Josué 6

Yi cweꞌn wocꞌ yi tnum Jericó

1 Ej itzun yi tnum Jericó, nin jopxij cyakil yi eꞌchk sawanil, tan yi xoꞌw yi eꞌ ban yi eꞌ wunak scyetz yi eꞌ xonl Israel. Cyaꞌl nintzun jun akꞌlij amaꞌl tetz tan toqueꞌn nka tan teleꞌn tul yi jun tnumaꞌtz. 2 Itzun tal Kataj Ryos tetz Josué: “Bit tzaj Josué. Ja bixeꞌ waꞌn, yi cxcyekwok scyeꞌj yi eꞌ aj Jericó, tuml yi chireyil, scyuchꞌ cyakil yi eꞌ sanlar. 3 Poro je yi tajweꞌn tan ibnolwokeꞌj: Tajweꞌn tan chixoneꞌn yi eꞌ isanlar solteꞌj yi tnum Jericó, jun tir le jun kꞌej, tetz kak kꞌej. 4 Baꞌn chibajxij juk paleꞌ swutz yi caẍaꞌ, nin baꞌn chicyꞌajnin juk curnet yi banij tan tucꞌ cneꞌr. Ma le jukiꞌn kꞌej, tajweꞌn tan chixoꞌmbel juk tir solteꞌj yi tnum. Nin baꞌn choꞌc yi eꞌ paleꞌ tan tocseꞌn yi eꞌchk curnetaꞌtz. 5 Yil tzibitwok yil chitxꞌixpuj kulil yi curnet, tajweꞌn tan iẍchꞌineꞌn icyakil cuꞌn. Nin junit tzꞌan iwiꞌ. Ej, nin tan yi xtxolbilaꞌtz, copon wocꞌ yi tapijil yi tnum. Sbejnin tzun cxoꞌcwoktz tul yi tnum tan chibiyleꞌn cuꞌn cyakil yi eꞌ yi ateꞌ-tz,” stzun Ryos bantz tetz Josué.

6 Toqueꞌn tzun Josué tan chimolcheꞌn yi eꞌ paleꞌ, i tzun taltz scyetz: “Chicyꞌajninuꞌ yi caẍaꞌ kale atiteꞌt yi caꞌwl Kataj. Nin baꞌn chibajxij juk paleꞌ swutz yi caẍaꞌ, yi cyꞌaꞌn jujun curnet cyaꞌn yi banij tan tucꞌ cneꞌr, swutz yi caẍaꞌaꞌtz.” 7 Nintzun cawun nin scyetz cyakil yi eꞌ wunak tan chixoneꞌn solteꞌj yi tnum. Ma yi eꞌ sanlar, tajweꞌn tan chibajxeꞌn swutz yi caẍaꞌ.

8 Inin tzun cyulejaꞌtz chi tal Josué scyetz. Eꞌ bajxeꞌn cuꞌn tzun yi juk paleꞌaꞌtz, yi na chitzan tan tocseꞌn yi eꞌchk curnet swutz yi caẍaꞌ tetz Kataj. 9 Nin ẍchiwutz yi eꞌ paleꞌaꞌtz, bajxcheꞌ yi eꞌ sanlar yi cyꞌaꞌn len chimaꞌcl cyaꞌn tetz oyintziꞌ. Nin at jun kꞌuꞌj yi cyꞌaꞌn chimaꞌcl cyaꞌn yi choꞌn xomcheꞌ nin wutz coc yi caẍaꞌ. Inti yi juk paleꞌ, qui na chitaneꞌ tan tocseꞌn yi eꞌchk curnetaꞌtz. 10 Nsken tzun tal Josué yi xtxolbileꞌj scyetz cyakil yi eꞌ wunak: “Yi eꞌ cyeruꞌ, quil chiẍchꞌinuꞌ, nin quil chijilonuꞌ. Jalen cuꞌn yil wal scyeruꞌ, baꞌn tzun chiẍchꞌinuꞌ tetz cuꞌn chiwaloruꞌ.”

11 Inin tzun tulej Josué-tz, quib yi tal Ryos. Na nin eꞌ ben tan takꞌleꞌn jun welt solteꞌj yi tnum Jericó. Nin ben quicyꞌal yi caẍaꞌ. Te yi cyakꞌol yi jun weltaꞌtz, taꞌsteꞌnin eꞌ pakxeꞌt kale na chiwiteꞌt. Nin choꞌn ticyꞌeꞌn akꞌbaltz cyaꞌn. 12-13 Ma le junt eklok, jalchan cuꞌn tzun chicꞌaseꞌntz. Nintzun ben chicyꞌal yi eꞌ paleꞌ yi caẍaꞌ tan takꞌleꞌn junt welt solteꞌj yi tnum. Nchaꞌtz eꞌ ban yi juk paleꞌ yi cyꞌaꞌn eꞌchk curnet cyaꞌn. Nintzun eꞌ bajx cuꞌntz swutz yi caẍaꞌaꞌtz. Nchaꞌtz at sanlar yi bajxcheꞌ, nin at sanlar yi xomcheꞌ nin wutz coc yi caẍaꞌ. Inti yi eꞌ paleꞌ, qui na chitaneꞌ tan tocseꞌn yi eꞌchk curnetaꞌtz. 14 Iteꞌn nin eꞌ bantz te yi caꞌp kꞌej, chi eꞌ ban te yi bajx kꞌej, nin eꞌ pakxijt kale ateꞌt. Yaꞌtz eꞌ bantz tetz kak kꞌej.

