Yi toqueꞌn Josué tan jatxleꞌn yi eꞌchk amaꞌl ẍchiwutz yi eꞌ mas xonl Israel
14
1 Je chibiꞌ yi eꞌchk amaꞌl cwent Canaán yi jatxlij ẍchikꞌab yi eꞌ xonl Israel cyakꞌun Eleazar yi paleꞌ, tu Josué yi cyꞌajl Nun, scyuchꞌ yi eꞌ chibajxom yi jujun kꞌuꞌj xonl Israel. 2 Choꞌn cyulej chi talnak Kataj tetz Moisés. Na eꞌ oc tan txꞌiluꞌntza teꞌj tan jatxleꞌn cuꞌn ẍchiwutz yi beluj kꞌuꞌj tu niꞌcy xonl Israel. 3 Na yi cobt kꞌuꞌj tu niꞌcy, yi eꞌ xonl Rubén, nin yi eꞌ xonl Gad, tu yi junt kꞌuꞌj xonl Manasés, nsken takꞌ Moisés yi cyetz chiꞌherens jalaj cyꞌen yi aꞌ Jordán.bMa yi eꞌ xonl Leví, quinin akꞌlij cyetz chiꞌherens, 4 na yi cob cyꞌajl Ẍep, yi Manasés tu Efraín, eꞌ oc tajlal yi coblaj kꞌuꞌj xonl Israel. Poro yi eꞌ xonl Leví qui akꞌlij chiꞌherens, ma na ntin akꞌlij muꞌẍ chiꞌamaꞌl kalel chinajeweꞌt, nin kalel chiwaneꞌt yi cyawun. Yi muꞌẍ chiꞌamaꞌlaꞌtz, choꞌn at ẍchixoꞌlak yi eꞌ mas xonl Israel. 5 Cyakil yi xtxolbilaꞌseꞌj, ja bnix chi talnak Kataj tetz Moisés.
Yi chiꞌamaꞌl yi eꞌ tu Caleb
6 Ej, itzun bantz, nintzun eꞌ ben yi eꞌ xonl Judá tan yol tetz Josué le tnum Gilgal. Yi cyoponeꞌn swutz Josué, nintzun tal Caleb yi cyꞌajl taꞌ Jefone yi cenezeo tetz: “Ma jaluꞌ taꞌ, ulk txꞌakx tcꞌuꞌluꞌ yi xtxolbil yi talnak Kataj tetz Moisés le amaꞌl Cades-barnea, na alijt cyen takꞌun, yi mbi sbajok skeꞌj ketz tuchꞌuꞌ.c 7 Na yi kasajeꞌn ẍchakol Moisés yi ẍchakum Ryos, tan xkꞌukeꞌn yi amaꞌleꞌj, atin wetz tul caꞌwunak yob. Ej, nin yi kulakeꞌn tan xkꞌukeꞌn, ja wal yi mero bintzi quib yi nwil, na ja chinxom te yi tajbil Wajcaw yi kaRyosil.d 8 Ma yi coboxt kuchꞌ yi xomcheꞌ skeꞌj, ntin ja choꞌc tan chixoꞌwseꞌn yi eꞌ mas katanum. Poro yi in wetz quinin nchinxom scyeꞌj, ma na ntin ja imban yi tajbil Kataj yi kaRyosil. 9 Chaꞌstzun te tal Moisés yi xtxolbileꞌj swetz: ‘Jun cuꞌn yol, yi amaꞌl kale ncxoneꞌt, atz sbneꞌ scyuchꞌ yi eꞌ anitxaꞌ, na ja cxom te yi tajbil Kataj yi kaRyosil,’e stzun iꞌ bantz swetz. 10 Ma jaluꞌ bin Josué, nimix bin tiemp yi tlol Moisés yi xtxolbileꞌj swetz. Na ja wiꞌt icyꞌ caꞌwunak oꞌix yob yi tlol Kataj yi xtxolbilaꞌtz tetz Moisés, nin yaꞌstzun yi tiemp yi na kaxon tzaj le amaꞌl tzꞌinunin tuꞌ. Ma jaluꞌ, atin tul jun mutxꞌ tu oꞌ yob, 11 ej, nin iẍnin wutaneꞌn wetz chi wutaneꞌn yi insajeꞌn ẍchakol Moisés tan xkꞌukeꞌn yi eꞌchk amaꞌlaꞌtz. Nchaꞌtz atit inwalor tan woqueꞌn tan oyintziꞌ. 12 Chaꞌstzun te na kloꞌ waj yil takꞌuꞌ yi amaꞌlaꞌtz yi suknak Kataj swetz. Iꞌtz yi wiꞌwtz kale ateꞌt yi eꞌ xonl Anac, yi eꞌ yi chin wutz quikan nin. At eꞌ yi choꞌn najlcheꞌ tulak eꞌchk lmak tnum, yi at chin tapij solteꞌjak. Takꞌuꞌ bin eꞌchk amaꞌlaꞌtz swetz, na choꞌn kꞌuklij incꞌuꞌl te Kataj, yi xomok iꞌ sweꞌj tan wuchꞌeyeꞌn tan chilajeꞌn len yi eꞌ wunakaꞌtz yi ateꞌ swutz,” stzun Caleb bantz tetz Josué.
13 Nintzun takꞌ Josué banl tibaj Caleb, nchaꞌtz takꞌ yi amaꞌl cwent Hebrón tetz herens iꞌ. Yi Calebaꞌtz iꞌ cyꞌajl Jefone yi cenezeo. 14 Yaꞌstzun bantz yi toqueꞌn Hebrón tetz herens Caleb tu cyakil yi xonl iꞌ, nin choꞌn najlcheꞌ-tz jaluꞌ, na nin xom iꞌ te yi mero tajbil Kataj yi kaRyosil, yi oꞌ xonl Israel. 15 Yi biꞌ yi amaꞌl Hebrón tenẍchan iꞌtz, Quiriat-arba. Yi biꞌaj Arba iꞌtz biꞌ jun xonl Anac. Nin iꞌtz jun yaj yi chin wutz tkan nin, nin chin cham nin iꞌ.
Ma yi xcyeweꞌn Caleb tan cambajeꞌn eꞌchk amaꞌlaꞌtz, quiꞌct oyintziꞌ bajij Canaán te yi tiempaꞌtz.