Yi cyaꞌteꞌn yi eꞌ xonl Israel Gilgal
5
1 Itzun bantz, yi quibital yi eꞌ wiꞌtz cyajcawil yi eꞌ amorreo yi ateꞌ jalajicyꞌ tzaj yi aꞌ Jordán, nintzun eꞌ xobtz. Nchaꞌtz eꞌ ban yi eꞌ wiꞌtz cyajcawil yi eꞌ aj Canaán yi najlcheꞌ nakaꞌjil yi mar Mediterráneo. Na nin quibit, yi ẍeꞌn cunin ban Kataj tan cabseꞌn cuꞌn yi aꞌ Jordán, yi quicyꞌeꞌn tzaj yi eꞌ xonl Israel tibaj. Quiꞌct nintzun oc cyajaltz tan makleꞌn chiwutz na wiꞌnin chixobeꞌn scyetz.2 Ej, iteꞌn nin tiempaꞌtz yi tlol Kataj tetz Josué: “Banaj cobox cꞌub yi chin cchiluꞌ nin tzꞌan wiꞌ. Nin banweꞌ circuncidar junt tir yi eꞌ xonl Israel yi qui banij cheꞌ circuncidar.”
3 Inin tzun tulej Josué-tz. Toqueꞌn tzun iꞌ-tz tan banleꞌn cobox cꞌubaꞌtz. Nintzun octz tan chibanleꞌn circuncidara yi eꞌ yaj wi juꞌwtz Aralot. 4 Oc Josué tan chibanleꞌn circuncidar, na cyakil yi eꞌ yaj yi nsken tzꞌak chiyob yi cyeleꞌn tzaj Egipto, nsken chiquim le amaꞌl tzꞌinunin tuꞌ. 5 Na cyakil yi eꞌaꞌtz yi eꞌ el tzaj Egipto banijcheꞌ circuncidar, poro nsken chiquim. Ma yi eꞌ yi eꞌ itzꞌij te yi caꞌwunak yob, yi eꞌaꞌtz yi nchixon le amaꞌl tzꞌinunin tuꞌ, qui banijcheꞌ circuncidar. 6 Eꞌ xon caꞌwunak yob le amaꞌlaꞌtz tzꞌinunin tuꞌ tan paj yi quinin chiban taneꞌn yi tajbil Ryos. Nin choꞌn eꞌ quimeꞌn cyakil yi eꞌ yi nsken tzꞌak chiyob yi cyeleꞌn tzaj Egipto. Yaꞌstzun ntulej Ryos tan qui quilol wutz yi balaj amaꞌlb yi suk iꞌ scyetz chimam chiteꞌ. 7 Ma yi chicyꞌajl yi eꞌaꞌtz, yaꞌstzun yi oc Josué tan chibanleꞌn circuncidar. Na choꞌn quitzꞌeꞌn cyeraꞌtz tbeꞌ. Nin yaꞌstzun chixel yi eꞌ yi banijcheꞌ circuncidar yi nsken chiquim.c 8 Yi chibajeꞌn circuncidar chicyakil yi yajaꞌtz. Taꞌsteꞌnin eꞌ cyajeꞌt cyentz jalen cuꞌn yi tuleꞌn yos scyuchꞌ. 9 Tlol tzun junt tir Kataj tetz Josué: “Te yi jun xtxolbileꞌj yi mmaban, quiꞌt tzꞌel itxꞌix ẍchiwutz yi eꞌ aj Egipto.” Chaꞌstzun te toqueꞌn quen biꞌ yi jun amaꞌlaꞌtz tetz Gilgal.d Iteꞌn nin biꞌaꞌtz yi amaꞌl jaluꞌ.
10 Choꞌn tzun cweꞌn chicampament tetz cobox kꞌej, yi eꞌ xonl Israelaꞌtz le amaꞌl Gilgal yi at ẍkꞌajlaj cwent Jericó. Itzun yi cweꞌn kꞌej te yi cyajlaj tajlal yi xawaꞌtz, nintzun eꞌ ban taneꞌn yi Pasc.e 11 Baj pam cyaꞌn yi quiꞌc xtxꞌamil tu ixiꞌn triw yi woyiꞌn. Ma le junt eklok, baj wutz yi cojbil yi at Canaán cyaꞌn. 12 Jetzaꞌtz tzun quiꞌt baj yi manáf cyaꞌn. Na i yi wutz yi cojbil yi at Canaán, yaꞌstzun baj cyaꞌn.
13 Itzun bantz, te yi at Josué nakaꞌjil Jericó, nintzun ẍchaj tib jun yaj yi aj oyintzinl swutz iꞌ, yi cyꞌaꞌn jun spar taꞌn le kꞌab. Beneꞌn tzun ẍkansal tib Josué nin ben jakol tetz:
—¿Iluꞌ peꞌ kacontr, nka choꞌn xomij wiꞌuꞌ skeꞌj?
14 —Cyaꞌl xomijeꞌt wetz inwiꞌ teꞌj. Na yi in wetz in yi wiꞌtz cyajcawil yi eꞌ sanlar cwent Ryos, stzun yi junaꞌtz ban.
Cweꞌn tzun joklok Josué-tz jalen cuꞌn yi cweꞌn poneꞌn yi wutz wuxtxꞌotxꞌ. Nintzun ben jakoltz tetz yi jun Sanlaraꞌtz:
—¿Mbiꞌtz tajweꞌn tan imbnol taꞌ, na in ẍchakumuꞌ? ¿Mbi nsaj tlol Wajcaw teruꞌ?
15 —Ma jaluꞌ Josué, cyꞌajweꞌ len yi axajab, na yi amaꞌl kale txicl quiẍeꞌt, chin xan nin, stzun yi jun wiꞌtz Ajcawaꞌtz bantz tetz Josué.
Inin tzun tulej Josuéjaꞌtz, quib yi aꞌlchij tetz.