Josué 13

Yi amaꞌl yi txeꞌn chicambaj yi eꞌ xonl Israel

1 Itzun bantz, yi tijineꞌn cꞌuꞌl Josué, nintzun tal Kataj tetz: “Josué, yi aẍatz ja tijin acꞌuꞌl, poro at tzaj nin tan ixcyeweꞌn tan cambajeꞌn yi amaꞌl yi insuknak tzitetz. 2 Na txeꞌn itetzaj chiꞌamaꞌl yi eꞌ filistey, tu chiꞌamaꞌl yi eꞌ gesureo. 3 Nchaꞌtz txeꞌn itetzaj yi chiꞌamaꞌl yi eꞌ aveo, yi at cweꞌn tziꞌn. Yi eꞌchk amaꞌlaꞌtz, iꞌtz yi amaꞌl yi na xeꞌt tzaj te yi tzanlaꞌ Sihor, swutzeꞌl tzaj Egipto, nin te yi mojomil yi na opon jalen te tnum Ecrón. Ma jeꞌn tziꞌn, txeꞌn itetzaj yi amaꞌl kale ateꞌt yi eꞌ aj Canaán. Tul yi amaꞌlaꞌtz, at oꞌ wiꞌtz ajcaw yi na chicawun. Nin iꞌtz yi ajcaw cwent Gaza, Asdod, Ascalón, Gat nin Ecrón. 4 Nchaꞌtz txeꞌn itetzaj yi amaꞌl yi at cweꞌn tziꞌn, yi na xeꞌtnin Sidón, nin yi na opon jalen Afec, yi mojom tib scyuchꞌ yi eꞌ amorreo. 5 Nchaꞌtz txeꞌn itetzaj chiꞌamaꞌl yi eꞌ giblita, nin yi amaꞌl cwent Líbano, yi na xeꞌtij Baal-gad, nin na opon xe wutz Hermón jalen Hamat. 6 Cyakil yi eꞌchk amaꞌlaꞌtz, swakꞌeꞌ tzitetz yi axwok xonl Israel. Swakꞌeꞌ cyakil yi chiꞌamaꞌl yi eꞌ aj Sidón, tu yi wiꞌwtz yi na xeꞌtij Líbano, jalen Misrefot-maim. Chelepon inlajul cyakil yi eꞌ wunak yi ateꞌ swutz yi eꞌchk amaꞌlaꞌtz. Ma aẍatz Josué, baꞌn tzajatx yi amaꞌlaꞌtz ẍchiwutz yi eꞌ atanum, chi walnak tzatz. 7 Baꞌn tzajatx cuꞌn ẍchiwutz yi beluj kꞌuꞌj xonl Israel, tuml yi junt kꞌuꞌj xonl Manasés yi txeꞌn akꞌlij cyetz”, stzun Ryos ban tetz Josué.

Yi tkꞌol Moisés chiꞌamaꞌl yi junt kꞌuꞌj Manasés, Rubén nin Gad

8 Yi eꞌ xonl Rubén, tu Gad, tu yi junt kꞌuꞌj xonl Manasés, nsken takꞌ Moisés yi cyetz chiꞌamaꞌl jalaj cyꞌen yi aꞌ Jordán. 9 Na ja cyetzaj yi amaꞌlaꞌtz yi na xeꞌt nin Aroer, yi at stziꞌ yi aꞌ Arnón tu yi eꞌchk tnum yi at ẍkꞌajlaj, tuml Medeba tu Dibón. 10 Tuml cyakil yi eꞌchk tnum yi at tzaj cwent yi rey Sehón yi cyajcawil yi eꞌ amorreo, yi choꞌn najeweꞌn iꞌ Hesbón. Nin ja opon cuꞌn stziꞌ yi chimojom jalen te yi chimojom yi eꞌ amonita. 11 Nchaꞌtz akꞌlij yi eꞌchk amaꞌl scyetz yi at cwent Galaad tu yi chiꞌamaꞌl yi eꞌ gesureo, tu chiꞌamaꞌl yi eꞌ maacateo, tu yi wiꞌwtz Hermón, tuml yi amaꞌl Basán jalen Salca. 12 Nchaꞌtz akꞌlij yi amaꞌl yi at jakꞌ caꞌwl Og, chireyil yi eꞌ aj Basán, yi cawunak le tnum Astarot tu Edrei. Yaꞌstzun yi eꞌ refaita yi eꞌ clax cyen, yi xcyeꞌ nak Moisés tan chibiyleꞌn, nin tan chilajeꞌn le cyetz chiꞌamaꞌl. 13 Ntin cuꞌn yi eꞌ aj Gesur scyuchꞌ yi eꞌ aj Maaca qui ncheꞌl lajuꞌn swutz yi chiꞌamaꞌl, ma na eꞌ cyaj cyen tuꞌ ẍchixoꞌl yi eꞌ xonl Israel. Nin ateꞌ nintz jaluꞌ.

14 Ma yi eꞌ xonl Leví quiꞌc cyetz chiꞌamaꞌl akꞌlij tan Moisés. Na yi cyetz chiꞌherens iꞌtz yi eꞌchk oy yi na opon cyakꞌun yi eꞌ xonl Israel tan pat-xeꞌn swutz Ryos, chi yi talnak Ryos scyetz.

