Nasehat soal bagemana orang Kristen musti hidop
3:1-11
3
1 Titus e, kasi inga jamaat-jamaat tarus biar dong taru hormat deng dengar-dengarang pemerinta deng orang-orang yang pegang kuasa. Dong jua musti siap par biking apa sa yang bae. 2 Bilang dong jang biking busu orang pung nama deng jang baku bakalai. Labe bae dong salalu hidop manis-manis deng samua orang. 3 Barang dolo, waktu katong balong parcaya Yesus, katong jua seng mangarti Allah pung mau deng seng dengar-dengarang Antua. Katong dapa parlente, hidop iko katong pung mau sandiri, deng seng bisa barenti biking sagala macang kajahatang yang katong sanang biking. Katong jahat par orang-orang, jalus, deng baku binci. 4 Mar biar kata bagitu, Allah yang Kasi Salamat Katong tu kasi unju Antua pung hati bae deng rasa sayang par katong, 5 la Antua kasi salamat katong. Antua kasi salamat katong bukang tagal katong su biking apa yang batul, mar tagal Antua pung hati bae. Antua kasi salamat katong deng cara kasi barsi katong dari katong pung dosa-dosa samua deng jua roba katong pung hidop jadi baru lewat Antua pung Roh. 6 Allah kasi Antua pung Roh par katong biar Antua karja kuat-kuat dalang katong pung hidop, tagal apa yang Yesus Kristus, Orang yang Kasi Salamat Katong tu su biking. 7 Allah kasi Antua pung Roh biar deng Antua pung hati bae, Antua bilang kalo katong ni seng ada dosa. Jadi katong parcaya kalo katong ada hak par hidop tarus-tarus deng Antua. 8 Apa yang beta bilang ni batul, jadi ale bisa parcaya akang. Beta mau ale sunggu-sunggu kasi nasehat soal ini par orang-orang yang su parcaya Allah biar dong labe sunggu-sunggu lai par biking apa yang bae. Nasehat ni, akang bae deng barguna par samua orang.9 Mar Titus, jang pastiu deng orang-orang yang suka bicara apapa yang biking orang baku malawang. Jang pastiu jua deng orang-orang yang carita soal silsila dolo-dolo. Deng jua jang baku malawang deng orang-orang soal orang Yahudi pung atorang-atorang. Barang, samua tu seng barguna deng seng bawa untung. 10 Kalo ada orang yang kasi balajar ajarang yang seng batul par biking jamaat tapica, ale musti tagor dia satu dua kali. Mar kalo dia masi biking macang bagitu tarus, jang batamang deng dia lai. 11 Barang ale tau to, orang yang macang bagitu tu su malawang ajarang yang batul. Dia pung dosa-dosa kasi unju par orang laeng kalo dia tu memang jahat.a
Paulus tutu dia pung surat
3:12-15
12 Titus e, beta nanti suru Artemas ka Tikikus datang par ale. Pas satu dari dong dua datang, ale capat-capat iko beta di kota Nikopolis jua. Datang iko beta do tagal beta mau tinggal di kota tu sampe abis musing ujang. 13 Beta minta ale tolong Senas yang pintar hukum tu deng Apolos lai. Tolong kasi siap apa yang dong dua parlu waktu dong dua mau pi, biar dong dua seng kurang apapa. 14 Tarus, katong pung basudara yang parcaya Yesus di pulo Kreta musti karja karas par biking apa yang bae deng tolong orang yang batul-batul ada parlu. Kalo dong su biking macang bagitu, dong pung hidop tu seng parcuma.
15 Titus, samua basudara yang parcaya Yesus yang ada sama-sama deng beta di sini kiring hormat par ale. Beta minta ale tolong kiring katong pung hormat lai par basudara yang parcaya Yesus di situ yang sayang katong.
Beta minta biar Tuhan kasi berkat basar par kamong samua.
Hormat, Paulus