ÉXODO
Yi cyaꞌteꞌn yi eꞌ xonl Israel le amaꞌl Egipto
1
1 Je chibiꞌ cyakil yi eꞌ xonl Israel tuml chinajal yi xomcheꞌ teꞌj Jacow yi cyoponeꞌn Egipto: 2 Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad tu Aser. 5 Oxcꞌal tu lajuj chixoneꞌn yi eꞌ xonl Jacow, tuml Ẍep yi ateꞌ nintz Egipto.6 Itzun bantz yi xoneꞌn tiemp eꞌ quimeꞌn tzun cyakil yi jun wek wunakaꞌtz tuml Ẍep tu cyakil yi eꞌ stzicy. 7 Pucꞌuneꞌn nin tzun eꞌ ban mas yi eꞌ xonl Israel na nin jal wiꞌnin chinitxajiltz. Nintzun eꞌ ben loꞌontz beneꞌn tziꞌn Egipto.
8 Ej itzun bantz yi xoneꞌn tiemp nintzun oc cyen junt rey tan chicaweꞌn yi eꞌ aj Egipto. Poro qui nin tajskej iꞌ wutz kꞌajtzun Ẍep, chaꞌstzun te talol iꞌ scyetz cyakil yi tanum yi xtxolbileꞌj: 9 “¡Bitwok tzaj, wiꞌnin ẍchꞌuyeꞌn yi cyajlal yi eꞌ xonl Israel! Ej nin at mas chichamil skawutz ketz. 10 Chaꞌstzun te tajweꞌn kajoyeꞌ puntil tan qui ẍchꞌuyeꞌn mas cyajlal, na kol koꞌc tan oyintziꞌ scyuchꞌ yi eꞌ kacontr quicunin batz xomok chiwiꞌ scyeꞌj nin chelepon ojk jakꞌ kacaꞌwl.”
11 Cyoqueꞌn tzun yi eꞌ aj Egipto tan chibuchleꞌn yi eꞌ xonl Israel, na nin eꞌ bixeꞌ cobox ajcaw squibaj tan cyakꞌol eꞌchk jilwutz akꞌun scyetz yi chin qꞌuixbel nin, chi taneꞌn jeꞌseꞌn yi cob tnum yi na biꞌaj Pitón tu Ramsés. Yi cob tnumaꞌtz xconak tan yi faraón tetz cuꞌlbil meꞌbiꞌl iꞌ. 12 Poro yi toqueꞌn chibuchleꞌn yi eꞌ xonl Israel mas tcunin tzun chipucꞌuneꞌn. Chaꞌstzun te wiꞌnin eꞌ xobeꞌn yi eꞌ aj Egipto scyetz.
13 Mas tcuꞌn tzun cyoqueꞌn tan chibuchleꞌn tan quiw akꞌun, 14 na nin eꞌ cawun tan cyoqueꞌn tan banleꞌn xkꞌol tetz xan, nin tan akꞌun wi cojbil. Chin buchij nin tzun eꞌ ban yi eꞌ xonl Israel tan cyakil yi akꞌun yi akꞌlij scyetz. 15 Ma yi rey nintzun eꞌ ẍchak yi Sifra tu Fúa yi cob xnaꞌn, yi eꞌ xeꞌiyum yi ateꞌ ẍchixoꞌl yi eꞌ hebrey. Itzun taltz scyetz:
16 —Yil cxben wok tan quiwleꞌn yi xnaꞌn yi na ul yos scyuchꞌ, ilwok yi eꞌ niꞌ yi na chitzꞌij. Ko eꞌ xicy, biywok cuꞌn, na qui na waj yil chitzꞌij. Poro ko eꞌ tal xun baꞌn tzitakꞌ wok amaꞌl tan quitzꞌeꞌn, stzun yi rey scyetz.
17 Poro quinin eꞌ xom yi eꞌ xeꞌiyum te yi tajtzaꞌkl yi rey, na nin cyek ẍchiꞌ Ryos. Chaꞌstzun te cyakꞌol amaꞌl tan quitzꞌeꞌn yi eꞌ niꞌ yi xicy. 18 Yi tbital yi rey yi yaꞌstzun na chiban yi eꞌ xnaꞌnaꞌtz, nintzun ben mantar tan chichakleꞌn. Yi cyoponeꞌn nintzun taltz:
—¿Mbi tzuntz yi mitakꞌwok amaꞌl scyetz yi eꞌ niꞌ xicy tan quitzꞌeꞌn?
19 —Yi mero bintzi taꞌ, iꞌtz, yi eꞌ xnaꞌn, yi oꞌ hebrey, apart eꞌ ẍchiwutz yi eꞌ aj Egipto, na yi cyetz chin chamnin eꞌ, na jalcuꞌn na ul yos scyuchꞌ. Chaꞌstzun te taxknin kopon ketz tan quiwleꞌn yi na ul yos scyuchꞌ, cheꞌch tzun yi eꞌ xeꞌiyum bantz tetz rey.
20-21 Tan yi xtxolbileꞌj chꞌuyeꞌn nin ban mas cyajlal yi eꞌ xonl Israel. Nin jal mas chichamil tan paj yi nim chixoneꞌn. Ma yi eꞌ xeꞌiyum, tantuꞌ yi ncyek ẍchiꞌ Ryos, ja takꞌ Ryos banl squibaj. Chaꞌstzun te ja jal wiꞌnin cyetz cyal tu cyetz chimamaj. 22 Poro yi rey nin el junt ley taꞌn ẍchiwiꞌ cyakil yi eꞌ tanum. Itzun taltz: “Na waj yil chiben joꞌliꞌn wi tzanlaꞌ cyakil yi eꞌ xicy yi na chitzꞌij ẍchixoꞌl yi eꞌ hebrey. Ma ko eꞌ xun, quil tzibiy wok cuꞌn,” stzun yi rey bantz.