Yi juchul Acán til
7
1 Itzun bantz, eꞌ juch yi eꞌ xonl Israel quil swutz Ryos, tan paj yi at jun scyeri yi jun kꞌuꞌj xonl Judá, nin saj tcyꞌal cobox takleꞌn le tnum Jericó yi quiꞌc cuj tan cyetzal. Na sken aꞌlchij scyetz yi tajweꞌn tan teleꞌn cuꞌn tircuꞌn swutz. Tan yi cobox takleꞌnaꞌtz yi saj tcyꞌal, tircuꞌn tzun xonl Israel jal quil swutz Ryos. Chaꞌstzun te jeꞌn lajp wiꞌ iꞌ scyeꞌj. Yi junaꞌtz yi njuch til, iꞌtz Acán, yi cyꞌajl Carmi, nin yi taj Carmi iꞌtz Zabdi, ma taj Zabdi iꞌtz Zera, yi eꞌaꞌtz eꞌ cuꞌn xonl Judá.2 Itzun yi teleꞌn cobox kꞌej, nintzun eꞌ ben ẍchakol Josué cobox xkꞌukwil tan xkꞌukeꞌn yi tnum Hay yi at swutz len yi tnum Betel, nakaꞌjil Bet-avén. Chibeneꞌn tzuntz tan tilweꞌn yi amaꞌl, chi tal Josué scyetz. 3 Yi chipakxeꞌnt nintzun cyaltz tetz Josué: “Quiꞌc tajweꞌn tan chijeꞌn poneꞌn cyakil yi eꞌ sanlar tan oyintziꞌ scyeꞌj yi eꞌ aj Hay, ma na tzicuꞌn tan cob nka ox mil sanlar, na quiꞌc mas chixoneꞌn yi aj Hay,” cheꞌch tetz Josué.
4 I nintzun tulej Josuéjaꞌtz. Ox ntziꞌ mil sanlar eꞌ ben taꞌn tan oyintziꞌ. Poro quinin eꞌ xcyeꞌ, na tircuꞌn yi ox milaꞌtz eꞌ el ojk ẍchiwutz yi eꞌ aj Hay. 5 Eꞌ xcyeꞌ yi eꞌ aj Hayaꞌtz tan chiquimseꞌn eꞌchk junak waklaj loꞌ xonl Israel. Nin eꞌ xomnin tan chibiyleꞌn yi eꞌ mas jalen wutz cuꞌnak Sebarim. Chaꞌstzun te wiꞌnin chixobeꞌn yi eꞌ xonl Israel scyetz yi eꞌ aj Hay. Quiꞌtnin tzun chinimsaj chicꞌuꞌl tan oyintziꞌ scyeꞌj.
6 Yi quibital Josué scyuchꞌ yi eꞌ wiꞌ banl wiꞌ yi cyeleꞌn ojk ẍchiwutz yi eꞌ chicontr, nintzun eꞌ oc tan katzleꞌn yi beꞌch cyetz, nin eꞌ oc tan ẍchitleꞌn puklaj xoꞌl chiwiꞌ tan ẍchajleꞌn yi wiꞌnin na chibisun. Chicweꞌn tzun joklok swutz yi caẍaꞌ tetz Kataj, jalen beneꞌn kꞌej.
7 Itzun tal Josué tetz Kataj Ryos:
—Taꞌ, ¿mbi xac mbanuꞌ yi xtxolbileꞌj skeꞌj? Baꞌn tcuꞌn quiꞌk nkuꞌl tanuꞌ tzoneꞌj. Ko yaꞌtz kaxac nkuꞌl tanuꞌ tan kaquimeꞌn ẍchikꞌab yi eꞌ amorreo. Baꞌn tcuꞌn choꞌnk nkacyaj cyen jalaj cyꞌen Jordán. 8 Lastum taꞌ, ¿mbil wal jaluꞌ? na cyakil yi eꞌ kasanlar ja cheꞌl ojk ẍchiwutz yi kacontr.
9 ”Ej, nin yil quibit yi eꞌ aj Canaán scyuchꞌ yi eꞌ mas kacontr yi mbi mbajij, chuꞌl tan kabiyleꞌn, nin skasotzok junawes cyaꞌn. Nin ko yaꞌtz ẍchibneꞌ skeꞌj ¿ẍeꞌn lajluchax yi teruꞌ kꞌejuꞌ? stzun Josué tetz Kataj.
