Yi titzꞌeꞌn Moisés
2
1 Itzun bantz, cyokꞌbel tzun quib jun yaj tu jun xnaꞌn. Eꞌ cuꞌn xonl Leví.a 2 Yi cyokꞌbel quib nintzun oc lacꞌpuj jun niꞌ te yi xnaꞌn. Yi tuleꞌn yos tuchꞌ, xicy tzun ban yi niꞌ. Yi tilol yi xnaꞌn yi chin yubeꞌn nin yi niꞌ nintzun octz tan teweꞌn tetz ox xaw. 3 Poro quinin xcyeꞌ tan teweꞌn mas tiemp. Yi jeꞌmponeꞌn yi ox xawaꞌtz, nintzun oct junt tir tan joyleꞌn puntil tan claxeꞌn yi niꞌ. Joyol tzun iꞌ puntil tan teweꞌn junt tir. Toqueꞌn tzuntz tan banleꞌn jun moꞌtx, nin baj nojsal xeꞌak yi moꞌtxaꞌtz tan wix tu ẍpupuꞌ tan qui tocomponeꞌn aꞌ tcꞌuꞌl. Yi wiꞌt bnixeꞌn nintzun cuꞌ coybal yi niꞌ tul. Ej nintzun bentz tan takꞌleꞌn xoꞌl aj stziꞌ yi tzanlaꞌ Nilo. 4 Nchaꞌtz ben ẍchakol jun tanub yi niꞌ tan xkꞌukeꞌn, nin tan qꞌuicyꞌleꞌn.5 Itzun bantz nintzun ben yi meꞌl yi faraón tan jichiꞌn stziꞌ yi jun tzanlaꞌaꞌtz. Yi chicweꞌn poneꞌn stziꞌ yi aꞌaꞌtz nintzun ben tilol jun moꞌtx yi at xoꞌl aj stziꞌ aꞌ. Yi beneꞌn tilol nintzun ben ẍchakol jun scyeri yi eꞌ mos yi xomcheꞌtz teꞌj tan ticyꞌleꞌn tzaj yi jun moꞌtxaꞌtz. 6 Yi tuleꞌn swutz, nintzun tbit yi na okꞌ jun tal niꞌ tcꞌuꞌl. Lajkeꞌl nintzun beneꞌntz tan jakleꞌn yi moꞌtx. Ma yi cweꞌn tilol nintzun okꞌ cuꞌn cꞌuꞌltz teꞌj. Itzun taltz:
—¡Ah! yi jun tal niꞌeꞌj iꞌtz tal jun hebrey, stzun iꞌ bantz.
7 Yi tilol yi stzicy yi niꞌ yi nsken opon ticyꞌleꞌn yi titzꞌun tkꞌab yi meꞌl faraón, lajkeꞌl nin tzun beneꞌntz tan yol tetz. Itzun taltz:
—Iluꞌ jun cꞌoloj meꞌl rey, ¿qui peꞌ na tajuꞌ yil chimben tan joyleꞌn jun xnaꞌn yi at taꞌal tim tan tkꞌol tetz yi niꞌ nin tan ẍchꞌuyseꞌn? stzun iꞌ bantz.
8 —Baꞌn, baꞌn cẍben tan joyleꞌn, stzun meꞌl faraón bantz.
Lajkeꞌl nintzun beneꞌn yi xun tan ẍchakleꞌn yi xtxuꞌ yi niꞌ. 9 Yi toponeꞌn yi xtxuꞌ, nintzun tal yi meꞌl faraón tetz:
—Cyꞌaj nin yi niꞌeꞌj. Nin chꞌuysaj, list wutaneꞌn tan ẍchojleꞌn atiemp, stzun iꞌ bantz.
Beneꞌn tzun tcyꞌal yi xnaꞌn yi tetz tal nintzun octz tan qꞌuicyꞌleꞌn. 10 Yi ẍchꞌuyeꞌn yi niꞌ nintzun ben yi xnaꞌn tan takꞌleꞌn tetz meꞌl faraón. Nintzun oc yi niꞌaꞌtz chi kꞌajbil tal meꞌl faraón. Ej nin oc tkꞌol yi meꞌl faraón yi biꞌ yi niꞌ tetz Moisés, na nin tal: “Choꞌn jeꞌn tzaj waꞌn stziꞌ aꞌ.”
Yi teleꞌn ojk Moisés Egipto
11 Itzun bantz yi yajineꞌn Moisés, nintzun bentz tan xoꞌn ẍchixoꞌl yi tetz tanum yi eꞌ xonl Israel yi ateꞌ tan akꞌun wi cojbil. Yi toponeꞌn nintzun okꞌ cꞌuꞌltz scyeꞌj. Na chin qꞌuixbel nin quitaneꞌn tan akꞌun. Nchaꞌtz til yi at jun aj Egipto yi na tzan tan biyleꞌn jun scyeri xonl iꞌ, jun hebrey binaꞌtz. 12 Yi beneꞌn tilol nintzun bentz tan colcheꞌn. Yi toponeꞌn nin baj xmayil xlaj yi ko cyaꞌl attz nakaꞌj. Ma yi tilol yi cyaꞌl at nintzun bentz tan biyleꞌn cuꞌn yi jun aj Egipto. Yi cweꞌn biyol, taꞌsteꞌn nin tzun cweꞌt mukul tul samlicyꞌ. 13 Ej itzun le junt ekloktz nin el junt tir tan xoꞌn. Nin te yi na xon nin ben tilol cob hebrey yi na chibiy quib squibil quib. Yi tilol yi xtxolbileꞌj nintzun ben jakol tetz yi jun yi na tzan tan biyleꞌn yi tuchꞌ. Itzun taltz:
—¿Nxac na cẍtzan tan biyleꞌn awuchꞌ? na itanum itib, stzun iꞌ bantz.
