Yi jeꞌn tzaj yi coblaj cꞌub le xoꞌmbil aꞌ
4
1 Itzun bantz, yi chibajeꞌnicyꞌ tzaj cyakil yi eꞌ xonl Israel wi aꞌ Jordán. Nintzun tal Katajtz tetz Josué: 2 “Txaꞌweꞌeꞌn coblaj yaj. Txaꞌeꞌn jun te jujun kꞌuꞌj xonl Israel. 3 Nin alaj scyetz tan chibeneꞌn tan jeꞌseꞌn tzaj jun cꞌub te jujun le xoꞌmbil aꞌ. Nin choꞌn ljeꞌ tzaj cyaꞌn kale txiclcheꞌt yi eꞌ paleꞌ yi palol tetz yi caẍaꞌ. Nin cyꞌajwoknin, kale cxcyaj cyentwok jaluꞌ, nin banwok jun muyc teꞌj,” stzun Kataj bantz tetz Josué.4 Inin tzun tulej Josué-tz quib yi aꞌlchij tetz. Chijeꞌn tzun xtxaꞌol coblaj yaj, jun te jujun kꞌuꞌj xonl Israel. 5 Nin ben tloltz scyetz: “Quibeneꞌnkwok nicyꞌal yi xoꞌmbil aꞌ kale txiclcheꞌt yi eꞌ paleꞌ tu yi caẍaꞌ, kale atit yi caꞌwl Kataj. Nin palwok tzaj jujun cꞌub te jujun. Xomok cyen tuꞌ tajlal te coblaj kꞌuꞌj oꞌ yi oꞌ xonl kamam Israel. 6 Yi coblaj cꞌubaꞌtz xconk sketz tan banleꞌn jun muyc tetz jun techla sbneꞌ opon tunintz. Nin tzantzaj yil chijak yi eꞌ kanitxaꞌ yi mbi na elepont yi jun muycaꞌtz, 7 baꞌn tzun kaltz scyetz: ‘Yi muyqueꞌj na ẍchaj yi ẍeꞌn ban yi kicyꞌeꞌn tzaj wi aꞌ Jordán. Bajx ticyꞌeꞌn tzaj yi caẍaꞌ. Ma ticyꞌeꞌn tzaj, nintzun cuꞌ jatxol tib yi aꞌ. Yaꞌstzun xac yi coblaj cꞌubaꞌtz tan tuleꞌn txꞌakx tkacꞌuꞌl yi ẍeꞌn cunin ban yi kicyꞌeꞌn tzaj wi aꞌ Jordán,’ koꞌch sbneꞌ,” stzun Josué bantz scyetz.
8 I nintzun cyulejaꞌtz, quib yi tal Josué scyetz. Nintzun jeꞌ tzaj chicyꞌal coblaj cꞌub le xoꞌmbil aꞌ. Jujun cꞌub te jujun kꞌuꞌj xonl Israel. Nintzun ben quicyꞌaltz kale atit chicampament. Nin cuꞌ chiwekoltz, chi tal Kataj tetz Josué. 9 Poro te yi ntaxk chicyꞌ tzi aꞌ Jordán, nintzun oc Josué tan wekleꞌn junt muyc tan coblajt cꞌub, le xoꞌmbil aꞌ kale eꞌ xcyeꞌ cuꞌnt yi eꞌ paleꞌ tu yi caẍaꞌ. Nin iẍnin wekijeꞌt yi cꞌubaꞌtz jaluꞌ.
