Yi chixubseꞌn yi eꞌ chibajxom yi eꞌ xonl Israel
9
1 Itzun bantz, yi quibital cyakil yi eꞌ ajcaw yi ateꞌ jalajicyꞌ tzaj yi aꞌ Jordán, yi mbi cuꞌn na chitzan yi xonl Israel tan banleꞌn. Nintzun eꞌ mol quibtz scyuchꞌ yi eꞌ yi ateꞌ jeꞌn tziꞌn, scyuchꞌ yi eꞌ yi ateꞌ nakaꞌjil yi mar Mediterráneo, scyuchꞌ yi eꞌ yi ateꞌ nintz Líbano. Yi eꞌaꞌtz yi eꞌ mol quib, iꞌtz yi cyajcawil yi eꞌ hitita, scyuchꞌ yi eꞌ amorreo, scyuchꞌ eꞌ xonl Canaán, scyuchꞌ eꞌ ferezeo, scyuchꞌ yi eꞌ heveo, nin scyuchꞌ yi eꞌ jebuseo. 2 Junit tzun ban chitxumuꞌn tan oyintziꞌ te Josué scyuchꞌ yi eꞌ xonl Israel. 3 Poro i tzun yi eꞌ heveo yi najlcheꞌ Gabaón, nin quibit yi mbi cuꞌn ban yi tnum Jericó tu yi tnum Hay cyakꞌun yi xonl Israel. 4 Cweꞌn tzun chitxumul jun cyajtzaꞌkl, nintzun eꞌ bentz tan chisubleꞌn yi chibajxom yi xonl Israel.Itzun yi chibeneꞌn, nin ben quicyꞌal eꞌchk biꞌẍ sac tetz cuꞌlbil beꞌch cyetz. Nin ben quicyꞌal eꞌchk biꞌẍ tzꞌuꞌm tetz cuꞌlbil quicꞌaꞌ. Cyakil yi eꞌchk takleꞌn yi ben quicyꞌal, nternin katznakt, nin ocnakt chaꞌbil teꞌjak. 5 Nchaꞌtz ocnin eꞌchk beꞌch cyetz yi katzaꞌl. Nin ocnin yi eꞌchk chixajab yi nternin biꞌẍt. Nchaꞌtz ben quicyꞌal wotzꞌ tetz chiwaꞌ yi nternin ximt. Nintzun eꞌ bentz. 6 Yi cyoponeꞌn Gilgal, kale chimoloneꞌt quib Josué scyuchꞌ yi eꞌ mas xonl Israel, nintzun cyaltz scyetz.
—Yi oꞌ ketz choꞌn nkasaj joylaj. ¿Quiꞌ poloꞌ cyeruꞌ nink kaban jun katrat scyuchꞌuꞌ? cheꞌch tzun bantz scyetz Josué.
7 —¿Nkꞌeꞌtz peꞌ nakaꞌj nchisajeꞌtuꞌ? Na ko nakaꞌj nchisajeꞌtuꞌ quiꞌc rmeril tan bnixeꞌn jun katrat scyuchꞌuꞌ,a stzun Josué scyetz.
8 —Quiꞌ taꞌ, yi oꞌ ketz, ja kuꞌl tan talcheꞌn yi list atoꞌt tan koqueꞌn tetz chimosuꞌ.
Beneꞌn tzun jakol junt tir Josué scyetz:
—¿Naꞌ tzun scyetz eꞌuꞌ? Nin cyaleꞌuꞌ yi bintzi yi ¿naꞌ nchisiteꞌtuꞌ?
9 —Yi oꞌ ketz choꞌn nkasaj joylaj, nin ja kuꞌl tan koqueꞌn tetz chichakumuꞌ. Na ja kubit yi wiꞌnin ẍchamil yi cyeruꞌ chiRyosiluꞌ. Na wiꞌnin eꞌchk takleꞌn bnix taꞌn tzoneꞌj, nin le amaꞌl Egipto. 10 Nchaꞌtz ja kubit, yi ẍeꞌn cunin tulej iꞌ yi cob rey cwent eꞌ amorreo yi quimnakeꞌ jalaj cyꞌen yi aꞌ Jordán, yi Sehón ajcaw cwent Hesbón, tu Og yi ajcaw cwent Basán, yi choꞌn najlcheꞌ sajleꞌn le luwar yi na biꞌaj Astarot.b 11 Nin yi kubital cyakil yi xtxolbilaꞌseꞌj, nintzun bixeꞌ cyakꞌun yi eꞌ kabajxom, scyuchꞌ yi eꞌ kawunakil tan kasajeꞌn scyeꞌjuꞌ. Je tzun cyal sketzeꞌj: “Quibeneꞌnk scyeꞌj eꞌ xonl Israel. Cyꞌajwok nin iwaꞌ. Nin alwok quen scyetz: ‘Oꞌ chixconsbeꞌtzuꞌ. Nin list kutaneꞌn tan kabnol jun trat scyuchꞌuꞌ,’ cheꞌch bantz sketz.” 12 Yi keleꞌn tzaj tan chijoyleꞌnuꞌ, inak cuꞌn bnixeꞌn tzaj yi kawaꞌ. Ma jaluꞌ nternin wotzꞌt, nin nternin ximt. 13 Nchaꞌtz yi tzꞌuꞌm kale at cuꞌnt yi kucꞌaꞌ, chin acꞌaj nin yi kasajeꞌn. Ma jaluꞌ nternin biꞌẍt. Nchaꞌtz yi eꞌchk beꞌch ketz tu kaxajab. Nim cunin beꞌ mbaj kaxoꞌmbel tan kuleꞌn scyuchꞌuꞌ, cheꞌch tzun yi cobox yajaꞌtz bantz.