14 Sajeꞌn tzun stzaꞌwel yi jun hebreyaꞌtz:
—Ma atz ¿naꞌ ncẍoꞌcsan tetz ajcaw skaxoꞌl? ¿Na peꞌ cẍtzan tan xtxumleꞌn tan imbiyleꞌn cuꞌn chi aban te yi aj Egipto ewt?
Itzun yi tbital Moisés yi xtxolbileꞌj nintzun saj jun chin xoꞌw teꞌj, na nin el xtxum tetz yi nsken quibit wunak yi nsken quim jun aj Egipto taꞌn.
15 Ma yi tbital faraón yi nsken wiꞌt quim jun aj Egipto tan Moisés, nintzun el jun ort taꞌn tan stzꞌamleꞌn nin tan cweꞌn kloꞌ biyij. Poro nintzun tbit Moisés yi na tzan joyleꞌn iꞌ. Lajkeꞌl nintzun teleꞌn ojktz. Choꞌn tzun toponeꞌntz le amaꞌl yi na biꞌaj Madián. Yi toponeꞌn Madián nin cꞌoleꞌ cuꞌntz nakajil jun julil aꞌ.
16 Ej nin te yi cꞌolchij Moisés nakaꞌjil yi jun julil aꞌaꞌtz nintzun eꞌ opon yi juk meꞌl Reuel tan jeꞌseꞌn tzaj aꞌ tetz quicꞌaꞌ yi cyawun. Yi jun Reuelaꞌtz iꞌ yi paleꞌb tetz Madián. 17 Poro te yi ateꞌ yi eꞌ xunaꞌtz te yi jun julil aꞌaꞌtz nin eꞌ baj opon coboxt pstor tan takꞌleꞌn quicꞌaꞌ yi cyetz cyawun. Yi cyoponeꞌn nin eꞌ octz tan chilajeꞌn len kloꞌ yi juk xunaꞌtz. Poro yi tilol Moisés nintzun octz tan chicolcheꞌn. Nchaꞌtz oc iꞌ tan jeꞌseꞌn tzaj aꞌ tetz quicꞌaꞌ eꞌ tal cyawun. 18 Yi chipakxeꞌn yi eꞌ xunaꞌtz xe chinajbil nin el yab yi chitajtz scyeꞌj, na or cyoponeꞌn. Nintzun tal scyetz:
—¿Mbi tzuntz jalcunin nxpakxij wok? stzun iꞌ bantz.
19 Beneꞌn tzun cyalol tetz chitaj yi mbi bajij scyeꞌj. Itzun cyaltz:
—Taꞌ, at jun aj Egipto mmoꞌc tan kacolcheꞌn ẍchikꞌab yi eꞌ mas pstor. Ej nin ja jeꞌ tzaj tcyꞌal iꞌ aꞌ tetz quicꞌaꞌ yi kawun, cheꞌch tzun bantz.
20 —¿Naꞌt tzun atit yi jun yajaꞌtz? ¿Mbi tzuntz ncyaj cyen itilol wok? ¡Or tzibeneꞌn lajkeꞌl tan joyleꞌn iꞌ nin chakwok tzaj tan waneꞌn skuchꞌ! stzun Reuel bantz.
21 Yaꞌstzun bantz yi toponeꞌn Moisés tan najeweꞌn xe caꞌl Reuel. Ej nin yi xoneꞌn tiemp ja takꞌ Reuel yi jun meꞌl yi na biꞌaj Séfora tetz txkel iꞌ. 22 Yi cyokꞌbel quib Séfora tu Moisés nin jal jun chinitxaꞌ. Gersónc tzun ban biꞌtz tan Moisés na nin taltz: “In jun awer nak tul jun amaꞌleꞌj yi qui wajskeꞌn.”
23 Itzun bantz yi xoneꞌn yi tiemp nin quim yi rey tetz Egipto. Poro yi eꞌ xonl Israel iẍnin buchij cheꞌ cyakꞌun yi eꞌ aj Egipto. Poro tbit Ryos yi chitziꞌ chikul, na chin qꞌuixcꞌuj nin ateꞌ cuꞌnt. 24 Tbit tzun Ryos yi cyoꞌkl, nin ul txꞌakx tcꞌuꞌl yi trat yi bnixnak ẍchixoꞌl tu Abraham, Isaac nin Jacow. 25 Ja cheꞌ til Ryos yi ẍeꞌn quitaneꞌn, nin ja el toꞌkl cꞌuꞌl scyeꞌj.