10 Ma yi eꞌ paleꞌaꞌtz yi qꞌuil tetz yi caẍaꞌ, eꞌ cyaj cyentz le xoꞌmbil aꞌ, jalen yi quicyꞌeꞌn tzaj yi eꞌ mas xonl Israel, quib yi talnak Kataj tetz Josué. Bnix cyakil cyakꞌun quib yi tal Moisés tetz Josué. Ej nin lajkeꞌl nin quicyꞌeꞌn tzajtz. 11 Yi chibajeꞌnicyꞌ tzaj, kalenaꞌs tzun quicyꞌeꞌn tzaj yi eꞌ paleꞌ tu yi caẍaꞌ. Nintzun eꞌ cuꞌ-t bajxok ẍchiwutz yi eꞌ xonl Israel. 12 Nchaꞌtz yi eꞌ xonl Rubén, scyuchꞌ yi eꞌ xonl Gad, nin yi junt kꞌuꞌj xonl Manasés, eꞌ bajx cuꞌntz tan quichꞌeyeꞌn yi eꞌ mas chixonl, chi yi talnak Moisés scyetz. Ej nin cyꞌaꞌn len chimaꞌcl cyaꞌn tetz oyintziꞌ yi chibeneꞌn tan quichꞌeyeꞌn yi chixonl. 13 At loꞌ caꞌwunak mil chixoneꞌn yi eꞌaꞌtz yi list quitaneꞌn tan oyintziꞌ, nin choꞌn bajxcheꞌ swutz yi caẍaꞌ tetz Kataj. Choꞌn tzun cyoponeꞌntz wi ẍkꞌajlaj nakaꞌjil Jericó. 14 Te yi tiempaꞌtz, jaleꞌn nintzun ban mas kꞌej Josué ẍchiwutz yi xonl Israel tan Kataj. Cyek ẍchiꞌ Josué, chi eꞌ ban tan tekeꞌn ẍchiꞌ Moisés yi itzꞌ tzaj iꞌ.
15 Ma yi quicyꞌeꞌn tzaj cyakil yi eꞌ xonl Israel jalajicyꞌ tzaj yi aꞌ Jordán, nintzun tal Kataj tetz Josué: 16 “Alaj scyetz yi eꞌ paleꞌ tan chijeꞌn tzaj tkambil aꞌ tu yi caẍaꞌ tetz yi trat.”
17 Cawuneꞌnin tzun Josué scyetz yi eꞌ paleꞌaꞌtz tan chijeꞌn tzaj. 18 Itzun bantz, yi chijeꞌn tzaj yi eꞌ paleꞌ, nintzun xeꞌtij junt tir yi aꞌ tan xoꞌn le xoꞌmbil.
19 Le lajuj tajlal yi bajx xawb tetz yi yob, yaꞌstzun yi quicyꞌeꞌn yi eꞌ xonl Israel wi aꞌ Jordán. Choꞌn tzun bnixeꞌn chicampament le amaꞌl Gilgal yi at swutzeꞌl tzaj Jericó. 20 Nin choꞌn jeꞌn wekol Josué yi coblaj cꞌubaꞌtz yi saj quicyꞌal le xoꞌmbil aꞌ Jordán.
21 Yi wiꞌt bnixeꞌn, nintzun tal scyetz cyakil yi eꞌ tanum: “Yil chijak yi kanitxaꞌ tzantzaj yi mbi na elepont yi cobox cꞌubeꞌj, 22 baꞌn tzun kal scyetz yi ẍeꞌn cuꞌn ban yi kicyꞌeꞌn tzaj wi aꞌ Jordán. 23 Nin baꞌn katxol scyetz yi ẍeꞌn cuꞌn makxeꞌn yi tzanlaꞌ tan Kataj yi kicyꞌeꞌn tzaj, chi banak iꞌ scyeꞌj kamam kateꞌ yi quicyꞌeꞌn tzaj wi Cyak Mar. 24 Nin tan yi xtxolbilaꞌseꞌj, tzꞌelpon chitxum cyakil yi eꞌ wunak yi ateꞌ beneꞌn tziꞌn wi munt te yi ẍchamil yi ketz Kataj. Tajweꞌn bin tan kakꞌol kꞌej iꞌ sbneꞌ opon tunintz,” stzun Josué bantz scyetz cyakil yi eꞌ tanum.