10 Nintzun saj tlol Ryos tetz Josué:
—¡Josué! txiclijeꞌn. ¿Mbi xac joklquiẍ wuxtxꞌotxꞌ? 11 Na yi jun xtxolbilaꞌtz ja bajij, tan paj yi ja chijuch yi eꞌ atanum yi quil. Ja chipaj incaꞌwl, na ja saj cyalkꞌal cobox takleꞌn yi ja kloꞌ tzꞌeꞌ cyaꞌn.a Eꞌ laꞌj. Wech na bitaꞌnt cyaꞌn yi at xtxintxal talkꞌeꞌn yi eꞌchk takleꞌnaꞌtz, ma na ja saj cyalkꞌal, nin ja cyew xoꞌl beꞌch cyetz. 12 Chaꞌstzun te quiꞌc rmeril tan ixcyeweꞌn scyeꞌj yi eꞌ icontr. Ej nin ilenin cxelepon ojk ẍchiwutz, na tajweꞌn kloꞌ tan iquimeꞌn. Nin ko quil tzꞌel cuꞌn yi eꞌchk takleꞌnaꞌtz swutz itaꞌn, tircuꞌn axwok cxelepon cuꞌn waꞌn swutz. 13 Ma jaluꞌ bin Josué. Txiclejeꞌn, molweꞌ cuꞌn cyakil yi eꞌ atanum, nin alaj scyetz yi tajweꞌn tan chixansal quib, na tajweꞌn chuꞌl tzinwutz ek jalchan. Ej, nin je swaleꞌ scyetzeꞌj: In yi Ajcaw tziteꞌj, nin in iRyosil. Poro ja jal jun chin ilcꞌol tzixoꞌlwok, na ja saj itcyꞌal eꞌchk takleꞌn yi ja kloꞌ el cuꞌn swutz itaꞌn. Ej, nin ko quil tzꞌel cuꞌn yi eꞌchk takleꞌnaꞌtz itaꞌn swutz, quiꞌct rmeril tan ixcyeweꞌn scyeꞌj icontr. 14 Ma jaluꞌ, na waj yil chuꞌl cyakil atanum tzinwutz ek jalchan. Nin junaleꞌn chichaj quib yi coblaj kꞌuꞌj atanumaꞌtz tzinwutz, na tzinchajeꞌ jun kꞌuꞌj ẍchixoꞌl yi coblaj kꞌuꞌjaꞌtz. Nin ẍchixoꞌl yi jun kꞌuꞌjaꞌtz tzinchajeꞌ junt kꞌuꞌj yi chixonl quib, nin ẍchixoꞌl yi eꞌaꞌtz tzinchajeꞌ jun najal.b Nin tul yi jun najalaꞌtz tzinchajeꞌ yi jun yaj yi aj paj. 15 Ma yil jal yi jun yajaꞌtz yi mmicyꞌan tzaj yi eꞌchk takleꞌnaꞌtz yi ja kloꞌ tzꞌeꞌ stzꞌeꞌok iꞌ tuml yi najal, tuml cyakil yi meꞌbiꞌl. Na eꞌ pajol caꞌwl tzixoꞌlwok, na quinin nchiban taneꞌn yi incaꞌwl yi walnak, stzun Kataj bantz tetz Josué.
Yi ẍchojoꞌnil yi til Acán
16 Itzun bantz, le junt eklok. Chin jalchan cunin tzun cꞌaseꞌn Josué. Nintzun ben mantartz tan iꞌ tan chichakleꞌn yi eꞌ tanum. Yi cyuleꞌn, nintzun eꞌ baj cuꞌn jatxol yi jujun kꞌuꞌj eꞌ. Jeꞌn tzun xtxaꞌol Kataj yi jun kꞌuꞌj xonl Judá. 17 Chisajeꞌn tzun ẍchakol Josué yi jun kꞌuꞌj xonl Judájaꞌtz, nin ẍchixoꞌl yi eꞌaꞌtz, nin jeꞌ xtxaꞌol Kataj yi jun kꞌuꞌj eꞌ tu Zera, nin ẍchixoꞌl yi eꞌaꞌtz, nin jeꞌ xtxaꞌol yi najal Zabdi. 18 Cyoponeꞌn tzun cyakil najal Zabdi, nin ẍchixoꞌl yi eꞌaꞌtz txꞌamxij Acán, yi cyꞌajl Carmi. Yi Carmi iꞌ cyꞌajl Zabdi, nin yi Zabdi, iꞌ cyꞌajl Zera. Cyakil yi eꞌaꞌtz, eꞌ cuꞌn xonl Judá.
