Josué 8

Yi chiquimeꞌn yi eꞌ aj Hay

1 Itzun bantz, nintzun talt Kataj tetz Josué:

—Quil cxob, nin quil cẍbisun. Cyꞌajweꞌ nin cyakil yi eꞌ sanlar tan oyintziꞌ scyeꞌj yi eꞌ aj Hay. Swakꞌeꞌ amaꞌl tzitetz tan ixcyeweꞌn scyeꞌj tuml chireyil, scyuchꞌ cyakil yi eꞌ wunak yi ateꞌ-tz. Nin itetz sbneꞌ cyakil yi chiꞌamaꞌl. 2 Choꞌn cuꞌn cheꞌ itulejwok chi itulejwok yi tnum Jericó. Ntin yi chimeꞌbiꞌl tuml cyakil yi cyawun itetz sbneꞌ. Ej nin ewun cuꞌn chocopon cobox kꞌuꞌj sanlar wutz coc yi tnum.

3 I nintzun tulej Josuéjaꞌtz. Nin eꞌ jeꞌ xtxaꞌol junaklaj mil sanlar. Ej nin lakꞌbal tzun chiwekol quib, nintzun eꞌ bentz tan oyintziꞌ scyeꞌj yi eꞌ aj Hay. 4 Yi ntaxk chiben, nintzun cawun Josué scyeꞌj. Itzun taltz: “Bitwok tzaj, ewwok itib wutz coc yi tnum. Nin list cuntunin axwoktz yil tzꞌopon oril. 5 Ma yi oꞌ ketz scyuchꞌ yi eꞌ mas sanlar, nkaben tan xuxiꞌn swutz yi tnum. Nin yil cheꞌl tzaj nil tan kabiyleꞌn kloꞌ, kelpon ojk ẍchiwutz, chi ban yi bajx tir. 6 Yil keꞌl tzaj ojk ketz, ẍchitxumeꞌ yi ja wiꞌt keꞌl ojk junt tir ẍchiwutz. 7 Itzun yil chixom tzaj tan katzꞌamleꞌn ketz, baꞌn tzun cxoꞌcwok quentz tnum tan chibiyleꞌn. Skaxcyek scyeꞌj, na ja wiꞌt takꞌ Kataj yi kaRyosil yi jun tnumaꞌtz sketz. 8 Yil cxoꞌcwok tnum, baꞌn tzꞌoc kꞌaꞌkl cyakil yi at, chi ntal Kataj sketz.”

9 Chibeneꞌn tzun yi eꞌ sanlaraꞌtz tan ew ib wutz coc yi tnum Hay tu Betel. Ma tetz Josué, nin cyaj cyentz te yi jun akꞌbalaꞌtz ẍchixoꞌl eꞌ mas sanlar kale ateꞌt nin. 10 Itzun le junt eklok, jalchan cunin cꞌaseꞌn Josué tan chimolcheꞌn yi eꞌ sanlar yi ateꞌ cyen. Yi wiꞌt chimolxeꞌn, nintzun bajx cuꞌn Josué scyuchꞌ yi eꞌ wiꞌ banl wiꞌ ẍchiwutz. Chibeneꞌn tzuntz tan oyintziꞌ scyeꞌj yi eꞌ aj Hay. 11 Choꞌn tzun cyoponeꞌntz swutz yi tnum, nin eꞌ cyaj cyentz tibajeꞌn muꞌẍ yi tnumaꞌtz. Jalt cuntuꞌ jun tal jocoꞌj cyaj cyentz ẍchixoꞌl tu yi tnum Hay. 12 Nsken cheꞌ tew Josué eꞌchk oꞌ loꞌ mil sanlar txoꞌl Betel tu Hay. 13 Na cob cuntuꞌ eꞌ el yi eꞌ sanlar yi xomcheꞌ te Josué. At jun kꞌuꞌj yi choꞌn cyewaꞌn quib swutz quen yi tnum. Ma yi junt kꞌuꞌj, choꞌn ateꞌ tibajeꞌn yi tnum. Itzun yi jun kꞌuꞌj kale xomijeꞌt Josué, yi ateꞌ tibajeꞌn yi tnum, lakꞌbal tzun quicyꞌeꞌn junt wek. Choꞌn tzun cyoponeꞌntz nicyꞌal yi tal jocoꞌj yi at swutz yi tnum.

