Orang-orang pung kalakuang waktu dunya mau kiamat
3:1-9
3
1 Timotius e, beta mau ale tau kalo waktu dunya mau kiamat nanti, itu jadi waktu yang paleng susa. 2 Barang, manusia nanti cuma pikir dong pung diri sandiri, mata kepeng, bicara mangarti, sombong, suka hojat orang, seng dengar-dengarang orang tatua, seng tau minta dangke, deng seng taru hormat par Allah lai. 3 Dong nanti seng sayang orang laeng, seng mau kasi ampong orang pung sala, suka bicara yang seng batul-batul soal orang laeng, seng bisa tahang diri, suka siksa orang laeng, deng binci samua yang bae. 4 Dong jua nanti tajang muka-balakang, paparipi biking apa yang bodo mar seng pikir apa yang nanti jadi, suka angka-angka diri, deng labe suka iko dia pung mau dari Allah pung mau. 5 Orang-orang lia dong tu rajing pi ibada, mar dong sandiri manyangkal Allah pung Roh pung kuasa yang bisa biking bae dong pung hidop. Orang-orang yang macang bagitu, jang batamang deng dong. 6 Barang dari dong ada yang maso ka orang-orang pung ruma deng akal busu. Dong pung mulu bakoco par buju parampuang-parampuang bodo yang su biking dosa paleng banya deng yang hidop iko sagala macang napsu, la kasi maso parampuang-parampuang tu dalang dong pung dodeso. 7 Parampuang-parampuang tu salalu minta sapa sa par kasi balajar dong, mar dong seng parna mangarti ajarang yang batul soal Yesus Kristus. 8 Orang-orang yang tipu parampuang-parampuang tu malawang ajarang yang batul soal Yesus Kristus, macang deng Yanes deng Yambresa malawang Musa dolo-dolo. Orang-orang yang malawang ajarang yang batul tu cuma pikir kajahatang deng seng parcaya apa yang batul, jadi Tuhan seng tarima dong. 9 Mar dong nanti seng bisa parlente orang deng dong pung ajarang tarus. Barang, samua orang nanti tau dong pung bodo, sama deng samua orang jua tau Yanes deng Yambres pung bodo.Paulus kasi nasehat Timotius par tetap parcaya Yesus deng pegang ajarang yang batul
3:10-17
10 Mar ale Timotius, ale su batul-batul tau deng iko beta pung ajarang, beta pung cara hidop, deng apa yang beta mau biking dalang hidop ni. Ale jua tau bagemana beta parcaya Tuhan, sabar deng samua orang, sayang orang-orang, deng tahang hati dalang susa deng sangsara. 11 Ale su tau kalo orang-orang siksa deng biking sangsara beta, apalai waktu beta dapa siksa banya paskali di kota Antiokia, Ikonium, deng Listra. Mar waktu itu beta tahang hati la Tuhan kasi salamat beta dari samua tu.*
12 Memang batul paskali kalo sapa sa yang mau hidop iko Allah pung mau deng parcaya Yesus Kristus, dong nanti dapa siksa. 13 Mar orang-orang jahat deng orang-orang tukang parlente nanti tamba kajahatang. Dong parlente orang, deng orang bale parlente dong lai. 14 Mar Timotius, ale musti tetap pegang ajarang yang katong su ajar par ale. Ale tau kalo akang batul. Jadi ale musti pegang akang tarus tagal ale kanal sapa yang ajar akang par ale, 15 deng tagal dari kacil lai ale su balajar Allah pung Tulisang. Dari Allah pung Tulisang tu, ale bisa mangarti kalo Allah kasi salamat ale tagal ale parcaya Yesus Kristus. 16 Samua yang ada dalang Allah pung Tulisang tu datang dari Allah sandiri. Akang pung guna par kasi balajar orang, tagor orang pung sala, roba kalakuang yang seng bae, deng ajar orang par hidop iko Tuhan pung mau. 17 Jadi, Allah pung Tulisang tu, akang pung guna biar orang-orang yang karja par Allah batul-batul siap par biking samua yang bae.