19 Nintzun ben tlol Josué tetz Acán:
—Ma jaluꞌ yaj, alaj yi mero bintzi swetz. Quil tzajuẍ awib swutz Kataj, yi kaRyosil yi oꞌ xonl Israel. Alaj swetz yi mbi ncuꞌ anucꞌul. Nin quil tzawew tzinwutz, stzun Josué tetz Acán.
20 Tlol tzun Acán yi mero bintzi:
—Bintzi taꞌ, ja injuch wil swutz Kataj yi kaRyosil. Na je mmimbaneꞌj: 21 Yi koponeꞌn Jericó, nin wil jun balaj xbuꞌk yi choꞌn sajnak Babilonia, nintzun saj wucyꞌaltz. Nchaꞌtz saj wucyꞌal cob cient piẍ sakal tu jun chin lepaj oro, at loꞌ jun liwr talal. Na nin el quen walmaꞌ teꞌj,c chaꞌstzun te sajeꞌn wucyꞌaltz. Choꞌn tzun cweꞌn inmukul xe inmantial tan teweꞌn, stzun Acán tetz Josué.
22 Chibeneꞌn tzun ẍchakol Josué cobox chakum tan tilweꞌn le mantial Acán. Lajkeꞌl nintzun eꞌ beneꞌntz tan tilweꞌn. Nin choꞌn nin jaleꞌntz cyakꞌun. Choꞌn mukij yi balaj xbuꞌkaꞌtz nicyꞌal yi mantial, nin choꞌn at cyen yi sakal tu yi oro tzakꞌ yi balaj xbuꞌkaꞌtz. 23 Yi jeꞌn tzaj quicyꞌal yi eꞌchk takleꞌnaꞌtz yi ewaꞌn xe yi mantial, nintzun saj chicyꞌal swutz Josué nin ẍchiwutz yi eꞌ mas xonl Israel. Nin ben chicyꞌal swutz Kataj Ryos. 24 Cawuneꞌnin tzun Josué scyetz cyakil yi xonl Israel tan chibeneꞌn tan stzꞌamleꞌn Acán, nin ben chicyꞌaltz tuml yi sakal, tu yi mant tu yi jun piẍ oro. Nchaꞌtz eꞌ txꞌamxij yi eꞌ cyꞌajl, scyuchꞌ yi eꞌ meꞌl, scyuchꞌ cyakil yi eꞌ tawun, yi eꞌ wacẍ, ẍchej, cneruꞌ, tu cyakil yi tetz mantial kale najlcheꞌt. Nintzun ben quicyꞌaltz le tal jocoꞌj yi na biꞌaj Acor.d
25 Yi cyoponeꞌn Acor, nintzun ben tlol Josué-tz tetz Acán:
—Yaj, ¿nxac mawakꞌ bis sketz? Ma jaluꞌ, stkꞌeꞌ Kataj yi acaws, stzun Josué tetz.
Cyoqueꞌn tzun cyakil yi eꞌ xonl Israel tan chibiyleꞌn cuꞌn Acán tan cꞌub. Yi wiꞌt chiloꞌoneꞌn nintzun eꞌ octz tan stzꞌeꞌseꞌn yi chiwankil. 26 Ej nin tibaj kale eꞌ tzꞌeꞌt nintzun jeꞌ tenuꞌn jun cꞌoloj cꞌub. Iẍnin atit yi cꞌubaꞌtz jaluꞌ. Chaꞌstzun te toqueꞌn yi biꞌ yi jun tal jocoꞌjaꞌtz tetz Acor, yi na elepont: “Sotzaj cꞌuꞌlal”. Nin yi amaꞌlaꞌtz, iteꞌn nin biꞌaꞌtz jaluꞌ. Ej nin tan yi xtxolbilaꞌtz, quiꞌt nchiꞌch mas cꞌuꞌl Ryos scyeꞌj yi eꞌ xonl Israel.