15 Ma le jukiꞌn kꞌej jalchan cunin tzun eꞌ cꞌaseꞌntz. Nintzun eꞌ bentz tan xoꞌn solteꞌj yi tnum. Poro te yi jukiꞌn kꞌejaꞌtz juk tir eꞌ bantz tan xoꞌn solteꞌj yi tnum. 16 Itzun te yi toqueꞌn yi curnet le jukiꞌn tir, nintzun cawun nin Josué scyetz cyakil yi eꞌ sanlar: “Chiẍchꞌinkuꞌ, na ja wiꞌt takꞌ Kataj yi tnumeꞌj sketz. 17 Nin ja cawun yi tajweꞌn tan cweꞌn kaxitul cyakil yi mbi cuꞌn at tnum. Nin quiꞌc jun takleꞌn nink clax quen kaꞌn, na yaꞌstzun yol Kataj swetz. Ntin cuꞌn Rahab yi wiꞌtz bnol tetz sclaxok, scyuchꞌ cyakil yi eꞌ yi ateꞌ xe yi tetz caꞌl, na ja oc iꞌ tan cyeweꞌn yi cob xkꞌukwil yi ja chuꞌlak tan tilweꞌn yi tnumeꞌj. 18 Chiqꞌuicyꞌlej bin quibuꞌ te yi eꞌchk takleꞌn yi at tnum na cyꞌaꞌn ilcꞌol taꞌn. Quil chimacuꞌ, nin quiꞌc cuj tan beneꞌn chicyꞌaluꞌ jun takleꞌn. Na qui na kaj tzꞌopon jun eꞌchk takleꞌn skaxoꞌl yi at ilcꞌol teꞌj. Kol katzꞌameꞌn, tzꞌul kacaws tan Ryos, nin tzꞌul sotzaj cꞌuꞌlal skawutz kacyakil cuꞌn. 19 Poro cyakil yi oro, tu sakal, tu brons nin yi eꞌchk takleꞌn yi chꞌichꞌ cuꞌn, baꞌn chicyꞌaj tzajuꞌ tan kakꞌol tetz Kataj. Tajweꞌn tzꞌopon cyanuꞌ le amaꞌl kale na molxeꞌt yi pwok yi na xcon xe caꞌl Kataj,” stzun Josué bantz scyetz cyakil yi eꞌ xonl Israel.

20 Yi toqueꞌn yi eꞌchk curnet, ja chiẍchꞌin cyakil yi eꞌ xonl Israel tetz cuꞌn chiwalor. Cweꞌn tzun wocꞌ yi tapij yi at solteꞌj yi tnum Jericó. Ma yi cweꞌn wocꞌ, sbejnin cyoqueꞌn len yi eꞌ xonl Israel le tnum. 21 Tircunin tzun chiquimeꞌn yi eꞌ aj Jericó tan spar. Yi eꞌ yaj, yi eꞌ xnaꞌn, yi eꞌ wutzileꞌn tijl cꞌuꞌlal, nin yi eꞌ xicy, tircuꞌn chiquimeꞌn. Nchaꞌtz ban cyakil yi cyawun, yi chiwacẍ, yi chicneruꞌ, tu chiburuꞌ. Tircuꞌn chiquimeꞌn.

22 Ma Josué, nin ben tlol scyetz yi cob xkꞌukwil yi eꞌ ulak tan tilweꞌn yi tnum. “Or quibeneꞌnk tan telseꞌn tzaj yi xnaꞌn yi wiꞌtz bnol tetz, scyuchꞌ yi eꞌ mas xonl iꞌ, chi mmisukwok tetz,” stzun Josué bantz scyetz. 23 Chibeneꞌn tzuntz tan cyelseneꞌl tzaj. El tzaj Rahab cyaꞌn tu yi taj xtxuꞌ, tu yi eꞌ titzꞌun, scyuchꞌ cyakil yi eꞌ mas xonl yi ateꞌ xe tetz caꞌl. Choꞌn tzun cyoponeꞌn cyaꞌn tul jun amaꞌl, nakaꞌjil kale ateꞌt yi eꞌ mas xonl Israel. 24 Toqueꞌn tzun kꞌaꞌkl cyakil yi tnum cyaꞌn. Tircuꞌn yi at tul yi tnumaꞌtz ja tzꞌeꞌ. Ntin cuꞌn yi oro, tu eꞌchk maꞌcl yi banij tan brons, tu chꞌichꞌ, qui tzꞌeꞌ cyaꞌn. Ma na saj quicyꞌal kale colijeꞌt cyakil yi eꞌchk takleꞌn yi na xcon tetz Kataj. 25 Ma tetz Rahab tu yi eꞌ taj, scyuchꞌ yi eꞌ mas xonl iꞌ, eꞌ clax tan Josué. Eꞌ clax tantuꞌ yi tewal Rahab yi cob xkꞌukwil yi ẍchaꞌkeꞌn tan xkꞌukeꞌn yi tnum Jericó. Chaꞌstzun te at xonl Rahab skaxoꞌl yi oꞌ xonl Israel jaluꞌ.

26 Itzun bantz, bixeꞌ jun xtxolbil tan Josué: “Alchok scyetz yil tzꞌoc tan xtxicbajeꞌn yi tnumeꞌj, stzꞌakꞌlok caws tan Ryos, na squimok yi bajx cyꞌajl, yi yaj yil tzꞌoc tan cuꞌseꞌn xeꞌ yi tnumeꞌj, nin squimok yi ẍchꞌiꞌp, yil tzꞌoc tan tocseꞌn eꞌchk sawanil,” stzun Josué bantz.

27 Tan cyakil yi mbajij te yi tnum Jericó, ja lajluchax yi xomij Kataj te Josué. Nin ben loꞌon yi stziblal iꞌ beneꞌn tziꞌn Canaán.