JOSUÉ
Yi bixeweꞌn Josué tetz xel Moisés
1
1 Itzun bantz, te yi nsken quim Moisés, yi ẍchakum Ryosa, nintzun jilon Kataj Ryos tetz Josué. Yi Josuéjaꞌtz iꞌ cyꞌajl Nun, nin iꞌ ẍchꞌeyum Moisés banak. 2 Itzun tal Kataj tetz: “Ma jaluꞌ Josué, ja quim Moisés, yi inchakum. Chaꞌstzun te tajweꞌn tan abajxeꞌn cyꞌen ẍchiwutz cyakil yi eꞌ mas atanum, yi eꞌ xonl Israel, wi yi aꞌ Jordán, bantz itoponeꞌn swutz yi amaꞌl yi swakꞌeꞌ tzitetz.
3 ”Sukiꞌnt cyakil yi eꞌchk amaꞌlaꞌtz waꞌn tzitetz, chi walnak tetz Moisés.b Cyakil yi amaꞌl kale cxicyꞌeꞌtwok, itetz sbneꞌ. 4 Sukiꞌnt yi eꞌchk amaꞌlaꞌtz tzitetz,c yi na xeꞌtnin te yi amaꞌl tzꞌinunin tuꞌ jalen te yi wiꞌwtz Líbano. Ma teleꞌn tziꞌn, choꞌn na xeꞌt tzaj tzi yi jun chin wutzileꞌn tzanlaꞌ Eufrates, nin na opon jalen te yi mar Mediterráneo, kale na cweꞌt yi kꞌej. Nin na jop cyakil yi chiꞌamaꞌl yi eꞌ hitita.
5 ”Cyaꞌl jun xcyeꞌ tzaweꞌj Josué te yi cobox kꞌej yi atiẍ tzoneꞌj wuxtxꞌotxꞌ, na chinxomok tzaweꞌj, chi banakin teꞌj Moisés. Quil ẍwil cyen achuc, na ilenin chinxomok tzaweꞌj.d 6 Benk awukan ttxꞌotxꞌe nin quil cxob, na aẍ cẍocopon tan jatxleꞌn cuꞌn chiꞌamaꞌl yi eꞌ intanumeꞌj. Yi amaꞌlaꞌtz, yaꞌstzun yi sukiꞌnt waꞌn scyetz imam iteꞌ. 7 Ntin na taj yi benk awukan ttxꞌotxꞌ, nin yi quil cxob. Nqueꞌn il tan banleꞌn taneꞌn cyakil yi ley yi talnak yi inchakum Moisés tzatz. Xomen teꞌj, quib yi na tal, bantz penin skꞌil sban cyakil yi eꞌchk takleꞌn yil tzaban.
8 ”Ntin na taj yi quil tzꞌel te acꞌuꞌl, yi mbi na tal yi liwr kale atit yi wetz incaꞌwl. Skꞌejl nin lakꞌbal na taj yil tzatxum yi mbi na tal. Nin kol cxom teꞌj, penin skꞌil sbneꞌ cyakil yi tzabneꞌ.
9 ”Qui bin cxob. Benk awukan ttxꞌotxꞌ. ¡Quiwit! Quil tzacabej acꞌuꞌl, na in awAjcawil, nin in aRyosil, nin chinxomok tzaweꞌj alchok cẍaꞌjnint.”
Yi toqueꞌn Josué tetz chibajxom yi eꞌ xonl Israel
10 Toqueꞌn tzun Josué tan chicaweꞌn yi eꞌ mas ajcaw yi ateꞌ ẍchixoꞌl yi eꞌ xonl Israel.
11 Itzun taltz scyetz: “Chibenkuꞌ ẍchixoꞌl yi eꞌ katanum, nin cyaleꞌuꞌ scyetz: ‘Banwok list iwaꞌ. Na le oxt kꞌej kicyꞌpon wi aꞌ Jordán tan ketzal yi amaꞌl yi ja wiꞌt suk Kataj yi kaRyosil sketz,’ cheꞌchuꞌ sban.”
12 Nchaꞌtz jilon Josué scyetz yi eꞌ xonl Rubén, scyuchꞌ yi eꞌ xonl Gad, scyuchꞌ jun kꞌuꞌj scyeri eꞌ xonl Manasés yi cobf elnakeꞌ. 13 Itzun taltz scyetz: “Ulk txꞌakx yi yol Moisés, yi inchakum, ẍchicꞌuꞌluꞌ. Na je yol iꞌeꞌj: ‘Kataj, yi kaRyosil mmakꞌon yi amaꞌleꞌj tan cyetzaluꞌ nin tan cyaꞌteꞌnuꞌ swutz,’ chij iꞌ ban. 14 Chicyajk cyen bin yi quixkeluꞌ scyuchꞌ chinitxajiluꞌ tzoneꞌj. Nchaꞌtz yi cyawunuꞌ chicyajk cyen tzoneꞌj. Na yi amaꞌleꞌj, yi at jalajicyꞌ tzaj yi aꞌ Jordán, yaꞌstzun yi cyeruꞌ yi takꞌnak Moisés. Poro cyakil yi eꞌuꞌ yi chusij cheꞌtuꞌ tan oyintziꞌ, yi eꞌuꞌ yi qui na chixobuꞌ, baꞌn chixomuꞌ tu chimaꞌcluꞌ skeꞌj tan kuchꞌeyeꞌn. 15 Tajweꞌn tan kuchꞌeyeꞌn, jalen cuꞌn yil takꞌ Kataj ketz kaꞌamaꞌl tan kujeweꞌn swutz chi mban iꞌ tan takꞌleꞌn yi cyeruꞌ. Yil koꞌc tetz taw yi amaꞌl yi stkꞌeꞌ Kataj sketz, kalenaꞌs tzun chaꞌjt tzajuꞌ swutz chiꞌamaꞌluꞌ yi at tzoneꞌj jalajicyꞌ tzaj yi aꞌ Jordán, yi ntakꞌ Moisés yi ẍchakum Ryos scyeruꞌ,”g stzun Josué bantz scyetz.
16 “Baꞌn taꞌ, cheꞌch. Skabneꞌ cyakil yi na taluꞌ, na list oꞌ tan kabeneꞌn kale na tajwituꞌ. 17 Nin kocopon jakꞌ caꞌwluꞌ chi banakoꞌ te Moisés. Ntinaꞌtz na kaj, yi nink xom Kataj Ryos teꞌjuꞌ chi banak iꞌ te Moisés.h 18 Nchaꞌtz, alchok scyetz yi quil tzꞌoc jakꞌ caꞌwluꞌ, tajweꞌn tan quimeꞌn. Ntinaꞌtz na kaj kal teruꞌ ¡quiwit! Benk tkanuꞌ ttxꞌotxꞌ,” cheꞌch bantz tetz Josué.