14 Itzun yi tilol yi rey cwent Hay yi nsken chopon yi eꞌ xonl Israel tan oyintziꞌ scyeꞌj, nintzun eꞌ el tzajtz tan oyintziꞌ scyeꞌj yi eꞌ yi ateꞌ tjocoꞌj. Quinin tzꞌicyꞌ scyetz yi ko ateꞌ mas sanlar cwent Israel cyewaꞌn quib swutz quen yi tnum.

15 Cyeleꞌn tzun ojk cyetz Josué taneꞌn. Chicyꞌal tzun yi beꞌ yi na ben le amaꞌl tzꞌinunin tuꞌ. 16 Chicyakil cuꞌn yi eꞌ sanlar cwent Hay eꞌ xomnin tan chitzꞌamleꞌn Josué scyuchꞌ yi eꞌ mas sanlaraꞌtz. Nin beneꞌnin eꞌ bantz joylaj te yi tnum. 17 Nkꞌeꞌtz ntin yi sanlar cwent Hay eꞌ xomnin tan chitzꞌamleꞌn, ma na nchaꞌtz yi eꞌ sanlar cwent Betel. Tircuꞌn eꞌ beneꞌn. Cyaj quen tuꞌ quilol yi cyetz chitnumil ẍchuc. 18 Beneꞌn tzun tlol Katajtz tetz Josué: “Banaj yi techl tan talcheꞌn scyetz yi eꞌ mas sanlar tan cyoqueꞌn tnum Hay, na ja wiꞌt wakꞌ amaꞌl tan icambalwok,” stzun Kataj bantz.

Toqueꞌn tzun yi jun techlaꞌtz tan Josué tan cyoqueꞌn yi eꞌ mas sanlar yi cyewaꞌn quib wutz coc yi tnum tan oyintziꞌ. 19 Cyeleꞌn tzaj tzun yi eꞌ sanlar yi cyewaꞌn quib swutz quen yi tnum. Nintzun eꞌ octz tul yi tnum, nin oc kꞌaꞌkltz cyaꞌn.

20 Itzun yi quilol yi eꞌ sanlar cwent Hay yi na tzan kꞌaꞌkl chitnumil nintzun eꞌ el ojk, poro cyaꞌl nin eꞌ aj nint, na nin eꞌ saj yi eꞌ xonl Israel yi nsken cheꞌl ojk taneꞌn tan chibiyleꞌn. 21 Yaꞌstzun bantz na yi beneꞌn quilol Josué yi na tzan kꞌaꞌkl yi tnum, nintzun eꞌ pakxijtz tan chibiyleꞌn yi eꞌ sanlar cwent Hay. 22 Nchaꞌtz eꞌ bant yi eꞌ yi ocsan kꞌaꞌkl yi tnum, nin eꞌ sajt tan quichꞌeyeꞌn yi eꞌ mas sanlar cwent Israel. Tircuꞌn tzun chiquimeꞌn yi eꞌ aj Hay. Cyaꞌl nin eꞌ aj nint na nsken chicyaj chinicyꞌal. 23 Ntin cuꞌn yi rey cwent Hay qui quim. Ma na ntin xtxꞌamxeꞌn cyaꞌn, nin ben chicyꞌal swutz Josué.

24 Te yi nsken chiquim chicyakil yi eꞌ aj Hay yi eꞌ xomnin tan chibiyleꞌn kloꞌ yi eꞌ xonl Israel taneꞌn, nintzun eꞌ pakxijt yi eꞌ xonl Israelaꞌtz le tnum Hay tan chibiyleꞌn yi eꞌ yi ateꞌ cyentz. 25 Te yi jun kꞌejaꞌtz eꞌ quim coblaj mil yaj scyuchꞌ cyakil xnaꞌn cwent Hay. 26 Na quinin eꞌ taneꞌ yi eꞌ xonl Israel tan oyintziꞌ, jalen cuꞌn yi chiquimeꞌn tircuꞌn yi eꞌ wunakaꞌtz. 27 Nchaꞌtz cyetzaj yi eꞌ xonl Israel tircuꞌn yi cyawun, tu yi chimeꞌbiꞌl yi eꞌ aj Hay. Na yaꞌstzun caꞌwl akꞌlij tetz Josué tan Ryos. 28 Kalenaꞌs tzun cawuneꞌnin Josué-tz tan stzꞌeꞌseꞌn tircuꞌn yi tnum. Nin tircuꞌn cweꞌn wocꞌ, chi taneꞌn jaluꞌ. 29 Nchaꞌtz cawunin Josué tan jeꞌn chꞌimbaꞌn yi rey cwent Hay jakꞌ tzeꞌ. Choꞌn tzun quimeꞌntz. Baj kꞌejtz tan yi wankil jakꞌ tzeꞌ. Jalen cweꞌn kꞌej cweꞌn tzajtz cyaꞌn. Nin choꞌn mukxeꞌntz tzi puertil yi tnum. Yi mukxeꞌn, nintzun jeꞌ tenuꞌn nicyꞌ cꞌub tibaj. Nin iẍnin tenuneꞌt yi eꞌchk cꞌubaꞌtz jaluꞌ.

