Yi bixeweꞌn Moisés tetz chibajxom yi eꞌ aj Israel tan Ryos
3
1 Itzun bantz choꞌn at pon Moisés tan pstoreꞌn yi tawun Jetro yi jiꞌ iꞌ le amaꞌl tzꞌinunin tuꞌ, nakaꞌjil yi wutz tetz Ryos, yi na biꞌaj Horeb. Yi Jetro, iꞌ yi chipaleꞌila yi eꞌ aj Madián. 2 Choꞌn tzun ẍchajol tib yi ángel tetz Kataj Jehová swutz iꞌ le amaꞌlaꞌtz. Choꞌn ẍchajol tibtz tul jun wiꞌ xtxoybchej yi na tzan kꞌaꞌkl. Poro qui na tzꞌeꞌ.Yi beneꞌn tilol Moisés yi na tzan kꞌaꞌkl yi jun xtxoybchejaꞌtz, 3 toqueꞌn tzun iꞌ-tz tan xtxumleꞌn yi mbi tzuntz yi qui na tzꞌeꞌ. Nin oc ẍkansal tibtz tan xmayeꞌn yi mbi tzuntz qui na tzꞌeꞌ.
4 Itzun yi tilol Kataj Ryos yi toponeꞌn ẍkansal tib Moisés tan xmayeꞌn, nintzun jilon tzaj tetz tul yi jun wiꞌ xtxoybchejaꞌtz. Itzun taltz:
—¡Moisés, Moisés!
—¿Mbiꞌ taꞌ? Je ineꞌj, stzun Moisés ban nintz.
5 Nintzun tal Ryos tetz:
—Moisés, quil cẍkanoꞌc tzaj mas, nin cyꞌajweꞌ len yi axajab, na chin xan nin yi amaꞌl kale txicl quiẍeꞌt. 6 Na i inaꞌtz yi chiRyosil yi eꞌ amam ateꞌ, yi kꞌajtzun Abraham tu Isaac nin Jacow, stzun Ryos bantz tetz Moisés. Tan paj yi xoꞌwl yi at cuꞌnt cweꞌn tzun tewal Moisés yi wutz, na nin xobtz tan xmayeꞌn wutz Ryos. 7 Poro nintzun tal Ryos tetz:
—Ma jaluꞌ Moisés, na wil yi qꞌuixcꞌuj yi ateꞌ cuꞌnt yi eꞌ intanum yi ateꞌ Egipto jakꞌ caꞌwl yi faraón. Nchaꞌtz ja opon yi cyoꞌkl tzinwutz, na chin buchij nin quitaneꞌn cyakꞌun yi ajcaw yi na chicawun squibaj. 8 Chaꞌstzun te ja nuꞌl tan chicolpeꞌn chikꞌab yi eꞌ aj Egipto. Cheluꞌl tzun incyꞌal le jun amaꞌlaꞌtz. Nin chopon waꞌn le jun balaj amaꞌl kale atiteꞌt balaj cojbil, jun amaꞌl kale atit wiꞌnin lech tu caꞌbil wunak txuc. Yi jun amaꞌlaꞌtz iꞌtz kale najlcheꞌt yi eꞌ aj Canaán, eꞌ hitita, scyuchꞌ yi eꞌ amorreo, eꞌ ferezeo, eꞌ heveo nin eꞌ jebuseo. 9 Ma jaluꞌ bin Moisés, ja wit yi cyoꞌkl yi atanum, yi eꞌ xonl Israel. Nin ja wil yi chin qꞌuixcꞌuj nin quitaneꞌn cyakꞌun yi eꞌ aj Egipto. 10 Chaꞌstzun te na waj yi ẍcuꞌ tbeꞌ ninin jalcuꞌn, na na waj cẍben tan yol swutz yi faraón tan cyelseneꞌl tzaj yi intanum Israel yi ateꞌ Egipto, stzun Ryos tetz Moisés.
11 Nintzun tal Moisés tetz Ryos:
—Taꞌ, ¿mbi ekaꞌn waꞌn tan woqueꞌn tetz chibajxom yi eꞌ intanum, nin tan yol tetz faraón, tan cyelseneꞌl tzaj jakꞌ chicaꞌwl yi eꞌ aj Egipto? Na yi mero bintzi yi in wetz quil chinxcyeꞌ teꞌj.
12 Poro nin tal Ryos tetz:
—Moisés, chinxomok tzaweꞌj. Ej nin je jun techleꞌj yi in inchakon nin aẍ: Yil cheꞌl tzaj yi intanum awaꞌn, cxuꞌl wok icyakil cuꞌn tan incꞌuꞌlajeꞌn swutz yi wutzeꞌj, stzun Ryos bantz.
