsa. 4 Itzun bantz nintzun eꞌ ben yi eꞌ xnaꞌnaꞌtz tan yol tetz yi paleꞌ Eleazar tu Josué, nin nchaꞌtz scyetz yi eꞌ wiꞌtz wiꞌ banl wiꞌ tetz yi tnum. Itzun cyaltz scyetz: “Talnak Kataj tetz kꞌajtzun Moisés yi tajweꞌn tzꞌakꞌlij yi ketz kaherens chi taneꞌn yi cyetz kaxonl,” cheꞌch tzun bantz. Nintzun takꞌ Josué chiꞌamaꞌl yi eꞌ xnaꞌnaꞌtz chi mban cyetz yi eꞌ mas chixonl, na alij cyen tan Kataj yi yaꞌstzun sban.a
5 Lajuj tzun piẍ amaꞌl akꞌlij scyetz yi eꞌ xonl Manasés, tu yi amaꞌl cwent Galaad, tu Basán yi at swutz len Jordán. 6 Na nin akꞌlij chiꞌherens yi eꞌ xnaꞌnaꞌtz, nin nicyꞌnin tuꞌ eꞌ baj bentz scyuchꞌ yi eꞌ yaj. Yi amaꞌl Galaad akꞌlij scyetz yi eꞌ mas xonl Manasés. 7 Nchaꞌtz cyetzaj yi tnum Aser, jalen Micmetat yi at swutz Siquem. Nin opon mojomil jeꞌn tziꞌn kale atit yi aꞌ Tapúa. 8 Ntin yi amaꞌl cwent Tapúa cyetz yi xonl Manasés ban. Poro yi tnumil, cyetz yi xonl Efraín ban. 9 Nin yi chimojom, oc cweꞌn tziꞌn kale atit yi tzanlaꞌ Caná. At coboxt tnum yi cyetz xonl Efraín ban yi at ẍchixoꞌl yi eꞌ xonl Manasés. Na yi chimojom yi eꞌ tetz Manasés, choꞌn xeꞌteꞌn jeꞌn tziꞌn kale atit yi tzanlaꞌ Caná, nin na opon tzi yi mar Mediterráneo. 10 Ma yi eꞌ xonl Efraín choꞌn eꞌ cyajeꞌn cyen xlaj cuꞌn yi mojom. Yi cyetz xonl Manasés, choꞌn eꞌ cyajeꞌn xlajeꞌn yi mojom, nin ja opon yi chimojom jalen tzi mar Mediterráneo. Ma jeꞌn tziꞌn, ja opon chimojom te chimojom yi eꞌ xonl Aser, tu chimojom yi eꞌ xonl Isacar yi at swutzlen chiꞌamaꞌl yi eꞌ Aser.
11 Nchaꞌtz akꞌlij coboxt tnum scyetz xonl Manasés yi choꞌn at le chiꞌamaꞌl yi eꞌ xonl Isacar tu Aser. Yi coboxt tnumaꞌtz iꞌtz: Bet-seán, Ibleam, Dor, Endor Taanac tu yi Meguido, tu oxt tal amaꞌl, tuml yi eꞌchk aldey yi at nakaꞌjil yi eꞌchk tnumaꞌtz. 12 Poro quinin eꞌ xcyeꞌ yi eꞌ xonl Manasés tan chilajeꞌn len yi eꞌ aj Canaán swutz yi eꞌchk amaꞌlaꞌtz, na quinin cyakꞌ quib tan cyeleꞌn swutz chiꞌamaꞌl. 13 Pontzaj, yi ẍchꞌuyeꞌn cyajlal yi eꞌ xonl Israel, nin yi jaleꞌn mas chichamil, nintzun eꞌ cawuntz scyeꞌj yi eꞌ aj Canaánaꞌtz tan chichojol yi alcawal scyetz, quiꞌt tzun eꞌ oc tan chilajeꞌn len swutz chiꞌamaꞌl.b
Yi amaꞌl kale eꞌ cyajeꞌt cyen yi eꞌ xonl Ẍep
14 Itzun yi eꞌ xonl Ẍepaꞌtz, yi Efraín tu Manasés, nintzun eꞌ bentz tan yol tetz Josué. Itzun cyaltz:
—¿Mbi tzuntz yi muꞌẍ ntziꞌ ketz kaꞌamaꞌl yi ntakꞌuꞌ? Na yi oꞌ ketz nim kaxoneꞌn. Nin at nin banl Kataj skibaj.
15 Nintzun tal Josué scyetz:
—Bintzi loꞌ yi na italwok, yi axwok itetz nim ixoneꞌn, nin quil xbaj cuꞌn swutz yi wiꞌwtz tetz Efraín, mas loꞌ balaj yil xbenwok tan cuꞌseꞌn yi eꞌchk tzeꞌ yi at wiꞌwtz, chicwent yi eꞌ ferezeo tu eꞌ refaita. Baꞌn xcon yi eꞌchk amaꞌlaꞌtz itaꞌn tetz icojbil, stzun Josué scyetz.
16 —Bintzi taꞌ, quil xcyeꞌ yi wiꞌwtzeꞌj skeꞌj. Poro kol kaben tan majleꞌn yi chiluwar yi eꞌ aj Canaán, quil kaxcyeꞌ, na yi eꞌ cyetz at cyetz chicareꞌt tetz oyintziꞌ yi chꞌichꞌ cuꞌn. Nchaꞌtz quitaneꞌn yi eꞌ yi ateꞌ Bet-seán, scyuchꞌ yi eꞌ yi ateꞌ lakak aldey, tu yi eꞌ yi ateꞌ ẍkꞌajlaj Jezreel, at len chicareꞌt tetz oyintziꞌ, cheꞌch tzun bantz tetz Josué.
17 —Quil cxobwok, na xcyekwok scyeꞌj. Na yi axwok itetz nim ixoneꞌn, nin at ichamil. Chaꞌstzun te nkꞌeꞌtz jun ntziꞌ piẍ amaꞌl tzitetzajeꞌwok, ma na baꞌn cxbenwok tan majleꞌn cyakil, mpe tzeꞌ cuꞌnk at swutz, itetz sbneꞌ. Na cxcyekwok tan banleꞌn baꞌn tetz yi amaꞌlaꞌtz, jalen kale atit eꞌchk mojomil. 18 Tzitetzajeꞌwok yi amaꞌlaꞌtz. Na xcyekwok tan chilajeꞌn len yi eꞌ aj Canaánaꞌtz. Pe tzunk at cyetz chicareꞌt yi chꞌichꞌ cuꞌn tetz oyintziꞌ, pe tzunk wiꞌnin chichamil, poro xcyekwok scyeꞌj, stzun Josué ban scyetz yi eꞌ xonl Ẍepaꞌtz.