Yi quicyꞌeꞌn yi eꞌ xonl Israel wi aꞌ Jordán
3
1 Itzun bantz le junt eklok, chin jalchan cunin tzun eꞌ baj cꞌaseꞌn Josué scyuchꞌ cyakil yi eꞌ xonl Israel. Nintzun eꞌ icyꞌtz swutz yi amaꞌl Sitim. Choꞌn tzun cyoponeꞌntz stziꞌ aꞌ Jordán, kale eꞌ cyaj cyent tetz ox kꞌej.2 Ej nin yi ticyꞌeꞌn yi ox kꞌejaꞌtz, nintzun eꞌ ben yi chibajxom tan talcheꞌn yi caꞌwleꞌj scyetz:
3 “Yil quilninuꞌ yil tzꞌicyꞌ yi caẍaꞌ kale atit yi quiwel yol Kataj yi kaRyosil, baꞌn chixomninuꞌ wutz coc. Na tzꞌicyꞌpon chicyꞌal yi eꞌ paleꞌ yi eꞌ xonl Leví.
4 ”Tajweꞌn chixomninuꞌ wutz coc yi caẍaꞌaꞌtz na qui cyajskeꞌnuꞌ yi beꞌ kalel kicyꞌeꞌt. Poro quiꞌc rmeril tan cyocomponuꞌ mero wutz coc yi caẍaꞌ. Ma na tajweꞌn tan cyajeꞌn cyen jun kilómetroa ẍchixoꞌluꞌ tu yi caẍaꞌaꞌtz.”
5 Nchaꞌtz tal Josué yi xtxolbileꞌj scyetz yi eꞌ tanum: “Chixanseꞌ quibuꞌ, na ek, ẍchajeꞌ Kataj jun chin milawr skawutz.”
6 Nchaꞌtz tal iꞌ scyetz yi eꞌ paleꞌ: “Chipalninuꞌ yi caẍaꞌ, nin baꞌn chicyꞌuꞌ wi aꞌ. Chibajxokuꞌ ẍchiwutz yi eꞌ mas katanum,” stzun Josué.
Yaꞌtz nintzun cyulejtz, nin ben chipalol yi caẍaꞌ. Nin eꞌ bajx cuꞌntz ẍchiwutz yi eꞌ mas xonl Israel.
7 Tlol tzun Kataj tetz Josué: “I bin jaluꞌ Josué, sbneꞌ opon tunintz sjalok mas akꞌej waꞌn ẍchiwutz yi atanum. Nin tzꞌelepon chitxum tetz yi xomchin tzaweꞌj, chi banakin te Moisés. 8 Nchaꞌtz, baꞌn ẍcawunin scyetz yi eꞌ paleꞌ yi palol tetz yi caẍaꞌ. Alaj scyetz yil chopon tzi aꞌ Jordán, tajweꞌn tan chixcyeweꞌn cuꞌn xe aꞌ,” stzun Kataj bantz tetz Josué.
9 Beneꞌn tzun tlol Josué scyetz yi eꞌ tanum: “Chisajkuꞌ tan tbiteꞌn yi yol Kataj yi kaRyosil yi swaleꞌ scyeruꞌ. 10 Yil chibenuꞌ ẍchiwutzuꞌ, tzꞌelepon chitxumuꞌ tetz yi bajxij yi kaRyosil skawutz, yi kaRyosil yi itzꞌ nin tetz. Na tzꞌocopon iꞌ tan chilajeꞌn len cyakil yi eꞌ aj Canaán swutzak chiꞌamaꞌl, yi eꞌ hitita, scyuchꞌ yi eꞌ heveo, scyuchꞌ yi eꞌ ferezeo, scyuchꞌ yi eꞌ gergeseo, scyuchꞌ yi eꞌ amorreo, scyuchꞌ yi eꞌ jebuseo. 11 Tzꞌelepon chitxumuꞌ tetz yi xomij Kataj yi kaRyosil skeꞌj, yil quiluꞌ yil bajxij yi caẍaꞌ skawutz yi jun caẍaꞌaꞌtz kale atit yi quiwel yi yol iꞌ. Yi jun Kataj aꞌtz iꞌ taw cyakil amaꞌl beneꞌn tziꞌn wi munt.
12 ”Ma jaluꞌ, tajweꞌn chisicyꞌeꞌnuꞌ coblaj yaj ẍchixoꞌluꞌ. Jun te jujun kꞌuꞌj xonl Israel. 13 Na yil copon yi quikan yi eꞌ paleꞌ yi cyꞌanl tetz yi caẍaꞌaꞌtz xe aꞌ, copon jatxol tib yi aꞌ ẍchuc. Nin stanek yi aꞌ yi na eluꞌl, nin smoleꞌ tib,” stzun Josué bantz.
14 Icyꞌeꞌn tzaj nintzun eꞌ ban yi eꞌ xonl Israel swutz yi amaꞌl kale ateꞌt. Nin eꞌ bajx cuꞌn yi eꞌ paleꞌ yi palol tetz yi caẍaꞌ. 15 Yi cyuleꞌn stziꞌ aꞌ Jordán, nintzun eꞌ bajx cuꞌn yi eꞌ paleꞌ yi qꞌuil tetz yi caẍaꞌ xe aꞌ. (Te yi tiempaꞌtz nim teꞌj yi aꞌ na iꞌtz kꞌalaj.) 16 Yi chicweꞌn poneꞌn xe aꞌ nintzun cuꞌ cabsal tib yi aꞌ yi na eluꞌl. Tircuꞌn cweꞌn makol tib jalen le tnum Adán, yi at nakaꞌjil yi amaꞌl Saretán. Ma yi aꞌ yi sken wiꞌt el, choꞌn stzajeꞌn pon le yi mar yi chin cꞌaꞌ nin tan atzꞌum nka yi Mar Muerto. Yaꞌstzun bantz yi cweꞌn jatxol tib yi aꞌ Jordán, nin yi quicyꞌeꞌn tzaj yi eꞌ xonl Israel. Choꞌn tzun quicyꞌeꞌn tzaj swutz yi tnum Jericó.
17 Ma yi eꞌ paleꞌ yi qꞌuil tetz yi caẍaꞌ choꞌn eꞌ cweꞌn txiclok nicyꞌal yi tkambeꞌn aꞌ yi nsken skej. Choꞌn eꞌ cyajeꞌn cyentz, jalen cuꞌn quicyꞌeꞌn tzaj cyakil yi eꞌ xonl Israel jalajicyꞌ tzaj. Skejenleꞌn tzun yi amaꞌl kale eꞌ icyꞌ tzit yi xonl Israel.