15 Ma yi eꞌ xonl Rubén, nintzun oc Moisés tan jatxleꞌn cyetz chiꞌamaꞌl. Xomquen tuꞌ te yi jujun najal. 16 Choꞌn tzun eꞌ cyajeꞌn cyen yi eꞌ xonl Rubénaꞌtz le yi amaꞌl Aroer, stziꞌ yi aꞌ Arnón tu yi tnum yi at ẍkꞌajlaj, cyꞌanl tetz Medeba. 17 Nin ja opon cuꞌn jalen Hesbón tu cyakil yi eꞌchk tnum yi at ẍkꞌajlajaꞌtz chi taneꞌn Dibón, Bamot-baal, Bet-baal-meón. 18 Nchaꞌtz iꞌ njatxon yi tnum Jahaza, Cademot, nin Mefaat, 19 tu yi tnum Quiritaim, Sibna, Zaret-sahar yi at ẍkꞌajlaj. 20 Ej, nin iꞌ njatxon yi tnum Bet-peor, tuml yi eꞌchk txalaꞌj Pisga, nin Bet-fesimot, 21 tu cyakil yi eꞌchk cojbil, tuml yi eꞌchk tnum yi at jakꞌ caꞌwl Sehón yi chireyil yi eꞌ amorreo, yi najlij Hesbón. Yaꞌstzun yi rey yi quim tan Moisés scyuchꞌ coboxt ajcaw yi na chibiꞌaj: Evi, Requem, Zur, Hur nin Reba. 22 Nchaꞌtz quim Balaam cyakꞌun yi eꞌ xonl Israel tan spar. Yi jun Balaamaꞌtz iꞌ jun nachol, nin iꞌ cyꞌajl Beor. 23 Cyakil yi eꞌchk amaꞌlaꞌtz, yaꞌstzun akꞌlij scyetz xonl Rubén tan Moisés. Xomquen tuꞌ te tajlal yi jujun kꞌuꞌj eꞌ yi chixonl quib. Tircuꞌn eꞌchk amaꞌlaꞌtz akꞌlij scyetz. Nin choꞌn mmopon chimojom tzi aꞌ Jordán.

24 Nchaꞌtz takꞌnak Moisés chiꞌamaꞌl yi xonl Gad. Xomquen tuꞌ te tajlal yi jujun kꞌuꞌj eꞌ yi chixonl quib. 25 Akꞌlij yi amaꞌl cwent Jazer tu cyakil yi tnum Galaad scyetz. Nin nchaꞌtz cyetzaj jalaj chiꞌamaꞌl eꞌ amonita. Nin yi mojomil yi chiꞌamaꞌl, opon jalen Aroer yi at swutz len Rabá, 26 tuml yi amaꞌl yi at xoꞌl Hesbón, Ramat-mispa tu Betonim, tuml yi amaꞌl yi at xoꞌl Mahanaim. Nin na opon te yi mojomil Debir. 27 Nchaꞌtz akꞌlij yi ẍkꞌajlaj Bet-aram Bet-nimra, tu Sucot, nin Zafón. Yaꞌstzun amaꞌl yi at tzaj jakꞌ caꞌwl Sehón yi rey tetz Hesbón. Choꞌn tzun at cyakil eꞌchk amaꞌlaꞌtz swutz len yi aꞌ Jordán. Nin choꞌn nxeꞌt tzaj tzakꞌ cuꞌn tzaj yi lawun yi na biꞌaj Cineret. 28 Cyakil yi eꞌchk amaꞌlaꞌtz, yaꞌstzun akꞌlij scyetz yi eꞌ xonl Gad tan Moisés. Xomquen tuꞌ te yi tajlal yi jujun kꞌuꞌj eꞌ aj Gadaꞌtz yi chixonl quib.

29 Nchaꞌtz takꞌ Moisés chiꞌamaꞌl yi junt kꞌuꞌj xonl Manasés, yi eꞌ cyaj cyen jalaj cyꞌen yi aꞌ Jordán. 30 Yi toqueꞌn jatxleꞌn yi chiꞌamaꞌl, xomquen tuꞌ te yi tajlal yi jujun kꞌuꞌj eꞌ yi chixonl quib. Nin ja cyetzaj cyakil yi amaꞌl yi at tzaj jakꞌ caꞌwl Og, yi rey tetz Basán. Choꞌn xeꞌtnin le tnum Mahanaim, tuml yi oxcꞌal tnum yi at cwent yi tnum Jair. 31 Nchaꞌtz cyetzaj jalajt te yi amaꞌl Galaad tu yi cobt tnum yi na biꞌaj Astarot tu Edrei. Yaꞌstzun yi amaꞌl yi akꞌlij scyetz xonl Maquir, cyꞌajl Manasés. Xomquen tuꞌ te tajlal jujun kꞌuꞌj eꞌ yi chixonl quib.

32 Yaꞌstzun cyakil yi amaꞌl yi baj jatxol Moisés scyetz yi eꞌ xonl Rubén, Gad tu Manasés, te yi ateꞌ wi ẍkꞌajlaj cwent Moab, yi at jalaj cyꞌen yi aꞌ Jordán, swutz len Jericó. 33 Ma yi eꞌ xonl Leví, quiꞌc cyetz chiꞌherens akꞌlij, ma na ntinaꞌtz tal Moisés scyetz: “Yi itetz iherens iꞌtz yi Kataj, yi kaRyosil.”