Yi chibeneꞌn ẍchakol Josué cob xkꞌukwil tan tilweꞌn Jericó
2
1 Itzun bantz, te yi ateꞌ yi eꞌ xonl Israel le amaꞌl Sitim, nintzun eꞌ ben ẍchakol Josué cob xkꞌukwil. Te yi ntaxk chiben, nintzun tal scyetz: “Quibeneꞌnk tan tilweꞌn ẍeꞌn taneꞌn yi tnum Jericó, tuml yi eꞌchk amaꞌl yi at cwent,” stzun iꞌ bantz.Yi chibeneꞌn tan tilweꞌn eꞌchk amaꞌlaꞌtz choꞌn tzun cyoponeꞌntz xe caꞌl jun xnaꞌn yi wiꞌtz bnol tetz yi na biꞌaj Rahab,a yi najlij Jericó. Yaꞌstzun eꞌ cyaj cyent te yi jun akꞌbalaꞌtz. 2 Poro at tzun jun opon tan talcheꞌn stziblal tetz yi rey yi at Jericó. Nin je yol iꞌeꞌj:
—Te yi akaleꞌneꞌj at eꞌ xonl Israel yi ja chuꞌl tan xkꞌukeꞌn yi katnumil, cheꞌch bantz.
3 Chibeneꞌn tzun ẍchakol yi rey cobox aj mantarinl tan talcheꞌn tetz Rahab:
—Chajweꞌeꞌl tzaj yi eꞌ xonl Israel yi nchoꞌc xe acaꞌl. Na ja chuꞌl tan xkꞌukeꞌn yi kaꞌamaꞌl, cheꞌch yi eꞌ aj mantarinlaꞌtz.
4 Poro yi xnaꞌn nsken cheꞌ tew yi cob yajaꞌtz. Sajeꞌn tzun tlol yi xnaꞌn scyetz yi eꞌ aj mantarinlaꞌtz:
—Bintzinin, ja chuꞌlak cob yaj swuchꞌ, poro quinin mmeꞌl intxum tetz yi naꞌ nchisajeꞌt. 5 Akaleꞌnt cuntuꞌ ncheꞌl, te yi ntaxk jopxij yi eꞌchk sawan. Nchaꞌtz qui na wil aloꞌ nchaꞌjnint. Poro yi nink chiben chanuꞌ tan chitzꞌamleꞌn, ẍchitxꞌamxok cyanuꞌ, stzun Rahab ban scyetz.
6 Poro nsken cheꞌ tew iꞌ yi cob yajaꞌtz wi caꞌl. Na choꞌn cyoqueꞌntz taꞌn jakꞌ eꞌchk tkan lino yi at wi caꞌl tan skejseꞌn.
7 Chibeneꞌn tzun yi eꞌ ẍchakum rey tan chitzꞌamleꞌn kloꞌ. Choꞌn chibeneꞌn tul yi beꞌ yi na opon tzi Jordán kale na chicyꞌeꞌt wunak. Watok cunin tzun cheꞌl tzaj yi eꞌ sanlaraꞌtz yi jopxeꞌnt yi eꞌchk puertil yi tnum.
8 Itzun bantz, te yi ntaxk chiwit yi eꞌ xkꞌukwil, nintzun jeꞌ Rahab wi caꞌl tan yol scyetz. Itzun taltz:
9 —Na wocsaj yi akꞌijt yi eꞌchk amaꞌleꞌj scyeruꞌ tan yi cyeruꞌ chiRyosiluꞌ. Chaꞌstzun te wiꞌnin na kaxob scyeruꞌ. Na cyakil yi oꞌ yi najlchoꞌ tzoneꞌj, jalt nin tan kaquimeꞌn tan xoꞌw. 10 Nchaꞌtz kubitnak yi ẍeꞌn cunin skejeꞌn yi Cyak Marb ẍchiwutzuꞌ tan Ryos yi cyeleꞌn tzajuꞌ Egipto. Nin kubitnak yi mbi cuꞌn bajij scyeꞌj Sehón tu Ogc yi cob chireyil yi eꞌ amorreo yi najlcheꞌ jalajcyꞌen yi aꞌ Jordán. Ja kubit yi ja cheꞌl cuꞌn cyaꞌnuꞌ swutz.
11 ”Yi kubital yi xtxolbilaꞌtz, nintzun oꞌ bisuntz taꞌn. Cyaꞌl jun yi nink nimsaj cꞌuꞌl tan xcyeweꞌn cuꞌn ẍchiwutzuꞌ tan oyintziꞌ, na ja el katxum tetz yi cyAjcawiluꞌ, yi chiRyosiluꞌ, iꞌ taw yi tcyaꞌj tu yi wuxtxꞌotxꞌ.
