Nasehat par hidop iko Tuhan pung mau
2:1-15
2
1 Mar ale Titus, ale musti kasi balajar ajarang yang batul. 2 Kasi nasehat bapa-bapa yang su jamang biar dong jaga diri, hidop batul biar samua orang bisa taru hormat par dong, deng pung pikirang tajang sampe tau bawa diri bae-bae. Dong jua musti parcaya Tuhan tarus, sayang orang laeng, deng tahang hati waktu susa deng sangsara.3 Bagitu lai deng parampuang-parampuang yang su jamang. Kasi nasehat dong biar dong hidop taru hormat par Tuhan, jang suka bicara yang tarbae-tarbae soal orang laeng, deng jang paminong, mar musti kasi balajar apapa yang bae. 4 Deng cara bagitu, dong bisa kasi nasehat parampuang-parampuang yang labe muda biar dong sayang dong pung laki deng anana, 5 bawa diri bae-bae, hidop seng biking dosa, kalesang ruma tangga, pung hati bae, deng dengar-dengarang dong pung laki. Kalo dong su hidop macang bagitu, orang laeng seng bisa carita yang tarbae-tarbae soal Allah pung ajarang.
6 Bagitu lai deng anana muda. Kasi nasehat dong biar dong bawa diri bae-bae. 7 Dalang samua hal, ale musti biking yang bae biar ale jadi conto par orang-orang. Waktu ale kasi balajar orang, ale musti kasi balajar dong bae-bae deng hati barsi, jua deng sunggu-sunggu. 8 Ale musti pake dasar yang batul waktu kasi balajar orang, biar dong seng bisa bilang apa yang ale ajar tu sala. La deng cara bagitu, dong yang malawang ale tu nanti jadi malu sandiri, tagal dong seng bisa bilang kalo katong ada pung apapa yang sala.
9 Titus e, ale jua musti kasi nasehat jongos-jongos biar dong salalu taru hormat par dong pung bos deng coba biking sanang dong pung bos pung hati. Dong seng bole malawang dong pung bos. 10 Dong jua seng bole pancuri dong pung bos pung apapa, mar musti salalu kasi unju kalo dong tu bae deng bisa dapa parcaya dari dong pung bos. Deng bagitu, dalang samua hal yang dong biking, orang-orang yang lia dong nanti taru hormat par ajarang soal Allah yang Kasi Salamat Katong Manusia.
11 Titus, kasi balajar samua yang beta su bilang ni, tagal Allah su kasi unju Antua pung hati bae par samua orang biar samua orang di dunya bisa salamat. 12 Antua pung hati bae yang biking sampe katong kasi tinggal katong pung kajahatang deng seng hidop iko dunya pung mau lai. Mala jamang sakarang ni, katong musti bawa diri bae-bae, iko Antua pung mau, deng biking Antua pung hati sanang. 13 Katong musti hidop bagitu waktu ada tunggu hari yang nanti biking katong pung hati paleng sanang, waktu Yesus Kristus bale kombali deng sinar paleng tarang manyala koliling Antua. Antua tu, Allah Yang Basar deng yang Kasi Salamat Katong Manusia. 14 Yesus su kasi Antua pung diri mati di kayo salib par kasi salamat katong dari sagala kajahatang. Antua mati la hapus katong pung dosa-dosa biar katong jadi Antua pung orang-orang yang suka biking apa yang bae.
15 Titus, kasi balajar samua ni par orang-orang. Pake Tuhan pung kuasa par kasi nasehat deng tagor orang-orang yang seng iko Tuhan pung ajarang. Jang kasi biar satu orang lai anggap enteng ale.