14 Eꞌ oc tzun yi eꞌ yajaꞌtz tan sukeꞌn muꞌẍ wajc scyetz chibajxom yi eꞌ xonl Israel, nin bajtz cyakꞌun. Poro quinin eꞌ jak tetz Kataj yi ko baꞌn yil baj yi wajaꞌtz cyaꞌn nka quiꞌ. 15 Nintzun cujij Josué tan bnixeꞌn jun chitrat scyuchꞌ yi eꞌaꞌtz, tan qui cyoqueꞌn tan chibiyleꞌn yi eꞌ wunakaꞌtz. Nin cyakil yi eꞌ wiꞌtz cyajcawil yi xonl Israel, eꞌ suk iteꞌn nin yolaꞌtz scyetz.
16 Poro yi teleꞌn ox kꞌej, kalenaꞌs tzun quibital yi eꞌ xonl Israel. Yi eꞌ wunakaꞌtz yi eꞌ ulak scyeꞌj, eꞌ teꞌn chiwisin, na choꞌn najlcheꞌ chinakaꞌjil. 17 Chibeneꞌn tzun yi xonl Israel tan chijoyleꞌn yi eꞌ wunakaꞌtz. Jalen le toxiꞌn kꞌej cyoponeꞌn kale najlcheꞌt. Na eꞌ aj Gabaón, aj Cafira, aj Beerot nin aj Quiriat-jearim. 18 Yi chijaleꞌn yi eꞌ wunakaꞌtz cyaꞌn, quinin eꞌ oc tan chibiyleꞌn, na nsken bixeꞌ jun chitrat scyuchꞌ yi quiꞌc rmeril tan cyoqueꞌn tan chibiyleꞌn. Na yi jun trataꞌtz choꞌn bnixeꞌn swutz Kataj yi kaRyosil.
Tan yi xtxolbileꞌj nintzun xeꞌtij yol ẍchixoꞌl yi eꞌ xonl Israel, yi ploj nchiban yi chibajxom. 19 Poro nintzun cyal yi eꞌ bajxomaꞌtz scyetz yi eꞌ mas xonl Israel:
—Bintzi loꞌ yi na cyaluꞌ, poro ja bnix katrat scyuchꞌ. Ej, nin swutz cunin Kataj yi kaRyosil yi nkasuk kayol scyetz. Ej nin yi kayol yi nkasuk scyetz iꞌtz, yi quil cheꞌ kabiy. Nin quiꞌc cuj tan kabnol mal scyetz. 20 Quil cheꞌ kabiy tan qui kajuchul kil swutz Kataj yi kaRyosil. Na ja wiꞌt kasuk kayol. Nin kol kapaj yi mbixeꞌ kakꞌun, tzꞌul kacaws tan Kataj, cheꞌch tzun bantz.
21 Nchaꞌtz eꞌ cawun nin: “Quiꞌc cuj tan koqueꞌn tan chibiyleꞌn yi eꞌ wunakaꞌtz. Na ja chibixeꞌ kaꞌn tetz kaswilum, nin tetz katzꞌyaꞌom.” Tan yi xtxolbilaꞌseꞌj yi quiꞌt eꞌ oc tan chibiyleꞌn, eꞌ el cuꞌn yi eꞌ bajxomaꞌtz te chiyol yi chisuk scyetz.
22 Cheꞌ ẍchakol tzun Josué yi eꞌ aj Gabaónaꞌtz. Nintzun jaktz scyetz:
—¿Nxac ncxoꞌcwok tan kasubleꞌn? ¿Nxac mmitalwok sketz yi choꞌn ncsajwok joylaj? Na axwok teꞌn kawisin. 23 Ma jaluꞌ, tan yi iyaꞌpl yi mmibanwok skeꞌj skakꞌeꞌ icaws. Axwok esclaw sbneꞌ opon tunintz. Axwok aj swilum, nin aj tzꞌyaꞌom sbneꞌ le caꞌl Ryos.
24 Itzun cyaltz tetz Josué:
—Ja kaban yi xtxolbilaꞌtz, na ja kaxob scyeruꞌ, ko tzun kaquim cyanuꞌ, na bitaꞌnt kaꞌn yi takꞌnak yi chiRyosiluꞌ cyakil yi eꞌchk amaꞌleꞌj scyeruꞌ. Na yaꞌstzun talnak iꞌ tetz Moisés yi ẍchakum Kataj. Ej, nin nchaꞌtz tal iꞌ tetz Moisés, yi tajweꞌn tan kaquimeꞌn cyakil yi oꞌ yi najlchoꞌ swutz yi eꞌchk amaꞌleꞌj. 25 Chaꞌstzun te ncuꞌ katxumul yi jun kajtzaꞌklaꞌtz. Ma jaluꞌ bin, ja bin koꞌc chicwentuꞌ. Chibneꞌuꞌ skeꞌj quib yi mbixeꞌ cyanuꞌ, cheꞌch bantz tetz Josué.
26 Quinintzun takꞌ Josué amaꞌl scyetz yi eꞌ mas xonl Israel tan cyoqueꞌn tan chibiyleꞌn yi eꞌ wunakaꞌtz. 27 Poro yi cyakꞌun yi eꞌ wunakaꞌtz ban iꞌtz, tan swiliꞌn nin tan baleꞌn quicꞌaꞌ yi eꞌ xonl Israel. Nchaꞌtz eꞌ oc tan takꞌleꞌn cyakil yi siꞌ, tu aꞌ yi na xcon tan banleꞌn chimunl swutz yi patbil chitxꞌixwatz, le amaꞌl kale talwit Ryos yi tajweꞌn tan chibnol chimunl swutz. Jetzaꞌtz tzun cyocleꞌn te yi jun akꞌunaꞌtz, nin iteꞌn nin cyakꞌunaꞌtz jaluꞌ.