12 ”Ma jaluꞌ bin, chibneꞌuꞌ jun pawor swetz, chi mimban wetz scyeꞌjuꞌ. Cyaleꞌuꞌ swetz swutz cuꞌn chiRyosiluꞌ yi quil chinquim cyanuꞌ cyuml yi eꞌ intaj scyuchꞌ yi eꞌ wutzicy yil chuꞌluꞌ tan oyintziꞌ tzoneꞌj. Ej nin cyakꞌ cyenuꞌ jun techl swetz, bantz kꞌukeweꞌn incꞌuꞌl scyeꞌjuꞌ. 13 Nchaꞌtz nink chiclax intaj tu intxuꞌ, scyuchꞌ yi eꞌ inxibin tu yi eꞌ mas wutzicy, scyuchꞌ cyakil yi eꞌ inxonl. Koꞌ chicoleꞌuꞌ bin tkꞌab quimichil, stzun Rahab bantz scyetz.
14 —Quil bisunuꞌ. Yil takꞌ Kataj yi amaꞌleꞌj sketz, skakꞌeꞌ kib tan chicolcheꞌnuꞌ, penin skꞌil cheꞌ kacoleꞌuꞌ. Poro qui na kaj yil cyaluꞌ katziblal tetz jun, cheꞌch yi cob xkꞌukwilaꞌtz bantz.
15 Yi caꞌl Rahab choꞌn at wi tapij yi at solteꞌj yi tnum Jericó. Choꞌn tzun chicweꞌn tzaj yi eꞌ xkꞌukwilaꞌtz tan Rahab te akwil. 16 Poro yi ntaxk chicuꞌ tzaj, nintzun taltz scyetz:
—Choꞌn chibenkuꞌ wiꞌwtz, bantz quil chijaluꞌ cyakꞌun yi eꞌ yi na chitzan tan chijoyleꞌnuꞌ. Cyeweꞌ quibuꞌ wiꞌwtz tetz ox kꞌej, jalen cuꞌn yil chipakxij yi eꞌ yi ncheꞌl tan chijoyleꞌnuꞌ, kalenaꞌs tzun chicyꞌajtuꞌ chibeꞌuꞌ, stzun Rahab ban scyetz.
17 Cyajeꞌn tzun cyaloltz tetz Rahab:
—Ntyoẍtuꞌ. Nkajeꞌn ketz, poro kelepon cuꞌn te kayol yi ja wiꞌt cyaj kasukil teruꞌ. 18 I bin jaluꞌ, tbit tzajuꞌ kayoleꞌj: Yil kuꞌl tzaj tan oyintziꞌ tzoneꞌj, baꞌn cꞌalquenuꞌ yi jun akwileꞌj, yi cyak yubil, te yi wentanuꞌil yi caꞌluꞌ kale kelponeꞌt. Nin baꞌn chimol quibuꞌ xe caꞌluꞌ, scyuchꞌ yi eꞌ taj xtxuꞌuꞌ, tu yi eꞌ stzicyuꞌ nin yi eꞌ xonl yi tajuꞌ. 19 Alchok scyetz yil tzꞌel solteꞌj yi caꞌluꞌ, squimok, nin quiꞌc ketz kapaj teꞌj kol quim, ma na iꞌ ajpaj teꞌj. Poro ko at jun sketz ketz yil tzꞌoc tan chibiyleꞌn yi eꞌ yi ateꞌ xe caꞌluꞌ, oꞌ tzun ajpajtz sbneꞌ. 20 Poro nchaꞌtz kol taluꞌ katziblal, quiꞌt kaban taneꞌn yi nkasuk teruꞌ, cheꞌch yi eꞌ xkꞌukwilaꞌtz bantz tetz Rahab.
21 —Baꞌn, chij Rahab.
Nintzun eꞌ jatx quibtz. Yi chicweꞌn tzaj, nintzun oc cꞌalol Rahab yi jun akwilaꞌtz te yi wentanuꞌil yi caꞌl iꞌ.
22 Inti yi eꞌ xkꞌukwilaꞌtz choꞌn chibeneꞌntz wiꞌwtz, nin choꞌn cyaꞌteꞌn tetz ox kꞌej tan ew ib xoꞌl tzeꞌ. Ma yi eꞌ sanlar yi na chitzan tan chijoyleꞌn nin eꞌ pakxij junt tir tnum na cyaꞌl eꞌ jaleꞌt. 23 Ma yi ticyꞌeꞌn yi ox kꞌejaꞌtz, nintzun eꞌ cuꞌ tzaj wiꞌwtz, nin eꞌ cyꞌajt chibeꞌ tan quicyꞌeꞌn wi aꞌ. Kalenaꞌs tzun cyoponeꞌntz te Josué.
Yi cyoponeꞌn, nin baj chitxolil tetz Josué cyakil yi eꞌchk takleꞌn yi mbajij scyeꞌj. 24 Itzun cyaltz:
—Ja wiꞌt takꞌ Kataj cyakil yi eꞌchk amaꞌl sketz, na ja kil yi wiꞌnin na chixob yi eꞌ wunak sketz.