Yi chixcyeweꞌn yi eꞌ xonl Israel scyeꞌj yi rey Jabín scyuchꞌ yi eꞌ mas rey
11
1 Itzun bantz, yi tbital Jabín, rey cwent Hazor, yi mbi cuꞌn nchiban yi eꞌ xonl Israel scyeꞌj yi eꞌ amorreo, nintzun ben ẍchakol cobox ẍchakum tan talcheꞌn scyetz yi rey Jobab cwent yi tnum Madón, tu yi rey cwent Simrón, tu yi rey cwent Acsaf, tan jeꞌn chimolol quib tan oyintziꞌ scyeꞌj yi eꞌ xonl Israel. 2 Nchaꞌtz ben mantar tan iꞌ scyeꞌj cyakil yi eꞌ rey yi ateꞌ jeꞌn tziꞌn, scyuchꞌ yi eꞌ yi najlcheꞌ tjocoꞌj kale na icyꞌeꞌt yi aꞌ Jordán, tzakꞌ cuꞌn tzaj yi jun wutzileꞌn lawun yi na biꞌaj Cineret. Nchaꞌtz ben mantar scyeꞌj cyakil yi eꞌ ajcaw yi najlcheꞌ wi ẍkꞌajlaj, swutzeꞌl tzaj Dor, yi at toqueꞌn tziꞌn. 3 Scyuchꞌ yi eꞌ aj Canaán, scyuchꞌ yi eꞌ hitita, scyuchꞌ eꞌ ferezeo, scyuchꞌ eꞌ aj jebuseo, yi choꞌn najlcheꞌ wiꞌwtz, nchaꞌtz yi eꞌ heveo yi ateꞌ wiꞌwtz Hermón, xlaj Mizpa. 4 Chimolol tzun quib yi eꞌ reyaꞌtz tan oyintziꞌ scyeꞌj yi eꞌ xonl Israel. Xomcheꞌ chisanlar scyeꞌj. At eꞌ yi choꞌn ateꞌeꞌn teꞌjak chej. Nin at eꞌ yi choꞌn ateꞌ tulak careꞌt tetz oyintziꞌ. Quinin ajlbeꞌn cyetz yi eꞌ sanlaraꞌtz, na choꞌn cunin cyajlal chi taneꞌn yi samlicyꞌ yi at tzi mar. 5 Junit eꞌ ban, nin choꞌn cyoponeꞌntz stziꞌ aꞌ Merom. Nin eꞌ ban list quibtz tan oyintziꞌ scyeꞌj yi eꞌ xonl Israel.6 Itzun tal Kataj tetz Josué: “Josué, quil cxob, na chwaꞌnin ek, nsken chiquim cyakil yi eꞌ icontraꞌtz waꞌn. Ma yi axwok itetz, ntinaꞌtz tajweꞌn tan ibnol: Wakꞌwokeꞌn quikan yi chichej, nin oken kꞌaꞌkl yi chicareꞌt itaꞌn,” stzun Kataj bantz tetz.
7 Beneꞌn tzun Josué scyuchꞌ yi eꞌ tetz sanlar tan oyintziꞌ scyeꞌj yi eꞌ reyaꞌtz. Qui cunin tzꞌicyꞌ scyetz yi cyoponeꞌn Josué tan chibiyleꞌn te yi ateꞌ tzi yi aꞌ Merom. 8 Na nin takꞌ Kataj amaꞌl scyetz yi eꞌ xonl Israel tan chixcyeweꞌn scyeꞌj yi eꞌ reyaꞌtz, eꞌ xomnin tan chibiyleꞌn jalen Sidón, nin jalen Misrefot-maim. Nin at eꞌ xonl Israel eꞌ xomnin tan chibiyleꞌn jalen ẍkꞌajlaj teleꞌn tziꞌn Mizpa. Tircuꞌn chiquimeꞌn yi eꞌ chicontraꞌtz, na quiꞌc jun nink clax. 9 Inin tulej Josué-tz chi tal Kataj. Cweꞌn tzun chitzꞌeꞌsal cyakil yi chicareꞌt nin nchaꞌtz baj chiwakꞌul quikan chichej yi eꞌ chicontraꞌtz.
