Orang-orang yang parcaya Yesus Kristus musti tarima susa deng sangsara
2:1-13
2
1 Timotius yang beta sayang macang deng beta pung ana sandiri e! Yesus Kristus su kasi berkat basar par katong biar katong kuat, jadi ale musti kuat. 2 Beta parna bilang ajarang soal Yesus par ale la orang banya su jadi saksi par akang. Ajarang tu, ale musti kasi balajar akang par orang-orang yang ale parcaya. Dong tu musti pintar kasi balajar orang laeng. 3-4 Ale musti tarima susa deng sangsara sama-sama deng katong tagal ale karja par Yesus Kristus deng bae. Ale macang deng tantara satu yang biking dia pung tugas deng batul. Dia tarima susa deng sangsara. Dia seng pastiu deng dia pung urusang hari-hari, tagal dia cuma mau biking sanang komandan pung hati sa. 5 Conto laeng, orang yang iko lomba lari. Dia seng bisa dapa juara kalo dia seng iko akang pung atorang-atorang to? 6 Conto satu lai, orang yang bakabong. Dia yang musti rasa akang pung hasil kamuka tagal dia yang banting tulang urus dia pung kabong. 7 Pikir bae-bae samua yang beta ada bilang ni. Tuhan nanti tolong ale par mangarti akang.8 Timotius, ale musti inga tarus soal Yesus Kristus, Raja Daud pung turunang. Antua mati, mar Allah kasi hidop Antua kombali. Ini ni Kabar Bae yang beta kasi tau par orang-orang. 9 Tagal Kabar Bae tu sampe beta susa deng sangsara, mala dapa rante macang deng orang jahat satu. Mar orang-orang seng bisa rante Allah pung Kabar Bae tu, tagal nanti ada orang laeng yang pi kasi tau akang di sagala tampa. 10 Jadi, beta tahang hati waktu susa deng sangsara biar orang-orang yang Allah su pili bisa parcaya Yesus Kristus la Antua kasi salamat dong. La dong nanti dapa hormat deng hidop tarus-tarus deng Antua di sorga.
11 Timotius, kata-kata yang beta mau bilang ni batul, jadi ale bisa parcaya akang.
“Kalo katong mati sama-sama deng Kristus,
katong jua nanti hidop sama-sama deng Antua.
12 Kalo katong tahang hati deng parcaya Antua tarus,
katong jua nanti parenta dunya ni sama-sama deng Antua.
Mar kalo katong manyangkal Antua,*
Antua jua nanti manyangkal katong.
13 Biar kata katong seng biking samua yang Antua su bilang par katong musti biking,
Antua tetap biking samua yang Antua su bilang Antua mau biking.
Antua pasti biking samua yang Antua su janji, tagal Antua seng bisa manyangkal Antua pung diri.”
Nasehat biar jang iko ajarang-ajarang yang seng batul
2:14-26
14 Timotius e, ale musti kasi inga orang-orang parcaya tarus soal hal-hal yang beta baru bilang tu. Kasi nasehat dong bagini, “Ingatang! Allah tau soal samua yang kamong biking. Jadi, kamong jang baku malawang soal kata-kata pung arti. Barang, akang seng ada pung guna. Mala akang cuma biking orang-orang yang dengar tu seng parcaya Yesus lai.” 15 Karja sunggu-sunggu biar Allah bisa bilang kalo ale tu pantas karja par Antua. Ale musti jadi orang karja yang bae biar ale seng malu deng apa yang ale su biking tu. Ale musti bilang apa yang batul kalo kasi balajar ajarang-ajarang yang batul dari Allah.
16 Jang pastiu deng orang-orang yang bicara apapa yang seng ada pung guna deng yang biking orang seng hidop taru hormat par Allah. Barang, samua tu nanti biking dong labe tamba jahat. 17 Dong pung ajarang-ajarang yang seng batul tu nanti orang carita akang tarus, sampe akang biking ancor orang yang nanti dengar tu pung parcaya. Akang macang deng luka yang busu yang palang-palang makang kasi ancor orang pung badang. Dua orang dari orang-orang yang macang bagitu tu Himeneus deng Filetus. 18 Dong dua ni su seng iko Allah pung ajarang yang batul lai. Dong kasi balajar orang-orang kalo Allah su kasi hidop kombali samua orang. Tagal ajarang tu sampe ada orang parcaya yang su seng parcaya ajarang yang batul soal Yesus Kristus lai. 19 Mar Allah pung orang-orang, dong parcaya Antua tarus. Dong pung parcaya tu seng tagoyang sadiki lai macang deng pandasi ruma yang kuat. Di atas pandasi tu ada tulisang bagini, “Tuhan kanal Antua pung orang-orang.” Ada tulisang bagini lai, “Sapa sa yang bilang kalo dia tu Tuhan pung orang, dia musti kasi tinggal dia pung kajahatang samua.”
20 Timotius, dalang ruma yang basar bukang cuma ada barang-barang dari mas deng perak sa. Ada lai dari kayo deng tana liat. Barang-barang dari mas deng perak tu, orang-orang pake akang waktu acara-acara panting. Mar barang-barang dari kayo deng tana liat tu, orang-orang pake akang sabang hari. 21 Sapa yang batul-batul kasi tinggal dia pung kajahatang, Tuhan nanti pake dia par biking tugas yang kusus, sama deng barang-barang yang mahal yang dapa pake waktu acara-acara panting. Tuhan su pili dia par jadi Antua pung orang biar dia barguna par karja par Antua deng siap par biking apa sa yang bae.
22 Timotius, jaga diri bae-bae dari anana muda pung sagala macang napsu jahat. Usaha par hidop batul di muka Allah, parcaya Yesus tarus, baku sayang deng orang laeng, deng hidop dame deng orang laeng. Ale deng samua orang yang sombayang par Tuhan deng hati barsi musti hidop macang bagitu. 23 Jang pastiu deng orang-orang yang baku malawang soal ajarang-ajarang yang bodo-bodo deng yang seng maso-maso akal. Ale su tau to, kalo samua tu cuma biking orang bakalai. 24 Orang yang karja par Tuhan seng bole bakalai mar musti hidop manis-manis deng samua orang. Dia jua musti sabar deng pintar kasi balajar orang. 25 Dia musti ajar orang-orang yang suka malawang dia deng bae-bae. Sapa tau, Allah nanti roba dong sampe dong kasi tinggal dong pung dosa-dosa la iko ajarang yang batul soal Yesus Kristus. 26 Deng cara bagini, sapa tau dong nanti sadar la bisa talapas dari Setang pung Raja, macang deng binatang yang talapas dari dodeso. La Setang pung Raja tu seng bisa parenta dong par iko dia pung mau lai.