13 —Poro Taꞌ, kol chimben tan yol scyetz yi eꞌ bajxom tetz intanum, nin kol wal scyetz yi ja chinsaj chakij tan Kataj Ryos yi chiRyosil yi eꞌ kamam kateꞌ ej nin kol chijak swetz, yi mbiꞌ biꞌuꞌ, ¿mbi tzun wal nin wetz scyetz? stzun Moisés bantz.
14 —Ma jaluꞌ, I INAꞌTZ YI IN. Ej nin baꞌn tzawal scyetz: Yi Ryos yi na biꞌaj I INAꞌTZ, iꞌ nchinchakon tzaj.
15 Nchaꞌtz tal Ryos tetz Moisés:
—Baꞌn tzawal scyetz yi eꞌ atanum yi eꞌ xonl Israel: “Yi Kataj Jehová, yi chiRyosil yi eꞌ kamam kateꞌ, yi Abraham tu Isaac nin Jacow, iꞌ mmaꞌlon swetz tan wuleꞌn ẍchiwutzuꞌ,” cẍchij sban scyetz. Yaꞌstzun wetz imbiꞌ. Ej nin baꞌn xcon yi jun imbiꞌaꞌtz itaꞌn tan innaꞌwseꞌn tetz ben kꞌej ben sak.
16 ”Ma jaluꞌ Moisés quiloꞌk Egipto, nin molweꞌ yi eꞌ bajxom scyetz yi eꞌ xonl Israel. Ej nin alaj scyetz yi xtxolbileꞌj: ‘Yi Kataj Jehová yi chiRyosil yi eꞌ kamam kateꞌ, yi Abraham tu Isaac nin Jacow, ja ẍchaj tib tzinwutz nin ja tal iꞌ swetz: Ja wit, nin ja wil yi ẍeꞌn cunin itaneꞌn wok cyakꞌun yi eꞌ aj Egipto. 17 Chaꞌstzun te cxelpon wok liwr waꞌn tkꞌab yi qꞌuixcꞌuj, nin jakꞌ chicaꞌwl yi eꞌ aj Egipto. Ej nin nxben wok waꞌn le junt balaj amaꞌl yi at chikꞌab yi eꞌ cananeo scyuchꞌ eꞌ amorreo, eꞌ hitita, eꞌ ferezeo, eꞌ heveo tu eꞌ jebuseo. Iꞌtz jun balaj amaꞌl kale atit balaj cojbil,’ cẍchij sban scyetz. 18 Ej nin yil tzawal yi xtxolbileꞌj scyetz yi eꞌ bajxom tetz Israel, scyocsajeꞌ yi xtxolbilaꞌseꞌj yi ja wiꞌt wal tzatz. Ej nin yil cyocsaj ayol kalenaꞌtz tzun cxben wok tan yol swutz yi rey tetz Egipto. Yil cxopon wok baꞌn tzawal tetz: ‘Yi ketz kaRyosil yi oꞌ hebrey ja jilon sketz le amaꞌl tzꞌinunin tuꞌ. Chaꞌstzun te nink takꞌuꞌ amaꞌl sketz tan kabeneꞌn tan toyeꞌn katxꞌixwatz swutz iꞌ. Nink takꞌuꞌ amaꞌl sketz tetz ox kꞌej, na yaꞌstzun yi tkanil yi kabeꞌ,’ cẍchij sban tetz yi rey. 19 Poro na el intxum tetz yi quil takꞌ yi rey amaꞌl tzitetz tan iteleꞌn tzaj Egipto. Ntin kol tzimban puers teꞌj. 20 Na je swulejeꞌj. Tzinchajeꞌ yi wetz imporer tetz yi rey. Ẍchiquimok wiꞌnin aj Egipto waꞌn. Nin tan yi cyakil yi mbi cuꞌn tzimbneꞌ scyeꞌj, kalenaꞌs tzun ltakꞌ amaꞌl tzitetz tan iteleꞌn tzaj. 21 Nkꞌeꞌtz ntinaꞌtz ma na nchaꞌtz swakꞌeꞌ yi imbanl tzitetz tan jaleꞌn ibalajil ẍchiwutz yi eꞌ aj Egipto. Na yil cxeꞌl wok tzaj, quil cxeꞌl tzaj tuꞌ, ma na tzꞌeluꞌl itcyꞌal wiꞌnin eꞌchk takleꞌn chikꞌab yi eꞌ aj Egipto. 22 Na cyakil yi ixnaꞌnil ẍchijakeꞌ eꞌchk takleꞌn scyetz chiwisin, nka scyetz alchok xnaꞌnil aj Egipto. Ẍchijakeꞌ balaj oro tu sakal, nchaꞌtz ẍchijakeꞌ balaj beꞌch cyetz scyetz tan jaleꞌn chimeꞌbiꞌl. Tzꞌelepon tzun itcyꞌal cyakil chimeꞌbiꞌl yi eꞌ aj Egipto,” stzun Ryos bantz tetz Moisés.