Yi jeꞌn siꞌlel Josué yi ley Moisés wi juꞌwtz Ebal

30 Yi bajeꞌn yi xtxolbilaꞌseꞌj, nintzun ben Josué-tz tan banleꞌn jun patbil chitxꞌixwatz tetz Kataj yi kaRyosil, tibaj yi juꞌwtz yi na biꞌaj Ebal. 31 Bnix cyakil, quib yi talnak Moisés, yi ẍchakum Kataj. Nchaꞌtz bnix yi jun altaraꞌtz, quib yi na tal yi liwr tetz yi ley Moisés, yi na tal: “Banaj jun patbil itxꞌixwatz yi cꞌub cuꞌn tzꞌan, nin quil seꞌlij yi cꞌubaꞌtz,” stzun Ryos banak cyen. Cyoqueꞌn tzuntz tan pateꞌn chitxꞌixwatz tibaj. Nchaꞌtz cyakꞌ cyoy yi nxcon tan chibansal quib tu Kataj. 32 Ma tetz Josué, nintzun octz tan stzꞌibeꞌn yi ley Moisés te eꞌchk cꞌubaꞌtz yi xcon tan banleꞌn yi patbil chitxꞌixwatzaꞌtz. Ẍchiwutz cuꞌn cyakil yi eꞌ xonl Israel yi toqueꞌn iꞌ tan banleꞌn. 33 Ma cyakil yi eꞌ xonl Israel scyuchꞌ yi eꞌ yi nkꞌeꞌtz eꞌ xonl Israel, eꞌ oc txiclok xlajak yi caẍaꞌ kale atit yi caꞌwl Kataj. Nchaꞌtz ateꞌ cyakil yi eꞌ wiꞌ banl wiꞌ scyuchꞌ yi eꞌ mas bajxom, scyuchꞌ yi eꞌ pujul xtisyaꞌ yi ateꞌ ẍchixoꞌl. Choꞌn tzun eꞌ xcyeweꞌn cuꞌntz ẍchiwutz yi eꞌ paleꞌ yi qꞌuil tetz yi caẍaꞌ tan tkꞌol Kataj banl squibaj. At jun txꞌakaj yi choꞌn ateꞌ xe wutz Gerizim, nin junt txꞌakaj yi choꞌn ateꞌ xe wutz Ebal. Tircuꞌn na chixmayin tzaj te yi caẍaꞌ, chi alijt cyen tan Moisés.

34 Toqueꞌn tzun Josué tan siꞌleꞌn cyakil eꞌchk yol yi tzꞌibaꞌn le liwr tetz yi ley. Siꞌlej iꞌ yi eꞌchk takleꞌn balaj yi suknak Kataj scyetz. Nchaꞌtz siꞌlej iꞌ yi chicaws yi ko quil chixom te yi yol Ryos. 35 Quiꞌc nin jun yol yi tzꞌibaꞌnt cyen tan Moisés yi quiꞌk siꞌlej Josué ẍchiwutz cyakil yi eꞌ xonl Israel. Na ja siꞌlej iꞌ yi jun liwraꞌtz ẍchiwutz cyakil yi eꞌ xnaꞌn, nin ẍchiwutz cyakil yi eꞌ nitxaꞌ, nin ẍchiwutz cyakil yi eꞌ yi nkꞌeꞌtz eꞌ xonl Israel yi ateꞌ ẍchixoꞌl.