Paulus pung Surat par
Titus
Tabea
1:1-4
1
1 Par Titus.Tabea! Beta ni Paulus, Allah pung orang suru-suru deng Yesus Kristus pung utusang. Allah su suru beta par tolong orang-orang yang Antua su pili biar dong labe tamba parcaya Antua. Beta su kasi balajar dong deng ajarang-ajarang yang batul dari Allah biar dong hidop iko Antua pung mau. 2 Dong su tau deng parcaya ajarang-ajarang yang batul tu sampe dong bisa parcaya sunggu-sunggu kalo dong nanti hidop tarus-tarus deng Allah. Waktu dunya balong jadi, Allah su janji soal ini jadi Antua pasti biking akang. Antua seng parna parlente. 3 Allah yang Kasi Salamat Katong Manusia tu su parcaya beta par kasi tau Kabar Bae la suru beta par biking akang, biar pas waktu yang Antua su ator, orang-orang dengar Antua pung ajarang.
4 Titus e, beta su anggap ale macang beta pung ana sandiri, tagal ale iko beta par parcaya Yesus Kristus.
Beta minta biar Allah Bapa deng Yesus Kristus yang Kasi Salamat Katong Manusia, kasi berkat basar deng dame par ale.
Atorang-atorang par jadi penatua
1:5-16
5 Titus, dolo beta pi kasi tinggal ale di pulo Kreta biar ale bisa ator apa yang balong klar deng angka orang-orang par jadi penatua di samua kota iko atorang-atorang yang beta su bilang par ale. Atorang-atorang tu bagini: 6 Orang yang mau jadi penatua tu pung hidop musti batul, biar orang seng bisa bilang kalo dia ada biking apapa yang sala. Dia pung bini musti satu sa deng dia seng maeng serong. Dia pung anana musti parcaya Yesus deng dong musti hidop bae-bae biar orang-orang seng bisa bilang kalo dia pung anana tu hidop iko dong pung mau sandiri deng tar dengar-dengarang orang tatua. 7 Penatua tu orang yang kalesang Allah pung jamaat, jadi dia pung hidop musti batul biar orang seng bisa bilang kalo dia ada biking apapa yang sala. Jang pili orang yang sombong, suka bakalai, pamabo, pamara, deng yang parlente orang par dapa kepeng. 8 Mar pili orang yang suka tarima sapa sa manumpang di dia pung ruma, suka biking apa yang bae, bawa diri bae-bae, hidop batul deng orang laeng, pung hati barsi, deng jaga diri sampe seng biking dosa. 9 Dia musti sunggu-sunggu parcaya Tuhan pung ajarang yang batul yang katong su kasi balajar par dia. Dia musti parcaya ajarang tu sunggu-sunggu, biar dia bisa kasi nasehat par orang-orang iko ajarang yang batul tu, deng biar dia bisa kasi unju par orang-orang yang malawang ajarang tu kalo dong sala.
10 Beta bilang bagitu tagal orang banya su hidop malawang ajarang yang batul. Dong jaga parlente deng suka bicara apapa yang seng ada pung guna. Labe-labe lai orang-orang Yahudi yang parcaya Yesus yang pegang atorang sunat kuat-kuat. 11 Orang-orang macang bagitu, katong musti prop dong pung mulu. Barang, dong jaga kasi balajar orang-orang deng ajarang yang tar batul-batul sampe samua orang di banya ruma bale balakang dari Yesus. Dong biking bagitu tagal dong mau cari kepeng.
12 Dolo, orang Kreta tu pung juru bicara sandiri parna bilang kata, “Katong orang-orang Kreta ni tukang parlente, galojo, pamalas, deng liar macang deng anjing utang!” 13 Kata-kata tu memang batul. Jadi, ale musti tagor dong deng sunggu-sunggu biar dong tetap parcaya ajarang yang batul soal Yesus. 14 Tagor dong biar dong seng parcaya lai par orang Yahudi pung carita-carita dolo-dolo deng atorang-atorang dari orang-orang yang malawang ajarang yang batul tu. 15 Par orang-orang yang pung hati barsi, samua-samua tu barsi. Mar par orang-orang yang pung hati kotor deng seng parcaya Yesus, seng ada satu lai yang barsi tagal dong pung pikirang jahat paskali deng dong seng tau apa yang sala deng apa yang batul.a 16 Dong bilang kalo dong kanal Allah, mar dong pung kalakuang seng kasi unju kalo dong tu kanal Antua. Dong tar dengar-dengarang deng pung kalakuang biking Allah gali. Dong su seng bisa biking apapa yang bae lai.