10 Chibeneꞌn tzun Josué tan chibiyleꞌn yi eꞌ yi ateꞌ le tnum Hazor. Tircuꞌn chiquimeꞌn, tuml yi chireyil, na iꞌ ntxumun yi jun oyintziꞌaꞌtz scyeꞌj yi eꞌ xonl Israel. 11 Tircuꞌn chiquimeꞌn yi eꞌ yi ateꞌ le jun tnumaꞌtz. Nin oc kꞌaꞌkl yi tnum cyakꞌun yi eꞌ xonl Israel. 12 Iteꞌn nin tulej Josué yi eꞌchk mas tnum yi xom chiwiꞌ te yi rey cwent Hazor. Quim chireyil, nin eꞌ quim tircuꞌn yi eꞌ wunak yi ateꞌ le yi eꞌchk tnumaꞌtz. Ban Josué yi xtxolbilaꞌtz na yaꞌstzun talnak Moisés yi ẍchakum Ryos. 13 Ntin Hazor oc kꞌaꞌkl cyakꞌun yi eꞌ xonl Israel, ma yi eꞌchk mas tnum yi ateꞌ wiꞌwtzeꞌn, quinin oc kꞌaꞌkl cyaꞌn. 14 Poro tircuꞌn yi eꞌ wunak yi ateꞌ-tz tul yi eꞌchk tnumaꞌtz eꞌ quim. Quiꞌc nin jun nink clax. Ma yi cyawun tu yi eꞌchk takleꞌn yi at tnum, tircuꞌn cyetzal.
Yi chibnol taneꞌn Josué yi caꞌwl yi tal Moisés
15 Yi eꞌchk caꞌwl yi takꞌ Kataj tetz Moisés, Josué tzun bnon taneꞌn, na nin tal Moisés cyakil yi eꞌchk caꞌwlaꞌtz tetz Josué. Quiꞌc nin jun xtxolbil yi quiꞌk mban Josué chi yi tal Kataj tetz Moisés. 16 Cyetzaj yi eꞌ xonl Israel cyakil yi eꞌchk amaꞌlaꞌtz yi at wiꞌwtz, tu yi jun cꞌoloj amaꞌl yi na biꞌaj Néguev, tu yi amaꞌl Gosén, tu cyakil yi ẍkꞌajlaj yi at stziꞌak yi aꞌ Jordán, tu yi amaꞌl yi na biꞌaj Arabá, tu cyakil eꞌchk mas amaꞌl yi at wiꞌwtz, tu yi eꞌchk jocoꞌj yi nsken wiꞌt oc chicwent. 17 Nchaꞌtz cyetzaj yi wiꞌwtz Halac yi na xeꞌtnin Seir, nin yi na opon jalen Baal-gad yi at jalen wi ẍkꞌajlaj Líbano, yi at tzakꞌ cuꞌn yi wutz Hermón. 18 Tircuꞌn chiquimeꞌn chireyil yi eꞌchk tnumaꞌtz, na nim tiemp eꞌ ban yi eꞌ xonl Israel tan cambajeꞌn yi eꞌchk amaꞌlaꞌtz. 19 Ntin cuꞌn yi eꞌ heveo, yi najlcheꞌ Gabaón, yaꞌstzun eꞌ clax, na nsken bnix jun chitrat scyuchꞌ. 20 Tircuꞌn chiquimeꞌn yi eꞌ mas wunakaꞌtz, nin chin qꞌuixcꞌuj nin eꞌ ban yi chiquimeꞌn, na yaꞌstzun tajbil Kataj tan ticyꞌeꞌn poneꞌn yi eꞌchk qꞌuixcꞌujaꞌtz cyaꞌn ẍchikꞌab yi eꞌ xonl Israel. Quinin el chikꞌajaba yi eꞌ xonl Israelaꞌtz scyeꞌj, na yaꞌstzun alijt cyen tan Kataj Ryos tetz Moisés.
21 Nchaꞌtz iteꞌn nin tiempaꞌtz chiquimeꞌn yi eꞌ xonl Anac yi najlcheꞌ wiꞌwtz Hebrón,b nin Debir, tu Anab. Nin cyakil yi eꞌ yi ateꞌ wiꞌwtz cwent Judá, tu yi eꞌchk amaꞌl yi nsken oc chicwent yi eꞌ xonl Israel, tircuꞌn chixiteꞌn tan Josué. 22 Chaꞌstzun te quiꞌc jun xonl Anac, yi eꞌ yi nim wutz quikan, ncyaj cyen le amaꞌlaꞌtz yi at ẍchikꞌab yi eꞌ xonl Israel. Poro ilenin eꞌ cyaj cyen cobox le amaꞌl Gaza, tu Gat, nin Asdod.
23 Yaꞌstzun ban yi chixcyeweꞌn yi eꞌ xonl Israel tan cambajeꞌn cyakil eꞌchk amaꞌlaꞌtz, chi yi talnak Kataj tetz Moisés. Nintzun cuꞌ jatxij yi amaꞌlaꞌtz ẍchiwutz yi eꞌ xonl Israel, xomquen tuꞌ te jujun kꞌuꞌj eꞌ. Nin jetzaꞌtz, quiꞌct mas oyintziꞌ jal ẍchixoꞌl.