Yi chitxꞌotxꞌ yi eꞌ cyꞌajl Ẍep
16
1 Je yi amaꞌl yi akꞌlij scyetz yi eꞌ xonl Ẍep yi toqueꞌn txꞌiluꞌn teꞌj: Yi chimojom te yi jalaj teleꞌn tziꞌn, choꞌn xeꞌt tzaj tzi aꞌ Jordán. Nin ja xom tzaj kale na itzꞌeꞌt yi eꞌchk tal aꞌ cwent Jericó. Nin yi na el le amaꞌl cwent Jericó, choꞌn na jepontz Betel. 2 Yi na elt Betel choꞌn tzun na icyꞌtz le chiꞌamaꞌl yi eꞌ arquita, nin na cuꞌ-tz jalen Atarot. 3 Kalenaꞌs tzun na cuꞌ-tz toqueꞌn tziꞌn le chiꞌamaꞌl yi eꞌ xonl Jaflet jalen tzakꞌ cuꞌn tzaj kale atit yi tnum Bet-horón yi at tzakꞌ cuꞌn, nin ja opon jalen Gezer. Kalenaꞌs tzun na opontz jalen tzi mar Mediterráneo.4 Je tzun yi amaꞌl yi akꞌlij scyetz yi cob cyꞌajl kꞌajtzun Ẍep yi na chibiꞌaj Manasés tu Efraín:
Yi chiꞌamaꞌl yi eꞌ xonl Efraín
5 Yi mojomil yi chiꞌamaꞌl yi eꞌ xonl Efraín iꞌtz: Choꞌn na xeꞌt tzaj swutz len Atarot-adar, nin choꞌn na icyꞌ Bet-horóna yi at wiꞌwtzeꞌn. 6 Kalenaꞌs tzun na bentz tan toponeꞌn stzi mar Mediterráneo.
Ma yi chimojom jeꞌn tziꞌn iꞌtz: Micmetat, kalenaꞌs tzun na ajtz leꞌlnak, jalen Taanat-siló. Nin na icyꞌaktz Janoa. 7 Kalenaꞌs tzun na copontz Atarot nin Narat, nin na icyꞌaktz Jericó, kalenaꞌtz na elepontz tzi aꞌ Jordán. 8 Ej, nin na xeꞌtnin junt tir jeꞌn tziꞌn le amaꞌl Tapúa. Choꞌn tzun na aj loꞌcnak le xoꞌmbil aꞌ cwent Caná. Kalenaꞌs tzun na ocpontz tzi yi mar Mediterráneo. Yaꞌstzun yi amaꞌl yi akꞌlij scyetz yi xonl Efraín. Nin tircuꞌn cweꞌn jatxij ẍchiwutz yi jujun kꞌuꞌj najal.
9 Nchaꞌtz at cobox tnum tuml eꞌchk chiꞌaldeyil yi choꞌn at le chiꞌamaꞌl yi eꞌ xonl Manasés, yi akꞌlij scyetz yi eꞌ xonl Efraín.
10 Poro yi eꞌ xonl Efraín, quinin eꞌ nimsaj chicꞌuꞌl tan chilajeꞌn len yi eꞌ aj Canaán yi najlcheꞌ le amaꞌl Gezer. Ma na eꞌ cyaj cyen tuꞌtz cyaꞌn ẍchixoꞌl. Ntin ja chicawun tan chichojol yi chiꞌalcawal scyetz. Chaꞌstzun te choꞌnin najlcheꞌ yi eꞌ aj Canaánaꞌtz ẍchixoꞌl yi eꞌ xonl Efraín jaluꞌ.b