Paulus pung Surat Kadua par
Timotius
Tabea
1:1-2
1
1-2 Par Timotius, orang yang beta sayang macang deng beta pung ana sandiri.*Tabea! Beta ni Paulus, Yesus Kristus pung utusang yang Allah su pili. Allah pili beta par pi kasi tau soal Antua pung janji par orang-orang kalo dong nanti bisa hidop tarus-tarus deng Antua asal dong parcaya Yesus Kristus.
Beta minta biar Allah Bapa deng Yesus Kristus, Tuhan yang katong somba tu, kasi unju Antua pung hati bae deng kasi berkat basar deng dame par ale.
Paulus minta Timotius labe samangat kasi tau Kabar Bae soal Yesus
1:3-18
3 Timotius e, beta minta dangke banya dari Allah yang su angka beta karja par Antua, macang deng beta pung tete-nene moyang karja par Antua. Beta karja par Antua deng hati yang batul-batul barsi. Siang-malang beta inga ale tarus dalang sombayang la minta dangke dari Allah tagal ale su parcaya Antua. 4 Beta inga bagemana ale manangis waktu katong mau bapisa. Jadi, beta mau paskali par baku dapa deng ale biar beta pung hati paleng sanang. 5 Beta jua inga kalo ale sunggu-sunggu parcaya Yesus Kristus macang deng ale pung nene Lois deng ale pung mama Eunike, yang su parcaya Yesus Kristus kamuka ale. Beta seng ragu sadiki lai kalo ale sunggu-sunggu parcaya Yesus Kristus sama deng dong. 6 Tagal itu, beta mau kasi inga ale kalo ale musti labe samangat lai par pake kuasa yang Allah su kasi par ale tu. Ale su tarima kuasa tu waktu beta taru beta pung tangang di atas ale. 7 Barang, Allah kasi Antua pung Roh par katong orang parcaya, bukang par biking katong panaku, mar par biking katong kuat, baku sayang, deng tau bawa diri bae-bae.
8 Jadi, jang malu par kasi tau soal Yesus Kristus, Tuhan yang katong somba tu. Jang malu lai deng beta yang maso bui tagal karja par Antua. Mar deng kuasa yang Allah su kasi par ale, mari tanggong sangsara sama-sama deng beta tagal katong kasi tau Antua pung Kabar Bae. 9 Antua su kasi salamat katong deng panggel katong par jadi Antua pung orang-orang yang seng bardosa. Antua biking bagitu bukang tagal katong su biking apapa yang bae, mar tagal Antua su ator akang deng tagal Antua pung hati bae par katong. Tagal Antua pung hati bae, dari waktu Antua balong biking dunya lai, Antua su ator par utus Yesus Kristus. 10 La sakarang ni, Antua su kasi unju Antua pung hati bae par katong waktu Yesus Kristus, Orang yang Kasi Salamat Katong Manusia tu, datang ka dunya. Yesus Kristus mati la hidop kombali biar katong seng mati tarus.a Dalang Antua pung Kabar Bae, Antua kasi unju par katong bagemana katong bisa hidop tarus-tarus deng Allah. 11 La biar orang-orang bisa dengar Kabar Bae tu, Allah angka beta par jadi Antua pung utusang, par kasi tau deng kasi balajar akang.* 12 La tagal itu sampe beta susa deng sangsara dalang bui. Beta susa deng sangsara mar beta seng malu, tagal beta kanal batul sapa tu Kristus yang beta parcaya. Beta jua seng malu tagal beta batul-batul parcaya kalo Antua bisa jaga beta pung karja yang Antua su parcaya beta par biking akang. Antua pasti jaga akang sampe Antua bale kombali ka dunya ni par putus manusia pung parkara.
13 Timotius e, ale musti tarus kasi balajar ajarang yang batul yang beta su bilang par ale tu. La waktu biking bagitu, ale musti parcaya Yesus Kristus tarus deng sayang orang laeng tagal ale su jadi satu deng Antua. 14 Jaga Allah pung Kabar Bae yang Antua su kasi par ale tu bae-bae. Antua pung Roh yang tinggal di dalang katong nanti bantu ale par jaga akang.
15 Timotius, ale su tau kalo samua orang yang parcaya Yesus di propinsi Asiab su pi kasi tinggal beta. Figelus deng Hermogenes jua su pi kasi tinggal beta lai. 16 Beta minta biar Tuhan kasi unju Antua pung hati bae par Onesiforus deng dia pung kaluarga, tagal dia kasi samangat beta tarus. Dia jua seng malu par mangente beta di bui. 17 Mala waktu dia sampe di kota Roma, dia cari beta tarus sampe baku dapa deng beta. 18 Ale jua su tau to, kalo waktu beta ada di kota Efesus, dia tu yang paleng banya tolong beta. Beta minta biar Tuhan kasi unju Antua pung hati bae par dia waktu Antua mau putus samua orang di dunya ni pung parkara.